ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး၏ ဦးဆောင်မှုဖြင့် ရင်းနှီးမြှုပ်နှံမှုနှင့်သက်ဆိုင်သည့် စီးပွားရေးဆိုင်ရာ လိုင်စင်၊ ပါမစ်၊ ထောက်ခံ ချက်များ ပြန်လည်သုံးသပ်ခြင်း အစည်းအဝေးကို ရုံးအမှတ် (၁)၊ ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးရုံးတွင် ၂၀၂၁ ခုနှစ်၊ မေလ ၃ ရက် နေ့တွင် Video Conferencing ဖြင့် ကျင်းပပြုလုပ်ခဲ့ပါသည်။
အစည်းအဝေးတွင် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးက မြန်မာနိုင်ငံရင်းနှီးမြှုပ်နှံမှုကော်မရှင်၏ ခွင့်ပြုမိန့်၊ အတည်ပြုမိန့်များ ရရှိပြီးနောက်ပိုင်း သက်ဆိုင်ရာဝန်ကြီးဌာနများ/ အဖွဲ့အစည်းများ၏ စီးပွားရေးနှင့် သက်ဆိုင် သည့် လိုင်စင်၊ ပါမစ်၊ ထောက်ခံချက်များကို ဆက်လက်လျှောက်ထားရယူရာတွင် အချို့ လိုင်စင်၊ ပါမစ်၊ ထောက်ခံချက်များအတွက် အခက်အခဲများနှင့် ကြန့်ကြာမှုများ ကြုံတွေ့ နေရကြောင်း၊ သို့ပါ၍ သက်ဆိုင်ရာ လိုင်စင်၊ ပါမစ်၊ ထောက်ခံချက်များ ထုတ်ပေးမှုအပေါ် ပြန်လည်သုံးသပ်၍ ဖြေလျော့မှုများဆောင်ရွက်သွားရန် လိုအပ်လျက်ရှိပါကြောင်း၊ ထိုသို့ ပြန်လည်သုံးသပ်ရန်အတွက် နိုင်ငံတော်စီမံအုပ်ချုပ်ရေးကောင်စီသို့ တင်ပြခဲ့ရာ “ရင်းနှီး မြှုပ်နှံမှုလုပ်ငန်းများနှင့် သက်ဆိုင်သည့် လိုင်စင်၊ ပါမစ်၊ ထောက်ခံချက်များ ပြန်လည် သုံးသပ်ရေးအဖွဲ့” ကို ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ဒုတိယ ဝန်ကြီး ဦးဆောင်၍ သက်ဆိုင်ရာဝန်ကြီးဌာနများမှ အဆင့်မြင့်အရာရှိများဖြင့် ဖွဲ့စည်းတာဝန် ပေးအပ်ခဲ့ပါကြောင်း၊ သက်ဆိုင်ရာဌာနများအနေဖြင့် နိုင်ငံ့စီးပွားရေးကို လျင်လျင်မြန်မြန် ဉီးမော့လာစေရန် ကြိုးပမ်း ဆောင်ရွက်ရာတွင် စီးပွားရေးလုပ်ငန်းများ ယခင်ကထက် ပိုမိုလွယ်ကူ လျင်မြန်သွက်လက်စွာဖြင့် ဆောင်ရွက်နိုင်ရေးအတွက် တီထွင်ကြံဆမှုဖြင့် ပူးပေါင်းဆောင်ရွက်ကြရန် ပြောကြားခဲ့ပါသည်။
ပြည်ထောင်စုဝန်ကြီးမှ ဆက်လက်ပြောကြားရာတွင် ယနေ့အချိန်အခါ အခြေအနေ အရ စီးပွားရေးကဏ္ဍတစ်ရပ်လုံး မြန်မြန်ဆန်ဆန်နှင့် လည်ပတ်လုပ်ဆောင်နိုင်ရန် အရေး တကြီးလိုအပ်နေချိန်ဖြစ်၍ ဥပဒေ၊ နည်းဥပဒေများအရ မဖြစ်မနေ ရယူဆောင်ရွက်ရမည့် ကိစ္စရပ်များမှအပ ဖြေလျော့ဆောင်ရွက်ပေးနိုင်မည့် ကိစ္စရပ်များကို လည်းကောင်း စတုတ္ထ စက်မှုပြုပြင်ပြောင်းလဲရေးကိုတစ်ကမ္ဘာလုံးက အရှိန်အဟုန်နှင့် ဆောင်ရွက်နေချိန်ဖြစ်၍ လူ ကိုယ်တိုင် စာရွက်စာတမ်းအထောက်အထားများစွာဖြင့် ဆောင်ရွက်နေရသည့်ကိစ္စရပ်များ အား Online စနစ်ဖြင့် ပြောင်းလဲကျင့်သုံးနိုင်ရေးအတွက် လည်းကောင်း၊ One Stop Service ဖြင့် ဆောင်ရွက်ရန် စံ လုပ်ထုံးလုပ်နည်း (SOP) ရေးဆွဲဆောင်ရွက်ရန် ကိစ္စများအတွက် နည်းပညာအကူအညီအထောက်အပံ့ လိုအပ်ချက်များအတွက်လည်း တင်ပြရန် ဆွေးနွေး မှာကြားခဲ့ပါသည်။
ထို့နောက် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ဒုတိယဝန်ကြီး က အဖွဲ့၏လုပ်ငန်းနှင့်စပ်လျဉ်း၍ ရှင်းလင်းဆွေးနွေးရာတွင် ရင်းနှီးမြှုပ်နှံမှုနှင့် သက်ဆိုင်သည့် ပြည်ထောင်စုအဆင့်ဝန်ကြီးဌာနနှင့် ပြည်ထောင်စုအဆင့်အဖွဲ့အစည်း ၁၆ ခု က ခွင့်ပြု ပေးလျက်ရှိသည့် လိုင်စင်၊ ပါမစ်၊ ထောက်ခံချက် စုစုပေါင်း ၂၇၃ မျိုးရှိပြီး မြန်မာနိုင်ငံ ရင်းနှီးမြှုပ်နှံမှုကော်မရှင်က ခွင့်ပြုပေးသည့်လုပ်ငန်းများနှင့် တိုက်ရိုက်ဆက်စပ် လျက်ရှိသည့် လိုင်စင်၊ ပါမစ်၊ ထောက်ခံချက်အရေအတွက်မှာ ၁၅၁ မျိုး ရှိသည်ကို ပဏာမ စိစစ် တွေ့ရှိပါကြောင်း၊ အဆိုပါ လိုင်စင်၊ ပါမစ်၊ ထောက်ခံချက်များအနက် လူကိုယ်တိုင်လာရောက် လျှောက်ထားရယူရသည့် လိုင်စင်၊ ပါမစ်၊ ထောက်ခံချက် ၁၃၄ မျိုး ရှိနေသည်ကို တွေ့ရပါကြောင်း၊ လိုင်စင်၊ ပါမစ်၊ ထောက်ခံချက်များ ထုတ်ပေးသည့် အဖွဲ့ အစည်းများမှ တာဝန်ရှိသူများနှင့် ညှိနှိုင်းအစည်းအဝေးများ ဆက်လက်ကျင်းပ ဆောင်ရွက် သွားမည် ဖြစ်၍ ပူးပေါင်း ပါဝင်ကြရန် ဆွေးနွေးခဲ့ပါသည်။
ထို့နောက် တက်ရောက်လာကြသည့် ဝန်ကြီးဌာနများနှင့် အဖွဲ့အစည်းများမှ ကိုယ်စားလှယ်များက စီးပွားရေးလုပ်ငန်းများနှင့် ပတ်သတ်သည့် လိုင်စင်၊ ပါမစ်နှင့် ထောက်ခံချက်များ စိစစ်ပေးနေမှုနှင့် ဖြေလျော့ ဆောင်ရွက် ပေးနေမှုအခြေအနေများကို ရှင်းလင်းဆွေးနွေးတင်ပြခဲ့ကြပါသည်။
ဆက်လက်၍ “ရင်းနှီးမြှုပ်နှံမှုလုပ်ငန်းများနှင့် သက်ဆိုင်သည့် လိုင်စင်၊ ပါမစ်၊ ထောက်ခံချက်များ ပြန်လည်သုံးသပ်ရေးအဖွဲ့”၏ အတွင်းရေးမှူး၊ ရင်းနှီးမြှုပ်နှံမှုနှင့် ကုမ္ပဏီ များ ညွှန်ကြားမှုဦးစီးဌာနမှ ဒုတိယညွှန်ကြားရေးမှူးချုပ်က အဖွဲ့အနေဖြင့် အသေးစိတ် ဆက်လက်ဆောင်ရွက်မည့်အစီအစဉ်များကို တင်ပြခဲ့ပါသည်။
အစည်းအဝေးသို့ ရင်းနှီးမြှုပ်နှံမှုနှင့်သက်ဆိုင်သည့် ဝန်ကြီးဌာနများမှ ညွှန်ကြားရေးမှူး ချုပ်များနှင့် “ရင်းနှီးမြှုပ်နှံမှုနှင့်သက်ဆိုင်သည့် လိုင်စင်၊ ပါမစ်၊ ထောက်ခံချက်များ ပြန်လည် သုံးသပ်ရေးအဖွဲ့” အဖွဲ့ဝင်များ စုစုပေါင်း (၅၀) ဦး ခန့် တက်ရောက်ခဲ့ပြီး အစည်းအဝေးကို မွန်းလွဲ ၁၅:၃၀ နာရီတွင် ရုပ်သိမ်းခဲ့ပါသည်။
DICA