တရုတ်နိုင်ငံဘက်က ပုံမှန်ဝယ်မှုရှိနေတဲ့ နှမ်းရောင်စုံကို လတ်တလော ဝယ်ယူမှုနည်းနေတာကြောင့် ပြည်တွင်းဈေးကွက်မှာ အရောင်းအဝယ်အေးပြီး၊ ဈေးနှုန်းကျဆင်းလာကြောင်း မန္တလေး နှမ်းကုန်သည်များ ထံမှ သိရပါတယ်။ နှမ်းဝယ်ယူမှုနည်းရခြင်းမှာ တရုတ်နိုင်ငံဘက်မှ ဒေသထွက် နှမ်းစိုက်ခင်းများ ယခုနှစ်မိုးကောင်းပြီး အထွက်နှုန်းကောင်းခြင်းကြောင့် လည်းကောင်း၊ အိန္ဒိယနိုင်ငံဘက်မှ ရေလမ်းကြောင်းဖြင့် တရုတ်နိုင်ငံ ဘက်သို့ အရည်အသွေးကောင်းပြီး၊ ဈေးနိမ့်၍ ဝင်ရောက်ခြင်းကြောင့်လည်းကောင်း၊ ငွေဈေးအတက် အကျကြမ်းခြင်းကြောင့် လည်းကောင်း၊ ပြည်တွင်းမှ နှမ်းများမှာ အိန္ဒိယနှမ်းထက် အရည်အသွေးနိမ့်၍ ဝယ်ယူမှုနည်းလာခြင်းကြောင့် ကုန်သည်များထံမှ သိရပါတယ်။ Five Star ပွဲရုံမှ ကိုအောင်အောင်က " ဒီရက်ထဲမှာ မိုးလည်းရွာတော့ ဈေးကွက်အေးနေတယ်။ တရုတ် ဘက်ထွက်နေတဲ့ ပဲတီစိမ်း၊ နှမ်း၊ ပြောင်း အားလုံးဈေးကွက်အေးနေတာ။ နှမ်းဈေးက နှမ်းဖြူ တစ်ကီလိုကို ပြီးခဲ့တဲ့ ၃ရက်က အကောင်းစ ၉ ဒသမ ၃ယွမ်၊ အညံ့စ ၈ ဒသမ ၃ ယွမ်ရှိခဲ့ပြီး၊ အောက် တိုဘာ ၂၅ ရက်မှာ အကောင်းစ ၈ ဒသမ ၆၁ယွမ်၊ အညံ့စ ၈ ဒသမ ၂၅ ယွမ်ဈေးရှိတယ်။ အရည်အသွေး ပေါ်မူတည်ပြီး ဈေးနှုန်းကလည်း အမျိုးမျိုးဖြစ်နေတာ။ ဈေးမမှန်တော့ ဒီဘက်မှာလည်း မဝယ်ရဲဘူး" လို့ ပြောပါတယ်။ ရတနာထွန်းပွဲရုံမှ ကိုသိန်းစံကလည်း " နှမ်းကို တရုတ်ပြည်တွင်းထိ သွားရောင်းလို့ရတယ်။ တိုက် ရိုက်သွားရောင်းလို့ရပေမယ့် အဝယ်မလိုက်ဘူးဖြစ်နေတာ။ Export မရှိတဲ့အတွက် မန္တလေးဈေး ကွက်မှာလည်း ဈေးကွက်အေးနေတယ်။ ရှေ့တစ်ပတ်က နှမ်းညို၊ နှမ်းနီရသလောက်ဝယ်တယ်။ ဒီတစ်ပတ်မှာ နှမ်းရောင်စုံဈေးအေးနေတာ။ နှမ်းဈေးက အရင်လနဲ့ယှဉ်ရင် ၅၄ ပိဿာဝင်တစ်အိတ်ကို ကျပ် ၁၀၀၀၀ ကျော်လောက်ဈေးကျတယ်။ ဒီတစ်ပတ်မှာ တစ်ရက်ထက် တစ်ရက်ဈေးအပြောင်းအလဲဖြစ်နေတာ"လို့ ပြောပါတယ်။ ပြည်တွင်းဈေးနှုန်းမှာ အောက်တိုဘာ ၂၃ ရက်က မန္တလေးကုန်စည်ဒိုင်ဈေး တစ်အိတ် နှမ်းဖြူ ၆၃၀၀၀ ကျပ်- ၆၄၀၀၀ကျပ်၊ နှမ်းညို ၅၆၀၀၀ ကျပ်- ၆၀၀၀၀ကျပ်၊ နှမ်းနက် ၇၅၀၀၀ ကျပ်- ၉၂၀၀၀ ကျပ်ဈေးရှိကြောင်း သိရပါတယ်။ ယခုတစ်ပတ်တွင် တရုတ်ဈေးကွက်သို့ ပဲ၊ ပြောင်း၊ နှမ်းတင်ပို့မှုနည်းလာခြင်းကြောင့် သယ်ယူမှု စရိတ် တဖြည်းဖြည်းကျလာကြောင်း သိရပါတယ်။ ပဲတီစိမ်းအဟောင်းလက်ကျန်နည်းပြီး၊ ပြောင်းဈေးကျ လို့ အတင်နည်းလာခြင်းနဲ့ နှမ်းဈေးကွက်အေးလျက်ရှိခြင်းကြောင့် သယ်ယူစရိတ် လျော့ကျလာခြင်း ဖြစ်ပါတယ်။ ရတနာထွန်းပွဲရုံမှ ကိုသိန်းစံက " ပဲ၊ နှမ်းအတင်မရှိတော့ ကားများတဲ့အတွက် သယ်ယူခနေ့စဉ် ကျလာတယ်။ ဒီအချိန်မှာ ကားခကျပေမယ့် ကုန်သည်တွေအတွက် တွက်ခြေမကိုက်ဘူး။ အောက်တိုဘာ လဆန်းပိုင်းကစပြီး ကားခတက်သွားခဲ့တယ်။ အရောင်းအဝယ်က မကောင်း၊ ကားခက တက်ဆိုတော့ ကုန်သည်တွေအတွက် အဆင်မပြေဘူး။ ကားသမားတွေအတွက်လည်း စရိတ်စက များလာတယ်။ အရင်က ကားတစ်စီးတက်ရင် အသွား ဆီဂါလံ ၆၀၊ အပြန်ဆီဂါလံ ၅၀ ပေါင်းရင်တစ်ခေါက်ကို ဂါလန် ၁၁၀ ကုန်တယ်။ အောက်တိုဘာလမတိုင်မီက ကားတစ်စီးမှာ အိတ် ၇၀၀ တင်ရာက ခုလမှာ ကားတစ်စီးကို အိတ် ၂၃၀-၂၅၀ပဲတင်ရတော့ ကားတစ်စီးအစား ကားသုံးစီးလောက်တက်ရတဲ့အတွက် ဆီဂါလန် ၃၃၀ လောက်ကုန်တယ်။ စက်သုံးဆီသုံးစွဲမှုများလာတော့ ကားခမြင့်တက်လာတာပေါ့။ အောက်တိုဘာလ မတိုင်မီက အိတ်တစ်အိတ်ကို သယ်ယူစရိတ် ၃၅ ကျပ်ရှိခဲ့ပြီး၊ အောက်တိုဘာလမှာ ၇၈ ကျပ် - ၈၀ ကျပ်ထိဖြစ်သွားတယ်"လို့ ပြောပါတယ်။ မန္တလေး - မူဆယ်ကုန်သယ်စရိတ်ခမှာ အောက်တိုဘာလအတွင်း တစ်အိတ် ၈၀ ကျပ်မှ အောက်တို ဘာ ၂၄ ရက်တွင် ၇၀ ကျပ်၊ ၂၅ ရက်တွင် ၆၅ ကျပ်ထိ ဈေးနှုန်းကျဆင်းလာသော်လည်း ယခင်ဈေး မမီကြောင်း သိရပါတယ်။ ဇူးဇူး
Background