ရော်ဘာဈေးနှုန်းတွေ ကျဆင်းနေရာ ကမ္ဘာ့ရော်ဘာထုတ်လုပ်မှုအများဆုံး ထိုင်းနိုင်ငံက ယခုနှစ်အတွင်း ရော်ဘာထုတ် လုပ်မှု ၃ ဒသမ ၅ ရာခိုင်နှုန်းလျှော့ချဖို့ ရည်ရွယ်နေကြောင်း သိရတယ်။ ထိုင်းနိုင်ငံက ၎င်းကိုယ်တိုင် ရော်ဘာထုတ်လုပ်မှု လျှော့ချမယ့်အပြင် အင်ဒိုနီးရှားနဲ့ မလေးရှားနိုင်ငံတို့ကိုလည်း ရော်ဘာထုတ်လုပ်မှုလျှော့ချဖို့ တိုက်တွန်းသွားမှာဖြစ်ကြောင်း၊ ဒါမှသာ ရော်ဘာဈေးနှုန်းပြန်လည်ဦးမော့လာမှာဖြစ်ကြောင်း ထိုင်းနိုင်ငံရော်ဘာလုပ်ငန်းမှ အရာထမ်းတွေက အောက်တိုဘာလ ၄ ရက်နေ့မှာ ပြောကြားခဲ့တယ်။              ၂၀၁၁ ခုနှစ် ၊ ဖေဖော်ဝါရီလအတွင်း ကမ္ဘာ့ရော်ဘာဈေးနှုန်းတွေက တစ်တန်ကို ကန်ဒေါ်လာ ၆၅၀၀ အထက်ထိ ရောက်ရှိ စံချိန်တင်ခဲ့သော်လည်း နောက်ပိုင်းတဖြည်းဖြည်းအားနည်းလာရာအောက်တိုဘာလဆန်းပိုင်းမှာ (ထိုင်း RSS-1) ဆိုရင် တစ်တန်ကို ဒေါ်လာ ၄၁၀၀ ဝန်းကျင် အထိ ကျဆင်းလာတယ်။ ကမ္ဘာ့စီးပွားရေး အခြေအနေအပေါ် စိုးရိမ်ပူပန်မှု တွေက ကုန်ကြမ်းပစ္စည်းတွေ ဝယ်လိုအားကိုကျဆင်းစေပြီး ရေနံအပါအဝင် အခြားကုန်စည်တွေ ဈေးကျဆင်းမှုနဲ့ အတူ ရော်ဘာဈေးနှုန်း တွေလည်း ကျဆင်းသွားခြင်းဖြစ်တယ်။                  ဒါကြောင့် ထိုင်းအစိုးရသစ်က ပြည်တွင်းရှိ ရော်ဘာထုတ်လုပ်သူတွေကို အပင်အိုတွေကိုခုတ်ပြီး အပင်သစ် စိုက်ပျိုးခြင်းကို တွန်းအားပေးဖို့ စီစဉ်နေခြင်းဖြစ်တယ်။ ရော်ဘာအပင်သစ် တစ်ပင်စိုက်ပျိုးပြီး ၇ နှစ်ကြာမှ အစေးထုတ်ယူ နိုင်ကြောင်း ၊ ယခုနှစ်မှ စပြီး နှစ်စဉ်ရော်ဘာတန်ချိန် ၁၂၀၀၀၀ လျှော့ချထုတ်လုပ်သွားဖို့ စီမံနေကြောင်း သိရတယ်။                   ဒါပေမဲ့ ၂၀၁၁ ခုနှစ် ၊ ထိုင်းနိုင်ငံရဲ့ ရော်ဘာထုတ်လုပ်မှုကို တန်ချိန် ၃ ဒသမ ၃၅ သန်းလို့ ခန့်မှန်းထားရာ ယခင်နှစ်က ထုတ်လုပ်မှု တန်ချိန် ၃ ဒသမ ၂၅ သန်းထက် ပိုမိုနေတယ်လို့ သိရတယ်။ ၂၀၁၁ ခုနှစ် အတွင်း အင်ဒိုနီးရှားရဲ့ ရော်ဘာထုတ် လုပ်မှုကိုလည်း တန်ချိန် ၂ ဒသမ ၉ သန်း ဝန်းကျင်ဖြစ်မယ်လို့ ခန့်မှန်းထားရာ ယခင်နှစ်ထုတ်လုပ်မှု တန်ချိန် ၂ ဒသမ ၇၄ သန်းထက် ပိုမိုနေကြောင်း သတင်းရရှိတယ်။ ပပ၊Source:theedgemalaysia.com

                      စိုက်ပျိုးစရိတ် အရင်းအနှီးကြီးသလို မျိုး၊ မြေနဲ့သွင်းအားစု ဖြည့်ဆည်းရာမှာ ခက်ခဲနက်နဲလွန်းပြီး ဈေးကွက်မှာ ပေါက်ဈေး အနိမ့်အမြင့်၊ အတက်အကျကြမ်းတဲ့အတွက် ယာသမား တိုင်း မစိုက်ရဲတဲ့သီးနှံကတော့ ကြက်သွန်နီ ဖြစ်ပါတယ်။ စိုက်ပျိုးရာမှာ မျိုးစေ့ပျိုးရာကနေ တူးဖော်ချိန်အထိ အချိန်တိုင်းနေ့ တိုင်း အရိပ်တကြည့်ကြည့်နဲ့ ကြည့်နေရသလို ရေလိုရင်ရေ၊ ဆေးလိုရင်ဆေး၊ မြေဆီလိုရင်မြေဆီ၊ ရာသီဥတုကိုကြည့်ပြီး အချိန်အဆ အတိုင်းအဆ မှန်မှန်ဖြည့်ဆည်းဖို့ အလိုအပ်ဆုံး သီးနှံပါ။                       ဒီလို မှော်ဆန်တဲ့ ကြက်သွန်နီက မုံရွာနယ်မှာ အစဉ်မပြတ်အားခဲစိုက်ကြတဲ့ မြေနဲ၊ မအူ၊မင်းရွာ၊ အောင်သာ၊ အက်တော၊ ကျွဲရဲနဲ့ပလ’င်ကုန်းနယ်က တောင်သူတွေဟာ လာမဲ့ ဆောင်းရာသီမှာ စောစောစိုက်နိုင်ဖို့ ယခုအခါ ပျိုးထောင်နေ ကြပြီ ဖြစ်ပါတယ်။ မြေနဲနဲ့မအူရွာကတောင်သူတွေကတော့ ဈေးကွက်မှာ လျော့လာတဲ့ ကြက်သွန် လက်ကျန်ကို ဖြည့်စွက်ဖို့ ကြက်သွန်နီတွေ ဧက ၁၀၀ ကျော်ထိပြီးခဲ့တဲ့ စက်တင်ဘာ လထဲက စိုက်ခဲ့ကြတယ်လို့ တောင်သူတွေကဆိုပါတယ်။ မုံရွာဈေးကွက်မှာတော့ ယနေ့ပွဲရုံသိမ်းဈေး အနိမ့်ဆုံး တစ်ပိဿာ ၅၀၀ ကျပ်မှ အမြင့်ဆုံး ၇၀၀ ကျပ်ထိ ပေါက်ခဲ့ပြီး၊ လက်လီဈေးကတော့ တစ်ပိဿာ အမြင့်ဆုံး ၉၀၀ ကျပ်၊ ၁၀၀၀ ကျပ်ပေါက်နေပါတယ်။ ယခုတစ်ပတ် အတွင်း မိုးအဆက်မပြတ်ရွာသွန်းနေလို့ မန်းတင်ပို့မှုမှာ ပိဿာ ၂၀၀၀၀ ခန့်သာရှိသလို လက်လီအဝယ်လည်း ပါးတယ်လို့ ပွဲရုံတန်းက ကြားသိရပါတယ်။                       တောင်သူကြီးတချို့နဲ့ ပွဲစားကုန်သည်တွေဆီမှာ လက်ကျန်ကြက်သွန်နီ ခပ်များများရှိသေးပေမဲ့ အညှောက် ထွက်စပြုလို့ အမြန်ထုတ်ရောင်းလိုကြတဲ့အတွက် ယခုလို ဈေးအေးခြင်းဖြစ်တယ်လို့ ပွဲစားတစ်ဦးကပြောပါတယ်။ ထွန်းလှိုင်

                  ရှမ်းနနွင်းကတော့ ခပ်အေးအေးသာ အရောင်းအဝယ်ဖြစ်ပါတယ်။ ပြီးခဲ့တဲ့လက တစ်လလုံးလိုလို အရောင်းအဝယ် မဖြစ်ခဲ့တဲ့ နနွင်းက ဒီလဆန်းမှာတော့ ပြည်တွင်းသုံးအတွက် ဈေးပတ်သမားတွေ ဝယ်လာလို့ အရောင်းအဝယ်နည်းနည်း ဖြစ်လာတယ်လို့ သိရပါတယ်။                 ဈေးကွက်မှာတော့ အမှုန့်ကြိတ်ဖို့နဲ့ ပရဆေးအတွက် အရည်အသွေးကောင်းတဲ့ နနွင်းကို ရွေးဝယ်ယူပြီး၊ ခြင်ဆေးခွေ အတွက်တော့ နနွင်းညံ့တွေ ဝယ်ယူနေကြပါတယ်။ ပြည်တွင်းသုံးဝယ်လက်တွေကတော့ ရန်ကုန်၊ မန္တလေး၊ မုံရွာ၊ တောင်ငူ၊ ပြည်စတဲ့မြို့တွေက အဓိကဝယ်ယူနေတယ်လို့လည်း ဒေသခံတွေထံက သိရပါတယ်။ ဒီတစ်ပတ် နနွင်းဈေးကတော့ နနွင်း (ကောင်း)ကတစ်ပိဿာ ၁၀၀၀ကျပ်မှ ၁၂၀၀ ကျပ်ဈေးရှိပြီး၊ နနွင်းညံ့ကတော့ တစ်ပိဿာ ၇၅၀ ကျပ်ဈေးရှိပါတယ်။ ဒီလဆန်း မှာတင် နနွင်းပိဿာချိန် ၂ ဒသမ ၉ သောင်းပိဿာ အရောင်းအဝယ်ဖြစ်ခဲ့တယ်လို့လည်း သိရပါတယ်။ ဧဧခိုင်