မုံရွာကုလားပဲ ဈေးအေးလာပေမဲ့ အဆွဲပို မုံရွာကုန်စည်ဒိုင် နိုဝင်ဘာလ ဒုတိယ ၁ဝ ရက်ပတ် ကုလားပဲ ဈေးကွက် မှာ ပစ္စည်းရှားပါးမှုပေါ်မူတည်ပြီး ဈေးအတက်အကျအနည်းငယ်ကြမ်းခဲ့တာ တွေ့ရပါတယ်။ ကုလားပဲရိုးရိုးကတော့ ရောင်းလက် တစ်ရက်သာ ဈေးဖွင့်ခဲ့ပြီး တစ်တင်း ၂၄ဝဝဝ ကျပ်ပေါက်ခဲ့ပါတယ်။ ကုလားပဲတိုင်ပေက တစ်တင်း ၂၅ဝဝဝ ကျပ်ထိ အမြင့်ဆုံး ရောက်ခဲ့ရာက ၂၃ဝဝဝ ကျပ်ထိဈေးပြန်ကျဆင်းသွားခဲ့သလို၊ ဗွီတူးအနေနဲ့ တစ်တင်း ၂၆ဝဝဝ ကျပ်ထိ အမြင့်ဆုံး ရောက်ခဲ့ပြီး တစ်တင်း ၂၄၃ဝဝ ကျပ်ထိဈေးကျဆင်းသွားခဲ့ရာ တစ်တင်း ၁၇ဝဝ ကျပ်မှ ၂ဝဝဝ ကျပ်အထိ အတက် အကျ ကွာခြားသွားခဲ့တာ တွေ့ရပါတယ်။ 929 ပဲကတော့ ကုလားပဲ အုပ်စုထဲမှာ ဈေးဆက်လက်စွာနေပြီး တစ်တင်း ၂၄၅ဝဝ ကျပ်နဲ့ အရောင်းအဝယ်သွက်ခဲ့တယ်လို့ ဆိုပါတယ်။ ယခုရက်ပတ်အတွင်း ကုလားပဲဈေး အမြင့်ဆုံးဖြစ်ပေါ်ချိန်မှာ မန္တလေး ရန်ကုန်ဝယ်လက်မရှိခဲ့ဘဲ ဒေသတွင်းလုပ်ငန်းသမားတွေသာ လိုအပ်သလောက် ဝယ်ယူမှုရှိခဲ့လို့ တစ်ရက် အိတ် ၂ဝဝ မှ ၃ဝဝ အတွင်း နေ့စဉ်အရောင်းအဝယ် ဖြစ်ခဲ့တယ်လို့ ပွဲရုံရပ်ကွက်က ဆိုပါတယ်။ ဈေးအေးချိန်မှာတော့ မန္တလေး ရန်ကုန် ဝယ်လက် ဝယ်ယူမှုရှိနေလို့ ယခုလ ဒုတိယ ၁ဝ ရက်ပတ်အတွင်း မုံရွာကုန်စည်ဒိုင် နယ်မြေကနေ မန္တလေးကို တင်း ၂၃ဝဝ ခန့်၊ ရန်ကုန်ကို တင်း ၃ဝဝ ခန့်နဲ့ ပခုက္ကူကို တင်း ၆ဝဝ ခန့် တင်ပို့နိုင်ခဲ့တာ တွေ့ရပါတယ်။ ထွန်းလှိုင်
Background