ရောင်းလိုအားများလို့ ဈေးလျော့အဝယ်ရှိလာတဲ့ ပြည်ပဲကြီး                     ယခုတစ်ပတ်ပြည်ပဲကြီးဈေးကွက်တွင် အခြားတိုင်းမှဝင်ရောက်မှုမရှိဘဲ ဒေသတွင်းမှအနည်းငယ်သာဝင် ရောက်မှုရှိခဲ့ပါတယ်။ ယခင်အပတ်က ပဲကြီး (ရွှေကျွန်း) တစ်တင်း ၁၇ဝဝဝ ကျပ်၊ ပဲကြီး(ကမ်းနား)တစ်တင်း ၁၅၅ဝဝ ကျပ်ဈေးဖြင့် ဈေးမြင့်လာခဲ့ပြီးယခုတစ်ပတ်အတွင်း တောင်သူတွေမှအပ်ပဲများ ထုတ်ရောင်း လာကြတာကြောင့် ဝယ်လက်များမှ ပဲကြီး(ရွှေကျွန်း)တစ်တင်း ၁၆၅ဝဝ ကျပ်၊ ပဲကြီး(ကမ်းနား)တစ်တင်း ၁၅ဝဝဝ ကျပ်ဖြင့် ယခင်အပတ် ထက်တစ်တင်း ၅ဝဝ ကျပ်ဈေးလျော့အဝယ်ရှိခဲ့တာကိုတွေ့ရပါတယ်။ ပဲကြော်ဖိုသမားရော လိုင်း သမားများပါ အဝယ်ရှိတဲ့အတွက် တစ်ရက်အိတ် ၂၅ဝ မှ ၃ဝဝ အထိအရောင်း အဝယ်ဖြစ်ကြောင်းသိရပါတယ်။ ခင်ဆွေဝင်း

ထောပတ်ပဲနဲ့ မြေထောက်ပဲ သင်္ဘောတင်ပုံမှန်ရှိနေ                     ယခုသီတင်းပတ် (ဇွန်လ ၉ ရက်မှ ၁၄ ရက်) အတွင်းမှာ ပင်လယ်ရေကြောင်း က ထောပတ်ပဲ တန် ၆ဝဝ နီးပါးနဲ့ မြေထောက်ပဲ တန် ၃ဝဝ နီပါးတင်ပို့မှုရှိလို့ ယခင်သီတင်းပတ်ထက် ပိုမိုတင်ပို့နိုင်တာ တွေ့ရပါတယ်။ တင်ပို့တဲ့နိုင်ငံတွေကတော့ ထိုင်း၊ ဖိလစ်ပိုင်၊ တရုတ်နဲ့ ဂျပန်တို့ဖြစ်ပါတယ်။ ဇွန်လ ၁ဝ ရက်နေ့အထိ လက်ရှိ ဘဏ္ဍာနှစ်အတွင်း တင်ပို့ပြီးစီးမှုအနေနဲ့ ထောပတ်ပဲတန် ၇ဝဝဝ ကျော်နဲ့ မြေထောက်ပဲ တန် ၃ဝဝဝ ကျော်ရှိပြီး ယခင်ဘဏ္ဍာနှစ် ကာလတူက ထောပတ်ပဲတန် ၆၃ဝဝ ကျော်နဲ့ မြေထောက်ပဲ တန် ၂ဝဝဝ ကျော် တင်ပို့မှုရှိခဲ့လို့ ယခုနှစ် ကာလတူမှာ ပိုမိုတင်ပို့နိုင်တာတွေ့ရပါတယ်။ လာမယ့်သီတင်းပတ်တွေမှာလည်း တင်ပို့မှုအားကောင်းဖွယ် ရှိတယ်လို့ ခန့်မှန်းကြပါတယ်။MIRT- MAPT

ဈေးအနည်းငယ်လှုပ်တဲ့ မုံရွာကုလားပဲဖြူလုံးကြီး V2                  မုံရွာကုန်စည်ဒိုင်မှာ ၂ဝ၁၁ ခုနှစ်ဇွန်လ ၁၅ ရက်အတွင်းကုလားပဲဖြူလုံးကြီးV2  တစ်ပိဿာအနိမ့်၊အမြင့်ဈေးမှာ ၈၃၂ ကျပ်၊ ၉၂၈ ကျပ်။ ယခင်နှစ်ကာလတူ ပေါက်ဈေးမှာ ၁ဝ၄၂ ကျပ်၊ ၁ဝ၇၉ ကျပ်ဈေးအသီးသီးနဲ့ရောင်း ဝယ်ခဲ့ကြပါတယ်။ ဇွန်လ ၁၃၊ ၁၄ ရက်နေ့မှာ V2 တစ်ပိဿာ ၈၃၂ ကျပ် မှ ၁၅ ရက်နေ့မှာ ၈၆၈ ကျပ်သို့ ဈေးလှုပ်ခဲ့ရာတစ်ပိဿာအပေါ် ၃၆ ကျပ်၊ တစ်တင်းအပေါ် ၇ဝဝ ကျပ်ဈေးတက်ခဲ့ကြောင်းသိရှိရပါတယ်။ပဲမျိုးစုံသီး နံှများရဲ့ဈေးအတက်အကျ ဖြစ်ရခြင်းမှာ Earning ဈေးနဲ့ Export ဝယ်လက်အပေါ်မူတည်ပါကြောင်း ကုန်သည်တစ်ဦး မှပြောပြလို့သိရှိရပါတယ်။ ယခုအပတ်အတွင်း မုံရွာကုန်စည်ဒိုင်မှာ ကုလားပဲဖြူလုံးကြီး V2တင်း ၁၂ဝဝ ကျော် အရောင်းအဝယ်ဖြစ်ကြောင်းသိရပါတယ်။ ယခုလအတွင်းစစ်ကိုင်းတိုင်းဒေသကြီးမှ ကုလားပဲဖြူလုံးကြီး V2 ရန်ကုန် သို့တင်း ၁၄ဝဝ ကျော်၊ မန္တလေးသို့တင်း ၃၁ဝဝ ကျော်စီးထွက်ခဲ့ကြောင်း သိရှိရပါတယ်။ သန်းသန်းတင် 

ကုလားပဲဖြူလုံးကြီး သင်္ဘောတင်ပို့မှု တန် ၂၃ဝဝ ကျော်လာ               ယခင်သီတင်းပတ်က ကုလားပဲဖြူလုံးကြီး သင်္ဘောတင်ပို့မှု တန် ၁၄ဝဝ ခန့်ကို လျော့ကျခဲ့ရာမှ ယခုသီတင်းပတ် (ဇွန်လ ၉-၁၄ရက်) အတွင်းမှာတော့ တန် ၂၃ဝဝ ကျော်ကို ပြန်တိုးတက်လာတာတွေ့ရပါတယ်။ တင်ပို့တဲ့ နိုင်ငံတွေကတော့ အိန္ဒိယ၊ ပါကစ္စတန်နဲ့ စင်ကာပူတို့ဖြစ်ပါတယ်။ လက်ရှိဘဏ္ဍာနှစ် ဇွန်လ ၁ဝ ရက်နေ့အထိ ကုလားပဲဖြူလုံးကြီး သင်္ဘောတင်ပို့မှု တန်ချိန် ၂၄ဝဝဝ ခန့်ရှိပြီး ယခင်ဘဏ္ဍာနှစ် ကာလတူက တန် ၅ဝဝ ခန့်သာ တင်ပို့နိုင်တာတွေ့ရပါတယ်။ လာမယ့်သီတင်းပတ် များမှာလည်း တင်ပို့မှု ဆက်လက်အားကောင်းဖွယ်ရှိတယ်လို့ ခန့်မှန်းကြပါတယ်။ MIRT- MAPT