၂၀၂၀ ပြည့်နှစ် ဇန်နဝါရီလမှ ဇူလိုင်လအတွင်း ဂျပန်နိုင်ငံမှ ဆန်ကို အသင့်ချက်ပြီးထုပ်ပိုးတင်ပို့မှုသည် ပြီးခဲ့သည့်နှစ်များထက် ၂၃ ရာခိုင်နှုန်းခန့် ပိုမိုတင်ပို့နိုင်ခဲ့

ဆန်ကို အသင့်ချက်ပြီးထုပ်ပိုးတင်ပို့မှုသည် ၂၀၂၀ ပြည့်နှစ် ဇန်နဝါရီမှ ဇူလိုင်လ အတွင်းတွင် ယန်း ၃၆၅ သန်း၊ တန်ချိန်အားဖြင့် ၆၈၁ တန်ထိ တင်ပို့နိုင်ခဲ့ကြောင်း၊ အဆိုပါ ပမာဏသည် ယခင်ကာလတူနှစ်မှ တင်ပို့မှုထက် ၂၃ ရာခိုင်နှုန်းအထိ ပိုမိုတင်ပို့နိုင်ခဲ့ ကြောင်း ဂျပန်နိုင်ငံ ဘဏ္ဍာရေးဝန်ကြီးဌာန၏ ကုန်သွယ်မှုစာရင်းဇယားများအရ သိရသည်။

ကိုရိုနာကပ်ရောဂါပြန့်ပွားနေချိန်အတွင်း လူအများနေအိမ်တွင်သာ နေထိုင်စား သောက်ကြသည့်အတွက် အရသာကောင်းမွန်ပြီး လွယ်လွယ်ကူကူအသင့်စားနိုင်သည့် အသင့် ချက်ထားသော ထမင်းဘူးများသည် ပြည်ပတိုင်းပြည်များတွင် လိုအပ်ချက် မြင့်မားလာပါ သည်။

ဂျပန်၏ အသင့်ချက်ထမင်းဘူးများတင်ပို့မှုသည် ပြီးခဲ့သည့် ဇူလိုင်လ တစ်လတည်း၌ပင်  ၄၀ ရာခိုင်နှုန်းမြင့်တက်တင်ပို့နိုင်ခဲ့ပြီး တန်ဖိုးအားဖြင့် ယန်း ၆၅ သန်းခန့်ရှိကြောင်း၊ လွန်ခဲ့သည့် တစ်နှစ်ခန့်ကစ၍ တင်ပို့မှုမြင့်တက်လာခဲ့ပြီး အမေရိကန်ပြည်ထောင်စု၊ ဟောင်ကောင် နှင့် ထိုင်ဝမ်တို့သို့ အဓိကတင်ပို့နေပါကြောင်း သိရသည်။

တိုးရာမစီရင်စု နူဇန်မြို့မှ အသင့်ချက်ပြီးထမင်း ထုပ်ပိုးတင်ပို့သည့် Wooke Co., Ltd., ၏ တာဝန်ရှိသူက ဟောင်ကောင်ဒေသတွင် လိုအပ်ချက်ပိုမိုမြင့်မားလာပါသည်ကို တွေ့ရပါကြောင်း၊ ကိုရိုနာဗိုင်းရပ်စ်ပြန့်ပွားမှုကြောင့် စတိုးဆိုင် များတွင် ဆန်များ ပြတ်လပ်လာသည့်အတွက် လူအများနေဖြင့် အသင့်ချက်ပြီး ထုပ်ပိုးထားသည့် ထမင်းဘူးများသည် အရသာလည်းကောင်းမွန်ရုံသာမက လွယ်ကူအဆင်ပြေသဖြင့် ဝယ်လိုအား မြင့်တက်လာခြင်းဖြစ်ကြောင်းပြော ကြားခဲ့သည်။

ဂျပန်နိုင်ငံ၏ ဆန်အရည်အသွေးကောင်းမွန်ကြောင်း လူအများက အသိအမှတ်ပြုကြ သည့်အတွက် ဆန်ထွက်ကုန်ပစ္စည်းထုတ်လုပ်သူများက ဝယ်လိုအား ပိုမိုမြင့်မားလာနိုင် ကြောင်း မျှော်မှန်းနေကြပါသည်။ ပြည်ပနိုင်ငံများ၏ ဝယ်လိုအားမြင့်မားလာစေရေး မျှော်မှန်းချက်နှင့်အတူ ဂျပန်နိုင်ငံတွင် ဆန်အဓိက စိုက်ပျိုးထုတ်လုပ်သည့် အာခိတစီရင်စုရှိ အိုဂါတ ကျေးရွာသည် အသင့်ချက်ပြီးထုပ်ပိုးထားသည့် ထမင်းဘူးများ ထုတ်လုပ်မှု မြှင့်တင်ရန် စက်ရုံ အသစ်တစ်ခုကို တည်ဆောက်နေပါသည်။

ဂျပန်နိုင်ငံ၊ ဆန်နှင့် ဆန်တင်ပို့မှုမြှင့်တင်ရေးအသင်းသည် ပြည်ပစျေးကွက်များ (အထူးသဖြင့် တရုတ်နိုင်ငံမှ လူကုံတန်များနှင့် ကလေးရှိသည့် အိမ်ထောင်စုများ) ထံ ရည်ရွယ်တင်ပို့ရန် ထုတ်လုပ်မှုသက်တမ်းကြာရှည်ခံပြီး အလွယ် တကူပြင်ဆင်စားသောက်နိုင်သည့် ထုတ်ကုန်များကို ဦးစားပေးထုတ်လုပ်တင်ပို့ရန် ကြိုးပမ်းနေကြောင်း သိရသည်။

ဂျပန်စိုက်ပျိုးရေးဝန်ကြီးဌာန၏ အဆိုအရ လတ်တလောတွင် ဆန်တင်ပို့မှု အနည်းငယ် နှေးကွေးလာကြောင်း၊ ဇူလိုင်လအတွင်းက ပို့ကုန်တင်ပို့မှုမြင့်တက်လာသဖြင့် ယခင်နှစ်ကာလတူထက် ဆန်တင်ပို့မှုမြင့်တက်လာခြင်းဖြစ် ကြောင်း၊ မတ်လနှင့် မေလအတွင်းက ၂၀ ရာခိုင်နှုန်းမှ ၅၀ ရာခိုင်နှုန်းအကြား မြင့်တက်လာခဲ့ပါကြောင်း သိရသည်။

စားသောက်ကုန် ထုတ်လုပ်ပို့ကုန်တင်ပို့မှုပမာဏသည် ဇူလိုင်တစ်လတည်းပင်လျှင် တန်ဖိုးအားဖြင့် ယန်း ၇၅ ဒသမ ၆ ဘီလီယံရှိခဲ့ပြီး ဇန်နဝါရီလမှ ဇူလိုင်လအထိ တင်ပို့မှု တန်ဖိုး ယန်း ၄၈၇ ဒသမ ၆ ဘီလီယံရှိခဲ့ကြောင်း သိရသည်။

 နန္ဒာဝင်း၊ စီးပွားရေးသံမှူး၊ မြန်မာသံရုံး၊ တိုကျိုမြို့