ယခုတစ်ပတ် ပြည်ပဲဈေးကွက်မှာ ပဲတီစိမ်းသီးနှံများမှာ ပဲအဝင်မရှိတော့ဘဲ ပွဲရုံတိုင်းမှာလည်း လက်ကျန်အသင့်အတင့်သာရှိခဲ့တာကို တွေ့ရပါတယ်။ လိုင်း သမားများ အဝယ်မရှိတော့သလောက်ဖြစ်ခဲ့ပြီး၊ စက်တင်ဘာလအတွင်းမှာ မျိုးပဲဝယ် ယူသူများရှိခဲ့ပါတယ်။ မျိုးပဲဈေးမှာ တစ်တင်း ၁၆၅၀၀ ကျပ်နဲ့ အရောင်းအဝယ် ဖြစ်ခဲ့ကြတာကို တွေ့ရပါတယ်။ ယခင်နှစ်က မျိုးပဲဈေးနှုန်းမှာ တစ်တင်း ၁၇၀၀၀ ကျပ်နဲ့ ရောင်းဝယ်ခဲ့ကြတဲ့အတွက် ယခုနှစ်မျိုးဈေး နဲ့ သိပ်ကွာခြားမှုမရှိဘဲ အရောင်း အဝယ်ဖြစ်ခဲ့သလို လက်လီသမားများကတော့ တစ်တင်း ၁၆၀၀၀ ကျပ်သာ ဈေးပေး အဝယ်ရှိပြီး၊ တစ်ရက်အိတ် ၅၀ ခန့်သာ အရောင်းအဝယ်အေးလျက်ရှိတယ်လို့ ပွဲရုံရပ်ကွက်က သိရပါတယ်။ ရန်ကုန်ဝယ်လက် အဝယ်ရှိတဲ့ရက်တွင် အိတ် ၂၀၀ ကျော်ရောင်းချနိုင်တယ်လို့ သိရပါတယ်။                  ခင်ဆွေဝင်း-ပြည်

အောက်တိုဘာလ ၃ ရက်မှ ၉ ရက်ထိကာလအတွင်းမှာ ကန်ဒေါ်လာသုည ဒသမ ၀၁၀ သန်းတန်ဖိုးရှိ ပဲလွန်းဖြူ ၁၄၇ တန်ကျော်ကို မြဝတီနယ်စပ်မှ အပို့ရှိ ခဲ့တယ်လို့သိရပါတယ်။ စက်တင်ဘာတစ်လလုံး နယ်စပ်မှ ပဲလွန်းဖြူအပို့နားနေပြီး ယခုအောက်တိုဘာလဆန်းပိုင်းမှာ မြဝတီနယ်စပ်မှ ပြန်လည်တင်ပို့မှုရှိတာဖြစ်ပါ တယ်။                    MIRT(DOBT)

မူဆယ် ၁၀၅ မိုင်ကုန်သွယ်ရေးဇုန်မှ အောက်တိုဘာ ၃ ရက်မှ ၉ ရက်ထိ ကာလ အတွင်းမှာ ကန်ဒေါ်လာ သုညဒသမ ၁၀၅ သန်းတန်ဖိုးရှိ ပဲတီစိမ်း ၁၂၅ တန်နဲ့ ကန်ဒေါ်လာသုညဒသမ ၀၈၄ သန်းတန်ဖိုးရှိ ပဲတီစိမ်းလုံးခြမ်း ၈၀ ဒသမ ၃၅၀ တန်အပို့ရှိခဲ့ပါတယ်။ ယခင်အပတ်ကထက် ပဲတီစိမ်းလုံးပြည့် ၂၈၂ တန်နဲ့ ပဲတီစိမ်းလုံးခြမ်း ၁၂၃ တန်အပို့လျော့ခဲ့တယ်လို့သိရပါတယ်။ ကုန်စည်ဒိုင်ဈေးနှုန်း ကြော်ငြာလွှာအရ မိမိဖက် မြေပြင်ဈေးသာ အနည်းငယ်ကျပြီး တစ်ဖက်နိုင်ငံဈေး ပြောင်းလဲမှု မရှိတာတွေ့ရပါတယ် -

ပခုက္ကူကုန်စည်ဒိုင်ရဲ့ ၂၀၁၂ ခုနှစ် စက်တင်ဘာလအတွင်း ကုန်စီးဆင်းမှုမှာ ရန်ကုန်ကို ပဲစင်းငုံ ၅၅၅၂ အိတ်၊ ပဲတီစိမ်း ၃၂၂၅ အိတ်၊ နှမ်းမျိုးစုံ ၇၄၀၄ အိတ်၊ စားတော်ပဲ ၇၄၉ အိတ်၊ ပဲနီပြား ၂၃၀ အိတ်၊ ပဲယင်း ၈၃၀ အိတ် စီးဆင်း တယ်လို့ သိရပါတယ်။ ကုန်စည်ဒိုင်မှာ နေ့စဉ်အရောင်းအဝယ်ဖြစ်နေတာကတော့ ပဲစင်းငုံပါ အရောင်းအဝယ် ဖြစ်တယ် ဆိုပေမဲ့ ဈေးအနေနဲ့ ကျဈေးလို့ပဲပြောရမှာပါ။ အောက်တိုဘာ ၇ ရက်နေ့မှာ တစ်ပိဿာကို ၉၀၅ ကျပ်၊ တစ်တင်း ၁၈၁၀၀ ကျပ်နဲ့ အိတ် ၃၀၀၊ ၉ ရက်နေ့မှာ တစ်ပိဿာ ၉၀၀ ကျပ်၊ တစ်တင်း ၁၈၀၀၀ ကျပ်နဲ့ အိတ် ၁၅၀၊ ၁၀ ရက်နေ့မှာ တစ်ပိဿာကို ၉၁၀ ကျပ်၊ တစ်တင်း ၁၈၂၀၀ ကျပ်နဲ့ ၂၀၀ အိတ်၊ ၁၁ ရက်နေ့မှာ တစ်ပိဿာ ၉၃၀ ကျပ်၊ တစ်တင်း ၁၈၆၀၀ ကျပ်နဲ့ အိတ် ၁၀၀၊ ၁၂ ရက်နေ့မှာ တစ်ပိဿာ ၉၂၀ ကျပ်၊ တစတင်း ၁၈၄၀၀ ကျပ်နဲ့ အိတ် ၅၇၀ အရောင်းအဝယ်ဖြစ်ပါတယ်။ ပဲစင်းငုံတစ်တင်းကို ၂၂၄၀၀ ကျပ်ကနေ ၁၇၅၀၀ ကျပ်ထိ ဆင်းနေတယ်ဆိုတော့ တစ်တင်းအပေါ်မှာ ၄၀၀၀ ကျော် ၅၀၀၀ နီးပါး အရှုံးပေါ်နိုင်တော့ ထိတဲ့သူတွေ ထိနေကြပြီဖြစ်ပါတယ်။ ကြားရက်တွေမှာ ပဲတီစိမ်းသေး ၇ ရက်နေ့မှာ တစ်ပိဿာ ၁၀၄၂ ကျပ်၊ တစ်တင်း ၁၉၈၀၀ ကျပ်၊ ၉ ရက်နေ့မှာ တစ်ပိဿာ ၁၀၆၈ ကျပ်၊ တစ်တင်း ၂၀၃၀၀ ကျပ် အရောင်းအဝယ်ဖြစ်ခဲ့ပါသေးတယ်။ အရောင်းအဝယ်ရဲ့ သဘောက မြတ်မယ်ရှုံးမယ်ဆိုတာ သဘာဝတရားပါ ရောင်းလိုအား ဝယ်လိုအား ပစ္စည်းထွက်ရှိမှုဆိုတာတွေကြောင့် အရှုံးအမြတ်သဘောရှိနေမှာပါ။ ဒါပေမဲ့ လောဘဇောနဲ့ ဖြစ်နိုင်ခြေရှိတာကို တွက်ချက်ခန့်မှန်းရင်း အရောင်းအဝယ်ရေစီးကြောင်းထဲကနေ နွံနစ်ပြီး အရောင်းအဝယ် မြောင်းပုပ်ထဲ ကျသွားမှာကိုတော့ သတိထားသင့်ကြောင်းပါ။                                   မြင့်ဦး - ပခုက္ကူ