ပို့ကုန်ဝယ်လိုအား ပြန်လည်မြင့်တက်လာတဲ့အတွက် မလေးရှားစားအုန်းဆီ ဈေးက ဇူလိုင် ၃၁ ရက်က ပြန်လည် မြင့်တက်လာကြောင်းနဲ့ ကမ္ဘာ့ဆီထွက်သီးနှံ ရောင်းလိုအား မြင့်တက်မဲ့ အလားအလာကြောင့် ဈေးနှုန်းများကို အထိန်းအကွပ် ဖြစ်စေခဲ့ကြောင်း၊ ဘိဇနက်ရီကော်ဒါ သတင်းမှာ ဖော်ပြထားပါတယ်။
မလေးရှားစားအုန်းဆီတင်ပို့မှုက ဇွန်မှာ တန်ချိန် ၁၃ ဒသမ ၅သိန်းရှိရာမှ ဇူလိုင်မှာ တန်ချိန် ၁၄ သိန်းထိ ရောက်ရှိကာ ၄ ဒသမ ၂ ရာခိုင်နှုန်းမြင့်တက်ခဲ့ ပါကြောင်း၊ ကုန်စည် စစ်တမ်းကောက်ယူရေး အေဂျင်စီ Intertek Testing Services က ပြောပါတယ်။ ဇူလိုင် ၁ ရက်မှ ၁၅ ရက်အတွင်း စားအုန်းဆီတင်ပို့မှု ၂၄ ရာခိုင်နှုန်း ကျဆင်း နေရာမှ ပို့ကုန်အလား အလာ ပြောင်းလဲလာတဲ့အတွက် အမေရိကန်ပြည်ထောင်စု အနောက်ဘက် အလယ်ပိုင်းဒေသမှာ ပဲပုပ်အထွက်ကောင်း တဲ့အတွက် လစဉ် ၄ ဒသမ ၅ ရာခိုင်နှုန်း ကျဆင်းမယ်လို့ ခန့်မှန်းထားတဲ့ စားအုန်းဆီဈေးတွေ ပြန်လည်မြင့်တက်လာစေခဲ့တယ်လို့ ကွာလာလမ်ပူက ကုန်သည်တစ်ဦးက ပြော ပါတယ်။ Bursa Malaysia ကုန်စည်ဒိုင်မှာ ဈေးပိတ်ချိန်က အောက်တိုဘာအတွက် အခြေခံဈေးနှုန်းက ၁ ရာခိုင်နှုန်း မြင့်တက်ပြီး တစ်တန်ကို ၂၂၃၈ ရင်းဂစ်(၆၉၀ ဒေါ်လာ) နှုန်းရှိခဲ့ပါတယ်။ စောစောပိုင်းဈေးနှုန်းမှာ တစ်တန်ကို ၂၂၄၅ ရင်းဂစ် ထိမြင့်တက်ပြီး၊ ဇူလိုင် ၂၄ ရက် နောက်ပိုင်း အမြင့်ဆုံးဖြစ်ခဲ့ပါတယ်။ စုစုပေါင်း ရောင်းချတဲ့ ပမာဏ ၂၅ တန်ပါအတွဲ ၃၀၃၂ ဒသမ ၃ တွဲရှိခဲ့ပါတယ်။ ရင်းဂစ်တန်ဖိုးကျဆင်းမှုကို အကြောင်းပြုပြီး၊ ရင်းဂစ်နဲ့ တန်ဖိုးသတ်မှတ်တဲ့ ဈေးနှုန်းဟာ ပင်လယ်ရပ်ခြား ဝယ်လက်နဲ့ သန့်စင်ရေးစက်ရုံများအတွက် ဈေးနှုန်း ချိုသာမှုရှိစေခဲ့ပါတယ်။ ဟင်းရွက်ဆီဈေးကွက်မှာ ဒီဇင်ဘာ အတွက်အမေရိကန် ပဲပုပ်ဆီမှာ သုည ဒသမ ၈ ရာခိုင်နှုန်းမြင့်တက်ခဲ့ပြီး၊ ဇန်နဝါရီလအတွက် ပဲပုပ်ဆီ ဈေးမှာ တရုတ်ဒါလီယံကုန်စည်ဒိုင်မှာ ၁ ဒသမ ၂ ရာခိုင်နှုန်း မြင့်တက်ခဲ့ပါတယ်။ UNT