ရှမ်းပြည်နယ်တောင်ပိုင်းမှာ ချင်းစိုက်ဒေသတစ်ခုဖြစ်တဲ့ နမ့်စန်ကထွက်တဲ့ချင်း တွေလည်းဈေးကွက်ကိုစပြီး ဝင်လာပါပြီ။ လောလောဆယ်တော့ အဝင်အနည်းငယ် သာရှိနေပြီး ၂ လပိုင်းလောက်မှသာ လှိုင်လှိုင်ဝင်လာနိုင်တယ်လို့သိရပါတယ်။ နမ့်စန် ချင်းသစ်က တစ်ပိဿာ ၂၅၀ ကျပ်ဈေးရှိပါတယ်။ ဟိုပုံးချင်းတွေလည်း အဝင်နည်း နေပါသေးတယ်။ ခြံရှင်တွေက ကြိုက်ဈေးမရလို့မဖော်သေးဘဲစောင့်နေပါတယ်။ အစိုဈေးကိုလည်း ကြိုက်ဈေးမရခဲ့ရင် ပြုတ်ခြောက်သာလုပ်တော့မယ်လို့ လည်းသိရ ပါတယ်။ ဟိုပုံးချင်း (နီ)ကလည်း တစ်ပိဿာ ၂၅၀ ကျပ်ဈေးသာရှိပြီး၊ ချင်းခြောက် က တစ်ပိဿာ ၁၄၀၀-၁၅၀၀ ကျပ်ဈေးရှိပါတယ်။                    အောင်ပန်းဈေးကွက်မှာတော့ ကလော၊ ပင်လောင်း၊ ပင်းတယစတဲ့မြို့နယ် တွေကထွက်တဲ့ ချင်းတွေက လှိုင်လှိုင် ဝင်နေတယ်လို့သိရပါတယ်။ အဝင်များပေမဲ့ ချင်း ထိုးသမားတွေနဲ့ ပြည်တွင်းသုံးအတွက်သာ အဝယ်ရှိနေတဲ့ အတွက် ရောင်း အားလည်းလျော့နေတယ်လို့ ချင်းပွဲရုံတွေက သိရပါတယ်။ အောင်ပန်းဈေးကွက်မှာ ချင်း(စို)တစ်ပိဿာ၂၅၀ ကျပ်မှ ၃၅၀ ကျပ် ဈေးရှိပြီး၊ ချင်းခြောက် (အသစ်)ကတော့ တစ်ပိဿာ ၁၅၀၀ ကျပ်နဲ့ အဟောင်းက တစ်ပိဿာ ၂၀၀၀ ကျပ်ဈေးရှိပါတယ်။ ဧဧခိုင်

                ပင်လယ်ရေကြောင်းကုန်သွယ်မှုလမ်းမှ ဇန်နဝါရီ ၁၅ ရက်မှ ၂၁ ရက်တာ ကာလအတွင်း နနွင်း ၄ တန်ကို တင်ပို့ခဲ့ ပါတယ်။ တင်ပို့ခဲ့တဲ့နိုင်ငံက မလေးရှားနိုင်ငံပဲဖြစ်ပါတယ်။ ၂၀၁၁ ဒီဇင်ဘာ တတိယပတ်မှစပြီး အပို့ပျောက်ခဲ့တဲ့နနွင်းက ဒီ တစ်ပတ်မှသာ ပြန်လည် တင်ပို့နိုင်ခြင်းဖြစ်ပါတယ်။ FOB ဈေးတစ်တန်ကို ကန်ဒေါ်လာ ၁၅၅၀ ရရှိခဲ့လို့ စုစုပေါင်းပို့ကုန် ဝင်ငွေ ကန်ဒေါ်လာ ခြောက်ထောင့် နှစ်ရာရရှိခဲ့ပါတယ်။ MIRT (DOT)

                   မြန်မာနိုင်ငံရဲ့ ပဲမျိုးစုံစိုက်ပျိုးမှုမှာ မတ်ပဲနဲ့ ပဲတီစိမ်းကို ပဲခူးတိုင်းဒေသကြီးနဲ့ ဧရာဝတီတိုင်းဒေသကြီးတို့မှာအများဆုံးစိုက်ပျိုးပြီး၊ ကုလားပဲနဲ့ ပဲစင်းငုံများကို စစ်ကိုင်းတိုင်းဒေသကြီး၊ မကွေးတိုင်းဒေသကြီးနဲ့ မန္တလေးတိုင်း ဒေသကြီးတို့မှာ အများဆုံးစိုက်ပျိုးလျက်ရှိပါတယ်။ စစ်ကိုင်းတိုင်းဒေသကြီးအနေနဲ့ ကုလားပဲသီးနှံကို တစ်ပြည်လုံး စိုက်ဧကရဲ့ ၄၆ ဒသမ ၂၅ ရာခိုင်နှုန်းနဲ့ အများဆုံးစိုက်ပျိုးတဲ့ တိုင်းတစ်တိုင်းဖြစ်ပါတယ်။ မတ်ပဲ၊ ပဲတီစိမ်း၊ ပဲစင်းငုံ တို့မှာ ပြည်တွင်းစားသုံးမှု အလွန် နည်းပါးပြီး၊ ပြည်ပဈေးကွက်ပေါ်မှာ မူတည်ပေမယ့် ကုလားပဲဖြူလုံးကြီးက ပြည် တွင်းဈေးမြင့်ပြီး၊ ပြည်ပဈေးနိမ့်သည့်တိုင် ပြည်တွင်းစားသုံးမှုများပြားလာပြီး၊ ပြည်တွင်း ပဲခွဲစက်၊ အမှုန့်ကြိတ်စက်နဲ့ ကြာဇံစက်များမှာ ပြည်တွင်းစာအဖြစ် ပိုမိုအသုံးပြုလျက်ရှိပါတယ်။                          ပဲစိုက်တောင်သူများရဲ့ စီးပွားရေးတွက်ခြေကိုက်မှုမှာ ပဲတစ်ဧကစိုက်ပျိုးမှု အပေါ် အမြတ်ရာခိုင်နှုန်းမှာ ကုလားပဲဖြူလုံးကြီး၊ V-2 အတွက် ၃၈ ဒသမ ၃၀ ရာခိုင်နှုန်း၊ ကုလားပဲဖြူလုံးကြီး V-12 အတွက် ၁၄၆ ဒသမ ၉၇ ရာခိုင်နှုန်း၊ မတ်ပဲ အတွက် ၂၃ ဒသမ ၂၃ ရာခိုင်နှုန်းဖြစ်တဲ့အတွက် ကုလားပဲဖြူလုံးကြီးမှာ တိုးချဲ့ စိုက်ပျိုးထုတ်လုပ်သွားဖို့ အလားအလာကောင်းတဲ့ ပဲမျိုးဖြစ်ပါတယ်။ ပဲမျိုးစုံ ကမ္ဘာ့ ဈေးကွက်မှာ အရည်အသွေးကောင်း၊ မျိုးသစ်၊ မျိုးသန့်များ စိုက်ပျိုးထုတ်လုပ်ပြီး၊ ယှဉ်ပြိုင်နိုင်မှသာ ရရှိပြီးဈေးကွက် ပိုမိုခိုင်မာပြီး ဈေးကွက်သစ်ချဲ့ထွင်ခြင်းကို ဆောင်ရွက်နိုင်မှာဖြစ်ပါတယ်။ တိုင်းဒေသကြီးရဲ့ ကုလားပဲစိုက်ပျိုးရာမှာ ယခင် V-2 ကုလားပဲမျိုးစိတ်များဟာ တောင်သူများအနေနဲ့ မျိုးအဖြစ် သီးသန့်ရွေးချယ်စိုက်ပျိုးခြင်းမဟုတ်ဘဲ စိုက်ပျိုး ထွက်ရှိတဲ့အထဲက မျိုးအဖြစ် ချန်ခြင်းကြောင့် နှစ်ကာလ ကြာမြင့်လာတဲ့အချိန်မှာ မျိုးညံ့လာပြီး၊ အထွက်နှုန်းလျော့နည်း အရွယ်အစား သေးလာသလို အရည်အသွေး နိမ့်ခြင်းကိုလည်း တွေ့လာရပါတယ်။ ဒါကြောင့် ပြည်ပဈေးကွက် မယှဉ်ပြိုင်နိုင်ဘဲ အဓိကတင်ပိုတဲ့ ပဲအဖြစ်မှ တင်ပို့မှု လျော့ကျသွားခဲ့ပါတယ်။ ပြည်ပကို အရည် အသွေးမီ တင်ပို့ရောင်းချနိုင်ရေးအတွက် မျိုးကောင်းမျိုးသန့်များ ရွေးချယ် စိုက်ပျိုးဖို့ တောင်သူတွက်ခြေကိုက်တဲ့ အထွက်နှုန်းကောင်းမျိုးများ စိုက်ပျိုးသွားဖို့ အရေးကြီး ပါတယ်။                     V-12 မျိုးသစ်ကို ယခုနှစ် စိုက်ပျိုးရာသီမှာ မုံရွာကုန်စည်ဒိုင်မှ ချိတ်ဆက်ပြီး၊ မျိုးတင်း ၂၀၀ အား ဖြန့်ဖြူးပေးမှုနဲ့ မုံရွာခရိုင်အတွင်းရှိ မုံရွာ၊ ယင်းမာပင်၊ ပုလဲ၊ ဘုတလင်၊ မြို့နယ်များမှ တောင်သူများ စတင်စိုက်ပျိုးလျက်ရှိရာ ယင်းကုလားပဲ မျိုးသစ် V-12 စိုက်ပျိုးတဲ့ ယင်းမာပင်မြို့နယ်၊ ရင်ပေါင်တိုင်ကျေးရွာမှ ဦးခင်မောင် ထွန်းကပြောကြား ရာမှာ V-12 ကုလားပဲဖြူလုံးကြီးမျိုးအားမုံရွာကုန်စည်ဒိုင်မှ ချိတ် ဆက်မှုရယူပြီး၊ယခုနှစ် ၅ ဧက စတင်စိုက်ပျိုးထားပြီး၊ မျိုးတစ်တင်း ၃၇၀၀၀ ကျပ်နဲ့ ဝယ်ယူခဲ့ပြီး တစ်ဧကစိုက်ပျိုးစရိတ်မှာ ၁ သိန်းခွဲကျော် ကုန်ကျမှာဖြစ်ပြီး၊ အထွက် နှုန်းမှာ ၂၅-၃၀ တင်း ထွက်ရှိမှာဖြစ်ကြောင်း ရှင်းပြပါတယ်။ ယနေ့ ကုလားပဲဖြူလုံးကြီးအသစ် မုံရွာကုန်စည်ဒိုင်ပေါက်ဈေးမှာ တစ်တင်း ၁၆၃၀၀ ကျပ်ဖြစ်လို့ စိုက်ပျိုးသူ တောင်သူအတွက် ယခင်မျိုး စိုက်ပျိုးသည်ထက် V-12 မျိုးစိုက်ပျိုးပါက အကျိုးအမြတ်ငွေ တစ်ဧက ကျပ် ၁ သိန်း ၈ သောင်းခန့် ပိုမို ရရှိပြီး၊ အခြားပဲသီးနှံများထက် ဈေးကွက်ကောင်းမွန်လို့ တောင်သူများအဖို့ စိုက်ပျိုးရန် ကုလားပဲမျိုးစိတ်သစ်အကြောင်း၊ တင်ပြလိုက်ပါတယ်။ ထွန်းဌေး

              ဈေးကွက်တွေကိုကုလားပဲအသစ်များဝင်ရောက်လာခြင်းမရှိသေးလို့ လက်ကျန် တော်တော်ပါးလာပြီ ဖြစ်ပါတယ်။ဒါကြောင့်လည်း ဇန်နဝါရီလ၁၆ ရက်မှ၂၀ ရက် အတွင်းမှာ ပြည်ပကို ၆၈ တန်သာ တင်ပို့နိုင်ခဲ့ပြီး ရန်ကုန် FOB ဈေးကွက်မှာလည်း ကုလားပဲဖြူလုံးကြီး ၁၂၀ တန်သာ အရောင်းအဝယ်ဖြစ်ခဲ့ကြောင်း သိရပါတယ်။ လက်ရှိ ၂၀၁၁-၂၀၁၂ ဘဏ္ဍာနှစ်အတွင်း ဇန်နဝါရီလ ၂၀ ရက်နေ့အထိ ပြည်ပကို ကုလားပဲဖြူလုံးကြီး တင်ပို့မှုဟာ တန်ချိန် ၆၅၆၀၀ ကျော်ရှိပြီး ဝင်ငွေမှာ ကန်ဒေါ်လာ ၅၅ သန်းကျော်ရရှိထားကြောင်း သိရပါတယ်။ ရန်ကုန် FOB ဈေးအနေနဲ့ ဇန်နဝါရီလ၂၀ ရက်မှာကုလားပဲဖြူလုံးကြီး FAQ တစ်တန် ကန်ဒေါ်လာ ၇၆၀-၇၈၀ ရှိရာမှ ဇန်နဝါရီလ ၂၇ ရက်မှာ ကန်ဒေါ်လာ ၇၂၀-၇၄၀ ကို ကျဆင်းခဲ့ကြောင်း သိရပါတယ်။MIRT - MAPT