စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူး ခရိုင်၊ စလင်းမြို့နယ်မှ ဝန်ထမ်းများသည် ဆင်ဖြူကျွန်းမြို့ သရက်ချဉ်ကျေးရွာရှိ မိုးနှောင်းကြက်သွန်နီ အပင်စိုက် စိုက်ပျိုးလျက်ရှိသော တောင်သူဦးမောင်မောင်လွင်နှင့် တွေ့ဆုံ၍ ကြက်သွန်နီစိုက်ပျိုးမှု အခြေအနေများ မေးမြန်းဆွေးနွေးခဲ့ရာ ၎င်းအနေဖြင့် ယခုနှစ်တွင် ၁၈ ဧကခန့်စိုက်ပျိုးထားရှိကြောင်း၊ ဇူလိုင်လတွင် ပျိုးထောင်၍ စက်တင်ဘာလတွင် အပြီးစိုက်ပျိုးခဲ့ရာ ယခုအချိန်တွင် ၇၅ ရက်ခန့်ရှိပြီး ဒီဇင်ဘာလလယ်တွင် ရိတ်သိမ်းမည်ဖြစ်ရာ အထွက်နှုန်းအားဖြင့် တစ်ဧကလျှင် ပိဿာ ၆၀ဝ၀-၆၅၀ဝ အထိ ထွက်ရှိရန် မျှော်မှန်းကြောင်း သိရှိရသည်။
၎င်းတောင်သူအနေဖြင့် မိုးနှောင်းကြက်သွန်နီကို သရက်ချဉ်ကျေးရွာအုပ်စု ကွင်းအမှတ် ၄၄၂ တွင် တစ်စုတစ်စပ်တည်း စိုက်ပျိုးပြီး ရွှေဖလား(မြစ်သား)မျိုးများ စိုက်ပျိုးထားကြောင်း၊ စိုက်နည်းစနစ်မှာ ပင်ကြား ၃ လက်မတန်းကြား ၄ လက်မ အကွာအဝေး စိုက်ပျိုးထားကြောင်းနှင့် ယခုနှစ်တွင် ရာသီဥတုကောင်းမွန်ပြီး ပိုးမွှားကျရောက်မှု နည်းပါးသောကြောင့် ယခင်နှစ်ထက် ကြက်သွန်နီ အထွက်ကောင်းနိုင်ကြောင်း တောင်သူဦးမောင်မောင်လွင်၏ ပြောကြားချက်အရ သိရှိရသည်။
သီဟဝင်း(စလင်း)