ရှမ်းပြည်နယ်တောင်ပိုင်းထွက် ချင်းဈေးကွက်                        အောင်ပန်းချင်းဈေးကွက်မှာ ချင်းဈေးက ဈေးနှုန်းအမျိုးမျိုးနဲ့ ဝင်နေပါ တယ်။ ချင်း (သစ်) ထိပ်စတစ်ပိဿာ ၇ဝဝ ကျပ်၊ (လတ်စ) ၆ဝဝ ကျပ်၊ (ညံ့စ) က ၅ဝဝ ကျပ်ဈေးရှိပြီး၊ ချင်းခြောက်က တစ်ပိဿာ ကျပ် ၂ဝဝဝ မှ ၂၅ဝဝ ဈေး ရှိတယ်လို့ သိရပါတယ်။ ချင်းသစ်တွေကတော့ ဈေးကွက်သို့ ပုံမှန်လောက်သာ ဝင်နေပြီး ၅ ရက်တစ်ဈေးကို ပိဿာချိန် ၁ ဒသမ ၅ သောင်းခန့် အဝင်ရှိတယ်လို့ သိရပါတယ်။ အောင်ပန်းဈေးကွက်ကို အဓိကဝင်နေတဲ့ ရွာတွေကတော့ ပဲယင်းတောင်၊ သရက်ပု၊ ရေချို၊ ပင်မှီစတဲ့ရွာတွေကဖြစ်တယ်လို့ သိရပါတယ်။ ဒီနှစ် ချင်းက အိတ်စပို့မထွက်သေးဘဲ ပြည်တွင်းသုံးအဖြစ်သာ ဝယ်ယူနေတာ ကြောင့် ငွေမလိုတဲ့ တောင်သူတွေက မဖော်သေးပဲ မြေကြီးထဲမှာသာ လှောင်ထား ကြပါတယ်။ အဲဒီလိုမဖော်ပဲထားရင် မိုးဦးကျမှာ မိုးမိပါက အချိန်ထပ်တိုးတာကြောင့် မဖော်သေးဘဲထားကြတယ်လို့ သိရပါတယ်။ တောင်ကြီးဈေးကွက်မှာ ဟိုပုံးချင်းက တစ်ပိဿာ ၄ဝဝ ကျပ်- ၄၅ဝ ကျပ်၊ နမ့်စန်ချင်းက တစ်ပိဿာ ၄၅ဝ ကျပ်ဈေး ရှိတယ်လို့ ချင်းပွဲရုံတွေက သိရှိရပါတယ်။                                                                        ဧဧခိုင် 

ပြည်ဘိုကိတ် ဈေးကောင်းရနေ              ယခင်အပတ်များက ပြည်ဈေးကွက်ကို ဆင်တဲ၊ ပန်းတောင်း၊ ဥသျှစ်ပင်မြို့နယ်များမှ ဘိုကိတ်ကုန်းပဲများ နေ့စဉ် ၁၄-၁၅ အိတ်ခန့် အဝင်ရှိသော်လည်း ယခုရက်ပိုင်းတွင် ကုန်းပဲများပြတ်နေခြင်းကြောင့် အဝင်မရှိကြောင်း သိရပါတယ်။ အဝင်နည်းနေတာကြောင့် ယခင်တစ်ပတ်ဈေးထက် တစ်တင်းကို ၂ဝဝဝ ကျပ်ထိ ဈေးမြင့်တက်လာခဲ့ပြီး ပိဿာ ၂ဝ တစ်တင်းကို ၂ဝဝဝဝ ကျပ်ဈေးရှိကြောင်း သိရပါတယ်။ ဈေးတက်နေသော်လည်း နေ့စဉ် ၁ဝ-၁၅ အိတ်ဝန်းကျင် အရောင်း အဝယ် ဖြစ်နေတယ်လို့ သိရပါတယ်။                                                                                            ဆုမွန်မွန်ဆွေ 

ပြည်ဈေးကွက်၌ ပဲကြီးဈေးနှုန်းကျဆင်း                ပြည်ဈေးကွက်၌ ၂ဝ၁ဝ ဒီဇင်ဘာလကုန်အထိ ပဲဈေးကွက်အတွင်း ဈေးအမြင့်ဆုံးဖြစ်ခဲ့တဲ့ ပဲကြီးဟာ ယခု ၂ဝ၁၁ ဇန်နဝါရီလဆန်းမှစလို့ ဈေးတဖြည်းဖြည်း ကျနေတာကို တွေ့ရပါတယ်။ နှစ်ကုန်ပိုင်းမှာ ပဲကြီး (ကမ်းနား) တစ်တင်း ကျပ်၃၃၅ဝဝ နဲ့ ရွှေကျွန်းမှာ တစ်တင်း ၃၅ဝဝဝ ကျပ်ဖြင့် အရောင်းအဝယ်ဖြစ်ခဲ့ကြပြီး ဇန်နဝါရီလဆန်းမှစလို့ ပဲကြီးဈေးနှုန်းများ ကျဆင်းလျက်ရှိရာ ဇန်နဝါရီ ဒုတိယပတ်အတွင်း ပဲကြီး (ကမ်းနား) တစ်တင်း ကျပ် ၃၁၅ဝဝ နဲ့ ပဲကြီး (ရွှေကျွန်း) တစ်တင်း ကျပ် ၃၂၅ဝဝ ဈေးကျသွားခဲ့ပါတယ်။ နှစ်ကုန်ဈေးနဲ့ ယှဉ်ရင် ပဲကြီး တစ်တင်း ကျပ် ၂ဝဝဝ မှ ၂၅ဝဝ အထိ ဈေးကျသွားခဲ့ပြီး အရောင်းအဝယ်ဖြစ်မှုကတော့ တစ်ရက်ကို အိတ် ၁၅ဝ ဝန်းကျင် အရောင်းအဝယ် ဖြစ်လျက်ရှိတယ်လို့ သိရပါတယ်။                                                                                                ခင်ဆွေဝင်း 

 မြေထောက်ပဲတင်ပို့မှု ပြန်လည်မြင့်တက်လာ             ယခင်သီတင်းပတ်တွေက မြေထောက်ပဲတင်ပို့မှု သိသိသာသာ လျော့ကျခဲ့ရာမှ ယခုတစ်ပတ် (ဇန်နဝါရီလ ၇ ရက်မှ ၁၂ ရက်)အတွင်းမှာတော့ တန်ချိန် ၅ဝဝ နီးပါးထိ တိုးတင်လာတာ တွေ့ရပါတယ်။ အချို့ဈေးကွက်တွေမှာ မြေထောက်ပဲ အသစ်အနည်းအကျဉ်းဝင်ရောက်မှုရှိပေမဲ့ လက်ရှိတင်ပို့မှုကတော့ အဟောင်းလက်ကျန်တွေ များတယ်လို့ သိရပါတယ်။            အဓိကတင်ပို့နေတဲ့ နိုင်ငံကတော့ အိန္ဒိယကို ဖြစ်ပါတယ်။ ယခုဘဏ္ဍာနှစ် ဇန်နဝါရီလ ၇ ရက်နေ့အထိ မြေထောက်ပဲတင်ပို့မှုမှာ တန်ချိန် ၈ဝဝဝ ခန့်ရှိပြီး ယခင်ဘဏ္ဍာနှစ်ကာလတူ တင်ပို့မှုနဲ့ နှိုင်းယှဉ်ရာမှာ တန်ချိန် တစ်သောင်းကျော်ရှိလို့ ယခု ဘဏ္ဍာနှစ်အတွင်း တန် ၂ဝဝဝ ခန့်လျော့ကျတင်ပို့တာတွေ့ရပါတယ်။ မြေထောက်ပဲကို ပြည်ပဈေးကွက်ဝယ်လိုအား ကောင်းပေမဲ့ ယခင်နှစ်ရာသီဥတုအခြေအနေအရ အထွက်ယုတ်တာ ကြောင့် တင်ပို့မှု ကျဆင်းရခြင်းဖြစ်တယ်လို့ ဈေးကွက်က သိရပါ တယ်။           ရန်ကုန် FOB ဈေးအနေနဲ့ FAQ  တစ်တန်ကို ကန်ဒေါ်လာ ၆၆ဝ-၆၇ဝ မှာ အတော်ကြာ ငြိမ်နေခဲ့ပေမဲ့ အိန္ဒိယမွန်ဘိုင်းဈေးကွက်မှာတော့ ဇန်နဝါရီလ ၁၃ ရက်မှာ မြေထောက်ပဲ (polished )တစ်တန်ကို ကန်ဒေါ်လာ ၇၇၆ ရှိရာမှ ကန်ဒေါ်လာ ၈၁၈-၈၄ဝ ကိုလည်းကောင်း၊ (Unpolished) တစ်တန်ကို ကန်ဒေါ်လာ ၇၃၂ ရှိရာမှ ၈ဝ၇ ကိုလည်း အသီးသီးမြင့်တက်ခဲ့ကြောင်း သိရပါတယ်။                                                                            MIRT - MAPT