Background
ယခုအပတ် မူဆယ်မှ နနွင်းတက် တင်ပို့မှု ပိုမိုလာ မူဆယ် (၁ဝ၅) မိုင် ကုန်သွယ်ရေးဇုန်မှ မေလ ၁၈ ရက်မှ ၂၄ ရက်ထိကာလအတွင်း ကန်ဒေါ်လာ ဝ ဒသမ ၁၁၁ သန်း တန်ဖိုးရှိ နနွင်းတက် ၅၆ တန်ကျော် တင်ပို့နိုင်ခဲ့ပါတယ်။ ယခင်အပတ်က ၁၆ တန် သာ တင်ပို့ခဲ့တာမို့ ယခုအပတ်မှာ တန် ၄ဝ ပိုမိုတင်ပို့နိုင်ခဲ့ပါတယ်။ ဧပြီလမှ မေလ ၂၄ ရက်ထိ ကာလအတွင်း နယ်စပ်မှ နနွင်းတက် တင်ပို့နိုင်မှုမှာ တန် ၁ဝ၅၆ တန်ကျော်ရှိပြီဖြစ်ပါတယ်။ MIRT (DOBT)
ပင်ယံဖျားက ရွှေမန်ကျည်း ပဲမျိုးစုံဈေးကွက်မှာ ပဲတီစိမ်းကလွဲလို့ အခြားပဲတွေ ဈေးကျဈေးအေးနေချိန်မှာ ပဲ ပင်ယံဖျားမှာ သီးမှည့်တဲ့ မန်ကျည်းက ခေါင်ကိုမော့ ရင်ကိုကော့နေတာတွေ့ရပါတယ်။ ယခင်နှစ်ကာလတူတွေကို ပြန်ကြည့်ရင် ၂ဝဝ၈ မေလ ယခုလိုရက်မျိုးမှာ မန်ကျည်းတစ်ပိဿာ ၁၅ဝ ကျပ်-၁၆၅ ကျပ်၊ ၂ဝဝ၉ မေလမှာ ၁၈ဝ ကျပ်-၂ဝဝ ကျပ်၊ ၂ဝ၁ဝ မေလမှာ ၆ဝဝ ကျပ်-၆၅ဝ ကျပ်ရှိပြီး ယခုနှစ်မှာတော့ ၁၃ဝဝ ကျပ်-၁၃၃ဝ ကျပ်ထိ ၂ဝဝ၈ ဈေးရဲ့ ၁ဝ ဆနီးပါးဖြစ်ခဲ့ပါတယ်။ ယခုကာလမှာတော့ ပခုက္ကူကို မြိုင်နယ်ဘက်က မန်ကျည်းအဝင်နည်းသွားပြီး ပေါက်နယ်နဲ့ ဂန့်ဂေါနယ် ကပဲ အဝင်ရှိပါတော့တယ်။ မောင်မောင်အေး
အင်ဒိုနီးရှားကို အများဆုံးတင်ပို့ ပင်လယ်ရေကြောင်း ကုန်သွယ်မှုလမ်းကနေ မေလ ၁၅ ရက်မှ ၂၁ ရက်တာ ကာလအတွင်း မန်ကျည်း ၂၄၂ တန်ကိုတင်ပို့ခဲ့ပါတယ်။ တင်ပို့ခဲ့တဲ့ ကုန်သွယ်ဖက် နိုင်ငံတွေက အင်ဒိုနီးရှားကို တန်ချိန် ၁၅ဝ၊ မလေးရှားနိုင်ငံကို ၂၄ တန်နဲ့ စင်ကာပူ နိုင်ငံကို ၆၈ တန်ဖြစ်ပါတယ်။ ဒီတစ်ပတ်တင်ပို့သမျှတွေထဲမှာ အင်ဒိုနီးရှားနိုင်ငံကို အများဆုံးတင်ပို့နိုင်ခဲ့ပါတယ်။ ယခင်သီတင်းပတ် ၁၂၃ တန်သာတင်ပို့နိုင်ခဲ့ပေမဲ့ ဒီသီတင်းပတ်မှာတော့ တန်ချိန် တစ်ရာကျော်ပိုမိုတင်ပို့နိုင်ခဲ့ပါတယ်။ တစ်တန်ကို အက်ဖ်အိုဘီဈေးကန်ဒေါ်လာ ၆၅ဝ ဝန်းကျင်နဲ့ တင်ပို့ခဲ့တဲ့အတွက် စုစုပေါင်းပို့ကုန် ဝင်ငွေကန်ဒေါ်လာ တစ်သိန်းငါးသောင်းကျော်ရရှိခဲ့ပါတယ်။ MIRT (DOT)
လှိုင်လှိုင်ပေါ်၍ ဈေးကျလာတဲ့ ပြည်ချင်းဈေးကွက် အောင်ပန်းဘက်မှ မှာယူတင်သွင်း ရောင်းဝယ်လျက်ရှိသော ချင်းများ ပြည်ဈေးကွက်တွင် ယခုတစ်ပတ်၌ တစ်ပိဿာကို ချင်း(ရှယ်) ၁၆ဝဝ ကျပ်၊ (ဂျွန်) ၁၅ဝဝ ကျပ်တို့ရှိပြီး ယခင်တစ်ပတ်ကထက် ချင်းတစ်ပိဿာကို ၂ဝဝ ကျပ်ခန့် ဈေးကျသွား ခဲ့ပါတယ်။ ချင်းများစိုက်ပိုျးထွက်ရှိရာ အောင်ပန်းတွင် ချင်းများလှိုင်လှိုင်ထွက်ပေါ်နေခြင်းကြောင့် ဈေးကျခြင်းဖြစ်ပြီး ပြည်ဈေးကွက်အတွင်း အဝင်ပုံမှန် အရောင်း အဝယ်ပုံမှန်ဖြင့် ယခုတစ်ပတ်အတွင်း တစ်နေ့ကို ဧရာဝတီနဲ့ ရခိုင်ဘက်သို့ အပါအဝင် ပိဿာချိန် ၆ဝဝ ခန့် အရောင်းအဝယ်ဖြစ်ခဲ့ကြောင်း သိရပါတယ်။ ဝင်းလဲ့ဝါ
ဈေးကောင်းရမှတူးဖော်မယ့် ရှမ်းချင်း အောင်ပန်းဈေးကွက်မှာလည်း ချင်းအစို အဝင်နည်းလာပါပြီ။ အထွက်များတဲ့ ကျောက်တစ်လုံး၊ ထနောင်း စတဲ့ရွာတွေကသာ အဝင်ရှိတော့တယ်လို့သိရပါတယ်။ ဇွန်လဆန်းမှာချင်း (ဥမ)တွေပြန်ဖေါ်ကြတော့မှာ ဖြစ်ပါတယ်။ မိုးဆက်တိုက်ရွာပြီ ဖြစ်တာကြောင့် မနှစ်ကစိုက်ခဲ့တဲ့ချင်းဟောင်းပင်တွေက ဥမပင်တွေကိုပြန်ဖေါ်ကြမှာဖြစ်ပါတယ်။ ပြည်တွင်းဈေးကွက်မှာချင်းဈေးမြင့်တက်လာခြင်း ဈေးကွက်မှာ တောင်သူတွေကြိုက်ဈေးရရှိပါက ချင်းကိုနှစ်ကြိမ်တိုင ်တူးဖော်ရောင်းချကြပါတယ်။ ဒီတစ်နှစ်ချင်းဥမဈေးကတော့ တစ်ပိဿာကို ၃ဝဝ ကျပ်၊ ၄ဝဝ ကျပ် ဈေးနဲ့ စဖွင့်နိုင်တယ်လို့ ကုန်သည်တွေကခန့်မှန်းကြပါတယ်။ ဒီတစ်ပတ်ချင်းဈေးက အောင်ပန်းမှာ ချင်းစို တစ်ပိဿာကို ၃ဝဝ ကျပ်၊ ၁ဝဝဝ ကျပ်ဈေးထိရှိပြီး ချင်းခြောက် ကတော့တစ်ပိဿာ ၂ဝဝဝ ကျပ်၊ ၂၂ဝဝ ကျပ် ဈေးရှိပါတယ်။ တောင်ကြီးဈေးကွက်မှာတော့ ချင်းစိုလက်လီဈေး ၁၂ဝဝ ကျပ် မှ ၁၅ဝဝ ကျပ် ရှိပြီးချင်းခြောက် ဈေးက တစ်ပိဿာ ၂၃၅ဝ ကျပ်ရှိပါတယ်။ ဧဧခိုင်
ပင်လယ်ရေကြောင်းက ၃၆ တန်တင်ပို့ မေ ၁၅ ရက်မှ ၂၁ ရက်တာကာလအတွင်း ချင်း ၃၆ တန်ကို ပင်လယ်ရေကြောင်းလမ်းကနေ တင်ပို့ခဲ့ပါတယ်။ မလေးရှားကို ၁၁ တန်နဲ့ အင်ဒိုနီးရှားကို ၂၅ တန်အသီးသီးတင်ပို့နိုင်ခဲ့ပါတယ်။ ယခင်သီတင်းပတ်အပို့ပျောက်ခဲ့တဲ့ ချင်းက ဒီသီတင်းပတ်မှသာ ပြန်လည်တင်ပို့နိုင်ခဲ့ပါတယ်။ တစ်တန်ကို အက်ဖ်အိုဘီဈေးကန်ဒေါ်လာ ၁၄၆ဝ ဝန်းကျင်နဲ့ တင်ပို့ခဲ့တဲ့အတွက် စုစုပေါင်းပို့ကုန်ဝင်ငွေကန် ဒေါ်လာ ငါးသောင်းနှစ်ထောင်ကျော်ရရှိခဲ့ပါတယ်။ MIRT (DOT)
ပြောင်းတန် ၂ဝဝဝ ကျော် မေလ ၁၃ ရက်မှ ၂၆ ရက်ထိ ကာလအတွင်း ပင်လယ်ရေကြောင်းမှ ပြောင်း တန်ချိန် ၂၄၇၂ တန်၊ တန်ဖိုး ကန်ဒေါ်လာ ဝ ဒသမ ၆၇၃ သန်းဖိုး တင်ပို့နိုင် ခဲ့ပါတယ်။ ယခင်ရက်သတ္တပတ်က တန် ၁ဝဝဝ ကျော်သာ တင်ပို့ခဲ့တာကြောင့် တင်ပို့ မှု ၂ ဆကျော်မြင့်တက်ခဲ့ပါတယ်။ တင်ပို့ခဲ့တဲ့ နိုင်ငံတွေနဲ့ တန်ချိန်တွေကတော့ အိန္ဒိယကို ၁၆၉၂ တန်၊ မလေးရှားကို တန် ၄၈ဝ နဲ့ ဖိလစ်ပိုင်ကို တန် ၃ဝဝ အသီးသီး ဖြစ်ပါတယ်။ ၤဥြ ရန်ကုန်ဈေးကတော့ ဒေါ်လာ ၂၉ဝ နဲ့ ၃၁ဝ ကြား ဈေးပေါက်လျက်ရှိပါတယ်။ KZW
မေလကုန်တွင် ရော်ဘာဈေးနှုန်းများ ၁ဝ ရာခိုင်နှုန်းကျော် ကျဆင်းနိုင် သွင်းကုန်တွေ ဈေးချိုလာခြင်းနဲ့ ပြည်တွင်းအထွက်နှုန်း မြင့်မားလာခြင်းကြောင့် မေလကုန်မှာ ရော်ဘာဈေးနှုန်း ၁၁ ရာခိုင်နှုန်းလောက် ကျဆင်းသွားနိုင်ကြောင်း အိန္ဒိယရော်ဘာသုံး တာယာလုပ် ငန်းနဲ့ အခြား စက်မှုလုပ်ငန်းများက မျှော်လင့်နေကြပါတယ်။ ယခု လက်ရှိမှာ ရော်ဘာဈေးနှုန်းက တစ်ကီလိုကို ၂၂၂ ရူပီး (၄ ဒသမ ၉ ဒေါ်လာ) ရှိရာကနေ မေလကုန်မှာ ရူပီး ၂ဝဝ ( ၄ ဒသမ ၄၅ ဒေါ်လာ)ကို ကျဆင်းသွားနိုင်ကြောင်း စက်မှုကျွမ်းကျင်သူများက ပြောပါတယ်။ ကြိုပွိုင့်ဈေးတွေကတော့ ဧပြီလကုန်ကတည်းက ကျဆင်းနေတာဖြစ်ကြောင်း သိရပါတယ်။ ရော်ဘာဈေးနှုန်းက ဇွန်လ တိုင်အောင် တစ်ကီလိုကို ရူပီး ၂ဝဝ အထိ ကျဆင်းနိုင် ကြောင်း အိန္ဒိယရော်ဘာရောင်းဝယ်သူများအသင်း (IRDF) ရဲ့ ဥက္ကဌက ပြောကြားခဲ့ပါတယ်။ ရာသီဥတု အခြေအနေကောင်းမွန် တာကြောင့် ရော်ဘာအစေးထွက်ကောင်းပြီး ထုတ်လုပ်မှုတက်လာခြင်းက ဈေးနှုန်းကျစေတဲ့အပြင် ကမ္ဘာ့ဈေးနှုန်းကျတာကြောင့် ရော်ဘာ သွင်းကုန်ဈေးတွေလဲ ကျဆင်းလာကြောင်း (IRDF) ရဲ့ ဥက္ကဋ္ဌက ဆက်လက်ပြောကြားခဲ့ပါတယ်။ အိန္ဒိယရဲ့ ရော်ဘာ ထုတ်လုပ်မှုဟာ ၂ဝ၁၁-၂ဝ၁၂ မှာ တန် ၉ဝ၂ဝဝဝ အထိ ထွက်ရှိနိုင် ကြောင်း ခန့်မှန်းထားပါတယ်။ တောင်သူများကလည်း မုတ်သုံရာသီ မတိုင်မီအချိန်မှာ ၎င်းတို့ရဲ့ သိုလှောင်မှုကို အများဆုံးသိုလှောင် ထားကြပြီး ဈေးကောင်းထပ်မံ ရဦးမယ်လို့ မျှော်လင့်နေကြကြောင်း သိရပါတယ်။ မိုးရာသီမှာတော့ စိုစွတ်တဲ့ရာသီဥတုကြောင့် ရော်ဘာ ပင်တွေ မှိုစွဲရောဂါဖြစ်ပြီး ပျက်စီးတတ်ကြောင်း ၎င်းကပြောကြား ခဲ့ပါတယ်။ ခရင့်ဗ်ရော်ဘာဈေးနှုန်းက တစ်ကီလိုကို ရူပီး ၂ဝဝ ဖြစ်ပြီး သွင်းကုန်ခွန် ရူပီး ၂ဝ ပေးဆောင်ရသည့်တိုင် ပြည်တွင်းဈေးထက် သက်သာနေသေးကြောင်း သိရပါတယ်။ ကမ္ဘာ့ဈေးကွက်မှာ ဘန်ကောက်ဈေးနှုန်းက တစ်ကီလိုကို ရူပီး (၂၂၈-၂၃ဝ) လောက် ရှိကြောင်း ရော်ဘာအသင်းရဲ့ စာရင်းများအရ သိရပါတယ်။ ယခု လက်ရှိမှာတော့ အိန္ဒိယရဲ့ နေ့စဉ်ရော်ဘာ တင်သွင်းမှုက တန် ၁ဝဝဝ ခန့်ရှိကြောင်း သိရပါတယ်။ Source:msn KZW
ရော်ဘာဈေးတက်၍ တာယာဈေးလိုက်တက် နယူးဇီလန်မှာရှိတဲ့ ဘရစ်(ချ်)စတုန်းကုမ္ပဏီက ၎င်းးရဲ့တာယာဈေးနှုန်းများကို ၁၆ ရာခိုင်နှုန်း ဈေးမြှင့်လိုက်ကြောင်း သိရပါ တယ်။ ၎င်းရဲ့ ကိုယ်ပိုင်အမှတ်တံဆိပ်တာယာတွေကို ၉ ရာခိုင်နှုန်းနဲ့ အထက် ဈေးမြှင့် မှာ ဖြစ်ပြီး အခြားဆက်စပ်နေတဲ့ တာယာတွေကိုတော့ လာမယ့်လကစပြီး ၁၆ ရာခိုင်နှုန်းဈေးတင်မှာ ဖြစ်ကြောင်း သိရပါတယ်။ စီးပွားရေးလုပ်ငန်းသုံး ကားတာယာနဲ့ ကျွတ်တွေရဲ့ ဈေးနှုန်းကိုတော့ ဇွန်လ ၁ ရက်နေ့ ကစပြီး ၅ ရာခိုင်နှုန်း ဈေးမြှင့်မှာ ဖြစ်ကြောင်းသိရပါတယ်။ ဒီလိုဈေးတက်တာဟာ ယခုနှစ်အတွင်း ဒုတိယ အကြိမ်ဖြစ်ပြီး ကုန်ကြမ်း ဈေးနှုန်းတွေ အဆမတန်မြင့်တက်နေတာကြောင့် ယခုလိုဈေးတင်ရခြင်းဖြစ်ကြောင်း နယူးဇီလန်ရှိ ဘရစ်(ချ်) စတုန်းကုမ္ပဏီ ဒါရိုက်တာကပြောကြားခဲ့ပါတယ်။ တကယ်လို့ ကုန်ကျစရိတ်တွေ မလျှော့ ချဘူးဆိုရင်တော့ ရှေ့ဆက်ပြီး ဈေးတက်အုံးမှာဖြစ်ကြောင်း ၎င်းကပြောကြားခဲ့ပါတယ်။ ရော်ဘာ ဈေးနှုန်းက မရပ်မနားဆက်တက်နေတဲ့ အပြင် ရေနံဓါတုအခြေခံပစ္စည်းတွေဖြစ်တဲ့ ရော်ဘာတုနဲ့ ကာဗွန်တွေရဲ့ ဈေးနှုန်းလဲ မြင့်တက်နေဆဲဖြစ်ကြောင်း ၎င်းဒါရိုက်တာက ပြောကြားခဲ့တယ်လို့ သတင်းရရှိပါတယ်။ Source:Businessday,KZW
မွန်ပြည်နယ်ရော်ဘာလုပ်ငန်း ခေတ္တရပ်နား ယခုနှစ် မွန်ပြည်နယ်အတွင်း အနောက်တောင်မုတ်သုန်လေ ဝင်ရောက်ချိန်ကာလထက် စောစီးစွာ မိုးရွာသွန်းခဲ့ တာကြောင့် ရော်ဘာအစေးခြစ်လုပ်ငန်းများ ပိတ်သိမ်းခဲ့ရသလို ရော်ဘာရောင်းဝယ်သူ ကုမ္ပဏီ အဝယ်ဒိုင်အချို့လည်း ရောင်းဝယ်မှု ရပ်နားခဲ့တာကို တွေ့ရပါတယ်။ ရော်ဘာခြံရှင်များအနေဖြင့် အစေးခြစ် ရပ်နားတဲ့ ယခုကာလများမှာ အပင်များအစေးထွက်နှုန်း ကောင်းမွန်လာစေရေးအတွက် မြေသြဇာကျွေးခြင်း၊ ပေါင်းမြက်များရှင်းလင်းခြင်းစတဲ့ လုပ်ငန်းများဆောင်ရွက်လျက်ရှိပါတယ်။ ရော်ဘာဈေးကွက်အခြေအနေမှာလည်း ပြည်ပဝယ်လိုအား နည်းပါးလာခြင်းအပေါ် အရောင်းအဝယ် အေးနေပြီး လက်ရှိ အခြေအနေတွင်RSS-3 တစ်ပေါင်ကို ၁၆ဝဝ ကျပ်နဲ့RSS-5 တစ်ပေါင် ၁၅ဝဝ ကျပ် ရှိနေကြောင်း သိရပါတယ်။ စီးဆင်းမှုအနေဖြင့် မွန်ပြည်နယ်မှ ရန်ကုန်နဲ့ မန္တလေးမြို့များသို့ မေလ ၁ ရက်မှ ၂၁ ရက်နေ့အထိ တန်ချိန်ပေါင်း ၄၅ဝဝ ကျော် တင်ပို့ခဲ့ကြောင်း မရမ်းချောင်စစ်ဆေးရေးဂိတ်မှ စာရင်းဇယားများအရ သိရပါတယ်။ အောင်လွင်