ဒီနှစ်မှာ ရှမ်းကြက်သွန်ဖြူက ဈေးကောင်းရနေပါတယ်၊ လွန်ခဲ့တဲ့ ငါးနှစ်ခန့်ကစပြီး ဆက်တိုက်ဈေးကွက်ပျက်ခဲ့တာ၊ ဈေးပြန်ကောင်းလာတာ မနှစ်နဲ့ ဒီနှစ် နှစ်နှစ်ခန့်သာရှိပါတယ်။ ငါးနှစ်ခန့်ဈေးကွက်ပျက်တာကြောင့် စိုက် တဲ့ တောင်သူတွေက လည်း စိတ်ပျက်ပြီး မစိုက်ကြတော့ပါဘူး။ ကြက်သွန်ဖြူ နေရာ မှာ ပြောင်းကိုအစားထိုးစိုက် ပျိုးနေတာကြောင့် စိုက်ဧကလည်းလျော့သွားပါတယ်။ ဒီနှစ်မှာတော့ ဈေးကောင်းရပေမယ့် စိုက်တဲ့တောင်သူတွေ နည်းလာပါတယ်။ အရှုံးပေါ်ခဲ့တဲ့ အတွက် တောင်သူတွေကလည်း မျိုးဖိုးတောင် မတတ်နိုင် တော့လို့မစိုက်နိုင်ကြတော့ဘူးလို့သိရပါတယ်။
ဈေးကွက်မှာတော့ မှန်မှန်အရောင်းအဝယ်ဖြစ်နေပြီး လက်ကျန်က အထွက်နှုန်းရဲ့ တစ်ဝက်ခန့် ကျန်နေသေးတယ် လို့ သိရပါတယ်။ ရှမ်းကြက်သွန်ဖြူကို အဓိကဝယ်ယူတဲ့ ဝယ်လက်က ရန်ကုန်၊နေပြည်တော်၊ မော်လမြိုင်၊ တပ်ကုန်း စတဲ့မြို့တွေက ဖြစ်ပါတယ်။ ဒီတစ်ပတ် တောင်ကြီးဈေးကွက် မှာ ကြက်သွန်ဖြူ တစ်ပိဿာပေါက်ဈေးတွေက (လက် ချား)ကျပ် ၂၃၀၀၊ (ထူး-၁)ကျပ် ၂၅၀၀၊(ထူး-၃)ကျပ် ၃၀၀၀၊ (ထူး-၄)ကျပ် ၃၃၀၀၊ (ထူး-၅)ကျပ် ၃၅၀၀ ဈေးရှိ ပါတယ်။
အောင်ပန်းဈေးကွက်မှာတော့ ကြက်သွန်ဖြူတစ်ပိဿာ ပေါက်ဈေးတွေက(လတ်ချား)ကျပ် ၂၂၀၀၊ (ရှယ်)ကျပ် ၂၆၀၀၊ (ထူး-၁)ကျပ် ၃၀၀၀၊ (ထူး-၂) ကျပ် ၃၃၀၀၊ (ထူး-၃)ကျပ် ၃၆၀၀၊ (ထူး-၄)ကျပ်၃၇၀၀ ဈေးပေါက်တယ်လို့ ကြက်သွန်ဖြူ ပွဲရုံ တွေက သိရပါတယ်
။ဧဧခိုင်(တောင်ကြီး)