အိန္ဒိယ-တရုတ် ကုန်သွယ်ရေး ကန်ဒေါ်လာ ၁၀၀ ဘီလီယံသို့ ရောက်ရှိနိုင်

                      အိန္ဒိယ-တရုတ်ကုန်သွယ်ရေးက ယခုကန်ဒေါ်လာ ၆၃ ဘီလီယံရှိရာမှ လာမယ့်လေးနှစ်အတွင်းမှာ ကန်ဒေါ်လာ ၁၀၀ ဘီလီယံကို ရောက်ရှိနိုင်ကြောင်း အိန္ဒိယနိုင်ငံ စက်မှုလက်မှုနဲ့ ကုန်သည်ကြီးများ အသင်း (Associated Chambers of Commerce and Industry of India- Assocham) က ပြောကြားလိုက်တယ်။ ၂၀၃၀ ခုနှစ်မှာ အာရှရဲ့ စီးပွားရေးအကြီးဆုံးနှစ်နိုင်ငံက ကမ္ဘာ့အကြီးမားဆုံးသော ကုန်သွယ်ဖက်နိုင်ငံတွေ ဖြစ်လာနိုင်တယ်။                       တရုတ်က အမေရိကန်ပြည်ထောင်စု၊ ဗြိတိန်နဲ့ ဂျပန်တို့ကိုကျော်လွန်ကာ အိန္ဒိယရဲ့ အကြီးမားဆုံး သောကုန်သွယ်ဖက်နိုင်ငံဖြစ်လာခဲ့တယ်။ အိန္ဒိယကုမ္ပဏီတွေက တရုတ်ရဲ့ ရင်းနှီးမြှုပ်နှံမှု ကုန်စည်တွေကို ဆွဲဆောင်မှုရှိတဲ့ ဈေးနှုန်းနဲ့ စဉ်ဆက်မပြတ်တင်သွင်းနိုင်ခြေရှိတယ်။                         အိန္ဒိယမှ တရုတ်ကို တင်ပို့မှုက ၂၀၀၉-၂၀၁၀ဘဏ္ဍာနှစ်က ကန်ဒေါ်လာ ၁၁ ဒသမ ၆ ဘီလီယံရှိ ရာမှ ၂၀၁၀-၂၀၁၁ ဘဏ္ဍာနှစ်မှာ ၆၈ ဒသမ ၈ ရာခိုင်နှုန်းခုန်တက်သွားကာ ကန်ဒေါ်လာ ၁၉ ဒသမ ၆ ဘီလီယံကို ရောက်ရှိခဲ့တယ်။ ဒါ့အပြင် သွင်းကုန်ကလည်း အလားတူကာလမှာ ကန်ဒေါ်လာ ၃၀ ဒသမ ၈ ဘီလီယံရှိရာမှ ၄၁ ရာခိုင်နှုန်းခုန်တက်ကာ ကန်ဒေါ်လာ ၄၃ ဒသမ ၅ ဘီလီယံကို ရောက်ရှိခဲ့တယ်။ ဒါပေမဲ့ အိန္ဒိယအစိုးရက တရုတ်ရဲ့ ကုန်စည်အချို့ (စွမ်းအင်နဲ့ ဆက်သွယ်ရေး ကုန်စည်များ) အပေါ်မှာ အကောက်ခွန်မဟုတ်တဲ့ အတားအဆီးတွေဖြစ်တဲ့ အခွန်နှုန်းမြင့်မားမှု အဆိုပြုချက်ကြောင့် အဓိကကဏ္ဍတွေမှာ ရင်းနှီးမြှုပ်နှံမှုအပေါ် အကျိုးသက်ရောက်စေမှာဖြစ်ပြီး အဓိကကုန်သွယ်ဖက်နိုင်ငံ အပေါ် ဆိုးကျိုးတွေဖြစ်ထွန်း စေမှာဖြစ်ပါတယ်။                      အိန္ဒိယနဲ့ တရုတ်နိုင်ငံအကြား စီးပွားရေးဆက်ဆံမှုတွေက ယခုကမ္ဘာ့စီးပွားရေးလောကမှာ သိသိ သာသာထင်ရှားလျက်ရှိကြောင်း Assocham  အထွေထွေအတွင်းရေးမှူး D S Rawat က ပြောကြား လိုက်တယ်။ အိန္ဒိယကုမ္ပဏီတွေက မိမိတို့ရဲ့တန်ဖိုးမြင့်ထုတ်ကုန်တွေကို တိုးမြှင့်တင်ပို့နိုင်ရေးအတွက် မိမိတို့ထုတ်ကုန် အချက်အလက်တွေကို ကျယ်ကျယ်ပြန့်ပြန့်သိနိုင်ဖို့ ဆောင်ရွက်ရမှာဖြစ်တယ်။ အိန္ဒိယနဲ့ တရုတ်က ကုန်သွယ်ရေး သဘောတူညီချက်ကို ၁၉၈၄ ခုနှစ်မှာ ရေးထိုးခဲ့ကြပြီး အချင်းချင်း အထူးအခွင့် ရေးပေးတဲ့ Most Favoured Nation (MFN)  အဆင့်အတန်းကို ခွင့်ပြုခဲ့ကြတယ်။                   အိန္ဒိယက ဝန်ဆောင်မှုကဏ္ဍ အဓိကမှာ အသိပညာကိုအခြေခံတဲ့ ဝန်ဆောင်မှုလုပ်ငန်းတွေမှာ ထူးခြားပြောင်မြောက်ပြီး တရုတ်က ကုန်ထုတ်လုပ်မှုကဏ္ဍမှာ ထူးခြားထင်ရှားတယ်။ အိန္ဒိယက တရုတ်ကို သတ္တုများ၊  သတ္တုရိုင်းများ၊ သံနဲ့ သံမဏိ၊ ချည်မျှင်တို့ကိုတင်ပို့လျက်ရှိပြီး တရုတ်မှ လျှပ်စစ်ပစ္စည်းများ၊ အဏုမြူဓာတ်ပေါင်းဖိုများ၊ ဘွိုင်လာအိုးများ၊ အော်ဂင်းနစ်ဓာတုပစ္စည်းများ၊ ဓာတ်မြေသြဇာများ၊ သံနဲ့ သံမဏိတို့ကို တင်သွင်းလျက်ရှိကြောင်း သတင်းရရှိပါတယ်။ Source:economictimes.indiatimes.com,အေးမွန်မွန်လှိုင်