မြို့ပင်ငယ်သော်လည်း စီးပွားရေးလုပ်ငန်းကောင်းလှတဲ့ ရေစကြို ပခုက္ကူခရိုင်ထဲက ရေစကြိုမြို့နယ်ဟာ လယ်ယာထွက်ကုန်သီးနံှများအပြင် ဧရာဝတီနဲ့ ချင်းတွင်းမြစ်ဆုံမှာတည်ရှိတဲ့ ကျွန်းသောင်ခုံတွေပေါများတဲ့အတွက် ကျွန်းသီးနံှတွေလည်း ထွက်ရှိပါတယ်။ ဒီလိုသီးနံှတွေအပြင် ပဲမျိုးစုံ၊ ဆန်ရောင်းဝယ်ရေးလုပ်ငန်း၊ ထန်းလျက်လုပ်ငန်း၊ အမွှေး တိုင်လုပ်ငန်း၊ တစ်နိုင်ငံလုံးကိုတင်ပို့တဲ့ ပဲကြော်လုပ်ငန်း၊ သနပ်ခါးလုပ်ငန်းတွေနဲ့ပတ်သက်ပြီး ကုန်ကြမ်းသယ်ယူခြင်း၊ ကုန်ချောတင်ပို့ခြင်းတွေကို နိုင်ငံအနံှ့ဈေးကွက်တွေရရှိပြီး ငွေအပို့ အယူ များလည်း ပမာဏများများနဲ့ လုပ်ကိုင်နေကြပါတယ်။ လောလောဆယ်မှာတော့ ပခုက္ကူမှာရှိတဲ့ ပုဂ္ဂလိကဘဏ်များနဲ့ ဆက်သွယ်လုပ်ကိုင်နေကြရလို့ အချိန်ကုန်၊ ငွေပိုကုန်ပြီး၊ အရောင်းအဝယ် လုပ်ရာမှာ အချိန်တချို့တစ်ဝက်ဖဲ့ပေးပြီး ငွေပို့ငွေယူလုပ်နေကြရပါတယ်။ ဒါကြောင့် ဇွန် ၂၄ ရက်က မကွေးမှာပြုလုပ်တဲ့ လက်ကားကုန်စည်ဒိုင်များ ဖွံ့ဖြိုးတိုးတက် ရေး အလုပ်ရုံဆွေးနွေးပွဲမှာ ရေစကြိုကုန်စည်ဒိုင်ဥက္ကဋ္ဌ ဦးအောင်ဆန်းရဲ့ ရေစကြိုမှာ ပုဂ္ဂလိက ဘဏ်တစ်ဘဏ် လာရောက်ဖွင့်လှစ်နိုင်ရေး တင်ပြချက်အပေါ် မြန်မာနိုင်ငံသားများဘဏ် ဥက္ကဋ္ဌကြီးရဲ့လမ်းညွှန်မှုနဲ့ အုပ်ချုပ်မှုဒါရိုက်တာ ဦးမျိုးဦးနဲ့အဖွဲ့ဟာ ၂ဝ၁၁ ခုနှစ် ဇူလိုင် ၄ ရက်မှာ ရေစကြိုကို ရောက်ရှိလာပါတယ်။ မြန်မာနိုင်ငံသားများဘဏ် အုပ်ခုျပ်မှုဒါရိုက်တာနဲ့အဖွဲ့ဟာ ရေစကြိုကုန်စည်ဒိုင်မှာ မြို့မိ မြို့ဖများ၊ လုပ်ငန်းအလွှာအသီးသီးမှ ကုန်သည်များနဲ့ရင်းနှီးပွင့်လင်းစွာ ဆွေးနွေးညှိနှိုင်းနေကြတာ ကိုကြည့်ရတာ ရေစကြိုမြို့သူမြို့သားတွေအတွက် ပုဂ္ဂလိကဘဏ်တစ်ခု အမှန်တကယ် လိုအပ်ကြောင်းသိသာလှပါတယ်။ ဒါကြောင့် ယခုလို IT ခေတ်ကြီးထဲမှာ မြို့ပင်ငယ်သော်လည်း စီးပွားရေးလုပ်ငန်းကောင်းလှတဲ့ ရေစကြိုလို မြို့ငယ်ကလေးတွေမှာလည်း ပုဂ္ဂလိကဘဏ်များ ဖွင့်လှစ်ပေးရန် လိုအပ်ပါကြောင်း တင်ပြလိုက်ရပါတယ်။ မောင်မောင်အေး
Background