မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်ရှိ ရွှေလှံကျေးရွာဟာ ချင်းတွင်းမြစ်အနောက်ဘက်ကမ်းရှိ ရေစကြို မြို့မှ အရှေ့ဘက်ကမ်း သုံးမိုင်ခန့်အကွာတွင် တည်ရှိပါတယ်။ ယင်းရွာမှ ဆန်ကောလုပ်ငန်းဟာ မိရိုးဖလာ စဉ်ဆက်မပြတ် ပြုလုပ်တဲ့လက်မှုလုပ်ငန်းဖြစ်ပြီး ရွှေလှံကျေးရွာထွက် ကုန်ပစ္စည်း များမှာ ဆန်ကော၊ ဆန်ကာ၊ ဆန်ကာခုံး၊ ရေအိုးဖုံး၊ ထမင်းစား ပွဲအုပ်၊ ကလေးပုခတ်၊ ဈေးရောင်းခံတောင်းတို့ ဖြစ်ပါတယ်။ ရွှေလံှကျေးရွာမှာ အိမ်ခြေပေါင်း ၇၀၀ ကျော်ရှိပြီး တောင်သူလုပ်ကိုင်သူ နည်းပါးပြီး၊ ဆန်ကောလုပ်ကိုင်သူ တစ်ရွာလုံး နီးပါးရှိကြောင်း သိရပါတယ်။ တောင်သူလုပ်ကိုင်သူ တချို့ မိသားစုများက နံနက်ပိုင်းနဲ့ ညနေပိုင်းတို့မှာ တောင်သူလုပ်ငန်း လုပ်ပြီး နေ့ပိုင်းနဲ့ ညပိုင်းချိန်များမှာသာ ဆန်ကောလုပ်ငန်းကိုလုပ်ကိုင်ကြပါတယ်။ " ကျွန်တော်တို့ရွာက ဆန်ကောလုပ်ကိုင်သူ တစ်ရွာလုံးနီးပါးပါ ပဲ။ ကလေးကအစ လူကြီးများမကျန်ပေါ့။ လိုအပ်တဲ့ ကုန်ကြမ်းက တော့ ဝါးနဲ့ ကြိမ်ပါပဲ။ ဒီကုန်ကြမ်းက အထက်ပိုင်း ခန္တီး၊ ကသာ၊ ထီးချိုင့်တို့က ဝါးဖောင်၊ ကြိမ် ဖောင်တွေနဲ့ စုန်ဆင်းယူရပါတယ်။ ဆန်ကောကို အချော၊ အကြမ်း နှစ်မျိုးလုပ်ပါတယ်။ မြင်းခြံသုံး အချော၊ ရေစကြိုသုံး (ထန်းလျက်၊ တောင်းအုပ်) အကြမ်းတွေပါ။ ငွေကြေးတတ်နိုင်သူများက ရွာထဲက ထွက်ကုန်တွေကို ဝယ်ယူစု ဆောင်းရောင်းချခြင်း၊ နယ်လှည့်ရောင်းသူများကို အဟောင်းပေး အသစ်ယူ စနစ်နဲ့ပေးခြင်း၊ ငွေထုတ်ပေးပြီး ကုန် ချောပြန်ယူခြင်း၊ တချို့ကတော့ ကိုယ်တိုင်လုပ်ကိုင်ရောင်းချခြင်းတို့အပြင် ကိုကြီး ကျော်နတ်ပွဲနဲ့ ရေစကြို၊ ပခုက္ကူ၊ မကွေး၊ မြောင်မြို့တို့ရှိ တန်ခိုးကြီး ဘုရားပွဲတော်များ၊ မတ္တရာ၊ ရွှေဘို၊ မုံရွာ၊ ရေဦး၊ တန့်ဆည်မြို့များနဲ့ မန္တလေး၊ မြင်းခြံမြို့များကို တင်ပို့ရောင်းချကြတယ်"လို့ ဒေသခံ ဆန်ကောလုပ်ကိုင်သူ ကိုသိန်းဆွေက ပြောပြပါတယ်။ ရွှေလှံကျေးရွာ ထုတ်ကုန်ပစ္စည်းများဟာ အနားကွပ်များ စိပ်ပြီး၊ သေသပ်ခိုင်ခံ့တာကြောင့် ဝယ်ယူသုံးစွဲသူများ အထူးနှစ် ခြိုက်ကြပြီး ဈေးနှုန်းမှာလည်း ကျပ် ၃၀၀ မှ ၈၀၀၀ ထိရှိကြောင်း သိရပါတယ်။
Background