ပြည်တွင်း အရောင်းအဝယ်ရှိတာကြောင့် ရှမ်းနနွင်းကတော့ အေးစက်စက်ဖြစ်နေပါတယ်။ ဒါပေမယ့် မြန်မာတွေရဲ့ ဟင်းချက်ရာမှာ မပါမဖြစ်အသုံးပြုနေရတဲ့ နနွင်းမှုန့်ပြုလုပ်ဖို့အတွက် ဝယ်ယူမှုရှိနေတာကြောင့်  အရောင်းအဝယ် ကတော့ ဖြစ်နေပါတယ်။ တချို့တွေကလည်း ပရဆေးဖော်ဖို့အတွက်လည်း ဝယ်ယူမှုရှိနေပါတယ်။

ပြည်ပကို ပင်လယ်ရေကြောင်းကုန်သွယ်မှုလမ်းမှ အောက်တိုဘာ ၂၁ ရက်မှ ၂၇ ရက်နေ့တာ ကာလအတွင်း နနွင်း ၁၅၆ ဒသမ ၆၄ တန်ကို တင်ပို့ခဲ့ပါတယ်။ ပါကစ္စတန်နိုင်ငံကို ၃၀ ဒသမ ၈ တန်နဲ့ မလေးရှားနိုင်ငံကို ၁၁၅ ဒသမ ၈၄ တန် တင်ပို့ခဲ့တာကြောင့် ဒီတစ်ပတ်မှာ မလေးရှားနိုင်ငံကို အများဆုံးတင်ပို့နိုင်တာတွေ့ ရပါတယ်။ ယခင်သီတင်းပတ်မှာ တန်ချိန် သုံးဆယ်ကျော်သာ တင်ပို့နိုင်ခဲ့တာကြောင့် ဒီတစ်ပတ်မှာ နနွင်းအပို့များခဲ့တယ်လို့ဆိုရပါမယ်။FOB ဈေးက တစ်တန်ကို ကန် ဒေါ်လာ ၅၁၀-၅၅၀ ရရှိခဲ့တာကြောင့် စုစုပေါင်းပို့ကုန်ဝင်ငွေ ကန်ဒေါ်လာရှစ်သောင်းကျော် ရရှိခဲ့ပါတယ်။  MIRT (DOT)

ဒီတစ်ပတ်တော့ ရှမ်းချင်းတွေ အဝင်မရှိသလောက်ပါဘဲ။ ရှမ်းပြည်နယ်ရဲ့ ဓလေ့ထုံးစံအရ သီတင်းကျွတ်ကာလမှာ ဘုန်းကြီးကျောင်းကို တစ်လလုံးသွားကြပါ တယ်။ တောင်သူတွေကလည်း အလုပ်နားကြတော့တာကြောင့် အရောင်းအဝယ် အနေနဲ့လည်း အရင်တစ်ပတ်ကထက်စာရင်တော့ အေးနေတယ်လို့ ဆိုရမှာပါ။ ယခုလောလော ဆယ်မှာလည်း  သီတင်းမကျွတ်ခင်ကဝင်တဲ့ ပစ္စည်းတွေကိုသာ အရောင်းအဝယ်လုပ်နေကြတယ်လို့ ဆိုပါတယ်။ နောက်ဈေးနှစ်ပတ်လောက်မှသာ အဝင်ရှိလာနိုင်တယ်လို့လည်း သိရပါတယ်။ ချင်း(ဥမ)ကော၊ ချင်းသစ်ပါတစ်ပိဿာ ၂၀၀ ကျပ်ဈေးရှိပါတယ်။

ရှမ်းပြည်နယ် တောင်ပိုင်းက လဲချားကုန်စည်ဒိုင်ကို ၂၀၁၂ ခုနှစ်၊ စက်တင်ဘာ ၂၇ ရက်က စတင်ဖွဲ့စည်းခဲ့ပြီး၊ အောက်တိုဘာ ၄ ရက်ကစလို့ ကုန်စည်ဒိုင် လုပ်ငန်း များ စတင်ဆောင်ရွက်ခဲ့ရာ အောက်တိုဘာ ၃၁ ရက်အထိ ဒေသထွက်ကုန် အဓိက သီးနှံ ၄ မျိုးမှ ကုန်ချိန် ၆၆၃၆၀၀ ပိဿာ (၁၀၈၃ ဒသမ ၆၂ တန်) အရောင်းအဝယ် ဖြစ်ခဲ့ပြီး၊ ဒေသထွက်ကုန် တစ်မယ်ချင်းအလိုက် ကြက်သွန်ဖြူ(အမြိတ်ပါ) ၃၀၃၈၀၀ ပိဿာ(၄၉၆ ဒသမ ၀၈ တန်)၊ ပဲပုပ်စေ့ ၉၃၃၀၀ ပိဿာ (၁၅၂ ဒသမ ၃၅ တန်)၊ မြေပဲဆန် ၁၇၅၀၀၀ ပိဿာ (၂၈၅ ဒသမ ၇၆ တန်)၊ မြေပဲတောင့် ၅၂၀၀၀ ပိဿာ (၈၄ ဒသမ ၉၁ တန်)နဲ့ နှမ်းဖြူ ၃၉၅၀၀ ပိဿာ (၆၄ ဒသမ ၅၀ တန်) ရောင်းဝယ်တင်ပို့နိုင်ခဲ့ကြောင်း သိရပါတယ်။