ဧပြီနောက်ဆုံးပတ် မန်ကျည်းပို့အားကောင်း             ဧပြီနောက်ဆုံးပတ်မှာ မန်ကျည်းတန်ချိန် ၆ဝ တန်ကို ပင်လယ်ရေကြောင်း ကုန်သွယ်မှုလမ်းကနေ တင်ပို့ခဲ့ပါတယ်။ တင်ပို့ခဲ့တဲ့ နိုင်ငံတွေမှာ အင်ဒိုနီးရှားနိုင်ငံ ကို ၂၄၇ တန်၊ မလေးရှားကို ၁ဝ၂ တန်၊ စင်ကာပူနိုင်ငံကို ၁၃၂ တန်နဲ့ အာရပ် စော်ဘွားများ ပြည်ထောင်စုနိုင်ငံကို တန်ချိန် ၁၂ဝ အသီးသီးတင်ပို့ခဲ့ပါတယ်။ ဧပြီလ ဒုတိယပတ်အတွင်း ၉၆ တန်သာ တင်ပို့နိုင်ခဲ့တဲ့ မန်ကျည်းက ဒီတစ်ပတ် မှာတော့ အပို့သာခဲ့တယ်လို့ ဆိုရပါမယ်။ ဧပြီလအတွင်း မန်ကျည်းတင်ပို့မှုမှာ တန်ချိန် ၈၉ဝ ကျော်ရှိခဲ့ပြီး မတ်လအတွင်း တင်ပို့မှုက တန်ချိန် ၁၇ဝဝ နီးပါးရှိခဲ့ တဲ့အတွက် မတ်လထက် အပို့လျော့နည်း ခဲ့ပါတယ်။ တစ်တန်ကို အက်ဖ်အိုဘီဈေး ကန်ဒေါ်လာ ၃၉ဝ ဝန်းကျင်နဲ့ တင်ပို့ခဲ့အတွက် စုစုပေါင်းပို့ကုန်ဝင်ငွေ ကန်ဒေါ်လာ နှစ်သိန်း သုံးသောင်းကျော်ရရှိခဲ့ပါတယ်။                                                                 MIRT (DOT) 

ရှမ်းနနွင်းဈေး ခပ်အေးအေး                   ဒီတစ်ပတ် နနွင်းဈေးက ခပ်အေးအေးပါပဲ။ နနွင်းပြန်စိုက်ဖို့အတွက် တောင်သူတွေလည်း ပြင်ဆင်နေကြ ပါပြီ။ ဒီနှစ်အထွက်နှုန်းက မနှစ်ကလောက်ပစ္စည်းမများသလို အရောင်းလည်းမသွက်ဘူးလို့ သိရပါတယ်။ လှောင်လက်တွေရဲ့ လက်ထဲမှာ သာရှိပြီး ဈေးကွက်ထဲကို တဖြည်းဖြည်းနဲ့ အဝင်နည်းလာတယ်လို့လည်း သိရပါတယ်။ လှောင်လက်တွေကလည်း ကြိုက်ဈေး မရရင် မထုတ်သေးဘဲ လှောင်ထားကြဦးမှာဖြစ်ပါတယ်။ ပင်လောင်းနနွင်း တွေကလည်း အောင်ပန်းဈေးကွက်ကို သိပ်မလာတော့ပဲ လိန်းလီကတစ်ဆင့် အောက်ဖက်ကို ဆင်းနေတယ် လို့လည်း သိရပါတယ်။ ဒီနှစ်က ပြည်ပဝယ်လိုအားနည်းပြီး ပြည်တွင်းသုံးအတွက်သာ ဝယ်ယူနေတာကြောင့် မနှစ်ကလောက်အရောင်းမသွက်ပါဘူး။ မူဆယ်ဝယ်လက်တွေကတော့ ငွေဈေးကျနေတာကြောင့် အဝယ်ရပ်သွား တယ်လို့ သိရပါတယ်။              ဒီတစ်ပတ်နနွင်းဈေးက အောင်ပန်းဈေးကွက်မှာ လက်ကျန် ဆင်တောင်နနွင်းက တစ်ပိဿာ ၃၅ဝဝ ကျပ်ဈေးရှိပြီး၊ ကျန်နနွင်းတွေကတော့ ၂၁ဝဝ ကျပ်မှ ၂၃ဝဝ ကျပ်ဈေးရှိပါတယ်။ ဟိုပုံးနနွင်းကတော့ တစ်ပိဿာ ၂၃၅ဝ ကျပ် ဈေးရှိပါတယ်။ တောင်ကြီးဈေးကွက်မှာလည်း နနွင်းဈေးက တစ်ပိဿာ ၂၃၅ဝ ကျပ်ဈေးရှိတယ်လို့ နနွင်းပွဲရုံတွေက သိရပါတယ်။              ဧဧခိုင် 

ဧပြီလအတွင်း နနွင်း ၁၆၆ တန်တင်ပို့နိုင်ခဲ့               ဧပြီလနောက်ဆုံးပတ်မှာတော့ နနွင်းတန်ချိန် ၇၇ တန်ကိုတင်ပို့ခဲ့ပါတယ်။ တင်ပို့ခဲ့တဲ့နိုင်ငံမှာ မလေးရှားကို ၇၅ တန်နဲ့ သြစတြေးလျနိုင်ငံကို ၂ တန်ဖြစ်ပါတယ်။ တစ်တန်ကို အက်ဖ်အိုဘီဈေး ကန်ဒေါ်လာ ၁၈၈ဝ ဝန်းကျင်နဲ့ တင်ပို့ခဲ့တဲ့ အတွက် စုစုပေါင်းပို့ကုန်ဝင်ငွေ ကန်ဒေါ်လာ တစ်သိန်းလေးသောင်းကျော် ရရှိခဲ့ပါတယ်။ ဧပြီလ နနွင်းတင်ပို့မှု စုစုပေါင်းမှာ ၁၆၆ တန်ရှိခဲ့ပြီး မတ်လရဲ့ နနွင်းတင်ပို့မှု စုစုပေါင်းမှာ ၂၃၄ တန်ကျော်ရှိခဲ့တဲ့အတွက် မတ်လထက် တင်ပို့မှု လျော့နည်းခဲ့တယ်လို့ ဆိုရပါမယ်။             MIRT (DOT) 

အောင်ပန်းချင်းသစ်ဈေးကွက်ဝင်                 မေပထမပတ် အောင်ပန်းဈေးကွက်ကို အောင်ပန်းမြို့နယ်မြောက်ဘက်က အသစ်ဖော်တဲ့ချင်းတွေ ဝင်နေပါတယ်။ အောင်ပန်းမြောက်ဘက်နယ်တွေ ဖြစ်တဲ့ လွယ်မော၊ သာမိုင်းခမ်းစတဲ့နယ်တွေက ချင်းကို အခုမှ ဖော်ကြတာကြောင့် ဈေးကွက်ကို အသစ်လိုဝင်နေကြတယ်လို့ သိရပါတယ်။ ချင်းစိုသက်တမ်းက ၅ လရှိပြီး၊ ချင်းအခြောက်ဆိုရင် တစ်နှစ်ထားလို့ရပါတယ်။ ဈေးကွက်အခြေအနေအရ မတူးပဲ မြေထဲမှာ ၃ လမှ ၄ လအထိ ထားနိုင်တာကြောင့် တောင်သူတွေကလည်း စိတ်ကြိုက်ဈေးရတဲ့အချိန်မှ ဖော်ကြပါတယ်။ အခုလည်း ချင်းအသစ်ပြန်စိုက်တော့ မှာ ဖြစ်တာကြောင့်ရယ်၊ ကြိုက်ဈေးလည်းရတာကြောင့်ရယ် တောင်သူတွေက ဖော်ပြီးရောင်းလာကြပါတယ်။ ချင်းကို ဧပြီလကုန်၊ မေလမှာစပြီး စိုက်ပျိုးကြပါတယ်။               ဟိုပုံးဈေးကွက်မှာတော့ ချင်းစိုက အဝင်လည်းမရှိ၊ လက်ကျန်လည်း မရှိသလောက်ဖြစ်သွားပြီလို့ ဒေသခံကုန်သည်တွေထံက သိရပါတယ်။ ဒီနှစ်ရာသီဥတု အခြေအနေက ဒီအတိုင်းသာ မိုးကောင်းနေမယ်ဆိုရင် သီးနံှတွေ မနှစ်ကထက် အထွက်နှုန်းကောင်းနိုင်တယ်လို့ ခန့်မှန်းနေကြပါတယ်။ အောင်ပန်းဈေးကွက်မှာ ချင်းစိုဈေးက အရည်အသွေးပေါ်မူတည်ပြီး တစ်ပိဿာကို ၃ဝဝ ကျပ်မှ ၁၃ဝဝ ကျပ်ဈေးထိရှိပါတယ်။ လတ်လတ်ဆတ်ဆတ်ချင်း (ဖော်ပြီးစ) တွေကတော့ တစ်ပိဿာ ၁၄ဝဝ ကျပ်ဈေးရှိပြီး ချင်းခြောက်က တစ်ပိဿာ ၂ဝဝဝ ကျပ်မှ ၂၃ဝဝ ကျပ်ဈေးရှိပါတယ်။ တောင်ကြီးဈေးကွက်မှာတော့ ချင်းခြောက်တစ်ပိဿာ ၂၄ဝဝ ကျပ်ဈေးရှိပါတယ်။          ဧဧခိုင်