အီးယူမှ ဗြိတိန်ခွဲထွက်ပြီးနောက်ပိုင်း ဗြိတိန်နိုင်ငံ၏ ပထမဆုံးနှင့် အဓိကသဘောတူညီချက် အဖြစ် ဗြိတိန်နိုင်ငံနှင့် ဂျပန်နိုင်ငံတို့အကြား ကုန်သွယ်ရေးသဘောတူညီချက်ရရှိခဲ့ကြောင်း သိရ သည်။ ဗြိတိန်၏ ကုန်သွယ်ရေးအတွင်းဝန် Liz Truss နှင့် ဂျပန်နိုင်ငံခြားရေးဝန်ကြီး Motegi Toshimitsu တို့အကြား ၁၁-၉-၂၀၂၀ ရက်နေ့က ဗီဒီယို call ဖြင့်တွေ့ဆုံမှုတွင် ဗြိတိန်-ဂျပန် စီးပွားရေးမိတ်ဖက်ပူးပေါင်းဆောင်ရွက်မှုသဘောတူညီချက်ကို မူအားဖြင့် သဘောတူညီခဲ့ကြခြင်း ဖြစ်သည်။ ယခုသဘောတူညီချက်သည် ဗြိတိန်ခွဲထွက်မှုအလွန် ပထမဆုံး ကုန်သွယ်ရေးသဘော တူညီချက်ဖြစ်သဖြင့် ဗြိတိန်နိုင်ငံနှင့် ဂျပန်နိုင်ငံတို့အတွက် သမိုင်းဝင်အခိုက်အတန့်ဖြစ်ကြောင်း Liz Truss ကပြောကြားခဲ့သည်။
အီးယူ-ဂျပန် ကုန်သွယ်ရေးသဘောတူညီချက်အပေါ် အခြေခံ၍ ဗြိတိန်-ဂျပန် ကုန်သွယ် မှုသဘောတူညီချက်အတွက် စေ့စပ်ညှိနှိုင်းဆွေးနွေးမှုများကို ပြီးခဲ့သည့် ဇွန်လက စတင်ခဲ့ခြင်းဖြစ်ပြီး၊ ယခုသဘောတူညီချက်ကြောင့် ဗြိတိန်၏ ဂျပန်နိုင်ငံနှင့် ကုန်သွယ်မှုတွင် စတာလင်ပေါင် ၁၅ ဒသမ ၂ ဘီလီယံခန့် တိုးတက်လာနိုင်ကြောင်း ခန့်မှန်းထားသည်။ သဘောတူညီချက်အရ ဗြိတိန်နိုင်ငံမှ ဂျပန်နိုင်ငံသို့ ဝက်သားနှင့် အမဲသားတင်ပို့မှုအတွက် အခွန်နှုန်းထားများကို လျှော့ချသွားမည်ဖြစ် သည်။ Stilton ဒိန်ခဲကဲ့သို့သော စားသောက်ကုန်ပစ္စည်းများကိုလည်း သက်သာသောအခွန်နှုန်းဖြင့် တင်ပို့နိုင်မည်ဖြစ်သည်။
ဗြိတိန်-ဂျပန် ကုန်သွယ်ရေးသဘောတူညီချက်သည် Comprehensive and Progressive Agreement for Trans-Pacific Partnership (CPTPP) တွင် ပူးပေါင်းပါဝင်နိုင်ရေး ဗြိတိန်နိုင်ငံ အတွက် အရေးပါသော ခြေလှမ်းတစ်ရပ်လည်းဖြစ်ကြောင်း၊ ယင်းသဘောတူညီချက်သည် ဗြိတိန်၏ စီးပွားရေးလုပ်ငန်းများအား အာရှပစိဖိတ်ဒေသသို့ ဝင်ပေါက်တစ်ခုသဖွယ်ဖြစ်နိုင်ပြီး၊ ထုတ်လုပ်မှု ကွင်းဆက် အမျိုးမျိုးကွဲပြားနိုင်စေရေးနှင့် ကြံ့ကြံခံနိုင်စွမ်းရှိစေရေးတို့ကို အထောက်အကူပေးနိုင် မည်ဖြစ်ကြောင်း၊ ဗြိတိန်၏ စီးပွားရေးလုပ်ငန်းများအနေဖြင့် ဂျပန်နိုင်ငံသို့ ပို့ကုန်များ၏ ၉၉ ရာခိုင် နှုန်းအပေါ် အခွန်သက်သာခွင့်အကျိုးကျေးဇူးများ ရရှိစေမည်ဖြစ်ကြောင်း၊ ဗြိတိန်အစိုးရ၏ လေ့လာ သုံးသပ်ချက်များအရ ဗြိတိန်-ဂျပန် ကုန်သွယ်မှုသဘောတူညီချက်သည် ဗြိတိန်နိုင်ငံ၏ စီးပွားရေး ကိုမြှင့်တင်ရာတွင် စတာလင်ပေါင် ၁.၅ ဘီလီယံခန့် အကျိုးပြုနိုင်ပြီး၊ လုပ်သားများ၏ လုပ်ခလစာ အတွက် ကာလရှည်တွင် စတာလင်ပေါင် (၈၀၀) သန်း ဖန်တီးပေးနိုင်မည်ဖြစ်ကြောင်း သိရသည်။
ရင်းမြစ် - (Politico နှင့် https://www.gov.uk )
ကျော်စိန်ဝင်း၊စီးပွားရေးသံမှူး
မြန်မာသံရုံး၊ ဘရပ်ဆဲလ်မြို့