နေပြည်တော် ၊ နိုဝင်ဘာ ၂၄ ၂၀၂၁ခုနှစ်၊ နိုဝင်ဘာလ ၂၄ ရက် (၁၃:၀၀) နာရီအချိန်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ (၁) ၌ Virtual စနစ်ဖြင့် ကျင်းပပြုလုပ်သည့် ကုန်သွယ်မှုမြှင့်တင်ရေး နှင့် မြန်မာ့ထုတ်ကုန်များတိုးချဲ့တင်ပို့နိုင်ရေးအတွက် ပြည်ပ (၁၃) နိုင်ငံ၌ တာဝန်ထမ်းဆောင်နေကြသော မြန်မာစီးပွားရေးသံမှူးများနှင့် ကမ္ဘာကုန်သွယ်ရေးအဖွဲ့ဆိုင်ရာသံမှူးတို့အား တွေ့ဆုံဆွေးနွေးပွဲ (ဒုတိယနေ့)သို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာပွင့်ဆန်း တက်ရောက် အမှာစကားပြောကြားခဲ့သည်။
အစည်းအဝေးဒုတိယနေ့တွင် ကိုရီးယားသမ္မတနိုင်ငံ၊ ဂျပန်နိုင်ငံ၊ ဆွစ်ဇာလန်နိုင်ငံ၊ သြစတြေးလျနိုင်ငံ၊ တောင်အာဖရိကနိုင်ငံ၊ ဘယ်လ်ဂျီယံနိုင်ငံ၊ ဂျာမဏီနိုင်ငံ၊ ဂျာမနီနိုင်ငံ၊ အိန္ဒိယနိုင်ငံတို့မှ စီးပွားရေးသံမှူးများနှင့် ကမ္ဘာကုန်သွယ်ရေးအဖွဲ့ဆိုင်ရာသံမှူးတို့က ၎င်းတို့ တာဝန်ထမ်းဆောင်နေသည့်နိုင်ငံများနှင့် မြန်မာနိုင်ငံတို့အကြား နှစ်နိုင်ငံကုန်သွယ်မှုမြှင့်တင်ရေး ဆောင်ရွက်နိုင်မှု၊ အမယ်သစ်ပို့ကုန်များတိုးချဲ့တင်ပို့နိုင်ရေး၊ ကမ္ဘာ့ကုန်သွယ်ရေးအဖွဲ့တွင် မြန်မာ နိုင်ငံမှ ပါဝင်လိုက်ပါဆောင်ရွက်နေမှုအခြေအနေများနှင့် ဆက်လက်ဆောင်ရွက်မည့် အစီအမံများ ကိုတင်ပြခဲ့ကြသည်။
စီးပွားရေးသံမှူးများနှင့် ကမ္ဘာ့ကုန်သွယ်ရေးအဖွဲ့ဆိုင်ရာသံမှူးတို့၏ တင်ပြဆွေးနွေးမှုများအပေါ် ပြည်ထောင်စုဝန်ကြီး ဒေါက်တာပွင့်ဆန်းက လမ်းညွှန်အမှာစကားကြားခဲ့ရာတွင် တာဝန်ထမ်းဆောင်နေသည့်ကာလအတွင်း သံမှူးများ၏ စွမ်းဆောင်ရည်များ တိုးတက်လာပြီး ကုန်သွယ်မှုနှင့် ရင်းနှီးမြှုပ်နှံမှုတိုးတက်ရေးအတွက် လိမ္မာပါးနပ်စွာဖြင့် ဆောင်ရွက်နိုင်စွမ်းရှိလာသည်ကို တွေ့ရှိရသည့်အတွက် ကျေနပ်အားရမိပါကြောင်း၊ မိမိတို့နိုင်ငံမှာ လယ်ယာစိုက်ပျိုးရေး ထုတ်ကုန်များကို အဓိကတင်ပို့နေသည့် နိုင်ငံဖြစ်သည့်အားလျော်စွာ လယ်ယာထွက်ကုန်များကို ကုန်ကြမ်းအဆင့်သာတင်ပို့နေရာမှ အချို့ထုတ်ကုန်များအား တန်ဖိုးမြှင့်ထုတ်ကုန်များအဖြစ် တင်ပို့ခြင်းဖြင့် နိုင်ငံသားများအတွက် အလုပ်အကိုင်အခွင့်အလမ်းများ ဖန်တီးပေးနိုင်မည်ဖြစ် သည့်အပြင် စျေးနှုန်းလည်းပိုမိုရနိုင်မည် ဖြစ်သည့်အတွက် ကြိုးပမ်းဆောင်ရွက် သွားစေလို ကြောင်း၊ မိမိတို့တာဝန်ကျရာနိုင်ငံများ၏ စျေးကွက်များတွင် အခြားနိုင်ငံများမှ တင်ပို့နေမှုများ အားလေ့လာပြီး မိမိတို့ထုတ်ကုန်များအတွက်စျေးကွက်ရရှိနိုင်အောင် နမူနာယူ ကြိုးစားသွားသင့် ကြောင်းနှင့် နယ်စပ်ဖြတ်ကျော်ပုံမှန်ကုန်သွယ်ရေး (Normal Trade through Border) ကို အောင်မြင်စွာ အကောင်အထည်ဖော်ဆောင်ရွက်နိုင်ရန်အတွက် ငွေပေးချေမှု ကိစ္စရပ်များအပါ အဝင် အခြားဆောင်ရွက်နေသည့်ပုံစံများအား လေ့လာပြီးပြန်လည်တင်ပြသွားရန် မှာကြားခဲ့ သည်။
ဆက်လက်ပြီး ဒုတိယဝန်ကြီးက လမ်းညွှန်မှာကြားခဲ့ရာ စီးပွားရေးသံမှူးများအနေဖြင့် နှစ်နိုင်ငံကုန်သွယ်မှုနှင့်စပ်လျဉ်းပြီး သက်ဆိုင်ရာနိုင်ငံများအလိုက် မူဝါဒအပြောင်းအလဲများ၊ ပို့ကုန်များအတွက်လိုက်နာရမည့် လုပ်ထုံးလုပ်နည်းများ၊ စံချိန်စံနှုန်းသတ်မှတ်ချက်များ အပါအဝင် အခါအားလျော်စွာထုတ်ပြန်သည့် အခြားစည်းမျဉ်းစည်းကမ်းများအား မိမိတို့နိုင်ငံမှ အစိုးရဌာနများ၊ အဖွဲ့အစည်းများ၊ လုပ်ငန်းရှင်များ ကြိုတင်ပြင်ဆင်ချိန်ရရှိရန် အတွက် အချက်အလက်များအား ဆောလျင်စွာအကြောင်းကြားပေးပို့စေလိုကြောင်း၊ မိမိတို့နှင့်နယ်စပ်ချင်းထိစပ်နေသည့် နိုင်ငံများရှိ စီးပွားရေးသံမှူးများအနေဖြင့်လည်း နယ်စပ်ဂိတ်များ အဆင်ပြေချောမွေ့စွာ ပြန်လည် ဖွင့်လှစ်နိုင်ရေး၊ ကုန်စည်များချောမွေ့စွာစီးဆင်းနိုင်ရေးတို့အတွက် သက်ဆိုင်ရာဌာနများနှင့် စဉ် ဆက်မပြတ် ထိတွေ့ဆက်ဆံသွားကြရန် မှာကြားခဲ့သည်။
ယနေ့ကျင်းပသည့် အစည်းအဝေးသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများနှင့် တာဝန်ရှိသူများ တက်ရောက်ခဲ့ကြကြောင်း သတင်းရရှိသည်။
MOC(IR)