Background
ပြောင်းတင်ပို့မှု ထက်ဝက်ကျော်ကျဆင်း စက်တင်ဘာ ၁၈ ရက်မှ ၂၄ ရက်ထိကာလအတွင်း ပင်လယ်ရေကြောင်းမှ ပြောင်းတန်ချိန် ၉၂၄ တန် တန်ဖိုး ကန်ဒေါ်လာသုညဒသမ ၂၆၅ သန်းဖိုး တင်ပို့ နိုင်ခဲ့ပါတယ်။ တင်ပို့တဲ့ နိုင်ငံတွေကတော့ စင်္ကာပူကို ၈၅၅ တန် နဲ့ ဗီယက်နမ်ကို ၆၉ တန်အသီးသီးတင်ပို့ခဲ့တာဖြစ်ပါတယ်။ ယခင်အပတ်က တန် ၁၅၀၀ ကျော် တင်ပို့ခဲ့တာကြောင့် ယခုတစ်ပတ်မှာ တင်ပို့မှုထက်ဝက်ကျဆင်းခဲ့ပါတယ်။ ပင်လယ် ရေကြောင်း တင်ပို့မှုကျပေမယ့် နယ်စပ်ကတော့ တန် ၁၁၀၀၀ ကျော်တင်ပို့နိုင်ခဲ့ တာ တွေ့ရပါတယ်။ FOB(ရန်ကုန်) ပေါက်ဈေးကတော့ ပြောင်းလဲမှုမရှိပဲ တစ်တန် ကို ဒေါ်လာ (၂၉၀-၃၀၅) ကြား ဈေးပေါက်လျက်ရှိကြောင်း သတင်းရရှိပါတယ်။ KZW
ကမ္ဘာ့ရော်ဘာဈေးနှုန်းနှင့် ထုတ်လုပ်နိုင်မှုအလားအလာ လွန်ခဲ့တဲ့ ၁၀ စုနှစ်ကျော်ထက် ရော်ဘာဈေးနှုန်း နှစ်ဆဖြစ်ခဲ့ပြီး ပြီးခဲ့တဲ့ ဖေဖေါ်ဝါရီလလယ်ခန့်မှာ ယခင်နှစ်ထက် ရော်ဘာဈေးနှုန်း ၁၅ ရာခိုင်နှုန်းခန့်မြင့်တက်ခဲ့ပေမယ့် နောက်ပိုင်းမှာ ရော်ဘာဈေးနှုန်းက ကျဆင်း ခဲ့ပါတယ်။ လွန်ခဲ့တဲ့နှစ် ကတော့ ရော်ဘာတုရဲ့ စရိတ်က ၇၆ ရာခိုင်နှုန်းမြင့်တက်ခဲ့ပြီး သြဂုတ်လဆန်းမှာ တစ်တန်ကို ဒေါ်လာ ၄၄၅၀ ကိုရောက် ရှိခဲ့ကာ ၁၉၉၇ ခုနှစ်က စတွက်ရင် အမြင့်ဆုံးနှုန်းကို ရောက်ခဲ့ကြောင်း သိရပါတယ်။ ယခုနှစ်မှာတော့ ထုတ်လုပ်မှု အားကျဆင်းတာကြောင့် ရောင်းလိုအား ပြတ်လတ်နိုင်ကြောင်း သိရပါတယ်။ ကမ္ဘာ့ ရော်ဘာ ဝယ်လိုအားက ၅ ဒသမ ၃ ရာခိုင်နှုန်းမြင့်တက်ပြီး ၂၀၁၂ မှာတန်ချိန် ၁၁ ဒသမ ၅၈ သန်းကို ရောက်ရှိကာ သုံးနှစ်ဆက်တိုက်တိုးတက်မှာဖြစ်ကြောင်း Citi အုပ်စုကခန့်မှန်းတွက်ချက်ထားကြောင်း သိရပါတယ်။ ထုတ်လုပ်မှုလည်း ၅ ဒသမ ၄ ရာခိုင်နှုန်း တိုးတက်ပြီး တန်ချိန် ၁၁ ဒသမ ၅၉ သန်းကို ရောက်ရှိနိုင်ပေမယ့် သိုလှောင်မှုကတော့ ကျဆင်းနိုင်ကြောင်းခန့်မှန်းကြပါတယ်။ ကမ္ဘာ့ရောင်းလိုအားရဲ့ ၆၀ ရာခိုင်နှုန်း ရှိတဲ့ ထိုင်းနဲ့ အင်ဒိုနီးရှားရဲ့ ထုတ်လုပ်မှုက ထိုင်းနိုင်ငံမှာ မိုးကြီးပြီး အစေးထွက် ထိခိုက်တာရယ်၊ အင်ဒိုနီးရှားမှ ရော်ဘာပင်များအရွက်ကြွေမှုများပြားတာကြောင့် သာမန်အောက်ကို ရောက်နိုင်ကြောင်း သိရပါတယ်။ ရော်ဘာသိုလှောင်မှု ကတော့ ရှန်ဟိုင်းကုန်စည်ဒိုင်ပေါ်မှာ မူတည်နိုင်ပြီး တန်ချိန် ၃၃၇၆၆ နဲ့ ရပ်တည်နေကာ လွန်ခဲ့တဲ့ ငါးနှစ်စာ ပျမ်းမျှခြင်း တန်ချိန် ၆၃၂၁၃ ရှိပြီး ဈေးနှုန်းတက်နိုင်ခြေရှိကာ အထွက်နှုန်း ကျတဲ့တောင်သူတွေအတွက် အမြတ်ငွေ ကာမိစေနိုင်တယ် လို့သိရပါတယ်။ Source: tire review,KZW
ဈေးနှုန်းများ ကျဆင်းနေမှုကြောင့် နိုင်ငံတကာရော်ဘာအသင်းအနေဖြင့် ရော်ဘာစိုက်ပျိုးသူများနှင့် တင်ပို့သူများအား ကုန်စည်များကို သိုလှောင်ထားရန်နှင့် လိုအပ်သောပမာဏသာ ရောင်းချရန် တိုက်တွန်းသွားမည် ကမ္ဘာ့စီးပွားရေးဖွံ့ဖြိုးတိုးတက်မှုနှေးကွေးနေချိန်မှာ ဥရောပကြွေးမြီ အကျပ်အတည်းပြဿနာအပေါ် စိုးရိမ်ပူပန်မှုပိုလာခြင်း ကြောင့် ကမ္ဘာ့စတော့ရှယ်ယာတန်ဖိုးများ ၊ ရေနံအပါအဝင် ကုန်စည်ဈေးနှုန်းများ ကျဆင်းသွားတာနဲ့ တစ်ပြိုင်နက် အာရှ ရော်ဘာ ဈေးနှုန်းတွေလည်း ယခင်တစ်ပတ် ဈေးနှုန်းအောက်ကို ကျဆင်းသွားတယ်။ စက်တင်ဘာလ ၁၉ ရက်နေ့ကအထိ တစ်တန်ကို ၄၇၁၆ ဒေါ်လာရှိနေတဲ့ ထိုင်း RSS-5 က စက်တင်ဘာလ ၂၆ ရက်နေ့မှာ တစ်တန်ကို ၄၃၉၉ ဒသမ ၅၀ ဒေါ်လာအထိ တစ်ပတ်အတွင်း ၃၁၆ ဒသမ ၅၀ ဒေါ်လာဈေး ကျသွားတယ်။ ဒါ့အပြင် ကာလအတွင်း မလေးရှား SMR- 20 (Standard Malaysia Rubber -20) အမျိုးအစားမှာလည်း တစ်တန်ကို ၄၆၁၀ ဒသမ ၅၀ ဒေါ်လာမှ ၄၃၅၈ ဒသမ ၅၀ ဒေါ်လာအထိ ၂၅၂ ဒေါ်လာတန်ဖိုးကျဆင်းသွားတယ်။ ဂျပန်တိုကျိုကုန်စည်ရောင်းဝယ်ရေးမှာလည်း ဖေဖော်ဝါရီလ အရောက်ပို့စာချုပ်ဈေးနှုန်းက တစ်ကီလိုကို ၁၁ ဒသမ ၇ ရာခိုင်နှုန်း ကျဆင်းကာ ၃၀၂ ဒသမ ၅ ယန်း (တစ်တန်ကို ၃၉၆၆ ဒေါ်လာဝန်းကျင်) အထိ ကျဆင်းသွားပြီးနောက် တစ်ကီလိုကို ၃၀၃ ယန်းနဲ့ အရောင်းအဝယ်ဖြစ်ခဲ့ရာ ၂၀၁၀ ခုနှစ် ၊ စက်တင်ဘာလ ၁၇) ရက်နောက်ပိုင်း အနိမ့်ဆုံးနှုန်း ဖြစ်လာတယ်။ ဒီလိုဈေးနှုန်းတွေကျဆင်းနေမှုကြောင့် နိုင်ငံတကာရော်ဘာအသင်းအနေနဲ့ အဖွဲ့ဝင်နိုင်ငံတွေရှိ ရော်ဘာ စိုက်ပျိုးသူတွေနဲ့ တင်ပို့သူတွေကို ကုန်စည်တွေကိုသိုလှောင်ထားဖို့နဲ့ လိုအပ်တဲ့ပမာဏသာ ရောင်းချဖို့ တိုက်တွန်း သွားမယ်လို့ အတွင်းရေးမှူးချုပ် Yium Tavanolit က ပြောကြားတယ်။ တရုတ်နိုင်ငံရှိ အထင်ကရ ရော်ဘာ ဂိုဒေါင် ၁၀ လုံးကို လေ့လာချက်အရ ရော်ဘာသိုလှောင်ထားရှိမှုမှာ တန်ချိန် ၃၀၅ တန် တိုးလာပြီး ၃၃၇၆၆ တန်အထိ မြင့်မားလာရာ မတ်လနောက်ပိုင်း အမြင့်ဆုံးသိုလှောင်ထားမှုပမာဏဖြစ်လာတယ်လို့ စက်တင်ဘာလ ၂၃ ရက်နေ့ က ထုတ်ဝေခဲ့တဲ့ ရှန်ဟိုင်းကြိုပွိုင့်ရောင်းဝယ်ရေး ရဲ့ အပတ်စဉ်အစီရင်ခံစာမှာ ဖော်ပြထားတယ်။ ဒီလိုတရုတ်နိုင်ငံရဲ့ ရော်ဘာသိုလှောင်ထားရှိမှု မြင့်မားလာခြင်းကလည်း ရော်ဘာဈေးနှုန်းကို ဖိအားဖြစ်စေခြင်း အကြောင်းရင်း တစ်ရပ်ပဲဖြစ်တယ်။ ပပ၊Source:Bloomberg.com, rubberboard.org.in
ယခုအပတ် ရော်ဘာ အပို့လျော့ မြန်မာ-တရုတ်နယ်စပ်ရှိ မူဆယ်နဲ့ ချင်းရွှေဟော် နယ်စပ်ကုန်သွယ်ရေးစခန်းများမှ ကန်ဒေါ်လာ ၁ ဒသမ ၉၄၁ သန်း တန်ဖိုးရှိ ရော်ဘာအဆင့်စုံ ၄၃၅ တန်ကို စက်တင်ဘာလ ၂၁ ရက်မှ ၂၉ ရက်ထိကာလ အတွင်း တင်ပို့နိုင်ခဲ့ပြီး ယခင် အပတ် နယ်စပ်တင်ပို့မှု ပမာဏထက် ၃၁၃ တန် လျော့နည်းတင်ပို့ခဲ့ပါတယ်။ မူဆယ်နယ်စပ်မှ ယခင်အပတ်က ရော်ဘာ အဆင့်စုံ တင်ပို့ခဲ့သော်လည်း ယခု အပတ်မှာ RSS-3 တစ်မျိုးတည်းကိုသာ ၃၀၅ တန်သာ တင်ပို့နိုင်ခဲ့ပြီး ယခင်အပတ်ကထက် ၂၉၃ တန်လျော့နည်း တင်ပို့ခဲ့ပါတယ်။ ချင်းရွှေဟော်နယ်စပ်မှာတော့ RSS-3 တန် ၁၃၀ သာအပို့ရှိပြီး ယခင်အပတ်တင်ပို့မှု ထက် ၁၀ တန် လျော့နည်းတင်ပို့ခဲ့ပါတယ်။ ယခုအပတ် မန္တလေး-မူဆယ် ရော်ဘာ သယ်ယူစရိတ်နှုန်းထားမှာ ၁ ပိသာ ၄၈ ကျပ်ဖြစ်ပြီး ယခင်အပတ်ထက် ၁၄ ကျပ် ပိုမိုခဲ့ပါတယ်။ မိမိဘက်နဲ့ တစ်ဘက်နိုင်ငံမှာ ရော်ဘာဈေးများကို နှိုင်းယှဉ်ဖော်ပြ ပေးလိုက်ရပါတယ်- မိမိဘက်(ကျပ်/တန်) တစ်ဘက်နိုင်ငံ(ဒေါ်လာ/တန်) ယခု ယခင် ပြောင်းလဲမှု % ယခု ယခင် ပြောင်းလဲမှု %RSS - 3 ၃၄၁၃၈၀၀ ၃၄၁၃၈၀၀ - - ၄၅၄၂ ၄၅၄၄ ၂ ၀ .၀၄RSS - 5 ၃၃၀၀၃၁၉ ၃၃၀၀၃၁၉ - - ၄၃၈၆ ၄၃၈၇ ၁ ၀ .၀၂MIRT (DOBT)
ရော်ဘာအပို့လည်း ထက်ဝက်ကျဆင်း စက်တင်ဘာ ၁၈ ရက်မှ ၂၄ ရက်ထိကာလအတွင်း ပင်လယ်ရေကြောင်းမှ ရော်ဘာ ၃၆၃ တန်၊ တန်ဖိုး ကန်ဒေါ်လာ ၁ ဒသမ ၅၈၃ သန်းဖိုးတင်ပို့နိုင်ခဲ့ပါတယ်။ ယခင်ရက် သတ္တပတ်က တန် ၇၀၀ ကျော်တင်ပို့ ခဲ့တာကြောင့် တင်ပို့မှု ထက်ဝက်ကျော် ကျဆင်းခဲ့ပါတယ်။ တင်ပို့တဲ့နိုင်ငံတွေက တော့ ဆွစ်ဇာလန်ကို တန် ၁၀၀ ၊ စင်္ကာပူကိုတန် ၁၀၀ နဲ့ မလေးရှားကို ၁၆၃ တန်အသီးသီးတင်ပို့ခဲ့ပါတယ်။ ရော်ဘာ အသစ် မထွက်ရှိသေးဘဲ လက်ကျန်များကိုသာ တင်ပို့နေ ရခြင်းဖြစ်တာကြောင့် တင်ပို့မှုနည်းနေကြောင်း သိရပါတယ်။ ယခုအပတ် နယ်စပ်ကလည်းတန်ချိန် ၄၀၀ ကျော်သာ တင်ပို့ နိုင်ခဲ့တာတွေ့ရပါတယ်။ FOBရန်ကုန်ဈေးကတော့ ကျဆင်းသွားပြီး RSS-3, MSR-20 တစ်တန်ကို ၄၃၀၀ ဒေါ်လာနဲ့RSS-5 တစ်တန်ကို ၄၂၀၀ ဒေါ်လာ အသီးသီး ဈေးပေါက်ကြောင်း သိရပါတယ်။ KZW
ဈေးကောင်းပြီး အရောင်းသွက် ပြည်ကြက်သွန်နီဈေးကွက် ရေနံချောင်းနဲ့ ပခုက္ကူဘက်မှ ကြက်သွန်နီများ ယခုတစ်ပတ်အတွင်း ပြည်ဈေးကွက်သို့ ၃၅ ပိဿာဝင် အိတ် ၂၀၀၀ ခန့်နဲ့ အဝင်များလျက်ရှိနေပါတယ်။ အဝင်လည်းများသလို အရောင်းအဝယ်မှာလည်း ဈေးကွက် အတွင်း လက် ကျန် အိတ်၃၀၀ ခန့်သာကျန်ရှိတဲ့အတွက် အရောင်းသွက်နေတယ်လို့ သိရပါတယ်။ ကြက်သွန်နီ ဈေးမှာ ပြီးခဲ့တဲ့ သြဂုတ် လ တတိယပတ်မှစပြီး တဖြည်းဖြည်းဈေးမြင့်လာခဲ့ရာ လှောင်လက်သမားအချင်းချင်းကပင် ဈေးအရမ်းမြင့်သွားလျှင် လက် ကျန် ရှိနေအောင် အဝင်ကို အဟောင်းအသစ်ဖလှယ်ပြီး အရောင်းအဝယ်ပြုလုပ်လျက် ရှိတဲ့အတွက် အရောင်းသွက် နေတာဖြစ်ကြောင်းသိရပါတယ်။ ဈေးကွက်ရှိပွဲရုံများ၌ လှောင်လက်သမားများ၊ လက်လီ၊ လက်ကားရောင်းဝယ်သူ များနဲ့ အခြားတိုင်းဖြစ်သော ဟင်္သာတ၊ အင်ပင်၊ တောင်ကုတ်၊ သံတွဲစတဲ့မြို့များသို့ တင်ပို့မှု အပါအဝင် ယခုတစ်ပတ် အတွင်းပိဿာချိန် ၅၉၀၀ ခန့်အရောင်းအဝယ်ဖြစ်ပြီး တစ်ပိသာလျှင် ကြက်သွန်နီ (ရှယ်) ၁၀၀၀ ကျပ်၊ (ကြီး) ၈၅၀ကျပ်၊ (လတ်စ) ၇၅၀ ကျပ်၊ (သေး) ၆၀၀ ကျပ်တို့နဲ့ အသီးသီးဈေးကောင်းရလျက်အရောင်းအဝယ်ဖြစ်နေကြောင်းသိရပါတယ်။ ဝင်းလဲ့ဝါ
အိန္ဒိယရဲ့ ကြက်သွန်နီပြည်ပဈေးကွက်များ တရုတ်နဲ့ ပါကစ္စတန်ကို ဆုံးရှုံး အိန္ဒိယအစိုးရက ကြက်သွန်နီတင်ပို့မှုပိတ်ပင်ခြင်းကို ပြန်ဖွင့်ခဲ့ပေမဲ့ တင်ပို့ဈေးနှုန်းမြင့်တက်ခြင်းနဲ့ မရေရာတဲ့ မူဝါဒများကြောင့် ၎င်းင်းရဲ့ပြည်ပဈေးကွက်များဟာ အိမ်နီးချင်းပြိုင်ဖက် တရုတ်နဲ့ပါကစ္စတန်ကို ဆုံးရှုံးနေရတယ်လို့ ပြည်ပ တင်ပို့သူ များကဆိုပါတယ်။ ကြက်သွန်နီ ပြည်ပတင်ပို့မှု ပိတ်ပင်ခြင်းပြန်ဖွင့်ခဲ့တဲ့ စက်တင်ဘာ၂၀ ရက်မှ ၂၇ ရက်ထိ ယခင် သီတင်းပတ်အတွင်း ကြက်သွန်နီတန်ချိန် ၄၀၀၀-၅၀၀၀ မျှသာ တင်ပို့နိုင်ခဲ့တယ်လို့ မွန်ဘိုင်း အခြေစိုက်စိုက်ပျိုးရေး ထုတ်ကုန်တင်ပို့သူများအသင်း (AEA) အရာရှိတစ်ဦးကဆိုပါတယ်။ အိန္ဒိယကြက်သွန်နီ ပုံမှန်အားဖြင့် ပင်လယ်ကွေ့နိုင်ငံများ၊ စင်ကာပူ၊ မလေးရှား၊ အင်ဒိုနီးရှားနဲ့ သီရိလင်္ကာတို့က ဝယ်ယူပေမယ့် ယခုအခါ ဈေးအနိမ့်နဲ့ရောင်းချနေတဲ့ တရုတ်နဲ့ပါကစ္စတန်ကြက်သွန်နီနဲ့ ယှဉ်ပြိုင် ရောင်းချဖို့ ခက်ခဲနေပြီလို့ဆိုပါတယ်။ အိန္ဒိယဟာ တရုတ်နိုင်ငံပြီးရင် ကမ္ဘာမှာ ကြက်သွန်နီ ဒုတိယအများဆုံး ထုတ်လုပ်သူဖြစ်ပါတယ်။ အိန္ဒိယအစိုးရက စက်တင်ဘာလ ၂၀ ရက်က ကြက်သွန်တင်ပို့မှု ပြန်လည်ခွင့်ပြုပြီးနောက် ပြည်ပတင်ပို့မှု အနိမ့်ဆုံးဈေး (MEP)ကိုတစ်တန်ကန်ဒေါ်လာ ၄၇၅ သတ်မှတ်ခဲ့တာဖြစ်ပါတယ်။ ယခုနှစ်စက်တင်ဘာလ ၉ ရက်မှ ၂၀ ရက်အထိ ကြက်သွန် တင်ပို့မှုပိတ်ထားစဉ် စင်ကာပူကုန်သည် တော်တော်များများဟာ အိန္ဒိယကြက်သွန်နီအစား တစ်လစာအတွက် တရုတ် တင်ပို့သူတွေနဲ့ စာချုပ်ခဲ့တယ်လို့ဆိုပါတယ်။ နိုင်ငံတကာဈေးကွက်မှာ တရုတ်နဲ့ ပါကစ္စတန်တို့က ကြက်သွန်နီတစ်တန် ကန်ဒေါ်လာ ၃၀၀ နဲ့ ၃၂၅ ဈေးအသီးသီးရောင်းချနေတဲ့အတွက် လက်ရှိ အိန္ဒိယ (MEP) ဈေးနှုန်းနဲ့ မယှဉ်နိုင်ဘူးလို့ဆိုပါတယ်။ ပုံမှန်အချိန်တွေမှာ အိန္ဒိယက လစဉ်တန်ချိန် ၇၀၀၀၀ ထိ တင်ပို့မှုရှိတယ်လို့ဆိုပါတယ်။ ယခုနှစ်အစောပိုင်းက ဒူဘိုင်းနိုင်ငံ ဟာ အိန္ဒိယကြက်သွန်နီတွေ အလျှံပယ်သုံးစွဲခဲ့ပေမဲ့ ယခုအခါ ပါကစ္စတန်နဲ့ အီရန်အပါအဝင် အခြား ၆ နိုင်ငံက ကြက်သွန်နီများ ရှာဖွေတော့မယ်လို့ AEA ကဆိုပါတယ်။ စိုက်ပျိုးရေးသမအေဂျင်စီဖြစ်တဲ့ Nafed မှ ထုတ်ပြန်ပြောကြားချက်အရ ယခုနှစ် ပထမနှစ်ဝက်အတွင်း ကြက်သွန်နီတင်ပို့မှုဟာ ယခင်နှစ်ကာလတူနဲ့ နှိုင်းယှဉ်ရင် ထက်ဝက်ကျော် ပိုနေတယ်လို့ဆိုပါတယ်။ ဧပြီလ ၁ ရက်နဲ့ စက်တင်ဘာလ ၂၆ ရက်အတွင်း ကြက်သွန်နီတန်ချိန် ၅ ဒသမ ၅၈ သိန်း တင်ပို့ပြီးသွားပြီလို့ဆိုပါတယ်။ အလားတူကာလ နှိုင်းယှဉ်မှုအနေနဲ့ ၂၀၀၉ ခုနှစ်မှာ တန်ချိန် ၁၁ ဒသမ ၂၁ သိန်း တင်ပို့ခဲ့ပြီ၊ ၂၀၁၀ ကာလတူမှာ တန်ချိန် ၉ ဒသမ ၃၄ သိန်းတင်ပို့ပြီးပြီလို့ဆိုပါတယ်။ အစိုးရက လက်လီဈေးကွက်မှာ ကြက်သွန်တစ်ကီလို ရူပီး ၂၅ (ကန်ဒေါ်လာ ၀ ဒသမ ၅၁) ထိ မြင့်တက်ခဲ့စဉ် စက်တင်ဘာလ ၉ ရက်နေ့မှာ ကြက်သွန်နီ တင်ပို့မှုပိတ်ခဲ့တာဖြစ်ပါတယ်။ ယမင်းခင်၊Source: ndtu.com
အိန္ဒိယနနွင်း ဈေးမာ အိန္ဒိယနနွင်းလက်ငင်းဈေးကွက်များအတွင်း နနွင်းတောင်သူများမှ နနွင်းသယ်ယူရောင်းချမှု နည်းတာကြောင့် စက်တင်ဘာ ၂၈ ရက်မှာ နနွင်းတစ်တန် ရူပီး ၂၅၀၀ မှ ၆၀၀၀ (ကန်ဒေါ်လာ ၅၁ - ၁၂၃) ထိမြင့်တက်လာခဲ့ပါတယ်။ တောင်သူတွေက ကုန်ပစ္စည်းများများ ဈေးကွက်အတွင်းဝင်ရောက်ရင် ဈေးလျော့ကျတဲ့အတွက် အနည်းငယ်စီသာ ထုတ်ရောင်းလာကြတဲ့အတွက် ဈေးမြင့်တဲ့ အကျိုးရရှိလာခြင်းဖြစ်တယ်လို့ အီရော့ နနွင်းကုန်သည်များအသင်း ဥက္ကဌ မစ္စတာ အာကေဗွီရာဗီရှန်ကာ ကဆိုပါတယ်။ ဈေးအနည်းငယ် တိုးလာလို့ တောင်သူတွေပျော်နေပေမဲ့ ကုန်သည်တွေကတော့ အိန္ဒိယမြောက်ပိုင်းက ကုန်သည်တွေရဲ့ အမှာအသစ်များကို စောင့်မျှော်နေရဆဲဖြစ်တယ်လို့ ဆိုပါတယ်။ နနွင်းအိတ် ၄၆၀၀ ဝင်ရောက်တဲ့အနက် ၆၀-၇၀ ရာခိုင်နှုန်းခန့် ရောင်းချရတယ်လို့ ဆိုပါတယ်။ ခုလို ဈေးတက်ခြင်းဟာ ယာယီမျှသာဖြစ်ပါတယ်။ အောက်တိုဘာလကုန်ထိ ခုလိုအတက်အကျ အနည်းငယ်သာ ရှိနိုင်ပြီး ထုတ်လုပ်မှုများတာကြောင့် မနှစ်ကလို ဈေးများများတက်နိုင်ဖွယ်မရှိဘူးလို့ ဆိုပါတယ်။ ဒီနှစ်က မနှစ်ကထက် ထုတ်လုပ်မှု ပိုမိုမြင့်တက်မယ်လို့လည်း မစ္စတာ ရာဗီရှန်ကာ ကထပ်လောင်း ပြောကြားပါတယ်။ အရည်အသွေးကောင်း နနွင်းဝင်ရောက်မှုကြောင့် ဈေးကွက်ထိန်းသိမ်းရေးကော်မတီဝင်းမှာ နနွင်းတစ်တန် ရူပီး ၆၀၀၀ (ကန်ဒေါ်လာ ၁၂၃) မြင့်တက်ခဲ့ပြီး အီရော့နနွင်းကုန်သည်များအသင်းဈေးဝင်းမှာ နနွင်း လက်ချောင်းဈေး တစ်တန် ရူပီး ၃၅၀၉၀-၄၇၆၆၀ (ကန်ဒေါ်လာ ၇၁၇-၉၇၅) ၊ နနွင်းဥဈေးက ရူပီး ၃၃၁၀၀-၄၂၆၆၀ (ကန်ဒေါ်လာ ၆၇၇-၈၇၂) ဈေးဖြစ်ခဲ့ တယ်လို့ သိရပါတယ်။ ယမင်းခင်၊Source: businessline
တရုတ်နှင့် ပါကစ္စတန် ကြက်သွန်နီများထက် အိန္ဒိယကြက်သွန်နီ ကြမ်းခင်းဈေး ပိုမိုနေ အိန္ဒိယက ပြည်တွင်းကြက်သွန်နီဈေးနှုန်းတွေ မြင့်မားလာမှုကြောင့် စက်တင်ဘာလအတွင်း ကြက်သွန်နီ ပြည်ပတင်ပို့မှုကို ပိတ်ပင်လိုက်ပြီး နှစ်ပတ်အကြာ စက်တင်ဘာလ ၂၀ ရက်နေ့မှာ ပြည်ပကို တင်ပို့ဖို့ ပြန်လည် ခွင့်ပြုပေးခဲ့တယ်။ ဒါပေမဲ့လည်း ပြည်ပတင်ပို့ဖို့ ကြမ်းခင်းဈေးကို တစ်တန်ကို ၄၇၅ ဒေါ်လာ (FOB နှုန်း) အထိ သတ်မှတ်လိုက်ရာ တရုတ်နဲ့ ပါကစ္စတန်မှ ကြက်သွန်နီတွေထက် ဈေးမြင့်နေရာ ဈေးကွက်ယှဉ်ပြိုင် နိုင်စွမ်း ကျဆင်းကာ ပြည်ပမှ ဝယ်လိုအားများစွာ မရှိကြောင်း သိရတယ်။ ကမ္ဘာ့ဈေးကွက်မှာ တရုတ်နဲ့ ပါကစ္စတန်ကြက်သွန်နီ ပြည်ပတင်ပို့တဲ့ ဈေးနှုန်း (FOB နှုန်း)များမှာ တစ်တန်ကို ၃၀၀ ဒေါ်လာနဲ့ ၃၂၅ ဒေါ်လာစီ အသီးသီး ဖြစ်ကြောင်း သတင်းရရှိပါတယ်။ ပပ၊Source:tribune.com.pk
မိုးများလို့ ဈေးကွက်ကိုစောဝင်တဲ့ ရှမ်းချင်း အရင်နှစ်တွေက မိုးမရွာလို့ မိုးရွာချိန်ကို စောင့်ပြီးဖော်ရတဲ့ ချင်းတွေက ကြက်သွန်နီ ဒီနှစ်မှာတော့ မိုးများတာကြောင့် ဈေးကွက်ကို စောပြီးဝင်လာပါတယ်။ ပြီးခဲ့တဲ့ အပတ်တွေကတော့ အောင်ပန်းမြို့နယ်အနီးတစ်ဝိုက်က ချင်းတွေကို မဖော်မဖြစ် ဖော်ခဲ့ရပြီး၊ဒီတစ်ပတ်မှာလည်းကလော၊နောင်တရားမြို့နယ်အနီးတစ်ဝိုက်ကချင်းတွေ ပါ ဖော်လာကြရပါတယ်။ ချင်းပင်တွေမှာ ရေဝပ်ပြီးထိပ်တွေပုပ်စပြုလာတာကြောင့် ဖော်ခဲ့ရတယ်လို့ နောင်တရားက တောင်သူတွေထံကသိရှိရပါတယ်။ ပုံမှန်အတိုင်း ဆိုရင် သီတင်းကျွတ်လောက်မှသာ ချင်းသစ်တွေ ဈေးကွက်ကိုစဝင်မှာ ဖြစ်ပါတယ်။ အဲဒီအချိန်မှာလည်း ချင်းကရင့်မှာဖြစ်ပါတယ်။ အောင်ပန်းဈေးကွက်မှာတော့ ကလောမြို့နယ်က ချင်းတွေ အများဆုံးဝင်နေပါတယ်။ ၅ ရက်တစ်ဈေးကို ချင်းသစ်ပိဿာချိန် ၃ သောင်းခန့် ဝင်နေတယ်လို့လည်း သိရပါတယ်။ ချင်းဥမတွေရော၊ ချင်းသစ်တွေပါဆိုရင် ဈေးတစ်ပတ်ခြားကို ပိဿာချိန် ၆ သာင်းခန့် အဝင် ရှိနေပါတယ်။ ဝင်လာတဲ့ ချင်းတွေကိုလည်း အရည်အသွေးပေါ်မူတည်ပြီး ဈေးနှုန်း သတ်မှတ်ကြလို့ ချင်း(ဥမ) (ညံ့စ)က တစ်ပိဿာ ၂၅၀ ကျပ်၊ (လတ်စ) ၃၀၀ ကျပ်နဲ့ (ထိပ်စ)က ၃၀၀ ကျပ် - ၃၅၀ ကျပ်ဈေးရှိပါတယ်။ ချင်းသစ်ကတော့ တစ်ပိဿာ ၂၀၀ကျပ် -၂၅၀ကျပ်ဈေးရှိပါတယ်။ ချင်းခြောက်တွေကလည်း လက်ကျန်တန် ၁၀၀၀ ခန့်ရှိသေးတယ်လို့ သိရပြီး တစ်ပိဿာကို ၂၀၀၀ကျပ် -၂၁၀၀ကျပ် ဈေးရှိတယ်လို့ အောင်ပန်းဈေးပွဲရုံတွေက သိရပါတယ်။ ဧဧခိုင်