Background
ဝယ်လိုအားကောင်းလို့ မန်းပဲစင်းငုံနီဈေးအနည်းငယ်မြင့်လာ မန်းဈေးကွက်အတွင်းသို့ ရွှေဘို၊ မုံရွာ၊ ထန်းတပင်၊ ဇီးကုန်းဒေသများမှ ထွက်ရှိသော ပဲစင်းငုံများအပြင် မန္တလေးတိုင်း ဒေသကြီးအတွင်းရှိ မြို့နယ်များမှ ထွက်ရှိသော ပဲစင်းငုံများလည်း ဈေးကွက်အတွင်းသို့ ဝင်ရောက် လျက်ရှိပါတယ်။ ယခင်တစ်ပတ်မှာ ရန်ကုန်ဝယ်လိုအားနည်းခဲ့ပြီး ဈေးအေးခဲ့သော်လည်း ယခုတစ်ပတ်မှာတော့ ရန်ကုန်ဝယ်လိုအား ကောင်းလာတာကြောင့် ဈေးမြင့်လာတာကို တွေ့ရပါတယ်။ ယခင်တစ်ပတ် ပဲစင်းငုံနီတစ်ပိဿာ ၁ဝ၂၅ ကျပ်၊ ငုံဖြူ တစ်ပိဿာ ၈ဝ၈ ကျပ်ဈေးရှိခဲ့ပြီး ယခုတစ်ပတ်မှာတော့ ပဲစင်းငုံနီ တစ်ပိဿာ ၁ဝ၄၂ ကျပ်၊ တစ်တန် ၆၃၈၁ဝဝ ကျပ်၊ ငုံဖြူ တစ်ပိဿာ ၈၁၇ ကျပ်၊ တစ်တန် ၅ဝဝ၃ဝဝ ကျပ်ဈေးတို့ဖြင့် အရောင်းအဝယ် ဖြစ်နေကြပါတယ်။ ယခုတစ်ပတ် မန်းဈေးကွက်အတွင်းမှာ ရန်ကုန်ဝယ်လက်ရှိနေသလို ပဲခွဲစက်လုပ်ငန်းရှင်များမှ လည်း ဝယ်လိုအားရှိနေတာကြောင့် ဈေးမာလာတာဖြစ်တယ်လို့ ကုန်သည်များထံမှ သိရပါတယ်။ ကျော်ကျော်မိုး
မုံရွာငုံနီဈေးကွက်အဝယ်သွက် အသယ်သွက် မုံရွာကုန်စည်ဒိုင် မတ်လပထမပတ်ပဲဈေးကွက်မှာ ပဲစင်းငုံနီ ရောင်းဝယ်မှု အေးအေးမှန်မှန်သာရှိခဲ့ပြီး ပေါက်ဈေးအားဖြင့် တစ်တင်း ၂ဝဝဝဝ ကျပ်-၂ဝ၅ဝဝ ကျပ်ကြားမှာ ဈေးငြိမ်နေတာကို တွေ့ပါတယ်။ ဝယ်လက်အနေနဲ့ ရန်ကုန်က အများဆုံးဆွဲယူနေသလို သယ်ယူခချိုသာတဲ့ မုံရွာ၊ မြင်းမူ၊ ရန်ကုန်၊ ကုန်းကြောင်း၊ ရေကြောင်း ဖက်စပ်ခရီးစဉ်နဲ့ အများဆုံးတင်ပို့ခဲ့ကြတာတွေ့ရပါတယ်။ ဒီရက်သတ္တပတ်မှာ မုံရွာကုန်စည်ဒိုင် ပဲစင်းငုံအရောင်းအဝယ်ဖြစ်မှုကတော့ တစ်ရက် ပျမ်းမျှအိတ် ၃ဝဝဝ ခန့် ရှိတယ်လို့ ဈေးကွက်ကဆိုပါတယ်။ နယ်ကပဲအဝင် ပုံမှန် ရှိခဲ့ပြီး မုံရွာကုန်စည်ဒိုင်နယ်မြေကနေ ပဲစင်းငုံထပ်ဆင့် တင်ပို့စီးဆင်းမှုအနေနဲ့ ပြီးခဲ့တဲ့ ဖေဖော်ဝါရီလ အတွင်းက မန္တလေးကို တင်း ၁၂ဝဝဝ ခန့် ရန်ကုန်ကို တင်း ၆၅ဝဝဝခန့်နဲ့ ပခုက္ကူကို တင်း ၁ဝဝဝဝ ခန့် ရှိခဲ့ပြီး မတ်လ ပထမပတ်တွင် မန္တလေး ကို တင်း ၁၂ဝဝ ကျော်၊ ရန်ကုန်ကို တင်း ၁၂ဝဝဝ ကျော်နဲ့ ပခုက္ကူကို တင်း ၈ဝဝ ကျော်ခန့်ရှိကြောင်း သိရပါတယ်။ ထွန်းလှိုင်
ပဲစင်းငုံတင်ပို့မှုလည်း အနည်းငယ်တက်လာ ယခုသီတင်းပတ် (မတ်လ ၃ ရက်မှ ၉ ရက်) အတွင်းမှာ ပင်လယ်ရေကြောင်း က ပဲစင်းငုံတင်ပို့မှုလည်း တန်ချိန် ၅၆ဝဝ ကျော်ကို တိုးတက်တင်ပို့နိုင်တာတွေ့ရပါတယ်။ အိန္ဒိယဈေးကွက်တွေမှာ ဈေးကျတယ်ဆိုပေမဲ့ ကုန်သည်အချင်းချင်း အရောင်းအဝယ်ဖြစ်သလို နိုင်ငံပိုင်အေဂျင်စီက ခေါ်ယူတဲ့ တင်ဒါအတွက်လည်း အဝယ်ရှိတာကြောင့် တင်ပို့မှုတက်လာတာဖြစ်ပါတယ်။ ယခုသီတင်းပတ်မှာလည်း ပြည်ပရောင်းချတဲ့ ပမာဏများတယ်လို့ သိရပါတယ်။ ပြည်တွင်းပဲစင်းငုံဈေးအနေနဲ့ မတ်ပဲ ဈေးတက်တာကြောင့် လိုက်ပါမြင့်တက်ပေမဲ့ ၤဥြ ဈေးကတော့ ယခင် သီတင်းပတ် အတိုင်း ငြိမ်နေတာတွေ့ရပါတယ်။ မတ်လ ၁၁ ရက် ရန်ကုန် FOB ဈေးအနေနဲ့ ပဲစင်းငုံနီ (FAQ)တစ်တန်ကို ကန်ဒေါ်လာ ၉ဝဝ-၉၂ဝ နဲ့ ပဲစင်းငုံဖြူနီနဲ့ အဖြူ တစ်တန်ကို ကန်ဒေါ်လာ ၇၆ဝ- ၇၈ဝ အသီးသီးဖြစ်တယ်လို့ သိရပါတယ်။MIRT - MAPT
ဟင်္သာတမတ်ပဲဈေး မြင့်တက်လာ ဟင်္သာတပဲဈေးကွက်ကို ယခုမတ်လ ဒုတိယပတ်မှာ မတ်ပဲသစ်များ ဝင်လာတာကိုတွေ့ရပါတယ်။ ဟင်္သာတ ခရိုင်အတွင်း အများဆုံးစိုက်ပျိုးတဲ့ မြို့နယ် များဖြစ်တဲ့ ဟင်္သာတနဲ့ ဇလွန်မြို့နယ်များမှာ မတ်ပဲသစ်များကို ရန်ကုန်ဈေးကွက်သို့ တစ်ပတ်အတွင်း အိတ် ၈၅ဝဝ ခန့် တင်ပို့နိုင်ခဲ့ကြောင်း သိရပါတယ်။ မတ်ပဲ တစ်တင်းဈေးမှာ ယခင်အပတ်က ၂၁၉ဝဝ ကျပ်ဖြစ်ပြီး ယခုအပတ်တွင် ပိဿာ ၂ဝ ဝင် တစ်တင်းကို ၂၂၄ဝဝ ကျပ်နဲ့ အရောင်းအဝယ် ဖြစ်ခဲ့ပြီး ရောင်းဝယ်မှု အနေနဲ့ ယခင်အပတ်ထက်ပိုများလာတယ်လို့ သိရပါတယ်။ အေးအေးခိုင်
ဘော်ဒါက တန်ချိန်အနည်းငယ်သာတင်ပို့ မတ်လ ၂ ရက်မှ ၈ ရက်ထိကာလအတွင်း မူဆယ် ၁ဝ၅ မိုင်ကုန်သွယ်ရေးဇုန်မှ ကန်ဒေါ်လာ ၃၇၁ဝဝ တန်ဖိုးရှိမတ်ပဲ ၃၈ တန် တင်ပို့နိုင်ခဲ့ပါတယ်။ယခင်အပတ်က ၇၃ တန် တင်ပို့ခဲ့တာတွေ့ရပါတယ်။၂ဝ၁ဝ-၂ဝ၁၁ ဘဏ္ဍာနှစ်ဧပြီလမှ ဖေဖော်ဝါရီ လကုန်ထိ နယ်စပ်မှမတ်ပဲ တန်ချိန် ၈၆ဝဝ ကျော်တင်ပို့ထားပြီး ဖြစ်ပါတယ်။ စစ်ကိုင်း၊ မန္တလေးနဲ့ ပဲခူးတိုင်းဒေသကြီးများက ထွက်ရှိတဲ့မတ်ပဲများကို မူဆယ် ၁ဝ၅ မိုင်မှတစ်ဆင့် တစ်ဖက်နိုင်ငံသို့တင်ပို့ခဲ့တာပါ။ ယခင်အပတ်ကထက် မိမိဘက် ဈေး ၁ တန်ကို ၁၁၂၅ဝ ကျပ်မြင့်တက်နေပေမဲ့ တစ်ဖက်နိုင်ငံ ပေါက်ဈေးများ ပြောင်းလဲမှုမရှိဘူးလို့ သိရပါတယ်။ တစ်ဖက်နိုင်ငံပေါက်ဈေးက ၁ တန် ဒေါ်လာ ၁ဝ၅ဝ ဖြစ်ပါတယ်။ MIRT (DOBT)
တစ်ပတ်အတွင်း မတ်ပဲတန်ချိန် ၆ဝဝဝ တင်ပို့ ယခင်သီတင်းပတ်တွေက ပင်လယ်ရေကြောင်း မတ်ပဲတင်ပို့မှုဟာ တန် ၅ဝဝဝ ဝန်းကျင်သာရှိနေခဲ့ရာက ယခုသီတင်းပတ် (မတ်လ ၃ ရက်မှ ၉ ရက်) အတွင်းမှာတော့ တန် ၆ဝဝဝ ကို တင်ပို့မှု တိုးတက်လာခဲ့ပါတယ်။ ယခုသီတင်းပတ် အတွင်းမှာတော့ ပြည်တွင်းဈေးကွက်အတွင်း ရောင်းလိုအားနည်းပြီး ဝယ်လိုအား ကောင်းလာတာကြောင့် ဈေးအနည်းငယ်မြင့်တက်ခဲ့ပေမဲ့ ပြည်ပရောင်းဈေး ကတော့ အိန္ဒိယဈေးလျော့လို့ ဒီတစ်ပတ် FOB ဈေးမှာ တစ်ပတ်လုံးလုံး ငြိမ်နေခဲ့ရာ မတ်လ ၁၃ ရက်နေ့မှာလည်း မတ်ပဲ FAQ တစ်တန်ကို ကန်ဒေါ်လာ ၉ဝဝ- ၉၂ဝ နဲ့ SQ တစ်တန်ကို ကန်ဒေါ်လာ ၁ဝဝဝ-၁ဝ၂ဝ ဖြစ်ကြောင်း သိရပါတယ်။ MIRT - MAPT
အရည်အသွေးပေါ်မူတည်ပြီး ဈေးအမိုျးမိုျးနဲ့ ရောင်းဝယ်နေတဲ့ ရှမ်းနနွင်းဈေးကွက် နနွင်းတက်တွေကတော့ ဈေးကွက်ကို တစိမ့်စိမ့်ဝင်နေပါတယ်။ မနှစ်ကလောက် အရောင်းမသွက်ပေမဲ့ ပြည်တွင်းသုံး (ဈေးပတ်သမား) တွေကတော့ ပုံမှန်ဝယ်ယူနေတယ်လို့သိရပါတယ်။ အခုလောလောဆယ် ဈေးကွက် ထဲကို အဝင်များနေတာ ကတော့ ကလောမြို့နယ်၊ တောင်လပို့ရွာက နနွင်းတွေပဲဖြစ်ပါတယ်။ တစ်ရက်ကို ပိဿာချိန် ၅ဝဝဝ ခန့် ဝင်နေတယ်လို့လည်း သိရပါတယ်။ ပင်လောင်းနနွင်းတွေလည်း ဈေးကွက်ကိုဝင်နေပါပြီ။ အရင်နှစ်တွေ လိုပဲ နနွင်းဈေးကတော့ အရည်အသွေးပေါ် မူတည်ပြီး ဈေးအမျိုးမျိုးသတ်မှတ် အရောင်းအဝယ် ပြုလုပ်ကြပါတယ်။ ဒီတစ်ပတ် အောင်ပန်းဈေးကွက်မှာ နနွင်းပေါက်ဈေးတွေကတော့ ပင်လောင်းနနွင်းတစ်ပိဿာ ၁၇ဝဝ ကျပ်၊ တောင်လပို့နနွင်း ၂ဝဝဝ ကျပ်၊ ဆင်တောင်နနွင်း ၂၅ဝဝ ကျပ်မှ ၂၈ဝဝ ကျပ်နဲ့ အင်းလေးစကတော့ ၁၈ဝဝ ကျပ်ဈေး ရှိပါတယ်။ တောင်ကြီးဈေးကွက်မှာတော့ နနွင်းတစ်ပိဿာ ၁၈ဝဝ ကျပ်ဈေးရှိပါတယ်။ ဧဧခိုင်
ယခုမူဆယ်မှ နနွင်းတက် တင်ပို့မှုရှိ ဖေဖော်ဝါရီလ ၂၃ ရက်မှ မတ်လ ၁ ရက်ထိ ကာလအတွင်းမှာ မူဆယ် ၁ဝ၅ မိုင်ကုန်သွယ်ရေးဇုန်မှ ကန်ဒေါ်လာ ၃၉ဝဝဝ တန်ဖိုးရှိ နနွင်းတက် ၂၁ တန်ကျော်တင်ပို့နိုင်ခဲ့ပါတယ်။ဖေဖော်ဝါရီတစ်လလုံး နနွင်းတက် ၄၂ တန်ကိုနယ်စပ်စခန်းများ ဖြစ်တဲ့ မူဆယ်နဲ့စစ်တွေတို့မှ တင်ပို့နိုင်ခဲ့ပါတယ်။ တင်တင်ထွန်း(MIRT)
နနွင်းဈေးကောင်းရခဲ့ ပင်လယ်ရေကြောင်းကုန်သွယ်မှုလမ်းကနေ ဖေဖော်ဝါရီ ၂၁ ရက်မှ ၂၈ ရက် တာကာလအတွင်း နနွင်းတန်ချိန် ၄၇ တန်ကို တင်ပို့နိုင်ခဲ့ပါတယ်။ တင်ပို့ခဲ့တဲ့ကုန် သွယ်ဖက်နိုင်ငံတွေကတော့ မလေးရှားနိုင်ငံကို ၁၅ တန်နဲ့ စင်ကာပူကို ၃၂ တန် တို့ပဲဖြစ်ပါတယ်။ ဖေဖော်ဝါရီလရဲ့ နနွင်းတင်ပို့ခဲ့တဲ့ တန်ချိန် စုစုပေါင်းမှာ ၆၈ တန်ရှိခဲ့ပြီး ယခင်ဇန်နဝါရီလအတွင်း တင်ပို့မှုက ၁ဝ၇ တန်ရှိခဲ့တာကြောင့် ဖေဖော် ဝါရီလမှာ နနွင်းတင်ပို့မှုကလျော့နည်းခဲ့ပါတယ်။ တစ်တန်ကို အက်ဖ်အိုဘီဈေး ကန်ဒေါ်လာ ၁၈၅ဝ ဝန်းကျင်နဲ့ တင်ပို့နိုင်ခဲ့တာကြောင့် စုစုပေါင်းပို့ကုန်ဝင်ငွေ ကန်ဒေါ်လာ ၈၈၉၂၅ ရရှိခဲ့ပါတယ်။ MIRT (DOT)