ဈေးမာတဲ့ ရှမ်းကြက်သွန်ဖြူ                  ဒီတစ်ပတ်ရှမ်းကြက်သွန်ဖြူ ဈေးတက်နေပါတယ်။ ကြက်သွန်ဖြူ စိုက် တောင်သူတွေမှာ ပစ္စည်းလက်ကျန် မရှိတော့ဘဲ၊ လှောင်လက်တွေဆီမှာသာ ကျန် တော့တာကြောင့် ပစ္စည်းတွေကဈေးတက်လာခြင်း ဖြစ်တယ်လို့ သိရပါတယ်။ သီတင်းကျွတ်မှာ စိုက်တဲ့ကြက်သွန်တွေကို ဖေဖော်ဝါရီလ နောက်ဆုံးအပတ်မှာ စပြီးဖော်မှာဖြစ်ပြီး၊ တန်ဆောင်မုန်းမှာ စိုက်တဲ့ကြက်သွန်ကတော့ မတ်လကုန် ဧပြီလမှာ စပြီးဖော်မှာဖြစ်ပါတယ်။ ဒီနှစ်ကြက်သွန်ဖြူ ကတော့ တောင်သူတွေ ကြိုက်ဈေးရတာကြောင့် စောစောပိုင်းမှာတင် ပစ္စည်းကုန်သွားသလောက်ကို အရောင်းအဝယ်ဖြစ်ခဲ့ပါတယ်။ လှောင်လက်တွေကသာ ဈေးကောင်းရအောင် စောင့်ပြီး ရောင်းဖို့အတွက်ချန်ထားတဲ့ လက်ကျန်တွေက ဈေးကွက်မှာ ဈေးတက်လာ ပါတယ်။ ဒီတစ်ပတ်ကြက်သွန်ဖြူဈေးက တောင်ကြီးဈေးကွက်မှာ တစ်ပိဿာ ဈေးတွေက (လတ်ခြား) ၃၂ဝဝ ကျပ်၊ (ထူး-၁) ၃၄ဝဝ ကျပ်၊ (ထူး -၂) ၃၇ဝဝ ကျပ်၊ (ထူး -၃) ၄ဝဝဝ ကျပ်၊ (ထူး- ၄) ၄၂ဝဝ ကျပ်ဈေးရှိပါတယ်။ အောင် ပန်းဈေးကွက်မှာတော့ (လတ်ခြား) ၃ဝဝဝ ကျပ်၊ (ရှယ်) ၃၂ဝဝ ကျပ်၊ (ထူး -၁) ၃၄ဝဝ ကျပ်၊ (ထူး -၂) ၃၆ဝဝ ကျပ်၊ (ထူး -၃) ၃၈ဝဝ ကျပ်၊ (ထူး -၄) ၄ဝဝဝ ကျပ်ဈေးရှိပါတယ်။ ကြက်သွန်ကြော်လုပ်ရန်၊ အစိမ်းစားအဖြစ် အသုံးပြုရန်၊ ရန်ကုန်၊ မန္တလေး၊ နေပြည်တော်၊ မိတ္ထီလာစတဲ့ မြို့တွေက ဝယ်ယူနေကြလို့ ဒီဇင်ဘာ တစ်လအတွင်းမှာ ပိဿာချိန် ၅ ဒသမ ၅ သိန်း စီးဆင်းသွားတယ်လို့ ကြက်သွန်ဖြူ ပဲွဲရုံတွေက သိရပါတယ်။ ဧဧခိုင်

ရှမ်းပြည်နယ်တောင်ပိုင်းထွက် ချင်းဈေးကွက်                        အောင်ပန်းချင်းဈေးကွက်မှာ ချင်းဈေးက ဈေးနှုန်းအမျိုးမျိုးနဲ့ ဝင်နေပါ တယ်။ ချင်း (သစ်) ထိပ်စတစ်ပိဿာ ၇ဝဝ ကျပ်၊ (လတ်စ) ၆ဝဝ ကျပ်၊ (ညံ့စ) က ၅ဝဝ ကျပ်ဈေးရှိပြီး၊ ချင်းခြောက်က တစ်ပိဿာ ကျပ် ၂ဝဝဝ မှ ၂၅ဝဝ ဈေး ရှိတယ်လို့ သိရပါတယ်။ ချင်းသစ်တွေကတော့ ဈေးကွက်သို့ ပုံမှန်လောက်သာ ဝင်နေပြီး ၅ ရက်တစ်ဈေးကို ပိဿာချိန် ၁ ဒသမ ၅ သောင်းခန့် အဝင်ရှိတယ်လို့ သိရပါတယ်။ အောင်ပန်းဈေးကွက်ကို အဓိကဝင်နေတဲ့ ရွာတွေကတော့ ပဲယင်းတောင်၊ သရက်ပု၊ ရေချို၊ ပင်မှီစတဲ့ရွာတွေကဖြစ်တယ်လို့ သိရပါတယ်။ ဒီနှစ် ချင်းက အိတ်စပို့မထွက်သေးဘဲ ပြည်တွင်းသုံးအဖြစ်သာ ဝယ်ယူနေတာ ကြောင့် ငွေမလိုတဲ့ တောင်သူတွေက မဖော်သေးပဲ မြေကြီးထဲမှာသာ လှောင်ထား ကြပါတယ်။ အဲဒီလိုမဖော်ပဲထားရင် မိုးဦးကျမှာ မိုးမိပါက အချိန်ထပ်တိုးတာကြောင့် မဖော်သေးဘဲထားကြတယ်လို့ သိရပါတယ်။ တောင်ကြီးဈေးကွက်မှာ ဟိုပုံးချင်းက တစ်ပိဿာ ၄ဝဝ ကျပ်- ၄၅ဝ ကျပ်၊ နမ့်စန်ချင်းက တစ်ပိဿာ ၄၅ဝ ကျပ်ဈေး ရှိတယ်လို့ ချင်းပွဲရုံတွေက သိရှိရပါတယ်။                                                                        ဧဧခိုင် 

ပြည်ဘိုကိတ် ဈေးကောင်းရနေ              ယခင်အပတ်များက ပြည်ဈေးကွက်ကို ဆင်တဲ၊ ပန်းတောင်း၊ ဥသျှစ်ပင်မြို့နယ်များမှ ဘိုကိတ်ကုန်းပဲများ နေ့စဉ် ၁၄-၁၅ အိတ်ခန့် အဝင်ရှိသော်လည်း ယခုရက်ပိုင်းတွင် ကုန်းပဲများပြတ်နေခြင်းကြောင့် အဝင်မရှိကြောင်း သိရပါတယ်။ အဝင်နည်းနေတာကြောင့် ယခင်တစ်ပတ်ဈေးထက် တစ်တင်းကို ၂ဝဝဝ ကျပ်ထိ ဈေးမြင့်တက်လာခဲ့ပြီး ပိဿာ ၂ဝ တစ်တင်းကို ၂ဝဝဝဝ ကျပ်ဈေးရှိကြောင်း သိရပါတယ်။ ဈေးတက်နေသော်လည်း နေ့စဉ် ၁ဝ-၁၅ အိတ်ဝန်းကျင် အရောင်း အဝယ် ဖြစ်နေတယ်လို့ သိရပါတယ်။                                                                                            ဆုမွန်မွန်ဆွေ 

ပြည်ဈေးကွက်၌ ပဲကြီးဈေးနှုန်းကျဆင်း                ပြည်ဈေးကွက်၌ ၂ဝ၁ဝ ဒီဇင်ဘာလကုန်အထိ ပဲဈေးကွက်အတွင်း ဈေးအမြင့်ဆုံးဖြစ်ခဲ့တဲ့ ပဲကြီးဟာ ယခု ၂ဝ၁၁ ဇန်နဝါရီလဆန်းမှစလို့ ဈေးတဖြည်းဖြည်း ကျနေတာကို တွေ့ရပါတယ်။ နှစ်ကုန်ပိုင်းမှာ ပဲကြီး (ကမ်းနား) တစ်တင်း ကျပ်၃၃၅ဝဝ နဲ့ ရွှေကျွန်းမှာ တစ်တင်း ၃၅ဝဝဝ ကျပ်ဖြင့် အရောင်းအဝယ်ဖြစ်ခဲ့ကြပြီး ဇန်နဝါရီလဆန်းမှစလို့ ပဲကြီးဈေးနှုန်းများ ကျဆင်းလျက်ရှိရာ ဇန်နဝါရီ ဒုတိယပတ်အတွင်း ပဲကြီး (ကမ်းနား) တစ်တင်း ကျပ် ၃၁၅ဝဝ နဲ့ ပဲကြီး (ရွှေကျွန်း) တစ်တင်း ကျပ် ၃၂၅ဝဝ ဈေးကျသွားခဲ့ပါတယ်။ နှစ်ကုန်ဈေးနဲ့ ယှဉ်ရင် ပဲကြီး တစ်တင်း ကျပ် ၂ဝဝဝ မှ ၂၅ဝဝ အထိ ဈေးကျသွားခဲ့ပြီး အရောင်းအဝယ်ဖြစ်မှုကတော့ တစ်ရက်ကို အိတ် ၁၅ဝ ဝန်းကျင် အရောင်းအဝယ် ဖြစ်လျက်ရှိတယ်လို့ သိရပါတယ်။                                                                                                ခင်ဆွေဝင်း