Background
မြန်မာနိုင်ငံတွင် ရော်ဘာစိုက်ပျိုးမှုအနေဖြင့် ပြည်နယ်၊ တိုင်းဒေသအသီးသီးတွင် စိုက်ပျိုးလျက်ရှိပြီး စက်မှုကုန်ချော သီးနှံအနေနဲ့လည်း တစ်ပင်လုံးအသုံးဝင်သောအပင်ဖြစ်ပါတယ်။
ပင်လယ်ရေကြောင်းကုန်သွယ်မှုမှ ဇူလိုင်လ ၂၈ ရက်မှ သြဂုတ်လ ၃ ရက်ထိ ကာလအတွင်းမှာ ရော်ဘာ ၄၈၆ တန်ကျော် ကိုရီးယားနိုင်ငံနဲ့ စင်္ကာပူနိုင်ငံကိုတင်ပို့နိုင်ခဲ့ပါ တယ်။ တန်ဖိုးအားဖြင့် ကန်ဒေါ်လာ ၁ ဒသမ ၀၄၇ သန်းဖိုး ရရှိခဲ့ပါတယ်။ ကိုရီးယားနိုင်ငံကို MSR-20 ၂၈၅ တန်ခန့်နဲ့ စင်္ကာပူနိုင်ငံကို MSR-20 ၂၀၂ တန်ခန့်တင်ပို့ခဲ့ပါတယ်။ ယခင်အပတ်က ရော်ဘာတင်ပို့မှုမရှိခဲ့ပါဘူး။ ယမန်နှစ်က ကိုရီးယားနိုင်ငံကို ရော်ဘာအပို့ရှိခဲ့သော်လည်း ယခုနှစ်မှာ ပထမဦးဆုံးအကြိမ်တင်ပို့ခြင်းဖြစ်ပါတယ်။
မြန်မာ-တရုတ်နယ်စပ်ရှိ မူဆယ် ၁၀၅ မိုင် ကူးသန်းရောင်းဝယ်ရေးဇုန်၊ ချင်းရွှေဟော်နဲ့ လွယ်ဂျယ်တို့မှ ကန်ဒေါ်လာ ၅ ဒသမ ၄၄၅ သန်းတန်ဖိုးရှိ ပြောင်းဖူးစေ့ တန်ချိန် ၁၅၁၆၂ တန်ကျော်ကို ဇူလိုင်လ ၃၁ ရက်မှ သြဂုတ်လ ၆ ရက်တာကာလအတွင်း တင်ပို့နိုင်ခဲ့ပါတယ်။
ရှမ်းပြည်နယ်တောင်ပိုင်း၊ လဲချားကုန်စည်ဒိုင်မှ သြဂုတ် လဆန်းက ခရမ်းစွဲကြက်သွန်ဖြူအမြိတ်ပါ တစ်ပိဿာ ကို ၁၈၀၀ ကျပ်ရှိခဲ့ရာက သြဂုတ်လ ဒုတိယအပတ်အစမှာတော့ အမြိတ်ပါ တစ်ပိဿာကို ၂၁၀၀ ကျပ်ထိ ရှိခဲ့ ကြောင်း သိရ ပါတယ်။
အခုတလော ပခုက္ကူကြက်သွန်နီဈေးကွက်ဟာ တက်ရိပ် ပြနေတာကိုတွေ့ရပါတယ်။ ထိပ်စ တစ်ပိဿာ ၆၀၀ ကျပ်၊ အလတ်စ တစ်ပိဿာ ၅၅၀ ကျပ်၊ အောက်စတစ်ပိဿာ ၅၂၅ ကျပ်များနဲ့ ကုန်စည်ဒိုင်မှာ အရောင်း အဝယ်ဖြစ်နေပါ တယ်။ အဝင်တွေအနေနဲ့ နေ့စဉ်ပိဿာချိန် ၂ သောင်းကျော်မှ ၁ သိန်းကျော်ကြား အဝင်ရှိနေပါတယ်။
ဟိုပုံးနနွင်းကိုတော့ ချင်းဝယ်ယူနေတဲ့ လှောင်လက် သမားတွေက ဈေးမေးပေမယ့် များများစားစားဝယ်ယူမှုတော့ မရှိသေးပါဘူး။ ဟင်းခတ်ဖို့ရယ်၊ ပရဆေးဖော်ဖို့အတွက်ရယ် သာအဓိက ဝယ်ယူမှုရှိနေတာကြောင့် သူကလဲ အများကြီး မဟုတ်တောင်၊ တစိမ့်စိမ့်နဲ့တော့ ရောင်းဖြစ်နေပါတယ်။
ပြည်ပကို ဇူလိုင်လ ၂၈ ရက်မှ သြဂုတ်လ ၃ ရက်နေ့တာ ကာလအတွင်း နနွင်း ၇၆ ဒသမ ၅ တန်ကို ပင်လယ်ရေ ကြောင်း ကုန်သွယ်မှုလမ်းမှ တင်ပို့ခဲ့ပါတယ်။ ဒီတစ်ပတ်တင်ပို့ ခဲ့တဲ့ နိုင်ငံနဲ့ တန်ချိန်တွေမှာ စင်ကာပူနိုင်ငံကို ၁၆ ဒသမ ၅ တန်နဲ့ မလေးရှားနိုင်ငံကို တန်ချိန် ၆၀ တို့ဖြစ်ပါတယ်။
ပြည်ပကို ဇူလိုင်လ ၂၈ ရက်မှ သြဂုတ်လ ၃ ရက်နေ့တာ ကာလအတွင်း မန်ကျည်းတန်ချိန် ၄၉ ဒသမ ၉၈ တန်ကို ပင်လယ်ရေကြောင်းကုန်သွယ်မှုလမ်းမှ တင်ပို့ခဲ့ပါတယ်။ ဒီတစ်ပတ်တင်ပို့ခဲ့တဲ့ နိုင်ငံက မလေးရှားနိုင်ငံကိုသာ တင်ပို့နိုင်ခဲ့တာ တွေ့ရပါတယ်။
ဒီတစ်ပတ်လည်း ချင်းက အဝယ်လိုက်နေပါတယ်။ အိန္ဒိယ၊ ဘင်္ဂလားဒေ့ရှ်စတဲ့ နိုင်ငံကို တင်ပို့ဖို့အတွက် တမူးနဲ့ တောင်ကုတ်လှောင်လက်တွေကတော့ ဝယ်နေတုံး ပါပဲ။ တချို့ ဝယ်လက်တွေကတော့ ဒီထက် ဈေးကောင်း လာရင်ဆိုတဲ့ မျှော်လင့် ချက်နဲ့ဝယ်ပြီး၊ လှောင်ကြတယ်လို့လည်း သိရပါတယ်။
တောင်ကြီးနဲ့ အောင်ပန်းဈေးကွက်မှ ချင်း(ဥမ)များ ယခုတစ်ပတ်ပြည်ဈေး ကွက်ကို ပိဿာ ၃၀ ဝင်အိတ် ၂၅၀ ခန့်နဲ့ ဝင်ရောက်မှုမှာ ယခင်အပတ်အတိုင်း ပုံမှန်အဝယ်ရှိနေပါတယ်။ အဝင်လည်း ပုံမှန်၊ ဈေးလည်း ပုံမှန်နဲ့ ယခင်ပတ် ဈေး အတိုင်းချင်း(ဥမ)(ရှယ်)တစ်ပိဿာကို ၁၂၀၀ ကျပ်၊ (ဂျွန်) ၁၁၀၀ ကျပ်တို့နဲ့ ဈေးငြိမ် နေပြီး၊ အရောင်းအဝယ်မှာ တစ်နေ့ကို ပိဿာချိန် ၈၀၀ ခန့်နဲ့ ယခုတစ်ပတ်အတွင်း အရောင်းအဝယ်လည်း ပုံမှန်ဖြစ်နေပါတယ်။ ရခိုင်ပြည်နယ်နဲ့ ဧရာဝတီတိုင်းဒေသ ကြီး စားသုံးမှုအဖြစ် ဈေးကွက်မှတစ်ဆင့် တစ်ရက်ကို ပိဿာချိန် ၃၅၀ ခန့် တင်ပို့မှု ရှိကြောင်း သိရပါတယ်။ဝင်းဝင်းခိုင် - ပြည်