အိန္ဒိယနိုင်ငံ စားသောက်ကုန်နဲ့ စားသုံးသူရေးရာ ဝန်ကြီးဌာနက ကြက်သွန်နီအတွက် ပို့ကုန် အနိမ့်ဆုံးဈေးနှုန်း သတ်မှတ်ချက်  minimum export price (MEP)ကို ထပ်မံလျှော့ချပေးတော့မှာ မဟုတ်ကြောင်းနဲ့ သကြားတင်ပို့မှု ကို ခွင့်ပြုသွားမှာမဟုတ်ကြောင်း နိုဝင်ဘာလ ၂ ရက် သတင်း အရ သိရှိရပါတယ်။                              MEP ဈေးနှုန်းကို ထပ်မံလျှော့ချပေးလိုက်ပါက ပြည်တွင်း ဈေးကွက်မှာ ကြက်သွန်နီဈေးနှုန်းတွေ ထပ်မံမြင့်တက် လာမှာ စိုးရိမ်တာကြောင့် ဝန်ကြီးများ တွေ့ဆုံဆွေးနွေးကာ စဉ်းစားခဲ့ကြခြင်းဖြစ်တယ်။                               ယခုလောလောဆယ်ပြည်တွင်းဈေးကွက်မှာ ကြက်သွန်နီရောင်းလိုအားက နိုဝင်ဘာလ ကြက်သွန်နီ အသစ် ဈေးကွက်ကိုဝင်ရောက်ချိန်အထိ အကန့်အသတ်ရှိနေမှာ ဖြစ်တယ်။ တကယ်လို့ MEP  ကိုနှိမ့်ချပေးလိုက် ပါက ကြက်သွန်နီ ထုတ်လုပ်သူတွေက ပြည်တွင်းမှာ ရောင်းချမှာထက် ပိုမို တင်ပို့နိုင်မယ့် မက်လုံးတွေကိုရရှိမှာ ဖြစ်ရာ ကြက်သွန်နီ အသစ် နိုဝင်ဘာလ ဈေးကွက်ကိုမရောက်ခင် ကြက်သွန် ဈေးနှုန်းတွေ မြင့်တက်သွားနိုင်မှာဖြစ်တယ်။                                အပြည်ပြည်ဆိုင်ရာဈေးကွက်မှာ ကြက်သွန်နီဈေးနှုန်းက ထိခိုက်လွယ်ပြီး ဝယ်ယူသူတွေက အိန္ဒိယ ကြက်သွန်နီထက် ဈေးပိုမိုသက်သာတဲ့တရုတ်နဲ့ ပါကစ္စတန်နိုင်ငံတွေမှ ပြောင်းလဲ  ဝယ်ယူနိုင်မှာဖြစ်တယ်။ ဒါ့အပြင် သကြားကိုပြည်တွင်းဈေး ကွက်မှာသကြားအသစ်မရောက်မချင်း နောက်ထပ်တင်ပို့ ခွင့်ပြုဦးမှာ မဟုတ်ကြောင်း သိရှိရတယ်။ တင်ပို့ခြင်းနဲ့ တင်သွင်းခြင်းတို့ကို ခွင့်မပြုမီ မိမိတို့ရဲ့ထုတ်လုပ်မှု၊ ဝယ်လိုအားနဲ့ ရောင်းလိုအား ဖြစ်နိုင်ခြေတို့ကို တွက်ချက်ရမှာဖြစ်တယ်။                               စက်တင်ဘာလက အစိုးရက ကြက်သွန်နီ ပို့ကုန် တားမြစ်ချက်ကို ပြန်လည်ဖယ်ရှားပေးလိုက်ပြီး အနိမ့်ဆုံး ပို့ကုန်ဈေးနှုန်း သတ်မှတ်ချက်မှာ တစ်တန်ကို ကန်ဒေါ်လာ ၄၇၅ ဖြစ်တယ်။ နှစ်စဉ်ကြက်သွန်နီထုတ်လုပ်မှုရဲ့ ၁၀ ရာခိုင်နှုန်းမှ ၁၅ ရာခိုင်နှုန်းကို ပုံမှန် kharif (ဇူလိုင်လမှအောက်တိုဘာလ အတွင်း) ရာသီမှာဖြစ်ပြီး ၃၀ ရာခိုင်နှုန်း မှ ၄၀ ရာခိုင်နှုန်းကို kharif  ရာသီနှောင်းပိုင်းမှာ ထွက်ရှိတယ်။ ကျန်ကြက်သွန်နီ က rabi  (အောက်တိုဘာလမှ ဖေဖော်ဝါရီလအတွင်း) ရာသီ မှာ ထွက်ရှိတယ်။                            ကြက်သွန်နီအဓိက စိုက်ပျိုးတဲ့ နိုင်ငံတွေမှ တရုတ်၊ အိန္ဒိယ၊ အမေရိကန်ပြည်ထောင်စု၊ ဂျပန်၊ စပိန်၊ တူရကီ၊ ဘရာဇီး၊ အီတလီ၊ အီဂျစ်နဲ့ ပါကစ္စတန်နိုင်ငံတို့ ဖြစ်ကြတယ်။ အိန္ဒိယကြက်သွန်နီ ပို့ကုန်အနိမ့်ဆုံးဈေးနှုန်း သတ်မှတ်ချက်ကြောင့် ကမ္ဘာ့ဈေးကွက်မှာ ယှဉ်ပြိုင်နိုင်စွမ်းရည်လျော့ကျ လျက် ရှိကြောင်း သိရှိရပါတယ်။ အေးမွန်မွန်လှိုင်၊ Source: business-standard.com

                   အိန္ဒိယပြည်တွင်းဈေးကွက်များအတွင်း နိုဝင်ဘာ၂ ရက်မှာနနွင်းလက်ငင်းဈေး ရူပီး ၂၀၀၀ (ကန်ဒေါ်လာ ၄၁) ကျဆင်းခဲ့ပါတယ်။ ကျေးလက်ဒေသများမှာ မိုးအဆက်မပြတ်ရွာသွန်းတာကြောင့် အမှာအော်ဒါများရှိပေမယ့် တောင်သူ များဈေးကွက်ကို သယ်ယူမှုအခက်အခဲဖြစ်သလို ကုန်သည်များကလည်း မိုးရွာသွန်းတဲ့အတွက် နနွင်းထုပ်ပိုး သယ်ဆောင်ရာမှာ ခက်ခဲတဲ့အတွက် ဝယ်ယူမှု ရပ်ဆိုင်းထားတယ်လို့ အီရော့ နနွင်းကုန်သည်များအသင်း ဥက္ကဌမစ္စတာ အာကေဗွီရာဗီရှန်ကာမှ ပြောကြားပါတယ်။ ဈေးကွက်မှာ ၃၀-၃၅ ရာခိုင်နှုန်းသာ ရောင်းချရတယ်လို့ ဆိုပါတယ်။                  နနွင်းစိုက်ပျိုးတဲ့ အင်ဒရာပဒေ့ရှ်နဲ့ အနီးအနားပြည်နယ်များမှာ မိုးရွာသွန်းနေခြင်းကြောင့် နနွင်းအထွက် ပိုကောင်းမယ့် အလားအလာလည်း ဈေးနှုန်းကို ကျဆင်းစေပါတယ်။ တောင်သူလက်ထဲမှာ နနွင်းအိတ် ၁၀ သိန်းကျော်ခန့်ရှိနေပြီး၊ လာမယ့် သီတင်းပတ်များမှာ ထုတ်ရောင်းမှာဖြစ်လို့ ဈေးထပ်မံကျဆင်းမယ်လို့လည်း ကုန်သည်များက ခန့်မှန်းကြပါတယ်။ ဒါပေမယ့် တောင်သူတွေ လက်ရှိဈေးနဲ့ အကျိုးရှိနေတယ်လို့ ဆိုပါတယ်။ ပြည်ပတင်ပို့မှု နည်းနေဆဲဖြစ်ပေမယ့် လာမယ့် သီတင်းပတ်မှာတော့ ဥရောပ၊ အမေရိကန်၊ အနောက်အာရှနဲ့ ဂျပန်တို့က ဝယ်လိုအားတက်လာဖွယ်ရှိတယ်လို့ ခန့်မှန်းထားပါ တယ်။                 အီရော့ နနွင်းကုန်သည်များအသင်း ဈေးဝင်းမှာ နနွင်းလက်ချောင်းဈေး တစ်တန် ရူပီး ၃၂၀၉၀-၅၃၂၉၀(ကန်ဒေါ်လာ ၆၅၃-၁၀၈၄)ရှိပြီး၊ နနွင်းဥတစ်တန် ရူပီး ၃၁၉၉၀-၅၀၃၆၀ (ကန်ဒေါ်လာ ၆၅၀-၁၀၂၄)ဈေးနဲ့ အရောင်းအဝယ်ဖြစ်ခဲ့တယ်လို့ သိရပါတယ်။ ယမင်းခင်၊ Source: Hindubusiness

                           အောက်တိုဘာ ၂၃ ရက်မှ ၂၉ ရက်တာ ကာလအတွင်း နနွင်း ၄ တန်ကို ပင်လယ်ရေကြောင်း ကုန်သွယ်မှုလမ်းမှ တင်ပို့ခဲ့ ပါတယ်။ တင်ပို့ခဲ့တဲ့နိုင်ငံက မလေးရှားပဲဖြစ်ပါတယ်။ ယခင် သီတင်းပတ်က ကိုရီးယားနိုင်ငံကို တင်ပို့ခဲ့တာ ဖြစ်ပြီး ယခင်သီတင်းပတ်ထက် ဒီတစ်ပတ်မှာ နနွင်းတင်ပို့မှုလျော့ခဲ့ပါတယ်။ ယခင် လများအတွက် နနွင်းတင်ပို့မှုမှာ တစ်ပတ်ကို အနည်းဆုံးတန်ချိန် တစ်ဆယ်အထက် မှာတင်ပို့နိုင်ခဲ့တာ တွေ့ရပြီး ဒီလထဲမှာ နနွင်းတင်ပို့မှုက လျော့ခဲ့ပါတယ်။ ဒီတစ်ပတ်မှာ နနွင်းတင်ပို့မှုက တစ်တန်ကို အက်ဖ်အိုဘီဈေးပျမ်းမျှ ကန်ဒေါ်လာ ၁၅၅၀ ရရှိခဲ့လို့ စုစုပေါင်းပို့ကုန်ဝင်ငွေ ကန်ဒေါ် လာ ၆၂၀၀ ရရှိခဲ့ပါတယ်။MIRT(DOT)

                      အောင်ပန်းနဲ့ တောင်ကြီးဈေးကွက်တွင် ချင်းဟောင်းလက်ကျန်မရှိတဲ့အတွက် ချင်းစိုက်တောင်သူများမှ အရင့်လိုသေးပေမယ့် ပစ္စည်းပြတ်နေတာကြောင့် တူးဖော် ရောင်းချလျက်ရှိပါတယ်။ ယခုတစ်ပတ်မှာလည်း ချင်းအသစ်ကို လှောင်လက်များမှ အဝယ်မရှိသေးဘဲ လက်လီလက်ကားရောင်းဝယ်သူများနဲ့ ဧရာဝတီတိုင်းဒေသ ကြီး၊ ရခိုင်ပြည်နယ်တို့သို့ တင်ပို့မှုအပါအဝင် ၂၅ ပိဿာဝင် တောင်း ၂၂၀ ခန့်နဲ့ အရောင်းအဝယ် အေးလျက်ရှိနေပါတယ်။                       ပြည်ဈေးကွက်ကို ယခုတစ်ပတ် တောင်း ၅၀၀ ခန့်စီးဝင်မှုရှိခဲ့ပြီး၊ ဈေးနှုန်းမှာ တစ်ပိဿာကို ချင်းတက် (ရှယ်) ၁၀၀၀ ကျပ်၊ (ဂျွန်) ၈၀၀ ကျပ်၊ ချင်း(ဓားလှီး) ၁၂၀၀ ကျပ်တို့ဖြစ်ပြီး၊ ယခင်အပတ်အတိုင်း ဈေးနှုန်းပြောင်းလဲမှုမရှိကြောင်း သိရ ပါတယ်။ ဝင်းလဲ့ဝါ