ကျွန်တော်တို့နိုင်ငံဟာ စိုက်ပျိုးရေးကို အခြေခံသော စီးပွားရေးကိုဆောင်ရွက်နေတဲ့ နိုင်ငံဖြစ်ပါတယ်။ အထူးသဖြင့် ဆန်စပါးတင်ပို့မှုကို ပြန်လည်ဆန်းစစ်လျှင် စစ်ကြိုခေတ်ကာလက ဆန်တန်ချိန် ၃ သန်းအထိတင်ပို့နိုင်ခဲ့ကြောင်းနဲ့ ကမ္ဘာပေါ်တွင် ဆန်အများဆုံးတင်ပို့နိုင်သော နိုင်ငံတစ်ခုအဖြစ် ရပ်တည်ခဲ့ကြောင်း သိရှိရပါတယ်။ ယခုအခါမှာ အရှေ့တောင်အာရှနိုင်ငံများအနက် ထိုင်းနိုင်ငံ၊ ဗီယက်နမ် နိုင်ငံတို့နဲ့ယှဉ်ပြိုင်တင်ပို့နေရပြီး ဆန်တင်ပို့နိုင်မှုမှာလည်း ၎င်းင်းနိုင်ငံများကို မမီနိုင်သေးကြောင်း တွေ့ရှိရပါတယ်။ အလားတူ ဆန်ဈေးနှုန်းမှာလည်း ထိုင်းနဲ့ ဗီယက်နမ်က ပိုမိုရရှိနေတာကို တွေ့ရှိရပါတယ်။ ၂၀၀၃ ခုနှစ်မှစပြီး ဆန်စပါးမူဝါဒသစ်နဲ့ ဆောင်ရွက်လျက်ရှိရာ အများဆုံး ဆန်တန်ချိန် ၅ သိန်းမှ ၇ သိန်းသာ တင်ပို့နိုင်ခဲ့ပါတယ်။ ယခုလက်ရှိ ကြိတ်ခွဲနေတဲ့ ဆန်အမျိုးအစားနဲ့ စပါးသုံးစွဲမှု မှာ ဆန်တစ်တန်ရရှိရန် စပါးတင်း ၁၀၀ သုံးစွဲရတယ်လို့ ယျေဘုယျသတ်မှတ်နိုင်ပါတယ်။ ဒါကြောင့် စပါးတင်းပေါင်း သိန်း ၇၀၀ ခန့် သုံးစွဲလျက်ရှိပါတယ်။ ပေါင်းဆန်ကို စစ်ကြိုခေတ်ကတည်းက အိန္ဒိယမှနည်းပညာယူပြီး ဟင်္သာတမြို့မှစပြီး ကြိတ်ခွဲထုတ် လုပ်ခဲ့ရာ မြန်မာပြည်အနှံ့အပြား အတွေ့အကြုံများလည်းရရှိပြီးဖြစ်ပါတယ်။ ကျွန်တော်လည်း ဟင်္သာတ ခရိုင်မှာ တာဝန်ကျစဉ်က ဟင်္သာတမြို့နယ်နဲ့ အင်္ဂပူမြို့နယ်များတွင် လိုအပ်ချက်အရ ပြည်ပတင်ပို့ရန် အနံ့မဲ့ပေါင်းဆန်များ ကြိတ်ခွဲထုတ်လုပ်ခဲ့ဖူးပါတယ်။ အနံ့မဲ့ပေါင်းဆန်ကြိတ်ခွဲရန် ဝယ်ယူရရှိတဲ့ စပါးများ ထဲမှ ဆန်ဖြူကြိတ်ခွဲလျှင် ဆန်ထွက်အောက်တန်းနည်းနိုင်သော ရွှေတဆုပ်၊ ဝတီထွန်း အစရှိတဲ့ စပါး များကို အနံ့မဲ့ပေါင်းဆန်အဖြစ် ကြိတ်ခွဲခဲ့ပါတယ်။ ဆန်ဖြူကြိတ်ခွဲလျှင် ဆန်ထွက်အောက်တန်း တင်း ၃၀ မကျော်သော စပါးများကို အနံ့မဲ့ပေါင်းဆန် အဖြစ် ကြိတ်ခွဲသောအခါ စပါးတင်း ၁၀၀ လျှင် ဆန်ထွက်အောက်တန်း ၄၂ တင်းမှ ၄၅ တင်းအထိရရှိ ပါတယ်။ ဒါကြောင့် ဆန်တစ်တန်ရရှိရန် သုံးစွဲမှုမှာမှာ စပါးတင်း ၇၀ ထက်မကျော်ကြောင်း တွေ့ရှိရပါ တယ်။ ဒါကြောင့် အထက်ဖော်ပြခဲ့တဲ့ စပါးတင်းသိန်း ၇၀၀ ကို အနံ့မဲ့ပေါင်းဆန်အဖြစ် ပြောင်းလဲကြိတ်ခွဲလျှင် ဆန်တန်ချိန် ၁၀ သိန်း(တစ်သန်း)ရရှိမှာဖြစ်ပါတယ်။ ပေါင်းဆန်ဈေးဟာလည်း ဆန်ဖြူဈေးထက် တစ်တန်ကို ဒေါ်လာ ၅၀ မှ ၇၅ ခန့် ပိုမိုရရှိမှာဖြစ်ပါတယ်။ ဒါ့အပြင် ယခင်က တန် ၇ သိန်းမှ ယခု တန်တစ်သန်း တင်ပို့နိုင်သဖြင့် တန် ၃ သိန်းအတွက် ဝင်ငွေပိုရရှိမှာဖြစ်ပါတယ်။ ဒါကြောင့် ရှေ့ဘိုးဘွားတွေလမ်းပြခဲ့တဲ့ ပေါင်းဆန်နဲ့ ကမ္ဘာ့ဆန်ဈေးကွက်ကို နေရာယူသကဲ့သို့ ကျွန်တော်တို့လည်း ပေါင်းဆန်ထုတ်လုပ်မှုကို ပြန်လည် ဆန်းသစ်တီထွင်ပြီး ဈေးကွက်ယှဉ်ပြိုင်နေရတဲ့ ထိုင်းနဲ့ ဗီယက်နမ်ကိုကျော်တက်ကာ ထိပ်ဆုံးနေရာကို ပြန်လည်ရရှိအောင် ကြိုးစားကြပါစို့လို့ တိုက် တွန်းရေးသားလိုက်ရပါတယ်။
Background