ဟင်္သာတကုန်စည်ဒိုင်ဈေးကွက်ရဲ့ မတ်ပဲဈေးမှာ ယခုတစ်ပတ်မှာ ဈေးပြန် အေးသွားပါတယ်။ ယခင်နှစ် ဇူလိုင်လရဲ့ မတ်ပဲအမြင့်ဆုံးဈေးမှာ ပိဿာ ၂၀ တစ်တင်းကို ၁၇၃၀၀ ကျပ်ဈေးနဲ့ အရောင်းအဝယ်ပြုလုပ်ခဲ့ပြီး၊ ယခုနှစ် ဇူလိုက်လ ရဲ့ မတ်ပဲအမြင့်ဆုံးဈေးမှာ ပိဿာ ၂၀ တစ်တင်းကို ၂၀၅၀၀ ကျပ်ဈေးနဲ့ အရောင်း အဝယ်ဖြစ်ခဲ့တာကြောင့် ယခင်နှစ်ထက်တစ်တင်းကို ၃၂၀၀ ကျပ် ပိုမြင့်လာခဲ့တာကို တွေ့ရပါတယ်။

ဟင်္သာတကုန်စည်ဒိုင် ဈေးကွက်သို့ မြို့နယ်ကျေးရွာများမှ ပဲဝင် ရောက်မှုလည်း နည်းလာပါတယ်။ မတ်ပဲအရောင်းအဝယ်ဖြစ်မှုအနေနဲ့ ပဲဈေးမြင့် လာတဲ့ ဇူလိုင်လတတိယပတ်မှာ တစ်နေ့ အိတ် ၂၀၀၀ ကျော်ခန့်ရှိပြီး၊ ယခုတစ် ပတ်မှာ ပျမ်းမျှအိတ် ၁၈၀၀ ခန့် အရောင်းအဝယ်ပြုလုပ်နိုင်ကြောင်း သိရပါတယ်။  မတ်ပဲစီးထွက်မှုအနေနဲ့ ယခင်နှစ် ဇူလိုင်လတစ်လလုံးမှာ အိတ် ၁၃၀၀၀၀ ခန့် ရန်ကုန်ဈေးကွက်သို့တင်ပို့နိုင်ခဲ့ပြီး၊ ယခုနှစ် ဇူလိုင်လတစ်လလုံးမှာ အိတ် ၈၅၀၀၀ ခန့်တင်ပို့နိုင်ခဲ့ပါတယ်။ ယခုနှစ်မှာ မတ်ပဲဈေးဟာ ယခင်နှစ်ထက် ပိုမြင့်သော်လည်း မတ်ပဲစီးထွက်မှုအနေနဲ့ လျော့နည်းရခြင်းမှာ ယခုနှစ်မတ်ပဲ တစ်ဧကအထွက်နှုန်း နည်းသွားတာကြောင့် တင်ပို့မှုလည်းယခင်နှစ်ထက် အနည်းငယ် လျော့နည်းခြင်း ဖြစ်ကြောင်း သိရပါတယ်။                                   အေးအေးခိုင်
 

မြန်မာ-တရုတ်နယ်စပ်ရှိ မူဆယ် ၁၀၅ မိုင်ကုန်သွယ်ရေးဇုန်မှ ကန်ဒေါ်လာ သုည ဒသမ ၀၃၄ သန်းတန်ဖိုးရှိ ပဲလွန်းဖြူ တန် ၅၀ ကျော်ကို ဇူလိုင်လ ၂၅ ရက်မှ ၃၁ ရက်ထိကာလအတွင်းမှာအပို့ရှိခဲ့ပါတယ်။ ယခင်အပတ်က တော့ ပဲလွန်းဖြူ အပို့မရှိခဲ့ပါဘူး။ ဇူလိုင်လမှာ နယ်စပ်မှပဲလွန်းဖြူ ၁၁၂ တန်ခန့်နဲ့ ဧပြီလမှ ဇူလိုင်လကုန်အထိ ပဲလွန်းဖြူ ၄၄၆၀ တန်တင်ပို့ထားပြီးဖြစ်ပါတယ်။ ယခုအပတ် မူဆယ်မြေပြင်ပေါက်ဈေးက ယခင်အပတ်ကထက် တစ်တန်ကို ၆၀၇၃ ကျပ်လျော့ ကျခဲ့ပြီး ၆၃၇၆၆၈ ကျပ်ဈေးပေါက်နေပါတယ်။ တစ်ဖက်ရွှေလီပေါက်ဈေးကတော့  ၇၄၁ ဒေါ်လာဖြစ်ပြီး ယခင်အပတ်အတိုင်းပြောင်းလဲမှုမရှိဘူးလို့သိရပါတယ်။MIRT(DOBT)

ယခုတစ်ပတ် ပဲမျိုးစုံတင်ပို့မှုထဲက တန်ချိန် အများဆုံး တင်ပို့တဲ့ မတ်ပဲက တန် ၁၃၈၀၀ ကျော်နဲ့ ယခင်အပတ်တင်ပို့ မှု တန်ချိန် ၁၃၁၀၀ ကျော်ထက် ပိုမိုတင်ပို့နိုင်ပေမဲ့ ယခု တစ်ပတ် မတ်ပဲရောင်းဝယ်မှုကတော့  တန်ချိန် ၇၅၀၀ ကျော် သာရှိလို့ ယခင်အပတ်ထက် ၆၂ ရာခိုင်နှုန်းသာ အရောင်း အဝယ် ဖြစ်ခဲ့ပါတယ်။

နိုင်ငံပိုင် အေဂျင်စီတစ်ခုဖြစ်တဲ့ PEC က နှစ်ဟောင်း မြန်မာ ပဲစင်းငုံလီမွန် တန် ၃၀၀၊ တန်ဇန်းနီးယား ပဲစင်းငုံအဟောင်း ၁၁၇ တန်ကို တင်ဒါခေါ်ယူရောင်းချခဲ့ပြီး သြဂုတ် ၁၀ ရက်မှာ တင်ဒါဖွင့်မှာ ဖြစ်ပါတယ်။ ဇူလိုင် ဒုတိယအပတ်လောက်အထိ မွန်ဘိုင်းဈေးကွက် မှာ ပဲစင်းငုံဈေးဟာ ၆၉၄-၇၂၇ ဒေါ်လာသာ ရှိပါတယ်။