မန္တလေးမြို့တော်သို့ ငါးဝင်ရောက်မှုများပြားပြီး စားသုံးမှု ပိုမိုများလာ ရန်ကုန်မှ ငါးများ ပြည်တွင်းဈေးကွက်သို့ ပိုမိုကျယ်ပြန့်စွာ ရောင်းချလျက်ရှိပြီးမန္တလေးမြို့တော်ဟာ အထက်မြန်မာ ပြည်ဈေးကွက်ဖြန့်တဲ့ ဗဟိုအချက်အချာ နေရာဖြစ်ပြီး မန်းမှ တစ်ဆင့် ပြင်ဦးလွင်၊ ကျောက်မဲ၊ သီပေါ၊ မြစ်ကြီးနားလိုင်းများ သို့ ထပ်ဆင့်တင်ပို့လျက်ရှိပါတယ်။ ရန်ကုန် ငါးများကို ကားလမ်းမှ ကုန်ပိဿာချိန် ၂ဝဝဝဝ ကျော်ခန့်နဲ့ ရထားလမ်းမှ ပိဿာချိန် ၅ဝဝဝ-၆ဝဝဝ ခန့်နေ့စဉ်ဝင်ရောက်လျက်ရှိပြီး ငါးအမျိုးအစားများအနေဖြင့် ငါးမြစ်ချင်း၊ ငါးကြင်းဖြူ၊ ငါး အုံတုံ၊ ငါးမုတ်နဲ့ ပုစွန်များ ဝင်ရောက်ကြောင်း သိရပါတယ်။ ရထားဖြင့်လာတဲ့ ငါးများကို မန်းမြို့ပေါ်မှ ကိုယ်စားလှယ်က နယ်များသို့ ရထားဖြင့် ဆက်လက်ဖြန့်ပြီး ကားနဲ့လာတဲ့ငါး တွေကို မန်းမြို့တွင်း ညနေ ၃ နာရီမှ စဖြန့်ပြီး ည ၉ နာရီမှာ အဝေးတင်ဖြန့်ကြောင်းသိရပါတယ်။ မန်းမြို့ငါးမွေးမြူရေးကန်များနဲ့ အမရပူရ တောင်သမန်အင်း၊ မတ္တရာမြို့နယ်တို့က လာတဲ့ ငါးများဖြစ်တဲ့ ရွှေဝါငါးကြင်း၊ ငါးခေါင်းပွ၊ ငါးတန်၊ ငါးမြစ် ချင်း၊ တီလားဗီယားငါးများလည်း ပိဿာချိန် ၆ဝဝဝ- ၇ဝဝဝခန့်ဝင်ရောက်ကြောင်း သိရပါတယ်။ မန်းမြို့ပေါ်ရှိဈေး ၄ဝ ဖြန့်ဝေမှုအရ မြို့နေလူထု စားသုံးမှု ပိဿာ ၈ဝဝဝ- ၁ဝဝဝဝ ခန့်ရှိပြီး အခုလတ်တလောဈေးကွက်တွင် ကြက်ငှက်တုပ်ကွေး၊ ဝက်နားရွက်ပြာ သတင်းများကြောင့် ငါးဝင်ရောက် မှု များပြားသည့်အတွက် စားသုံးမှု ပိုမိုများလာတဲ့အပြင် လက်လီပြန်ရောင်းတဲ့ ငါးသည်များမှ ငါးအတုံးလေးများ ခုတ်ပြီး ၁ဝ ကျပ်သား အထုတ်သေးများ တစ်ပိုင်တစ်နိုင် ရောင်းချပေးတဲ့အတွက် ဝယ်ယူမှု ပိုမိုများပြားလာကြောင်း သိရပါတယ်။ ရောင်းချနေတဲ့ ဈေးနှုန်းတွေကတော့ ရန်ကုန် ငါးကြင်းဖြူ တစ်ပိဿာ ၃၅ဝဝ ကျပ်-၄ဝဝဝ ကျပ်၊ ငါးအုံတုံ၊ ငါး မြစ်ချင်း၊ ငါးမုတ်တွေကတော့ တစ်ပိဿာ ၁၇ဝဝ ကျပ်- ၁၈ဝဝ ကျပ်-၂၁ဝဝ ကျပ်ရှိကြောင်း သိရပြီး မန်းမြို့ငါးများ ကတော့ လတ်ဆတ်မှုပေါ်မူတည်ပြီး ဈေးရကြောင်း သိရပါတယ်။ ခင်မြင့်မြင့်သန်း
Background