ပင်လယ်ရေကြောင်းက ပဲတီစိမ်းတင်ပို့မှုကတော့ ယခုတစ်ပတ်မှာလည်း တန်ချိန် ၂၁၀၀ ကျော်နဲ့ ပုံမှန်သာ တင်ပို့မှု ရှိပါတယ်။ အိန္ဒိယဝယ်လက်များ အဝယ်နှေးနေတဲ့အတွက် ပမာဏနည်းနည်းနဲ့ ပုံမှန်တင်ပို့မှုရှိခြင်း ဖြစ်ပါတယ်။ ၂၀၁၁-၂၀၁၂ဘဏ္ဍာနှစ် အောက်တိုဘာ၂၁ ရက်အထိပဲတီစိမ်းတင်ပို့မှု စုစုပေါင်းမှာ တန်ချိန် နှစ်သိန်း တစ်သောင်းကျော်ရှိပြီး ဝင်ငွေ အားဖြင့် ကန်ဒေါ်လာ ၁၉၅ သန်းကျော်ရှိပါတယ်။ ယခင်ဘဏ္ဍာနှစ် ကာလတူအတွင်း ပဲတီစိမ်းတန်ချိန် ၁၄၃၀၀၀ ကျော်ရှိပြီး ဝင်ငွေအားဖြင့် ကန်ဒေါ်လာ ၁၇၁ သန်းကျော်ရှိတာ တွေ့ရပါတယ်။ လာမယ့်သီတင်းပတ်တွေမှာလည်း ပဲတီစိမ်းတင်ပို့မှု ပုံမှန်သာ ရှိနိုင်တယ်လို့ ခန့်မှန်းကြပါတယ်။ MIRT- MAPT

                ပင်လယ်ရေကြောင်းက ပဲလွန်းဖြူ တင်ပို့မှုမှာ လက်ရှိဘဏ္ဍာနှစ် အောက်တိုဘာ၂၁ ရက်အထိ စုစုပေါင်းတင်ပို့ပြီး စီးမှုဟာ တန်ချိန် ၁၅၉၀၀ ခန့်၊ ဝင်ငွေ အားဖြင့် ကန်ဒေါ်လာ ၁၄ သန်းကျော် ရှိတာတွေ့ရပါတယ်။ ယခင်ဘဏ္ဍာနှစ် ကာလတူအတွင်း တင်ပို့မှုအနေနဲ့ ပဲလွန်းဖြူတန်ချိန် ၁၆၁၀၀ ကျော်ရှိပြီး ဝင်ငွေအားဖြင့် ကန်ဒေါ်လာ ၁၃ သန်း ကျော်သာရရှိလို့ ယခင်နှစ်တင်ပို့မှု ပမာ ဏပိုမိုပေမဲ့ ဝင်ငွေအားဖြင့် ယခုနှစ်မှာ ပိုမိုရရှိတာ တွေ့ရပါတယ်။                   ယခုတစ်ပတ် အောက်တိုဘာလ ၁၇ ရက်မှ ၂၁ ရက်အတွင်း တင်ပို့မှု အနေနဲ့ တန်ချိန် ၄၀၀ ကျော်ရှိပြီး တင်ပို့ တဲ့ နိုင်ငံများကတော့ အင်ဒိုနီးရှား၊ တောင်ကိုရီးယား၊ မလေးရှား၊ ဖိလစ်ပိုင်၊ စင်ကာပူ၊ ထိုင်းနဲ့ ဗီယက်နမ်တို့ဖြစ်ပါတယ်။                     ရန်ကုန် FOB ဈေးကွက်မှာ အောက်တိုဘာလ ၂၁ ရက်မှ ၂၇ ရက် အတွင်း ပဲလွန်းဖြူ အရောင်းအဝယ် ဖြစ်မှုမှာ တန်ချိန် ၁၂၀ ခန့်သာရှိလို့ ယခင်တစ်ပတ် အရောင်းအဝယ်ဖြစ်မှု တန်ချိန် ၄၀၀ ကျော်ထက် လျော့ကျ ခဲ့ပါတယ်။ လက်ကျန်နည်းလာပြီဖြစ်လို့ အရောင်းအဝယ်ဖြစ်မှုနည်းပါးလာပါတယ်။                     ရန်ကုန် FOB ဈေးမှာ ယခင်တစ်ပတ် ဈေးဖြစ်တဲ့ FAQ တစ်တန်ကန်ဒေါ်လာ ၈၄၀-၈၆၀၊ SQ တစ်တန် ကန်ဒေါ်လာ ၉၅၀-၉၇၀ နဲ့ အောက်တိုဘာလ ၂၈ ရက်နေ့အထိ ငြိမ်နေပါတယ်။ MIRT-MAPT

                  မုံရွာကုန်စည်ဒိုင်ပဲဈေးကွက်မှာ ဒေသထွက်အရောင်းသွက်တဲ့ Export ပဲအချို့လက်ကျန် ပြတ်သလောက် နည်းသွားချိန်မှာ ဒေသခံ ကုန်သည်အချို့နဲ့ ရန်ကုန်ဝယ်လက်ဝယ်လိုအားတက်လာခဲ့လို့ ယခင်အပတ်ကထက် အရောင်းအဝယ် အားကောင်း သွက်လက်ခဲ့ပါတယ်။ ယခုရက်ပတ်ထဲမှာ တစ်တင်းအနိမ့်ဆုံး ၁၂၅၀၀ ကျပ်ကနေ အမြင့်ဆုံး ၁၃၅၀၀ ကျပ်ထိ ဈေးရလာခဲ့ပြီး၊ မုံရွာကုန်စည်ဒိုင်မှာ တစ်ရက် ကိုအိတ် ၁၅၀၀ ခန့်အထိ အရောင်း အဝယ်ဖြစ်ခဲ့တယ်လို့ ကုန်သည်ရပ် ကွက်က ကြားသိရပါတယ်။ စီးဆင်းမှုအနေနဲ့ ရာသီဥတုနဲ့ လမ်းပန်းအခြေအနေ အရ မန္တလေးကို အိတ် ၁၀၀၀ ခန့်နဲ့ ရန်ကုန်ကို အိတ် ၁၂၀၀ ခန့်သာ စီးထွက်ခဲ့တယ်လို့ ဈေးကွက်က ဆိုပါတယ်။ ထွန်းလှိုင်

              ရန်ကုန်တိုင်းဒေသကြီးဘုရင့်နောင်ဈေးကွက်အတွင်းပဲအားလုံးထဲမှာ အရောင်း အဝယ်အသွက်ဆုံး ပဲကတော့ ယခုတစ်ပတ် ပဲစင်းငုံပဲဖြစ်ပါတယ်။ ဒါကြောင့်လည်း ရန်ကုန် FOB ဈေးကွက်မှာ ပဲစင်းငုံနီ၊ ဖြူကြား အရောင်း အဝယ်ဖြစ်မှုဟာ အောက်တိုဘာ ၂၁ ရက်မှ ၂၇ ရက်အတွင်း တန်ချိန် ၁၂၀၀၀ ကျော်တဲ့အထိ စံချိန်တင် တိုးတက်ခဲ့တာတွေ့ရပါတယ်။                   အရောင်းအဝယ်ဖြစ်တဲ့ထဲမှာ ဈေးအနိမ့်ဆုံး ရှမ်းစတွေပိုများတယ်လို့ သိရပါ တယ်။ အိန္ဒိယဝယ်လက်များ လတ်တလောရောင်းဖို့အတွက် ချက်ချင်းသင်္ဘော တင်ဖို့ ဈေးအသက်သာဆုံးပဲများ ဝယ်ယူနေခြင်းဖြစ်တယ်လို့ ကုန်သည်ကြီးတစ်ဦးက ဆိုပါတယ်။ အိန္ဒိယမှာလည်း လာမယ့်လတွေမှာ ပဲအသစ်ဝင်တော့မှာဖြစ်ပါတယ်။ ရန်ကုန် FOB ဈေးများ ယခင်တစ်ပတ်အတိုင်း အောက်တိုဘာလ ၂၈ ရက်မှာလည်း ပဲစင်းငုံနီ တစ်တန် ကန်ဒေါ်လာ ၅၆၀-၅၈၀၊ ဖြူနီ တစ်တန် ကန်ဒေါ်လာ ၄၆၀- ၄၈၀ နဲ့ ငုံနီ(အဟောင်း) တစ်တန် ကန်ဒေါ်လာ ၅၅၀-၅၇၀ ဖြစ်ပါတယ်။ MIRT-MAPT