Background
သကာပွက်ရည်ဈေးလိုက်လို့ တောင်သူတွေတွက်ခြေကိုက် ယခုနှစ်ကြံရာသီတွင် သကြားဈေးကောင်းမွန်လျက်ရှိသဖြင့် သကြားချက်ရန် အရေးကြီးကုန်ကြမ်းဖြစ်တဲ့ သကာပွက်ရည်ဈေးလည်း မြင့်တက်လာခဲ့တယ်လို့ သိရပါတယ်။ သကာပွက်ရည် တစ်ပိဿာဈေးရဲ့ နှစ်အလိုက် ဈေးကွက်ကိုလေ့လာတဲ့ အခါ ၂ဝဝ၉ ခုနှစ်က တစ်ပိဿာ ၅ဝဝ ကျပ်၊ ၅၅ဝ ကျပ်၊ ၂ဝ၁ဝ ခုနှစ်က ၆ဝဝ ကျပ်၊ ၆၅ဝ ကျပ်ကနေ ယခုနှစ်မှာ တစ်ပိဿာ ၇ဝဝ ကျပ်၊ ၇၅ဝ ကျပ်ထိ ဈေးရလာ ခဲ့တာတွေ့ရပါတယ်။ ဒါကြောင့်လည်း အရာတော်မြို့နယ်၊ ဇရစ်ကျေးရွာက ကြံတောင်သူတွေဟာ ဇန်နဝါရီလကုန်ပတ်ကနေ ယနေ့ထိ ကြံခုတ်၊ ကြံရည်ကျိုချက် ပြီးရလာတဲ့ သကာပွက်ရည်ကို မုံရွာမှာရှိတဲ့ ဖောက်သည်တွေထံ တစ်ပိဿာ ၇ဝဝ ကျပ်၊ ၇၅ဝ ကျပ်ဈေးများနဲ့ တင်ပို့ရောင်းချလျက်ရှိတယ်လို့သိရပါတယ်။ ကြံတစ် ဧကကို သကာပွက်ရည် ၈၅ ပိဿာဝင် အပိုင်း ၂ဝ မှ ၂၅ အတွင်းရရှိလို့ တစ်ဧက ခန့်မှန်းဝင်ငွေကျပ် ၁၅ သိန်းခန့် ရရှိတဲ့အတွက် ကြံတောင်သူတွေ အကျိုးအမြတ် ရရှိခဲ့ကြောင်းသိရပါတယ်။ မုံရွာမှာ သကာပွက်ရည်ဒိုင်ဖွင့်လှစ်ဝယ်ယူသူ တစ်ဦးစ၊ နှစ်ဦးစသာရှိပြီး ကိုယ်တိုင်သကြားဖြူချက်လုပ်ဖို့ အခက်အခဲရှိတဲ့အတွက် မန္တလေးသကြားစက်ကြီးများသို့ ထပ်ဆင့်တင်ပို့ခဲ့ကြောင်း သိရပါတယ်။ ထွန်းလှိုင်
ပြောင်းဖူးစေ့တန်ချိန် ၈၇ဝဝ ကျော် နယ်စပ်မှပို့ ဖေဖော်ဝါရီလ ၂၃ ရက်မှ မတ်လ ၁ ရက်ထိ ကာလအတွင်း မူဆယ် ၁ဝ၅ မိုင်ကုန်သွယ်ရေးဇုန်မှ ပြောင်းဖူးစေ့ တန်ချိန် ၈၆၁ဝ နဲ့ နံှစားပြောင်း ၄၇၂ တန်ခန့်၊ လွယ်ဂျယ်နယ်စပ်မှ ပြောင်းဖူးစေ့ ၁၄၃ တန်ကျော် စုစုပေါင်း ကန်ဒေါ်လာ ၂ ဒသမ ၃၃ သန်းဖိုး တင်ပို့နိုင်ခဲ့ပါတယ်။ ယခုအပတ်ပြောင်းဖူးစေ့ စုစုပေါင်းတန်ချိန် ၈၇၅၃ တန် တင်ပို့နိုင်ခဲ့တဲ့အတွက် ယခင်အပတ်ကထက် ၁၁၁၃ တန်ကျော် ပိုမို တင်ပို့ခဲ့ပါတယ်။ သယ်ယူပို့ဆောင်စရိတ်များ မြင့်မားနေတဲ့အတွက် လားရှိုးပတ်ဝန်းကျင်ဒေသအထွက် ပြောင်းဖူးစေ့များကိုသာ မူဆယ်မှ တင်ပို့နိုင်ပါတယ်။ ယခင် အပတ်ကထက် တန် ၉၇ဝ ကျော်တင်ပို့မှုပိုမိုခဲ့ပါတယ်။ပြောင်းဖူးစေ့ဈေးဟာ ယခင် အပတ်နဲ့ နှိုင်းယှဉ်လျှင် သိသိသာသာ ပြောင်းလဲမှုမရှိပေမဲ့ နံှစားပြောင်းမှာတော့ တစ်ဖက်နိုင်ငံဈေး အနည်းငယ်မြင့်ခဲ့တယ်လို့ သိရပါတယ်။ဖေဖော်ဝါရီလ တစ်လ လုံး ပြောင်းတင်ပို့မှုမှာ တန်ချိန် ၂၈၇ဝဝ ကျော်ပါတယ်။ မိမိဘက်နဲ့ တစ်ဘက်နိုင်ငံ ပြောင်းဈေးများ နှိုင်းယှဉ်ဖော်ပြပေးလိုက်ပါတယ် - မိမိဘက်(ကျပ်/တန်) တစ်ဘက်နိုင်ငံ(ဒေါ်လာ/တန်) ယခု ယခင် ပြောင်းလဲမှု % ယခု ယခင် ပြောင်းလဲမှု %နံှစားပြောင်း ၂၆၆၁၄၂ ၂၆၆၁၄၂ - - ၃ဝ၄ ၂၈၈ ၁၆ ၅ပြောင်းဖူးစေ့ ၂၈ဝ၆၉၃ ၂၈၅၉၄၅ ၅၂၅ ၂ ၂၈၈ ၂၈၇ ၁ ဝ .၃MIRT (DOBT)
ပြောင်း အပို့လျော့ ဖေဖော်ဝါရီ ၂၁ မှ ၂၈ ရက်ထိကာလအတွင်း ပင်လယ်ရေကြောင်းမှ ပြောင်း ၂၅၈ဝ တန်၊ တန်ဖိုး ဝ ဒသမ ၆၅ သန်းဖိုးတင်ပို့ခဲ့တယ်လို့ သိရပါတယ်။ ယခင် ရက်သတ္တပတ်က ၃၃၆၂ တန်တင်ပို့ခဲ့တာကြောင့်ယခု အပတ်မှာ ၇၈၂ တန်လျော့နည်းတင်ပို့ခဲ့ပါတယ်။ တင်ပို့တဲ့နိုင်ငံတွေကတော့ မလေးရှားကို ၇၃ဝ တန်၊ ဖိလစ်ပိုင် ကို ၁၇၃ဝ တန်နဲ့ စင်ကာပူကို တန် ၁၂ဝ အသီးသီးတင်ပို့ခဲ့တာဖြစ်ပါတယ်။ FOB ရန်ကုန်ဈေးကတော့ တစ်တန်ကို ဒေါ်လာ ၂၅ဝ မှ ၂၇ဝ ကြားဈေးပေါက် လျက်ရှိကြောင်း သတင်းရရှိပါတယ်။ KZW
မြောင်းမြရော်ဘာ ပြည်ပဈေးကွက်ဝင်လာ မြောင်းမြမြို့နယ် ရော်ဘာစိုက်ပျိုးမှုကို ၁၉၉၆-၉၇ခုနှစ်တွင် ၄၅၃ဧကမှ စမ်းသပ်စိုက်ပျိုးလာရာ ယခုအခါ ၄၉၁၂ ဧကထိရှိလာပြီဖြစ်ပါတယ်။ ရော်ဘာစိုက်ပျိုးထုတ်လုပ်သူ ခြံပိုင်ရှင်တစ်ဦးက ယခုစိုက်ပျိုးဧက ၅ဝ ခန့်ရှိပြီး အထွက်ကောင်း မျိုးသန့်များကို အားဖြည့်စိုက်ပျိုးထားကြောင်း၊ အစေးခြစ်ဧက ၁၅ ဧကလောက်ရှိပြီး၊ မနှစ်ကရော်ဘာဈေးအဖွင့်မှာ တစ်ပေါင်လျှင် ၈၅ဝ-၉ဝဝ ကျပ်လောက်သာရှိရာမှ ယခုနှစ်အဖွင့်တွင် ၁၁၅ဝ ကျပ်၊ ၁၂ဝဝ ကျပ်ထိရှိကာ လက်ရှိပေါက်ဈေးမှာ တစ်ပေါင်လျှင် ၁၅ဝဝ ကျပ်ထိရကြောင်းဆိုပါတယ်။ အစေးခြစ်ရာတွင်လည်း ညဘက်အပူအအေးညီမျှမှုရှိချိန်မှာ ပိုမိုအစေးထွက်ရှိပြီး၊ နည်းစနစ်မှန်မှန်ကန်ကန်နဲ့ ပြုလုပ်ပါက ရော်ဘာအရည်အသွေးကောင်းမွန်၍ ဈေးကောင်းရနိုင်မှာ ဖြစ်ကြောင်း၊ မိမိတို့ရန်ကုန်ပွဲရုံများသို့တင်ပို့တဲ့ ရော်ဘာအဆင့်ဟာ RSS-2/3 ကြားရှိတယ်လို့ ခြံပိုင်ရှင်မှပြောပါတယ်။ ရော်ဘာ ဟာ နှစ်ရှည်ပင်ဖြစ်တဲ့အပြင် ဒေသသုံးစွဲမှုနည်းပြီး ပြည်ပဈေးကွက် လိုအပ်ချက်မြင့်မားလာခြင်းကြောင့် စိုက်ပျိုး ထုတ်လုပ်မှု ကျယ်ပြန့်လာခဲ့တယ်လို့ နှစ်ရှည်စိုက် ခြံတာဝန်ခံမှ ပြောပါတယ်။ ကျော်လင်း
နယ်စပ်စခန်းများမှ ရော်ဘာတန် ၁ဝဝဝ ကျော်တင်ပို့ ဖေဖော်ဝါရီလ ၂၃ ရက်မှ မတ်လ ၁ ရက်ထိ ကာလအတွင်း မူဆယ် ၁ဝ၅ မိုင်ကုန်သွယ်ရေးဇုန်မှ ချင်းရွှေဟော်နဲ့ မြိတ် နယ်စပ်စခန်းများမှ ကန်ဒေါ်လာ ၄ ဒသမ ၂၅ သန်းကျော်တန်ဖိုးရှိ ရော်ဘာတန် ၁ဝဝ၄ တန် တင်ပို့နိုင်ခဲ့ပါတယ်။ ယခင်အပတ်ကထက် တန် ၇ဝ တင်ပို့မှုလျော့နည်းခဲ့ပါတယ်။တရုတ်ဖက်မှ ရော်ဘာ အဆွဲနည်းတဲ့အတွက် ဈေးကွက်အခြေ အနေစောင့်ကြည့်ပြီး တင်ပို့ရတာမို့ လျော့နည်းရတယ်လို့ သိရပါတယ်။နယ်စပ်အလိုက်တင်ပို့နိုင်မှုတွေကတော့ မူဆယ်မှ ၆၂၉ တန်ကျော်၊ ချင်းရွှေဟော် ၂၇၅ တန်ကျော်နဲ့ မြိတ်မှ တန် ၁ဝဝ အသီးသီးတင်ပို့ခဲ့တာဖြစ်ပါတယ်။ ဖေဖော်ဝါရီလ တစ်လလုံးမှာ နယ်စပ်မှ တန် ၃၇ဝဝ ကျော်တင်ပို့ ထားပြီး ဖြစ်ပါတယ်။ မိမိဘက်မှာရောတစ်ဘက် နိုင်ငံမှာပါဈေးငြိမ် လျက်ရှိတယ်လို့ သိရပါတယ်။မိမိဘက်နဲ့ တစ်ဘက်နိုင်ငံရော်ဘာဈေးများကတော့RSS-3 တစ်တန်ကို ၄၄၁၉၂၆ဝ ကျပ်နဲ့ RSS-5 တစ်တန်ကို ၄၁၆၉၇၈၅ ကျပ်၊ တစ်ဘက်နိုင်ငံမှာRSS-3 တစ်တန်ကို ၅၁၆၃ ဒေါ်လာနဲ့RSS-5 တစ်တန်ကို ၄၇၈၃ ဒေါ်လာ အသီးသီး ဈေးပေါက်လျက်ရှိပါတယ်။ MIRT(DOBT)
ရော်ဘာ တန် ၇ဝဝ ပိုမိုတင်ပို့ ဖေဖော်ဝါရီ ၂၁ မှ ၂၈ ရက်ထိကာလအတွင်း ပင်လယ်ရေကြောင်းမှ ရော်ဘာ ၂ဝ၁၅ တန်၊ တန်ဖိုး ကန်ဒေါ်လာ ၈ ဒသမ ၂ဝ သန်းဖိုး တင်ပို့ခဲ့ပါတယ်။ ယခင်အပတ်က တန်ချိန် ၁၃ဝဝ ကျော် တင်ပို့ခဲ့တာကြောင့် တန် ၇ဝဝ နီးပါး ပိုမို တင်ပို့နိုင်ခဲ့ပါတယ်။ ရော်ဘာအထွက်ကျတဲ့ရာသီဖြစ်ပြီး ဈေးကောင်းရနေတာကြောင့် ပိုမိုတင်ပို့ နိုင်ခြင်း ဖြစ်ကြောင်း သိရပါတယ်။ တင်ပို့တဲ့နိုင်ငံများကတော့ တရုတ်ကိုRSS -3 ၁၄၄ တန်၊RSS -5 ၁၅၃ တန်၊ စင်ကာပူကို MSR -20 ၂ဝ၁ တန်၊ အာရပ်စော်ဘွားများပြည်ထောင်စုကိုRSS -3 ၂၂၄ တန်၊ မလေးရှားကို RSS -3 ၈၆၂ တန်နဲ့RSS -5 တန် ၄၂ဝ အသီးသီး တင်ပို့ခဲ့ပါတယ်။ ပင်လယ်ရေကြောင်းကနေတင်ပို့တဲ့ဈေးနှုန်း တွေကတော့ RSS -3 တစ်တန်ကို ၅၄ဝဝ ဒေါ်လာနဲ့ RSS -5 တစ်တန်ကို ၅၃ဝဝ ဒေါ်လာနဲ့MSR -20 တစ်တန်ကို ၅၄ဝဝ ဒေါ်လာ အသီးသီးဖြစ်ကြောင်း သတင်းရရှိပါတယ်။ KZW
မန်းဈေးကွက်က ပဲကြီးသစ် အမြင့်ဈေးနဲ့နေ ဒေသတွင်းရှိ ကျောက်ဆည်၊ မတ္တရာတို့မှ သီးနံှအသစ်များထွက်ရှိလာပြီး၊ ရှမ်းပြည်နယ်တောင်ပိုင်းကလည်း ဝင်ရောက်လာတာတွေ့ရပါတယ်။ စစ်ကိုင်းတိုင်း မုံရွာမှလည်း ဒီတစ်ပတ်အတွင်း ဒေသတွင်းသို့ ပဲကြီးသစ် အိတ် ၂ဝဝ ခန့်ဝင်လာတာ တွေ့ရပါတယ်။ တိုင်းတွင်းဒေသများဖြစ်တဲ့ ကျောက်ဆည်နဲ့မတ္တရာတို့က ထွက်တဲ့ ပဲမှာ အလုံးသေးပြီး ပစ္စည်းလှတယ်လို့သိရပါတယ်။ ရန်ကုန်ကို တစ်ပတ်အတွင်း အိတ် ၂ဝဝ ခန့် စီးဆင်းသွားပါတယ်။ ပဲကြီး ၃ တင်းတစ်အိတ်ကို အသစ်က ၆၅ဝဝဝ ကျပ်နဲ့ အဟောင်းက ၆ဝဝဝဝ ကျပ်ဈေးနဲ့ ရောင်းဝယ်နေကြကြောင်း သိရပါတယ်။ ချိုချိုမြင့်
စစ်ကိုင်းပဲကြီးသစ်များ Export ဝယ်လက်ဆွဲ မုံရွာကုန်စည်ဒိုင်မှာ ၂ဝ၁၁ ခု ဖေဖော်ဝါရီလအတွင်း ပဲကြီးတစ်ပိဿာ အနိမ့် အမြင့်ဈေးမှ ၉၄၇ ကျပ်၊ ၁၁၈၄ ကျပ်၊ ယခင်နှစ်ကာလတူဈေးမှာ ၁ဝ၅၃ ကျပ်၊ ၁၄၂၁ ကျပ်ဈေးအသီးသီးနဲ့ ရောင်းဝယ်ခဲ့ကြပါတယ်။ ဘုတလင်၊ ကနီ၊ ယင်း မာပင်၊ ပုလဲ၊ ချောင်းဦး၊ မြောင်မြို့နယ်များမှ ပဲကြီးအသစ်များ မုံရွာမြို့ကို ဝင်ရောက်ပါတယ်။ Export ဝယ်လက်ရှိလို့ ဖေဖော်ဝါရီလအတွင်း စစ်ကိုင်းတိုင်းဒေသကြီးအတွင်းမှ ရန်ကုန်သို့ ပဲကြီးတင်း ၁၂ဝဝ ကျော်၊ မန္တလေးသို့ ပဲကြီးတင်း ၂၉ဝ ကျော်စီးထွက်ခဲ့ကြောင်းသိရပါတယ်။ မုံရွာကုန်စည်ဒိုင်မှာ နေ့စဉ် ပျမ်းမျှတင်း ၅ဝဝ ခန့် အရောင်းအဝယ်ဖြစ်ကြောင်း ကုန်စည်ဒိုင်သတင်း ရပ်ကွက်က သိရပါတယ်။ သန်းသန်းတင်
ဒေသတွင်းသာ အရောင်းအဝယ်ဖြစ်တဲ့ ပဲနောက် ပဲခူးတိုင်းဒေသကြီးအနောက်တွင် ပဲနောက်သီးနံှမှာ အခြားသော ဆောင်းသီးနံှ ပဲများလောက်စိုက်ပျိုးမှု မများဘဲ ပြည်ခရိုင်အတွင်းမြို့နယ်များနဲ့ သာယာဝတီခရိုင်အတွင်းရှိ မိုးညိုမြို့နယ်တွင်သာ စိုက်ပျိုးမှုရှိခဲ့ပါတယ်။ စုစုပေါင်း စိုက်ဧက ၁ သောင်းကျော်ခန့် စိုက်ပျိုးခဲ့ပြီး အထွက်နှုန်းအနေဖြင့် တစ်ဧက ၁၄ တင်း အထိထွက်ရှိခဲ့ကြောင်း သိရပါတယ်။ ပဲနောက်သီးနံှကို အခြားတိုင်းသို့ တင်ပို့ ရောင်းချနိုင်ခြင်းမရှိဘဲ ဒေသတွင်းသာ ရောင်းဝယ်မှု ရှိကြပါတယ်။ ပဲနောက် ဈေးနှုန်းမှာ ယခင်နှစ်က ဇန်နဝါရီလအတွင်း တစ်တင်း ၃၉ဝဝဝ ကျပ်ထိ ဈေးကောင်း ရရှိခဲ့ပါတယ်။ ယခုနှစ်မှာတော့ တစ်တင်း ၂၈ဝဝဝ ကျပ်ဖြင့်သာ အရောင်းအဝယ် ဖြစ်ခဲ့ကြတယ်လို့ သိရပါတယ်။ ခင်ဆွေဝင်း
ခပ်အေးအေးအရောင်းအဝယ်ဖြစ်နေတဲ့ ပြည်ဘိုကိတ် ပြည်ဈေးကွက်တွင် ဘိုကိတ်ပဲမှာ ယခင်တစ်ပတ်ဈေးထက် လျော့နည်း ပြီး ပိဿာ ၂ဝ တစ်တင်းကို ၁၈ဝဝဝ ကျပ်ဖြင့် အရောင်းအဝယ်ဖြစ်နေပါတယ်။ ပန်းတောင်းဘက်ကမ်းမှ တစ်ပတ်ကို အိတ် ၁ဝဝ ခန့် အဝင်ရှိပြီး ဈေးကွက်မှာ ခပ်အေးအေးသာ အရောင်းအဝယ် ဖြစ်နေပါတယ်။ ဆုမွန်ဆွေ