စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ၂၀၀၀ ပြည့် နှစ်က ထုတ်ပြန်ခဲ့တဲ့ အမိန့်အမှတ် ၅/၂၀၀၀ နှင့် ၆/ ၂၀၀၀တို့အား လက်ရှိဆောင်ရွက်လျက်ရှိတဲ့ အခြေအနေများနှင့် ကိုက်ညီမှုမရှိတော့တဲ့အတွက် ပယ်ဖျက်လိုက်ကြောင်း ၂၀၁၄ ခုနှစ် စက်တင်ဘာလ၃၀ရက်စွဲပါ အမိန့်ကြော်ငြာစာအမှတ် ၆၀/၂၀၁၄ ဖြင့် ပြည်ထောင်စုဝန်ကြီး ရုံးမှ ထုတ်ပြန်
လိုက်ပါတယ်။
အမိန့်အမှတ် ၅/၂၀၀၀ မှာ မြန်မာ-တရုတ် နယ်စပ်ဒေသနဲ့ မြန်မာ-အိန္ဒိယ နယ်စပ်ဒေသ၊ အမိန့်အမှတ် ၆/၂၀၀၀ မှာ
မြန်မာ-ထိုင်းနယ်စပ်ဒေသ များမှာ နှစ်နိုင်ငံသုံးငွေကြေး၊ အမေရိကန်ဒေါ်လာတို့ဖြင့်ရောင်းဝယ်ခွင့်ပြုထားပြီးရောင်းချ တဲ့ငွေကြေးဖြင့် အခွန်ပေးဆောင်ရန် ၂၀၀၀ ပြည့်နှစ်က ထုတ်ပြန်ထားခဲ့ခြင်းဖြစ်ပါတယ်။
ယခုအခါ နယ်စပ်ဒေသများမှာ ကုန်သွယ်မှုနည်းလမ်းအလိုက် ဆောင်ရွက်ခွင့်ပြုတဲ့ငွေကြေး၊ ဆောင်ရွက်ခွင့်ပြုတဲ့ကုန်
ပစ္စည်းများကို သတ်မှတ်ထားပြီး ဖြစ်တဲ့အပြင် အခွန်ကောက်ခံမှုအပိုင်းကို သက်ဆိုင်ရာဘဏ္ဍာရေးဝန်ကြီးဌာနရဲ့ ဥပဒေ အရ ဆောင်ရွက်လျက်ရှိနေပြီ ဖြစ်ပါတယ်။ ထို့အပြင် သွင်းကုန်လိုင်စင် ကြေးကိုလည်း ကျပ်ငွေဖြင့်ကောက်ခံနေ ပြီဖြစ် တဲ့အတွက် လက်ရှိဆောင်ရွက်လျက်ရှိသော အခြေအနေနဲ့ကိုက်ညီခြင်းမရှိသဖြင့် ယခင်ထုတ်ပြန်ထားသော အမိန့် အမှတ် ၅/၂၀၀၀ နှင့် ၆/၂၀၀၀ တို့အား ပယ်ဖျက်လိုက်ခြင်း ဖြစ်တယ်လို့ သိရပါတယ်။