ပင်လယ်ရေကြောင်းက မလေးရှားကို ၁ဝ တန်ပို့            ပင်လယ်ရေကြောင်းကုန်သွယ်မှုလမ်းကနေ နိုဝင်ဘာ ၁၈ ရက်မှ ၂၁ ရက်တာ ကာလအတွင်း နနွင်းတန်ချိန် ၁ဝ တန်ကို တင်ပို့ခဲ့ပါတယ်။ ကုန်သွယ်ဖက်နိုင်ငံကတော့ မလေးရှားဖြစ်ပြီး တစ်တန်ကို အက်ဖ်အိုဘီကန်ဒေါ်လာ ၁၆၄၅ ဒေါ်လာနဲ့ တင်ပို့ခဲ့တာဖြစ်ပါတယ်။ တင်ပို့မှုက စုစုပေါင်းပို့ကုန်ငွေ ကန်ဒေါ်လာ ၁၆၄၅ဝ ရရှိခဲ့ပါတယ်။ ယခင်သီတင်းပတ်ကတော့ နနွင်းတန်ချိန် ၅ဝ ဒသမ ၇၃ တန်တင်ပို့ခဲ့ပြီး ယခုသီတင်းပတ်တင်ပို့မှုနဲ့ယှဉ်ရင် အားလျော့သွားတာတွေ့ရတဲ့အပြင် ဖောက် သည်တွေဖြစ်တဲ့ ဂျပန်၊ ကိုရီးယား၊ အာရပ်စော်ဘွားများ ပြည်ထောင်စုနိုင်ငံများဘက်ကလည်း အဝယ်ပါးသွားခဲ့ပါတယ်။        MIRT (DOT)  

အောင်ပန်းချင်း ဈေးကွက်ထဲ ပုံမှန်အဝယ်ရှိလို့ ဈေးလျော့လာ                  မြန်မာနိုင်ငံမှာ ချင်းကို ရှမ်းပြည်နယ်တောင်ပိုင်းမှာ အများဆုံး စိုက်ပါတယ်။ အရင်ကတော့ ပြည်တွင်း ဈေးကွက်သာရှိပေမဲ့ အခုနောက်ပိုင်း နှစ်တွေမှာ ပြည်ပဈေးကွက်ထိ ကျယ်ပြန့်လာပါတယ်။ ရှမ်းပြည်နယ် တောင်ပိုင်းမှာ ချင်းကို နှစ်စဉ်ဧက ၇ဝဝဝ ကျော်စိုက်ပိုျးပါတယ်။ ကလောမြို့နယ်မှာ အများဆုံးစိုက်ပျိုးပြီး ဒုတိယအများဆုံးစိုက်တာကပင်လောင်းမြို့နယ်၊ တတိယအများဆုံးက နမ့်စန်မြို့နယ် ဖြစ်ပါတယ်။ ချင်းကို ဧပြီ၊ မေလတွေမှာ စိုက်ပြီး နိုဝင်ဘာ၊ ဒီဇင်ဘာမှာ ပြန်ပြီးတူး ဖော်ကြပါတယ်။ ဒီနှစ်က ချင်းဈေးကောင်းတာကြောင့် ချင်းစိုက်တောင်သူ တွေ လည်းမိုးတစ်ပြိုက်နှစ်ပြိုက်ကျတာနဲ့အမြန်ပြန်စိုက်ကြတာကြောင့် အောက်တိုဘာလ လယ်လောက်မှစပြီး ဈေးကွက်ကိုဝင်လာပါတယ်။ ကလောမြို့နယ်က ချင်းတွေကိုတော့ ဥမအဖြစ်ပြန်ဖော်ပြီး ရောင်းပေမဲ့ နမ့်စန်မြို့နယ်၊ ဟိုပုံးမြို့နယ်တွေကတော့ ဥမကို မဖော်ဘဲ ချင်းတက်ကိုသာ ရောင်းတာကြောင့် ဟိုပုံး၊ နမ့်စန်ချင်းက ပိုပြီး အခက်လှလို့ ဈေးကွက်ပိုဝင်တယ်လို့ သိရပါတယ်။ ဟိုပုံး၊ နမ့်စန်ကချင်းတွေကတော့ ဒီဇင်ဘာလလယ်လောက်မှဈေးကွက်ကိုစပြီးဝင်မှာဖြစ်ပါတယ်။အောင်ပန်း ဈေးကွက်မှာ ချင်း (စို)တွေ ပုံမှန်ဝင်နေတာကြောင့် ဈေးကတော့ အနည်းငယ် ကျလာပါတယ်။ အကြီးအခက်လှတွေက တစ်ပိဿာ ၈ဝဝ ကျပ်၊ အလတ်စတွေက တစ်ပိဿာ ၇ဝဝ ကျပ်ဈေးရှိပါတယ်။ ဒီနှစ်ကချင်းစိုဈေးကောင်းနေတာကြောင့် ချင်းခြောက်အဖြစ်ပြုလုပ်တာနည်းပြီး ချင်းစိုအတိုင်းသာ ရောင်းနေတယ်လို့ သိရပါတယ်။ လက်ကျန်ချင်းခြောက်ကတွေကတော့ တစ်ပိဿာ ၂၈ဝဝ ကျပ်ဈေး ရှိပါတယ်။           ဧဧခိုင် 

ပဲသစ်ဝင်လာတာကြောင့် ပြည်ဘိုကိတ်ဈေးကျ         ပြည်ဈေးကွက်တွင် ဘိုကိတ်အဟောင်း ပိဿာ ၂ဝတစ်တင်းကို ၃၁ဝဝဝ ကျပ်ထိဈေးကောင်းရခဲ့ပြီး ယခုတစ်ပတ်အတွင်း ကံမမှ ပဲသစ်များ ဈေးကွက်တွင်းသို့ စတင်ဝင်ရောက်လာပြီဖြစ်ကြောင်း သိရပါတယ်။ ပဲသစ်များ စတင် ဝင်ရောက် လာတဲ့အတွက် ဘိုကိတ်ဈေးနှုန်းမှာ ပိဿာ ၂ဝ တစ်တင်းကို ၂၅ဝဝဝ ကျပ်ဖြင့် အရောင်းအဝယ်ဖြစ်နေတယ်လို့ သိရပါတယ်။ ပဲသစ်များ ဝင်လာတာကြောင့် ဈေးအေးသွားပေမဲ့ လက်လီသမားများဖြင့် နေ့စဉ် ၁၄-၁၅ အိတ် အရောင်းအဝယ် ဖြစ်လျက်ရှိကြောင်း သိရပါတယ်။                                                                                                                               ဆုမွန်ဆွေ 

 ရောင်းလက်ဝယ်လက်စုံတဲ့ မုံရွာကုလားပဲဈေးကွက်       မုံရွာကုန်စည်ဒိုင်ရဲ့ နိုဝင်ဘာ တတိယပတ် ကုလားပဲဈေးကွက်မှာ ယခင်အပတ်ကထက် တစ်တင်း ၅ဝဝ ကျပ်မှ ၁ဝဝဝ ကျပ်ထိ ဈေးကျဆင်းသွားခဲ့ ပေမဲ့ အရောင်းအဝယ်ကောင်းမွန်ခဲ့တယ်လို့ ဆိုပါတယ်။ ဒီရက်ပတ် အတွင်းမှာ ကုလားပဲရိုးရိုးတစ်တင်း ၂၂၅ဝဝ ကျပ်မှ ၂၂ဝဝဝ ကျပ်၊ ကုလားပဲတိုင်ပေတစ်တင်း ၂၃ဝဝဝ ကျပ်မှ ၂၂၅ဝဝ ကျပ်၊ ကုလားပဲဗွီတူး ၂၄၅ဝဝ ကျပ်မှ ၂၃၅ဝဝ ကျပ်၊ ကုလားပဲ ၉၂၉ ၂၄၅ဝဝ ကျပ်မှ ၂၄ဝဝဝ ကျပ်အသီးသီး ကျဈေးဖြစ်ပေါ်ခဲ့ပြီး ဝယ်လက်အနေနဲ့ ခွဲခြမ်းလိုင်း၊ အမှုန့်လိုင်းနဲ့ မန္တလေး၊ ရန်ကုန်နယ်တင်ပို့လိုင်းသမား တွေ ပုံမှန်ရှိခဲ့လို့ မုံရွာကုန်စည်ဒိုင်မှာ တစ်ရက်အိတ် ၅ဝဝ ဝန်းကျင် အရောင်း အဝယ်ဖြစ်ခဲ့တယ်လို့ ဈေးကွက်က ဆိုပါတယ်။ ဒီရက်ပတ်အတွင်း မုံရွာကုန်စည်ဒိုင် နယ်မြေကနေ ကုလားပဲ စီးဆင်းမှုအနေနဲ့ မန္တလေးကို တင်း ၂ဝဝဝခန့်နဲ့ ရန်ကုန်ကို တင်း ၁ဝဝဝ ခန့် တင်ပို့ခဲ့ကြတယ်လို့ သိရပါတယ်။                                                                                                                    ထွန်းလှိုင်