ပဲလွန်းဖြူ၊ နီ တန်ချိန် ၁ဝဝဝ အထက် တင်ပို့မှု ရှိနေ                  ပဲလွန်းဖြူ၊ နီ သင်္ဘောတင်ပို့မှု ကတော့ အပတ်စဉ် တန် ၁ဝဝဝ အထက်မှာ ရှိနေသလို ယခုသီတင်း ပတ်(မေလ ၁၁ရက်မှ ၁၇ ရက်)အတွင်း မှာလည်း တန်ချိန် ၁၃ဝဝ ကျော် တင်ပို့ နိုင်တာ တွေ့ရပါတယ်။ တင်ပို့တဲ့ နိုင်ငံ တွေကတော့ စင်ကာပူ၊ ကိုရီးယား၊ အိန္ဒိယနဲ့ ဖိလစ်ပိုင်တို့ဖြစ်ပါတယ်။ ယခုဘဏ္ဍာနှစ် မေလ ၁၃ ရက် နေ့ထိ ပဲလွန်းဖြူတင်ပို့မှုကို လေ့လာရာ မှာ တန်ချိန် ၆ဝဝဝ ကျော်ရှိပြီး ယခင် ဘဏ္ဍာနှစ် ကာလတူတင်ပို့ခဲ့တဲ့ တန်ချိန် ၅ဝဝဝ ကျော်ထက် ပိုမိုတင်ပို့နိုင်တာ တွေ့ရပါတယ်။ အဝယ်ပုံမှန်ရှိနေတဲ့ ပဲဖြစ်လို့ လာမယ့် သီတင်းပတ်တွေမှာ လည်း ပုံမှန်တင်ပို့နိုင်မယ်လို့ ခန့်မှန်းကြ ပါတယ်။ MIRT- MAPT

ယခုတစ်ပတ်လည်း ပဲစင်းငုံတန် ၃ဝဝဝ အောက်သာအတင်ရှိ                ပင်လယ်ရေကြောင်းက ပဲစင်းငုံတင်ပို့မှုကတော့ အပတ်စဉ် တန် ၃ဝဝဝ အောက်သာရှိသလို ယခုတစ်ပတ် (မေ ၁၁ ရက်မှ ၁၇ )အတွင်းမှာလည်း တန် ၃ဝဝဝ အောက်သာ တင်ပို့နိုင်ခဲ့ပါတယ်။ ဒီတစ်ပတ်မှာတော့ အိန္ဒိယနဲ့ စင်ကာပူကို သာတင်ပို့တယ်လို့ သိရပါတယ်။                  လက်ရှိ ၂ဝ၁၁ -၁၂ ဘဏ္ဍာနှစ် မေလ ၁၃ ရက်နေ့အထိ ပဲစင်းငုံ သင်္ဘောတင်ပို့မှုဟာ တန်ချိန် ၁၂ဝဝဝ ခန့်ရှိပြီး ယခင်ဘဏ္ဍာနှစ်ကာလတူမှာ တန်ချိန် ၆ဝဝဝ ခန့်သာရှိလို့ ယခုနှစ် ပိုမိုတင်ပို့ခဲ့တာတွေ့ရပါတယ်။ လာမယ့် အပတ်တွေမှာတော့ အနည်းငယ်တိုးတက်တင်ပို့နိုင်ဖွယ်ရှိတယ်လို့ ခန့်မှန်းကြပါတယ်။MIRT- MAPT

ပြည်ပအဝယ်များပြီး FOB အရောင်းအဝယ်သွက်ပေမဲ့ ဈေးများများမတက်                 ရန်ကုန် FOB ဈေးကွက်မှာ ယခုတစ်ပတ် (မေလ ၁၃ ရက်မှ ၂ဝ ရက်) အတွင်း ရန်ကုန်တိုင်းကုန်စည်ဒိုင် (ဘုရင့်နောင်)မှာ ပြည်ပအရောင်းအဝယ် စာချုပ်ချုပ်ဆိုမှု မတ်ပဲ SQ ၊ FAQ တန်ချိန် ၂၉ဝဝဝ နီးပါးရှိခဲ့ပါတယ်။ မေလ ၂ ရက်မှ ၂ဝ ရက်အထိ အရောင်းအဝယ်ဖြစ်မှုမှာ တန်ချိန် ၇ဝဝဝဝ ကျော်ရှိပြီး ယခင်နှစ် ၂ဝ၁ဝ မေလ တစ်လလုံး အရောင်းအဝယ်ဖြစ်ခဲ့တဲ့ ပမာဏအတိုင်း ရောင်းဝယ် နိုင်ခဲ့ပါတယ်။                  ယခုလအတွင်း ရန်ကုန် FOB ဈေးကွက်မှာ မတ်ပဲက ပြည်ပအဝယ် တစ်ပတ် ထက် တစ်ပတ်များလာတယ်လို့ သိရပါတယ်။ အဝယ်များသလို အရောင်းလည်း ရှိတာကြောင့် FOB အရောင်းအဝယ် သွက်တယ်လို့ သိရပါတယ်။ ဒါပေမဲ့ မိုးမတ်ပဲများကို ပြည်တွင်းစက်သမားများ ရောင်းအားများတာကြောင့် အရည်အသွေး ကောင်းပဲကို ပြည်ပဝယ်လက်များ ဈေးမြှင့်ပေးခြင်းမရှိဘူးလို့ သိရပါတယ်။ အထူး သဖြင့် ရေထိပဲများကို တောင်သူတွေ မထိန်းဘဲလျှော့ဈေးနဲ့ ရောင်းတဲ့အပြင် စက်သမားတွေကလည်း အရည်အသွေးကောင်းပဲတွေနဲ့ ညှပ်ရောင်းတဲ့ အတွက် ပြည်ပဝယ်လိုအားကောင်းပေမဲ့ ဈေးများများမတက်ခြင်းဖြစ်တယ်လို့ ဝါရင့်ကုန်သည် တစ်ဦးက ဆိုပါတယ်။ ရန်ကုန် FOB ဈေးများ နှိုင်းယှဉ်ဖော်ပြလိုက်ပါတယ်- ဒေါ်လာ/တန်                  မတ်ပဲ(FAQ)    မတ်ပဲ(SQ) ၂ဝ-၅-၁၁    ၈၂ဝ-၈၄ဝ      ၉၆ဝ-၉၈ဝ ၁၃-၅-၁၁    ၈ဝဝ-၈၂ဝ       ၉၅ဝ-၉၇ဝ MIRT(MAPT)

ကျောက်ပန်းတောင်း မန်ကျည်း ဈေးကွက်                          ကျောက်ပန်းတောင်းမြို့နယ်တွင် ယခင်နှစ် မန်ကျည်း လက်ကျန်မရှိခြင်း၊ ယခုနှစ်တွင် မန်ကျည်းအသီး နည်းခြင်း ကြောင့် အထွက်နှုန်းနည်းပြီး ယခင်နှစ် ကထက် မန်ကျည်း ဈေးကောင်း ရနေပါတယ်။ ယခုတစ်ပတ်တွင် ကျောက်ပန်း တောင်းမြို့နယ်အတွင်း ထွက်ရှိသော မန်ကျည်းအကြောပါ အလုံး ထိပ်စတစ်ပိဿာ ၁၁ဝဝ ကျပ်၊ အလတ်စ ၁ဝ၅ဝ ကျပ်၊ အောက်စ ၁ဝဝဝ ကျပ်နဲ့ မန်ကျည်းအသားတစ် ပိဿာ ထိပ်စ ၂ဝဝဝ ကျပ်၊ အလတ်စ ၁၉ဝဝ ကျပ်၊ အောက်စ ၁၈ဝဝ ကျပ်တို့ ရှိပါတယ်။ လွိုင်ကော်၊ တောင်ကြီး မြို့များမှ ဝင်ရောက်လျက်ရှိသော မန်ကျည်းအကြောပါ အလုံး တစ်ပိဿာ ၉ဝဝ ကျပ်၊ အလတ်စ ၈ဝဝ ကျပ်ဖြင့် ဝယ်ယူ လျက်ရှိကြောင်း သိရပါတယ်။ လွိုင်ကော်၊ တောင်ကြီးမှ ဝင်ရောက်လာတဲ့ မန်ကျည်းများကို ကျောက်ပန်း တောင်းမှာ အသားထုတ်ပြီး ရောင်းချရာမှာ အသားပါးမှုကြောင့် တစ် ပိဿာ ၁၅ဝဝ ကျပ်ဖြင့်ဝယ်ယူကြတယ်လို့ သိရပါတယ်။ ကျောက်ပန်းတောင်း မန်ကျည်းအောက်စနဲ့ ရောပြီးလည်း ရောင်းချမှုရှိတယ်လို့ သိရပါတယ်။ မန်ကျည်းအစေ့ တစ် ပိဿာ ၂၅ဝ ကျပ် ရှိပြီး မန်ကျည်းအစေ့ကို ရန်ကုန်မြို့ ဝက်စာစက်ရုံများမှ ဝယ်ယူလျက် ရှိပါတယ်။ မန်ကျည်း အသားကို ရန်ကုန် ဘုရင့်နောင်ပွဲရုံသို့ နေ့စဉ် တင်ပို့မှုမရှိဘဲ ရက်ခြားပြီး ပိဿာ ၃ဝဝဝဝ ခန့် တင်ပို့ရောင်းချလျက်ရှိ ကြောင်း မန်ကျည်းပွဲစားတစ်ဦးထံမှ လေ့လာ သိရှိရပါတယ်။ ထားအိဝင်း