ဘင်္ဂလားဒေ့ရှ်-မြန်မာ ပူးတွဲကုန်သွယ်ရေးကော်မရှင် အစည်းအဝေးကျင်းပမည် ဘင်္ဂလားဒေ့ရှ်-မြန်မာနှစ်ရက်ကြာပူးတွဲကုန်သွယ်ရေးကော်မရှင် (JTC )အစည်းအဝေးကို ဒက္ကာမြို့၌ စက်တင်ဘာ ၂၂ ရက်၌ ကျင်းပသွားမည်ဟုဘင်္ဂလားဒေ့ရှ်နိုင်ငံ စစ်တကောင်းမြို့ပူရ်အိုကောင် နေ့စဉ်သတင်းစာတွင်ဖော်ပြထားပါသည်။ အဆိုပါ အစည်းအဝေးတွင် နှစ်နိုင်ငံ အကြားဘဏ်ဆိုင်ရာ အခွင့်အရေးများ တိုက်ရိုက်ရရှိရေးအတွက် ဘဏ်ဖွင့်လှစ်ရေး ကိစ္စနှင့် ကုန်သွယ်မှုဆိုင်ရာ လိုအပ်ချက်များလျော့နည်းရေးကိစ္စများကို ဆွေးနွေးသွားကြမည်ဖြစ်သည်။ ဘင်္ဂလားဒေ့ရှ်နိုင်ငံနှင့် မြန်မာနိုင်ငံသည် နယ်စပ်ကုန်သွယ်ရေးနှင့်နယ်စပ်ဖြတ်ကျော်ပုံမှန်ကုန်သွယ်ရေးကိုဆောင်ရွက်လျက်ရှိရာ မြန်မာနိုင်ငံသည်ကုန်သွယ်မှုအသာစီး ရရှိသော အခြေအနေရှိပါသည်။ ဘင်္ဂလားဒေ့ရှ် ပို့ကုန်တိုးတက်ရေးဗျူရို၏ စာရင်းများအရ ဘင်္ဂလားဒေ့ရှ်နိုင်ငံသည် မြန်မာနိုင်ငံသို့အဓိကအားဖြင့် ဆေးဝါး၊ ဘိလပ်မြေ၊ဓာတ်မြေသြဇာနှင့်ချုပ်ထည်များ တင်ပို့ပြီး မြန်မာနိုင်ငံအနေနှင့် ဘင်္ဂလားဒေ့ရှ်နိုင်ငံသို့ ရေထွက်ကုန် ပုစွန်၊ ငါး၊ ငါးသလောက်၊ စားသောက်ကုန်၊ လယ်ယာထွက်ကုန်၊ ချင်း၊ နနွင်းတက်၊ မန်ကျည်းမှည့်(အစေ့ပါ)၊ မန်ကျည်းစေ့များ တင်ပို့လျက်ရှိပါသည်။ MIRT (DOBT) Source :နသက(မောင်တော)
Background