Background
ပဲခူးတိုင်းဒေသကြီး ပြည်၊ ပေါက်ခေါင်း၊ ပန်းတောင်းမြို့နယ်များမှာ မိုးပဲတီစိမ်း သီးနှံကို အများဆုံးစိုက်ပျိုးကြပြီး ဇွန်လကုန်၊ ဇူလိုင်လဆန်းမှာ ဈေးကွက်အတွင်းသို့ စတင်ဝင်ရောက်နိုင်တယ်လို့သိရပါတယ်။ ယခုပြည်ဈေးကွက်မှာ လက်ကျန်ပဲတီစိမ်း များ တစ်ခါတစ်ရံ အရောင်းအဝယ်ဖြစ်ခဲ့ကြပါတယ်။ ရန်ကုန်ဝယ်လက်များမှ တစ်ခါ ဝယ်ရင် အိတ် ၂၀၀ ကျော် ၃၀၀ အထိဝယ်ယူကြပြီး ပဲဈေးမှာတစ်တင်း ၁၅၅၀၀ ကျပ်ဖြင့် ရောင်းဝယ်ခဲ့ကြပေမဲ့ ယခုနှစ် ပဲတီစိမ်းသစ် စပေါ်ချိန်မှာ ပဲဟောင်းဈေးကို အမှီလိုက်နိုင်မလားဆိုတာ ပဲစိုက်တောင်သူများ စောင့်မျှော်နေကြောင်း သိရှိရပါ တယ်။ခင်ဆွေဝင်း
အိန္ဒိယပြည်တွင်းဈေးကွက်တွေကို နွေပဲတီစိမ်းသစ်များ တစ်ရက်အိတ် ၃၀၀၀ ထိ တိုးလာတဲ့တိုင် ပဲတီစိမ်းခွဲခြမ်းဈေးတော့ တည်ငြိမ်နေပါတယ်။ မိုးပဲများလည်း စိုက်ပျိုးနေပြီဖြစ်ပြီး ဂူဂျာရတ်မှ တောင်သူများမှာ ဝါဂွမ်းအစား ဈေးပိုရတဲ့ မိုးပဲများ ပြောင်းလဲ စိုက်ပျိုးလာနိုင်တယ်လို့ သိရပါတယ်။
မြန်မာ-တရုတ်နယ်စပ်ရှိ မူဆယ် ၁၀၅ မိုင်မှ ကန်ဒေါ်လာ ၂ ဒသမ ၀၉၈ သန်း တန်ဖိုးရှိ ပဲတီစိမ်း ၃၁၂၃ တန်ကျော်ကို မေ ၃၀ ရက်မှ ဇွန် ၅ ရက်အတွင်း မှာ အပို့ရှိခဲ့ပါတယ်။ ယခင်အပတ်ကထက် ၇၆၇ တန်ကျော် တင်ပို့မှု ပိုမိုခဲ့ပါတယ်။ယခုအပတ် မိမိဘက်မြေပြင်ဈေးမှာ ကျပ် ၆၉၃၃၀၃ ကျပ်ရှိပြီး ယခင် အပတ်က ထက် ၄၉၉၄ ကျပ် လျော့နည်းခဲ့ပါတယ်။ တစ်ဘက်နိုင်ငံ ဈေးကတော့ ယခင် အပတ်ကထက် ၃ ဒေါ်လာခန့် လျော့နည်းခဲ့ပြီး ၈၄၁ ဒေါ်လာ ပေါက်လျက်ရှိပါ တယ်။ MIRT(DOBT)
ရန်ကုန်တိုင်းဒေသကြီး ဘုရင့်နောင်ကုန်စည်ဒိုင် FOB ဈေးကွက်မှာ ပဲတီစိမ်း အရောင်းအဝယ် ပိုမိုလျော့ကျလာခဲ့ပါတယ်။ အိန္ဒိယမှာ နွေပဲတီစိမ်းအသစ်တွေ ဝင်လာနေပြီဖြစ်လို့ ဝယ်လိုအားပါးလာတာကြောင့် တရုတ်နိုင်ငံနဲ့ အခြားနိုင်ငံ အချို့ကို တင်ပို့ဖို့ အရောင်းအဝယ်အနည်းငယ်သာဖြစ်ကြောင်း သိရပါတယ်။
ပင်လယ်ရေကြောင်းက ပဲတီစိမ်းတင်ပို့မှုကတော့ ယခင်တစ်ပတ်ထက် အနည်း ငယ်လျော့ကျပါတယ်။ ယခင်တစ်ပတ်က တန် ၉၀၀၀ ကျော်တင်ပို့မှုရှိပေမဲ့ မေလ ၂၈ ရက်မှ ဇွန် ၁ ရက်အထိမှာတော့ စုစုပေါင်း တန် ၈၀၀၀ ကျော်သာ လျော့ကျ တင်ပို့ခဲ့ပါတယ်။ မေလတစ်လလုံး တင်ပို့မှုအနေနဲ့ ပဲတီစိမ်းတန်ချိန် ၄၃၀၀၀ ကျော်ရှိပြီး ဧပြီလအတွင်းမှာ တန်ချိန် ၂၄၀၀၀ ခန့် တင်ပို့နိုင်ခဲ့ပါတယ်။ ၂၀၁၁ မေလ အတွင်းမှာတော့ တန်ချိန် နှစ်သောင်းကျော်သာ တင်ပို့နိုင်ခဲ့လို့ ယခုနှစ်မေလ ကာလတူမှာ ထက်ဝက်ကျော်ပိုမိုတင်ပို့နိုင်ခဲ့ပါတယ်။
ဒီတစ်ပတ် ပင်လယ်ရေကြောင်း ကပဲလွန်းဖြူတင်ပို့မှုနဲ့ FOB အရောင်း အဝယ်ပြန်ကောင်းလာခဲ့ပါတယ်။ယခင် တစ်ပတ်က တန်ချိန် ၁၄၅၀ ခန့်တင်ပို့မှု ရှိခဲ့ပြီး မေ ၂၈ ရက်မှ ဇွန် ၁ ရက် အထိ တစ်ပတ်အတွင်းမှာ ပဲလွန်းဖြူ တန်ချိန် ၁၆၀၀ ခန့် တင်ပို့နိုင်ခဲ့ကြောင်း သိရပါတယ်။ ယခုတစ်ပတ်တင်ပို့တဲ့ နိုင်ငံများကတော့ အိန္ဒိယ၊ ကိုရီးယား၊ မလေးရှား၊ စင်ကာပူနဲ့ ဗီယက်နမ်တို့ ဖြစ် ပါတယ်။
ယခင်နှစ် ဆောင်းရာသီမှာ အအေးလွန်ကဲခြင်းကြောင့် ပြည်တွင်းသီးနှံများ ပျက်စီးခဲ့တဲ့အတွက် ပြည်တွင်း စားသုံးမှု ဖြည့်ဆည်းဖို့ ပဲလိုအပ်ချက်ရဲ့ ၈၀ ရာခိုင်နှုန်းခန့် တင်သွင်းရဖွယ်ရှိတယ်လို့ ဇွန်လ ၃ ရက်နေ့မှာ ပဲတင်သွင်း သူများက ပြောကြားပါတယ်။ ယခင်နှစ် ဆောင်းရာသီက အအေးလွန်ကဲပြီး၊ ပဲသီးနှံရဲ့ ၈၀ ရာခိုင်နှုန်းဝန်းကျင် ပျက်စီးခဲ့လို့ ပြည်တွင်း ဝယ်လိုအား ပြည့်မီဖို့ ယခုအခါ တင်သွင်းရမယ်လို့ ပဲတင်သွင်းသူများခေါင်းဆောင် Anis Majeed မှ ပြောကြားပါတယ်။
အိန္ဒိယပြည်တွင်းဈေးကွက်အတွင်းမှာ ရူပီးတန်ဖိုးကျဆင်းလို့ တင်သွင်းပဲ ဈေးကြီးမြင့်တဲ့အတွက် ပဲစင်းငုံဈေးလည်း ယခုတစ်ပတ်ဆက်လက်မြင့် တက် နေပါ တယ်။ ပြည်တွင်းပဲစင်းငုံလက်ကျန်နည်းနေတာကြောင့် ပြည်ပပဲစင်းငုံများ ဆက် တိုက်တင်သွင်းလျက်ရှိရာမှာ ရူပီးတန်ဖိုးကျဆင်းနေတဲ့အတွက် တင်သွင်းပဲဈေး မြင့်တက် လာတာဖြစ်ပါတယ်။
ရန်ကုန်တိုင်းဒေသကြီး ဘုရင့်နောင်ကုန်စည်ဒိုင် FOB ဈေးကွက်မှာ ပဲစင်းငုံ ရောင်းဝယ်မှု အားကောင်း နေပါတယ်။ ဇွန် ၁ ရက်မှ ၇ ရက်အထိ ပဲစင်းငုံအနီနဲ့ ဖြူနီစုစုပေါင်း တန်ချိန် ၁၂၀၀၀ နီးပါး အရောင်းအဝယ် ဖြစ်ခဲ့ပါတယ်။ FOB ဈေးကွက်မှာ အိန္ဒိယဝယ်လက်များ ဝယ်လို အားကောင်းနေဆဲဖြစ်ပြီး ပြည်တွင်း ရောင်းလက်များ ဈေးအနိမ့်နဲ့ ရောင်းချမှု အားသိပ်မကောင်းတဲ့ အတွက် အရောင်း အဝယ်ဖြစ်ပေမဲ့ FOB ဈေးတော့ အနည်းငယ် တိုးလာခဲ့ပါတယ်။
ပင်လယ်ရေကြောင်းက ပဲစင်းငုံတင်ပို့မှုမှာ ယခင်တစ်ပတ်ထက် ပိုမိုတိုးတက် လာခဲ့ပါတယ်။ ယခင်တစ်ပတ်က တန်ချိန် ၉၈၀၀ ကျော်တင်ပို့မှုရှိခဲ့ပြီး ယခုတစ်ပတ် (မေ ၂၈ - ဇွန် ၁ ရက်) အတွင်းမှာ တန်ချိန် ၁၄၀၀၀ ခန့်အထိ တင်ပို့မှုရှိခဲ့တယ်လို့ သိရပါတယ်။ ၂၀၁၂ မေလအတွင်းမှာလည်း ပဲစင်းငုံတန်ချိန် ၃၅၀၀၀ ကျော် တင်ပို့နိုင်ခဲ့ပြီး ဧပြီလအတွင်းမှာ တန်ချိန် ၁၄၅၀၀ ခန့်တင်ပို့မှုရှိခဲ့ပါတယ်။ ၂၀၁၁ မေလအတွင်းမှာလည်း ပဲစင်းငုံတန်ချိန် ၁၉၀၀၀ ကျော်သာတင်ပို့မှုရှိခဲ့လို့ ယခုနှစ် မေလမှာ ပိုမိုတင်ပို့မှုရှိခဲ့ပါတယ်။