မလေးရှားနိုင်ငံသို့ လွှတ်ကျောင်းမွေးမြူရေး နွားအကောင် ၆ဝဝဝ တင်ပို့ရန် စာချုပ်ထားပြီးဖြစ်                 ကမ္ဘာမင်း ကုမ္ပဏီမှ လွှတ်ကျောင်းမွေးမြူရေး နွားအကောင် ၆ဝဝဝ တင်ပို့ရန် မလေးရှား ကုမ္ပဏီတစ်ခုနဲ့ စာချုပ်ထားပြီ ဖြစ်ကြောင်း သိရပါတယ်။ မလေးရှားနိုင်ငံသို့ တင်ပို့မဲ့လွှတ်ကျောင်း မွေးမြူရေး နွားအမျိုးအစားမှာ နွားပြာ စိမ်း အမျိုးအစား ဖြစ်ပြီး ပထမအကြိမ် နွားမ အကောင် ၅ဝဝ ကို ဒီဇင်ဘာလ ပထမ အပတ် မှာ တင်ပို့မှာဖြစ်ကြောင်း သိရပါတယ်။ ကမ္ဘာမင်း ကုမ္ပဏီမှ မန်နေးဂျင်းဒါရိုက်တာ ဦးသောင်းတန်က ''နွားပြာစိမ်း အမျိုးအစားက ပုဂံ၊ ညောင်ဦး၊ မိတ္ထီလာ အနီးတစ်ဝိုက်က ရတယ်။တောင်သူတွေအနေနဲ့ လွှတ်ကျောင်းနွားကို ဒီထက်ပိုပြီး မွေးမြူထားမယ်ဆို ဈေးကွက်တစ်ခု ဖြစ်လာနိုင်တယ်။ မလေးရှားက ဈေးကောင်းပေးဝယ်တဲ့ အတွက် ပိုလံျှ နွားတွေလည်းဖြစ်တော့ တောင်သူတွေအနေနဲ့ ဈေးကွက်တစ်ခု ရလာနိုင်တယ်။FATA ဖြစ်ရင် ဈေးကွက်က ဒီထက် ကျယ်ပြန်လာနိုင်တယ်။ မလေးရှားကို ဖေဖော်ဝါရီလအတွင်းမှာ နွားမအကောင် ၃ဝဝဝ တင်ပို့မယ်။ အထီး ၃ဝဝဝ ကို နောက်ပိုင်းဆက်ပြီး တင်ပို့မယ်'' လို့ ပြောပါတယ်။               ပြည်ပသို့ တင်ပို့မဲ့ နွားများကို မိတ္ထီလာခရိုင် မြင်းကန်အုပ်စု၊ ဆင်စလွယ် ကျေးရွာမှာ ရောဂါရှိမရှိ စစ်ဆေးပြီးမှ တင်ပို့ရကြောင်း သိရပါတယ်။ '' ပြည်ပ မပို့ခင်မှာ တိရစ္ဆာန်မွေးမြူရေးနှင့်ကုသရေးဦးစီးဌာနက စစ်ဆေးပြီး ရောဂါမရှိကြောင်း လက်မှတ်ကို တစ်ကောင်ချင်းစီထုတ်ပြီးမှ တင်ပို့ရတယ်။ မပို့ခင် ၁၅ ရက်လောက် ဒီမှာစစ်ဆေးခံတယ်။ ခွာနာ၊ လျှာနာရောဂါ၊ ဒေါင့်သန်းရောဂါ၊ ပေါင်ပုပ်လက်ပုပ်ရောဂါ၊ တီဘီရောဂါ ရှိမရှိ စစ်ဆေးတယ်။ မလေးရှားနိုင်ငံဘက်ကလည်း ရောဂါရှိမရှိ လာရောက် စစ်ဆေးပြီးမှ တင်ပို့မယ်''လို့ ပြောပါတယ်။ ဇူးဇူး

 မြန်မာ့မျှစ်ကို အရောင်ဆိုးကြသူများ              ၂ဝ၁ဝ-၂ဝ၁၁ ဘဏ္ဍာနှစ်အတွင်းမှာ မျှစ်(အစို/အခြောက်)များကို တရုတ်နိုင်ငံသို့ ၂ဝ၁ဝ ပြည့်နှစ် သြဂုတ်လမှ စပြီး တင်ပို့ခဲ့ရာ နိုဝင်ဘာလ ၂၂ ရက်နေ့အထိ မူဆယ်နယ်စပ်ခန်းမှတစ်ဆင့် ကုမ္ပဏီ(၇)ခုက မျှစ်စို ၇ဝဝ တန်၊ တန်ဖိုးကျပ်သန်း (၉ဝ)ကျော်၊ မျှစ်ခြောက် (၁၉၅)တန် တန်ဖိုးကျပ် (၆၇)သန်းကျော်ကို တင်ပို့ခဲ့တာ တွေ့ရှိရပါတယ်။ မျှစ်စိုတစ်တန်ကို လိုင်စင် ဈေး (၁၃ဝဝဝဝ)ကျပ်၊ မျှစ်ခြောက်တစ်တန်ကို (၃၅ဝဝဝဝ)ကျပ်နှုန်းနဲ့ တင်ပို့ခဲ့တာ ဖြစ်ပါတယ်။            တရုတ်နိုင်ငံ၊ ယူနန်ပြည်နယ်ရဲ့ ၁၆-၁၁-၁ဝ ရက်နေ့ ယူနန်ချွမ်ချိန်ဝမ်ပေါင်သတင်းစာမှာ ''မြန်မာနိုင်ငံမှ တင် သွင်းသည့် မျှစ်များတွင် ဓာတုဆေးဝါး ရောစပ်ပါဝင်မှု စိစစ်တွေ့ရှိ''ခေါင်းစဉ်နဲ့ မသမာသည့် တရုတ်စီးပွားရေးလုပ်ငန်းရှင် အချို့ဟာ မြန်မာနိုင်ငံရှိ တောင်ပေါ်ကျေးရွာတွေမှာထွက်ရှိနေတဲ့ မျှစ်စိမ်း (အစို)၊ မျှစ်ခြောက်များဝယ်ယူပြီး မျှစ်အချောကိုင် ဆောင်ရွက်ရာမှာ ဓာတု ဆေးဝါးများရောစပ်ပါဝင်လာတာကိုတွေ့ ရကြောင်း၊ အဆိုပါဆေးဝါးများများစားသုံးသူအား ကိုယ်ခန္ဓာ ချို့ယွင်းမှုနှင့် ကင်ဆာရောဂါဖြစ်စေနိုင်ကြောင်း ယူနန်ပြည်နယ် ကျန်းမာရေးဌာနမှ စစ်ဆေးတွေ့ရှိခဲ့လို့ ရွှေလီနယ်စပ် စားသောက်ကုန်စိစစ်ရေးအဖွဲ့မှ ဓာတ်ခွဲစိစစ်တဲ့အခါ ကာဗွန်ဒိုင်ဆာလဖိတ်စွမ်းရည် (၂၉၃ ဒသမ ၃ mg/kg)ရှိလို့ စားသောက် ကုန် ပစ္စည်းသတ်မှတ်နှုန်းထက် (၄ ဒသမ ၉) ဆကျော်လွန်သွား၍ စံနှုန်းမမှန်တဲ့ စားသောက်ကုန်ဖြစ်ကြောင်း၊ မြန်မာနိုင်ငံ မှ တင်သွင်းတဲ့မျှစ်များကို အဆင့်ဆင့်စစ်ဆေးပြီး စံနှုန်းမမှီပါကတင်သွင်းခွင့်မပြုရေး သို့မဟုတ် မီးရှို့ဖျက်ဆီးရေးများ ဆောင် ရွက်လျက် ရှိကြောင်း ဖော်ပြထားခဲ့ပါတယ်။              အဆိုပါသတင်းဖော်ပြချက် မှန်ကန်မှုရှိမရှိကို ကုန်သည်များ၊ ဝန်ထမ်း များနဲ့တွေ့ဆုံစိစစ်ဆွေးနွေးမှုများ ပြုလုပ်တဲ့အခါမှာ မျှစ်စို၊ မျှစ်ခြောက်တင်ပို့တဲ့ မိမိဘက်မှကုမ္ပဏီတွေက ဓာတုဆေးဝါးများ အသုံးပြုခြင်းမရှိကြောင်းနဲ့ တရုတ်နိုင်ငံဘက်မှ မျှစ် ဝယ်ယူသူများက ၎င်းတို့ဝယ်ယူတဲ့မျှစ်တွေကို တရုတ်နိုင်ငံ ဂျယ်ဂေါင်ဒေသမှာ ၎င်းတို့အစီအစဉ်နဲ့ ဓာတုဆေးဝါးတွေကို အသုံးပြုပြီး ပြန်လည်ရောင်းချကြတယ်လို့ သိရှိခဲ့ရပါတယ်။               မူရင်းကောင်းမှ မိတ္တူကောင်းမယ်လို့ ပြောလေ့ရှိကြပါတယ်။ မူရင်းကောင်းပါလျက် မိတ္တူမကောင်းတာက တော့ စက် ဒါမှမဟုတ် အသုံးပြုသူရဲ့ ချို့ယွင်းမှုကြောင့်ပဲဖြစ်ပါလိမ့်မယ်။ မြန်မာ့ထွက်ကုန် မျှစ်အရည်အသွေး ကောင်းမွန်ပါရဲ့ နာမည် ပျက်ရတာဟာ မိမိနိုင်ငံသားလုပ်ငန်းရှင်များရဲ့ မရိုးသားမှုကြောင့်မဟုတ်ဘဲ တစ်ဖက်နိုင်ငံမှ ဝိသမာလောဘသား တရုတ် စီးပွားရေး လုပ်ငန်းရှင်အချို့ရဲ့ ဖန်တီးမှုကြောင့်သာဖြစ်ပါကြောင်း ရှင်းလင်း တင်ပြလိုက်ပါတယ်။နကသ   (ပို့ကုန်)

 ပွင့်လင်းရာသီရောက်ရှိပြီဖြစ်လို့ တီးတိန်-ရိဒ်ကားလမ်းပိုင်း အသင့်အတင့်ကောင်းမွန်လာ            ပွင့်လင်းရာသီ ရောက်ရှိလာပြီ ဖြစ်တဲ့အတွက် မိုးတွင်းကာလ အတွင်း က ပျက်စီးလျက်ရှိသော တီးတိန်- ရိဒ် ကားလမ်းပိုင်းအား တီးတိန်မြို့နယ် ပြည်သူ့ ဆောက်လုပ်ရေးလုပ်ငန်း (လမ်းတံတား) အဖွဲ့က မြေတူး မြေ ကော်စက်နဲ့ နိုဝင်ဘာလ ၁၉ ရက်နေ့က စတင်ဆောင်ရွက်နေ ပြီ ဖြစ်ပါတယ်။ စတင်ဆောင်ရွက်ပြီး ၃ ရက်မြောက်နေ့ မှာတော့ တီးတိန်မြို့ နယ် အပိုင်ဟိုင်မွာ ရွာအနီး အချို့နေရာများမှာ ရေစိမ့် ထွက်မှုကြောင့် ချိုင့်များ ရှိတာကလွဲပြီး အသင့်အတင့် ကောင်းမွန်လာပြီလို့ သိရပါတယ်။ လမ်းကောင်းမွန်လာ တာကြောင့် ယာဉ်သွားလာမှုများ အဆင်ပြေချောမွေ့လာစေပြီး ကလေးမှ ရိဒ်သို့ ဟိုင်မွာဂျစ်ယာဉ်ငယ်များ သာမက သွင်းကုန် ဓါတ်မြေသြဇာများကို ခြောက်ဘီးယာဉ်ကြီး အချို့နဲ့ နေ့ချင်း ပေါက် သယ်ယူ ပို့ ဆောင်နိုင်မှုရှိလာပြီ လို့သိရပါတယ်။ ၂ဝ၁ဝ ဒီဇင်ဘာလ ခရစ်စမတ်ပွဲတော် နီးကပ်လာပြီဖြစ်တဲ့ အတွက် တစ်ဖက်နိုင်ငံ မီဇိုရမ်ပြည်နယ်မှ မဝတ်တီရှပ်၊ ကျား၊ မ စီးကင်း ဘတ်ရှူး၊ ကလေးစီးဖိနပ် စသည်များ အဝယ်လိုက်လာပြီး ကုန်စည်စီးဆင်းမှု များ ပိုမိုလာပြီလို့ ရိဒ်နယ်စပ်ကုန်သွယ် ရေးစခန်းမှ သတင်းရရှိပါတယ်။ Sources: နကသ (ရိဒ်)၊၊ သိန်းဝင်း

မျှစ်များတွင် ဓာတုဆေးဝါး ရောစပ်ပါဝင်မှုများ စိစစ်တွေ့ရှိရလျက်ရှိ         မြန်မာနိုင်ငံ တောင်ပေါ် ကျေးရွာ တစ်လျှောက်ထွက်ရှိတဲ့ မျှစ်စို (အစိမ်း) နဲ့ မျှစ်ခြောက်များကို နယ်စပ် ကုန်သွယ်ရေး စခန်းများမှတစ်ဆင့် နယ်စပ် ကုန်သွယ်ရေး နည်းလမ်းနဲ့ တင်ပို့လျက် ရှိပါတယ်။ ယခုအခါ မသမာတဲ့ စီးပွားရေးလုပ်ငန်းရှင်အချို့ဟာ ဝယ်ယူပြီးမျှစ်စို၊ မျှစ်ခြောက်များကို ကုန်ချောပြုလုပ်ဆောင်ရွက်ရာမှာ ဓာတု ဆေးဝါးများ ရောစပ်ပါဝင်နေတာကို စစ်ဆေးတွေ့ရှိရကြောင်းနဲ့ အဆိုပါ ဆေးဝါးများမှာ စားသုံးသူများအား ခန္ဓာကိုယ်ချို့ယွင်းမှုနဲ့ ကင်ဆာ ရောဂါ ဖြစ်စေနိုင်တယ်လို့ ယူနန်ပြည်နယ် ကျန်းမားရေးဌာနက စစ်ဆေးတွေ့ရှိရတယ်လို့ ထုတ်ပြန်ထားပါတယ်။ စားသောက်ကုန် စိစစ်ရေးအဖွဲ့မှ ဓာတ်ခွဲ စမ်းသပ်သောအခါ ကာဗွန်ဒိုင် ဆာလဖိတ်ပါဝင်မှု ၂၉၃ mg/kgm  ရှိတာ တွေ့ရပြီး ခွင့်ပြုချက်ထက် ၅ ဆနီးပါး ကျော် လွန်တဲ့အတွက် စံနှုန်းမမှန်တဲ့စားသောက်ကုန်အဖြစ် သတ်မှတ်လိုက်တယ်လို့ ဆိုပါတယ်။ မြန်မာနိုင်ငံက တင်သွင်းတဲ့မျှစ်များအား အဆင့်ဆင့်စစ် ဆေးပြီးစံချိန်မမီပါက တင်သွင်းခွင့် ပြုမည်မဟုတ်ကြောင်း သတင်းရရှိတဲ့ အတွက် မျှစ်တင်ပို့သူများအနေနဲ့ သတိထား ဆောင်ရွက်ကြရန် လိုအပ်ကြောင်း အသိပေးလိုက်ရပါတယ်။                                                                                                          Source:ယူနန်မန်စီ၊သောင်းနိုင်