လက်ကျန်နည်းပြီး အဝယ်တက်လာလို့ အိန္ဒိယနနွင်းကြိုပွိုင့်ဈေးမြင့်တက်                အိန္ဒိယနိုင်ငံ နနွင်းဈေးကွက်တွေဖြစ်တဲ့ နီဇမ်မာဘတ်နဲ့ အီရော့ လက်ငင်းဈေးကွက်များအတွင်း ပြည်တွင်းဝယ်လက်များ အဝယ်လျော့လို့ ၁ဒသမ ၆၄ ရာခိုင်နှုန်းကျဆင်းခဲ့ပေမဲ့ ကြိုပွိုင့်ဈေးကတော့ ဝင်ရောက်မှုနည်းလို့ ဈေးအနည်းငယ်မြင့်တက်ခဲ့တယ်လို့ သိရပါတယ်။ နနွင်းဝင်ရောက်မှုအနေနဲ့ အီရော့နဲ့ နီဇမ်မာဘတ်ကို ဧပြီလ ၂၆ ရက်က အိတ် ၁၆၀၀၀ နဲ့၈၀၀၀ စီ အသီးသီးဝင်ရောက်တာကြောင့် ယခုလအစပိုင်းက ဝင်ရောက်ခဲ့တဲ့ အိတ် ၁၅၀၀၀ နဲ့ ၁၀၀၀၀ ထက် အနည်းငယ် လျော့ကျခဲ့တယ်လို့ သိရပါတယ်။        နနွင်းထုတ်လုပ်မှုအနေနဲ့ ယခင်နှစ်က ၇၀ ကီလိုပါအိတ် ၄၈သိန်း ထွက်ရှိရာမှ ယခုနှစ်မှာ အိတ်ပေါင်း ၆၉ သိန်းခန့် ထွက်ရှိမယ်လို့ ခန့်မှန်းထားပါတယ်။ ဈေးကွက်များအတွင်းလက်ကျန် နည်းလာပြီဖြစ်ပြီး ပြည်တွင်း၊ပြည်ပဝယ်လိုအားတက်လာနိုင်တဲ့အတွက် ကြိုပွိုင့်ဈေးကွက်မှာ ဈေးအမြင့်ဘက် ဦးတည်လာနေခြင်းက ကာလတိုအတွင်း လက်ငင်းဈေးကိုလည်း ပိုမိုလာစေနိုင်ကြောင်း ဈေးကွက်က ခန့်မှန်းထားါတယ်။     ယခင်းခင်၊Source: P T I

သြင်္ကန်အလွန်ဈေးမာလာတဲ့ ရှမ်းချင်းဈေးကွက်        သြင်္ကန်ပြီးကာလ အောင်ပန်းဈေးကွက်မှာ ချင်းစိုတွေဈေးတက်လာပါတယ်။ ချင်းကလည်းအဝင်နည်းသလောက်ဖြစ်နေပါပြီ။ အခုလောလောဆယ်ဈေးကွက်ကို ပင်းတယ၊ပင်မှီ၊လဲချား၊ငုံးသုံးနဲ့ နန်းတိုင်းစတဲ့ နယ်တွေကသာ ဝင်တော့တယ်လို့ သိရပါတယ်။ အဝင်နည်းနေတာကြောင့် ဝယ်လက်နဲ့ရောင်းလက်မှာ ဝယ်လက်ကပိုများ နေပါတယ်။ ပဲခူး၊တောင်ငူ၊ရန်ကုန် စတဲ့ဝယ်လက်တွေက ပြည်တွင်သုံးအတွက် ဝယ်နေကြတာဖြစ်ပြီး ဝယ်လက်တစ်ဦးကို နေ့စဉ် ပိဿာချိန် ၁၈၀၀ ခန့်ဝယ်ယူနေတယ်လို့ သိရပါတယ်။အရင်နှစ်တွေက ဒီလိုအချိန်မှာ လှောင်လက် တွေလက်မှာ ပိဿာချိန် သိန်းဂဏန်းခန့်ကျန်နေပေမဲ့ ဒီနှစ်မှာတော့ သောင်းဂဏန်းခန့်သာကျန်တော့တယ်လို့ ဒေသခံတွေထံကသိရပါတယ်။          ဒီတစ်ပတ်အောင်ပန်းဈေးကွက်မှာ ချင်းစိုဈေးထိပ်စတစ်ပိဿာ ၁၄၀၀ ကျပ်၊ လတ်စ ၁၀၀၀ ကျပ်၊ ၁၂၀၀ ကျပ် နဲ့ အောက်စက ၆၀၀ ကျပ်၊၆၅၀ ကျပ်ရှိပါတယ်။ရန်ကုန်ဝယ်လက်တွေကတော့ ထိပ်စချင်းတွေကို ပြည်တွင်းသုံးအတွက် ဝယ်ယူနေတယ်လို့ သိရပါတယ်။ ချင်းခြောက်ဈေးကလည်း ပစ္စည်းသိပ်မကောင်းရင်တော့ ၂၂၀၀ ကျပ် ရှိပါတယ်။ မိုးရွာနေပြီဖြစ်တာကြောင့် အခြောက်ခံဖို့ အခက်အခဲ ရှိတာကြောင့် အစိုအတိုင်းရောင်းချတာများလို့ အခြောက်ကလည်းအဝင်နည်းပါတယ်။တောင်ကြီးဈေးကွက် မှာချင်းခြောက်တစ်ပိဿာ ၂၃၅၀ ကျပ်ရှိပါတယ်။        ဧဧခိုင်

ပဲယင်းလဲမပြတ် တင်ပို့            ဧပြီလ ၂ဝ ရက်မှ ၂၆ ရက်ထိကာလအတွင်း မူဆယ် (၁ဝ၅) မိုင် ကုန်သွယ်ရေး ဇုန်ကနေ ကန်ဒေါ်လာ ဝ ဒသမ ၂၁၅ သန်းတန်ဖိုးရှိ ပဲယင်း ၂၉၅ တန်ကို တင်ပို့ခဲ့ပါတယ်။ ဧပြီလဆန်းကစပြီး ပဲယင်းတင်ပို့မှု ပုံမှန်ရှိနေတာ တွေ့ရပါ တယ်။ မိမိဘက် မြေပြင် ပေါက်ဈေး ၅ဝ၂၇၁၉ ကျပ်နဲ့ တစ်ဖက် နိုင်ငံဈေး ၆၁၈ ဒေါ်လာ ရှိတယ်လို့ သိရပါတယ်။ MIRT (DOBT) 

မုံရွာစိမ်းကြီး ဈေးတက်ရေးမြင်              မုံရွာကုန်စည်ဒိုင် ဧပြီလကုန်ပတ် ပဲတီစိမ်းဈေးကွက် အနေနဲ့ ဈေးကွက်ဝယ်လိုအားရှိပေမဲ့ နယ်ပစ္စည်းအဝင် အား နည်းခဲ့လို့ တက်ဈေးဖြစ်ပေါ်ခဲ့တာ တွေ့ရပါတယ်။ မုံရွာ ကုန်စည်ဒိုင် ဈေးကွက်အတွင်း ပဲတီအသစ်ပေါ်စတစ်တင်း ၂၅ဝဝဝ ကျပ်နဲ့ ဈေးဖွင့်ခဲ့သလို ဝယ်လိုအားနဲ့ရောင်းလိုအား မမျှတလို့ တစ်ရက်ထက်တစ်ရက် ဈေးမြင့်လာခဲ့ကာ ဧပြီ ၂၉ ရက်နေ့မှာ တစ်တင်း ၂၈ဝဝဝ ကျပ်ထိ ဈေးမြောက်လာခဲ့တာ တွေ့ရပါတယ်။ ဝယ်လက်အားဖြင့် ဒေသတွင်းလုပ်ငန်းသုံး သမားများအပြင်၊ မန္တလေး လက်ပါရှိခဲ့လို့ ပစ္စည်းဝင် သလောက် အရောင်းအဝယ်ဖြစ်ခဲ့တယ်လို့ ဆိုပါတယ်။ ဈေးကွက်လိုအပ်ချက် မြင့်မားနေပေမဲ့ ဧပြီ ၂၇၊ ၂၈၊ ၂၉ ရက်များအတွင်း မုံရွာနယ်ဝန်းကျင်မှာ ရွာခဲ့တဲ့မိုးကြောင့် ရေဝင်ဒေသနဲ့ အင်းဒေသများမှာ ရေဝင်ခဲ့လို့ နွေ ပဲတီခင်း တစ်ချို့ ပျက်စီးထိခိုက်မှုရှိခဲ့ကြောင်းနဲ့ ဈေးကွက်ထဲပစ္စည်း အဝင်လည်း အနည်းငယ်ထိခိုက်နိုင်လို့ တက်ဈေးမြင်တယ်လို့ ဈေးကွက်က ဆိုပါတယ်။                    ထွန်းလှိုင်