ဗီယက်နမ်နှင့် ကမ္ဘော့ဒီးယားနှစ်နိုင်ငံနယ်စပ်ဖြတ်ကျော် ကျူအာရ်ကုဒ်ငွေပေးချေမှုစနစ် စတင်အသုံးပြု

ဗီယက်နမ်နှင့် ကမ္ဘောဒီးယားကြား နှစ်နိုင်ငံ နယ်စပ်ဖြတ်ကျော် ငွေပေးချေမှုစနစ်အရ နှစ်နိုင်ငံပြည်သူများအနေဖြင့် QRကုဒ်များကို စကင်န်ဖတ်ကာ ၎င်းတို့၏ ဒေသသုံး ငွေကြေးဖြင့်တစ်ဖက်နိုင်ငံ၌ ငွေပေးချေမှုများ ပြုလုပ် နိုင်မည်ဖြစ်ကြောင်း VN Economy အွန်လိုင်းသတင်းဖော်ပြချက်အရ သိရသည်။နှစ်နိုင်ငံဖြတ်ကျော် QR ပေးချေမှု ချိတ်ဆက်မှု စတင်နိုင်ခြင်းမှာ ဗီယက်နမ် နိုင်ငံတော်ဘဏ်နှင့် ကမ္ဘောဒီးယား အမျိုးသားဘဏ်တို့အကြား နားလည်မှု စာချွန်လွှာ(MOU)ကို ၂၀၂၂ ခုနှစ်နိုဝင်ဘာ ၈ ရက်က လက်မှတ်ရေးထိုးခဲ့ခြင်း၏ရလဒ်ဖြစ်သည်။ ငွေပေးချေမှုစနစ်သည် သုံးစွဲသူပြည်သူများ အနေဖြင့် ကုန်ပစ္စည်းဝယ်ယူခြင်းအတွက် ဗီယက်နမ်တွင် ခမာရီးယလ် KHR)ဖြင့် ပေးချေနိုင်ပြီး ကမ္ဘောဒီးယားတွင် ဗီယက်နမ် ဒေါင် (VND)ကို အသုံးပြုနိုင်သည့် ငွေပေးချေမှုစနစ်ဖြစ်သည်။ ခန့်မှန်းခြေကမ္ဘောဒီးယားကုန်သည် ၁ ဒသမ ၈ သန်းခန့်က KHQR ကုဒ်များဖြင့် စကင်န်ဖတ် ပေးချေနိုင်ပြီဖြစ်ကြောင်း သိရှိသည်။ KHQR သည် ကမ္ဘောဒီးယားတွင် လက်လီငွေပေးချေမှုများအတွက်ဖန်တီးထားသော နာမည်ကြီး QR ကုဒ်စနစ်တစ်ခုဖြစ်သည်။အဆိုပါ ငွေပေးချေမှုစနစ်သုံးစွဲမှုသည်နှစ်နိုင်ငံကြား စီးပွားရေးဖွံ့ဖြိုးတိုးတက်မှု၊ ခရီးသွားလာရေးကဏ္ဍနှင့် နယ်စပ်ဖြတ်ကျော် ကုန်သွယ်မှုကိုလည်းမြှင့်တင်ပေးသွားနိုင်မည်ဖြစ်ကြောင်းသိရသည်။ 

(စီးပွားရေးသံမှူး၊ ဗီယက်နမ်)