ရေကြီးနစ်မြုပ်ခဲ့သည့် လယ်ယာမြေများအတွက် ကူညီပံ့ပိုးမှုများဆောင်ရွက်ပေးမည်                 ယခုလအတွင်း မြန်မာနိုင်ငံတစ်ဝန်း ရေလွှမ်းမိုးမှုများဖြစ်ပွားလျက်ရှိရာ ယင်းကဲ့သို့ရေလွှမ်းမိုးမှုကြောင့် ရေကြီးနစ်မြုပ်ခဲ့ ရသည့်လယ်ယာမြေများအတွက် လယ်ယာစိုက်ပိုျးရေးနှင့်ဆည်မြောင်းဝန်ကြီးဌာနမှ တောင်သူလယ်သမားများအား ပံ့ပိုးကူညီမှု များ ပြုလုပ်ပေးသွားမည်ဖြစ်ကြောင်း သြဂုတ် ၁၂ရက်က ကျင်းပခဲ့သည့်သတင်းစာရှင်းလင်းပွဲတွင် လယ်ယာစိုက်ပိုျးရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးအုန်းသန်းက ရှင်းလင်းပြောကြားသွားခဲ့သည်။ ဒုတိယဝန်ကြီးဦးအုန်းသန်းက ''ရေကြီးနစ်မြုပ်မှုတွေနဲ့ပတ်သက်ပြီး ရေကျသွားတဲ့အခါမှာ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနအနေ နဲ့ တောင်သူလယ်သမားများ စပါးပြန်လည်စိုက်ပျိုးနိုင်အောင် လိုအပ်ချက်တွေဖြစ်တဲ့ မျိုးများကို ကြိုတင်ရှာဖွေစုဆောင်းထားပြီး မျိုးအပါအဝင် အခြားပံ့ပိုးမှုများကို လိုအပ်သလို ကူညီပံ့ပိုးဆောင်ရွက်သွားမှာဖြစ်ပါတယ်။ အလားတူပဲ နောင်နှစ်တွေ မှာ ရေလွှမ်းမိုးမှုမရှိအောင် နိုင်ငံတော်သမ္မတကြီးရဲ့လမ်းညွှန်ချက်နဲ့အညီ ဆည်မြောင်းဦးစီးဌာနက မိုးကုန်သွားတဲ့အခါ သက်ဆိုင်ရာကွင်းတွေကို တိုင်းတာပြီး လုပ်သင့်လုပ်ထိုက် တဲ့ ရေမြောင်းများ တူးဖော်ခြင်း၊ ရေတံခါးများ ဆောင်ရွက်ခြင်းတို့ကို ဆက်လက်ဆောင်ရွက်ပေးသွားမှာဖြစ်ပါတယ်။ ဒုတိယသမ္မတကြီးဦးစီးတဲ့ ကရင်ပြည်နယ်ခရီးစဉ်မှာလည်း အလားတူစီမံဆောင်ရွက်ပေးခဲ့ပါတယ်''ဟု ရှင်းလင်းပြောကြားခဲ့ကြောင်း သိရှိရသည်။ မယ်သီတာ

ယခုတစ်ပတ် လက်ကျန်နည်းလာလို့ဈေးငြိမ်ပြီး မြေထောက်ပဲနဲ့ ထောပတ်ပဲ ရောင်းချနိုင်မှုလျော့                    ရန်ကုန်တိုင်းဒေသကြီး၊ဘုရင့်နောင်ကုန်စည်ဒိုင် FOB ဈေးကွက်မှာ မြေထောက်ပဲနဲ့ ထောပတ်ပဲ အရောင်းအဝယ်စာချုပ်နိုင်မှုဟာ သြဂုတ်လ ၅ ရက်မှ ၁၁ ရက်အတွင်း မြေထောက်ပဲ FAQ ၈၅ တန်၊ ထောပတ်ပဲ ၁၁ဝ တန်ကျော်၊ စာခုျပ်ရောင်းချနိုင်ခဲ့ပါတယ်။ ဈေးကွက်မှာ လက်ကျန်နည်းလာတာကြောင့် ယခင်အပတ်က မြေထောက်ပဲ တန် ၃ဝဝ ကျော်၊ ထောပတ်ပဲ တန် ၁၃ဝ ကျော် ထက် လျော့နည်းခဲ့ပါတယ်။                                           သြဂုတ် ၁၁ ရက်နေ့က မြေထောက်ပဲ FAQ တစ်တန် ကန်ဒေါ်လာ ၆၃ဝ- ၆၅ဝ၊ ထောပတ်ပဲ FAQ တစ်တန် ကန်ဒေါ်လာ ၇၅ဝ-၇၈ဝ ဖြစ်တာကြောင့် ယခင် အပတ်ဈေးအတိုင်း ဖြစ်နေတယ်လို့ သိရပါတယ်။ MIRT - MAPT 

ဈေးအေးသော်လည်း အရောင်းသွက်တဲ့ မုံရွာပဲတီစိမ်း                    သြဂုတ်လ ဒုတိယပတ် မုံရွာကုန်စည်ဒိုင် ပဲတီစိမ်းကြီး ဈေးကွက်မှာ နယ်စုံက ပဲသစ်တွေ ဝင်လာသလို အရောင်းလည်းသွက်ခဲ့ပါတယ်။ အဟောင်းသမားတွေလည်း ငွေလိုလို့ ထုတ်ရောင်းခဲ့ကြတဲ့အတွက် ယခုတစ်ပတ်အတွင်း ပဲတီအဟောင်း၊ အသစ်အရောင်းအဝယ်ဖြစ်ခဲ့ရာ မုံရွာကုန်စည်ဒိုင်မှာ တစ်ရက်လျှင် အိတ် ၅ဝဝ မှ ၁ဝဝဝ ကြားရှိခဲ့တယ်လို့သိရပါတယ်။ ပုံမှန်ဆွဲလက် မန္တလေးအပြင် ဈေးအချို ကြိုက်တဲ့ ရန်ကုန်ဝယ်လက်ပါဝယ်လို့ အခုလို အရောင်းအဝယ်သွက်ခြင်း ဖြစ်တယ် လို့ ကုန်သည်အသိုင်းအဝိုင်းက ဆိုပါတယ်။ ယခုအပတ်အတွင်း စိမ်းကြီး တစ်တင်း အမြင့်ဆုံး ၁၈၅ဝဝ ကျပ်မှ အနိမ့်ဆုံး ၁၆၅ဝဝ ကျပ်ထိ ပေါက်ခဲ့ပြီး စီးထွက်မှုအနေနဲ့ မန္တလေးကိုတင်း ၅ဝဝဝ ခန့်နဲ့ ရန်ကုန်ကို တင်း ၃ဝဝဝ ကျော်ရှိခဲ့တယ်လို့ ဈေးကွက် က ဆိုပါတယ်။ ထွန်းလှိုင်

နနွင်းအပို့လျော့                 ပင်လယ်ရေကြောင်းကုန်သွယ်မှုလမ်းကနေ သြဂုတ်လ ပထမပတ်အတွင်း နနွင်းတန်ချိန် ၃ဝ ကို စင်ကာပူနိုင်ငံကို တင်ပို့ခဲ့ပါတယ်။ ယခင်သီတင်းပတ် ၇၅ တန်တင်ပို့နိုင်ခဲ့တဲ့ နနွင်းက ဒီတစ်ပတ်မှာ အပို့လျော့ခဲ့ပါတယ်။ တစ်တန်ကို အက်ဖ် အိုဘီဈေးကန်ဒေါ်လာ ၁၈၈ဝ ဝန်းကျင်နဲ့ တင်ပို့နိုင်ခဲ့လို့ စုစုပေါင်းပို့ကုန်ဝင်ငွေ ကန်ဒေါ်လာ ငါးသောင်းခြောက်ထောင်ကျော် ရရှိခဲ့ပါတယ်။ MIRT (DOT)