ရှမ်းပဲစင်းငုံ ဈေးကွက်စဝင် ဒီတစ်ပတ်ဈေးကွက်ကို ရှမ်းပဲစင်းငုံတွေ စပြီးဝင်လာပါပြီ။ အများဆုံး စိုက်တဲ့ တောင်ကြီးခရိုင်၊ ဆီဆိုင်၊ ဆိုက်ခေါင်၊ ရပ်စောက်စတဲ့ မြို့နယ်တွေကနေ ဝင်လာတာဖြစ်ပါတယ်။ ဒီနှစ်ရှမ်းပြည်နယ်တောင်ပိုင်း ပဲစင်းငုံအထွက်နှုန်းက မနှစ်ကထက် အထွက်လျော့နိုင်တယ်လို့ ခန့်မှန်းကြပါတယ်။ ဒီဇင်ဘာလမှ နှင်းခါးတွေကျလာလို့ မြို့နယ်အချို့မှာ ပဲစင်းငုံအခင်းလိုက် ပျက်သွားတယ်လို့ သိရပါတယ်။ ပဲစင်းငုံမှာလည်း အထွက်စောတဲ့မျိုးနဲ့ အထွက်နောက်ကျတဲ့ မျိုးဆိုပြီး နှစ်မျိုးရှိလို့ အထွက်စောတဲ့ ပဲတွေက နှင်းခါးဒဏ်လွတ်သွားပြီ၊ အထွက်နောက်ကျတဲ့ ပဲကတော့ ထိသွားတယ်လို့ သိရပါတယ်။ ဟိုပုံးမြို့နယ်တစ်ဝိုက်မှာတော့ လွင်ပြင်က အခင်းတွေ ထိပေမဲ့ တောင်စောင်းနဲ့ ကုန်းမြင့်ပေါ်က အခင်းတွေကတော့ နှင်းခါး ဒဏ်က လွတ်တယ်လို့ သိရပါတယ်။ ဒါပေမဲ့ မနှစ်က ဟိုပုံးမြို့နယ်မှာ ပဲစင်းငုံ ပိဿာချိန် ၅ သိန်းထွက်ရင် ဒီနှစ်တော့ ၁ သိန်းလောက်သာထွက်နိုင်တယ်လို့ ဟိုပုံး ဒေသခံကုန်သည်တွေထံက သိရပါတယ်။ နာမည်ကြီး လင်းခေး ပဲစင်းငုံ ကတော့ ၂ လပိုင်းအကုန် ၃ လပိုင်းလောက်မှသာ ဈေးကွက်ကို ဝင်မှာဖြစ်ပါတယ်။ ဒီနှစ်ထွက်တဲ့ ပဲစင်းငုံဈေးက အတက်အကျကြမ်းတယ်လို့ သိရပါတယ်။ တောင်ကြီးဈေးကွက်မှာ ပဲစင်းငုံသစ်ဈေးကလုံးကြီးတစ်ပိဿာ ၇ဝဝကျပ်၊ (နီ၊ သေး) တစ်ပိဿာ ၉ဝဝ ကျပ် ဈေးရှိပြီး၊ ပဲစင်းငုံအဟောင်းက တစ်ပိဿာ ၁ဝဝဝ ကျပ် ဈေးရှိပါတယ်။ ဧဧခိုင်
Background