ပြည်ပဲဈေးကွက်အတွင်း မတ်ပဲ၊ ကုလားပဲ၊ ပဲစင်းငုံ၊ ပဲကြီးစသဖြင့် ပဲမျိုးစုံ သီးနှံများ အရောင်းအဝယ်ဖြစ်လျက် ရှိရာ ထောပတ်ပဲသီးနှံဟာလည်း တစ်ခုအပါ အဝင်ဖြစ်ပါတယ်။ ပြည်ဈေးကွက် သို့ ဖေဖော်ဝါရီနောက်ဆုံးပတ် မှစပြီး၊ ထောပတ်ပဲ သစ်များဝင်ရောက်လာခဲ့ပြီး၊ တစ်တင်း ၁၅၀၀၀ ကျပ်နဲ့ ဈေးဖွင့်ဝယ်ယူခဲ့ကြပါ တယ်။ ထောပတ်ပဲ ဟာ တိုင်းအတွင်း စားသုံးမှု ဖူလုံရုံသာရှိတာကြောင့် အခြားတိုင်းကို တင်ပို့နိုင်ခြင်းမရှိသလို တိုင်းအတွင်း အရောင်း အဝယ်ဖြစ်တဲ့ ပဲများဟာလည်း ဒေသတွင်းမှထွက်ရှိတဲ့ပဲများဖြစ်ပါတယ်။ ရွှေတောင်၊ ကျီးသဲမြို့နယ်များမှ အများဆုံး ဝင်ရောက်ခဲ့ပြီး၊ တစ်ရက်အိတ် ၁၀၀ ကျော် ဝင်ရောက်ခဲ့ပါတယ်။ လှောင်လက် သမားနဲ့ လက်လီသမားများအဝယ်ရှိတဲ့ အတွက် တစ်တင်း ၁၅၀၀၀ ကျပ်နဲ့ ဈေးငြိမ် အရောင်းအဝယ်ဖြစ်လျက်ရှိတယ်လို့သိရပါတယ်။ခင်ဆွေဝင်း-ပြည်

အိန္ဒိယနိုင်ငံတွင်းရှိ လက်ကားဈေးကွက်အချို့မှာ လာမယ့်သုံးလပတ်အတွင်း ပဲစင်းငုံဈေး ၁၀-၁၅ ရာခိုင်နှုန်း ကြားမြင့်တက်ပြီး တစ်တန် ရူပီး ၄၅၀၀၀-၅၀၀၀၀ အထိမြင့်တက်လာနိုင်ပါတယ်။ ပဲစင်းငုံအဓိက စိုက်ပျိုးထွက် ရှိတဲ့ ပြည်နယ်များမှာ မိုးခေါင်ခဲ့တဲ့အတွက် ယခုနှစ်မှာ ပဲစင်းငုံအထွက်လျော့ကျပြီး ဈေးတက်နိုင်တယ်လို့ ခန့်မှန်းကြ ပါ တယ်။ ပဲစင်းငုံအများဆုံးထွက်ရှိတဲ့ မဟာရာရှတ္တရာ၊ ကာနာတာကာ နဲ့ အန္ဒရာပရာဒေ့ရှ်ပြည်နယ်များမှာ ၂၀၁၂  ခုနှစ်က မိုးရာသီကာလမှာ မိုးခေါင်ပြီး စိုက်ပျိုးချိန်နောက်ကျခဲ့ရာ ပဲစင်းငုံအထွက် ၃၀ မှ ၄၀ ရာခိုင်နှုန်းကြား ကျဆင်း ခဲ့ရကြောင်း သိရပါတယ်။ လွန်ခဲ့တဲ့နှစ်က တစ်တန်ကို ၃၀၀၀၀-၃၂၀၀၀ ရူပီးကြား ရှိခဲ့တဲ့ ပဲစင်းငုံဈေးဟာ ယခုအခါ ၃၀-၃၅ ရာခိုင်နှုန်းထိမြင့်တက်လျက်ရှိပါတယ်။ ရာသီအစ ဒီဇင်ဘာလမှစပြီး ပဲစင်းငုံဈေးမှာ နေ့စဉ်မြင့် တက်လျက်ရှိပါတယ်။ ကာနာတာကာပြည်နယ်ရဲ့ ရာသီအစပဲစင်းငုံဈေးဟာ တစ်တန် ရူပီး ၃၇၀၀၀ ဝန်းကျင်ရှိပြီး လွန်ခဲ့တဲ့သီတင်းပတ်က တစ်တန်ကို ရူပီး ၄၂၀၀၀ ထိမြင့်တက်ခဲ့ပါ တယ်။ ဗဟိုအစိုးရမှ ပဲစင်းငုံတစ်ကွမ် တယ်ကို ရူပီး ၃၈၅၀ အထက် သတ်မှတ်ခဲ့ပြီး ပြည်နယ်အစိုးရမှ တစ်တန်ကို ရူပီး ၆၅၀ ထပ်မံပိုပေးမယ်လို့ ကြေညာ ခဲ့တဲ့အတွက် ဈေးကွက်အတွင်း ပဲစင်းငုံဈေးများ မြင့်တက်ခဲ့တာဖြစ်ပါတယ်။ ကာနာတာကာပြည် နယ်ရဲ့ ပဲစင်းငုံအဓိကစိုက် ပျိုးတဲ့ ဂူလ်ဘာဂမြို့မှာလည်း မိုးခေါင်မှုကြောင့် ပဲစင်းငုံ အထွက်နှုန်း ၄၀ ရာခိုင်နှုန်းထိ ကျဆင်းခဲ့ပြီး တန်ချိန် ၁၈၀၀၀၀ သာထွက်ရှိမယ်လို့ ခန့်မှန်းခဲ့ပါတယ်။ ဒါပေမဲ့ ပြည်နယ်စိုက်ပျိုးရေးဌာနက ယခုနှစ်အထွက်နှုန်းကို ၃၅၅၀၀၀ တန်ရှိမယ်လို့ ခန့်မှန်းပါတယ်။ အိန္ဒိယနိုင်ငံရဲ့ ပဲစင်းငုံအများဆုံးစိုက်ပျိုးထုတ်လုပ်တဲ့ မဟာရာရှတ္တရာပြည်နယ် မှာလည်း မိုးခေါင်တဲ့အခြေ အနေဖြစ်ပေါ်လျက်ရှိပါတယ်။ မိုးခေါင်ရေရှားခဲ့မှု ကြောင့်ပြည်နယ်တွင်း ပဲစင်းငုံအထွက်မှာ ၃၀ ရာခိုင်နှုန်းကျဆင်း ခဲ့ပါတယ်။ တစ် နိုင်ငံလုံးပဲစင်းငုံအထွက်နှုန်းမှာ မက်ထရစ်တန်ချိန် ၂ ဒသမ ၃ သန်းရှိရာ ပုံမှန် ထွက်ရှိနေကျအောက် ၁၅ ရာခိုင်နှုန်းကျဆင်းသွားနိုင်ကြောင်း ခန့်မှန်းပါတယ်။နှင်းပန်းဖြူ

မတ်လ ဒုတိယပတ် မုံရွာကုန်စည်ဒိုင် ပဲဈေးကွက်မှာ ပဲစင်းငုံ အဟောင်းFOB ရှိလို့ ဒိုင်အတွင်း တစ်ရက်အိတ် ၁၀၀၀ ခန့်နေ့စဉ် အဝယ်သွက်ခဲ့ပြီး၊ ငုံနီအသစ်ဈေးကွက်မှာ တော့ ပဲဟောင်းပဲသစ်လဲဖို့ ဒေသခံလှောင်လက်တွေ အဝယ်ရှိ ခဲ့တဲ့အတွက် တစ်ရက်အိတ် ၂၀၀၀ ဝန်းကျင်အရောင်းအဝယ် ဖြစ်ခဲ့တယ်လို့ သိရပါတယ်။ ယခုတစ်ပတ် ငုံနီတစ်တင်း ပဲ ဟောင်း ၁၉၀၀၀ ကျပ်၊ပဲသစ် ၂၀၁၀၀ ကျပ်မှ ၂၁၀၀၀ ကျပ် ထိပေါက်ဈေးဖြစ်ပေါ်ခဲ့ပြီး၊ စီးဆင်းမှုအနေနဲ့ မြင်းမူ ဆိပ်ကမ်း ကတစ်ဆင့်ရန်ကုန်ကို ငုံနီအိတ် ၃ သောင်းကျော် တင်ပို့ခဲ့ တယ်လို့ ကုန်စည်ဒိုင်ရပ်ကွက်က ကြားသိရပါတယ်။ ကုလားပဲ မျိုးစုံဈေးကွက်အနေနဲ့ ယခုအပတ်ထဲမှာ နယ်စုံက ကုလားပဲ များ ဒိုင်အဝယ်သွက်လာခဲ့သလို Export  အဝယ်မရှိပေမယ့် ဒေသလှောင်လက်ဝယ်လို အားကောင်း လို့ ဈေးအသင့်အတင့် မာနေတယ်လို့ ဆိုပါတယ်။ ယခုတစ်ပတ်မှာ V2 တစ်တင်း ၁၇၂၀၀ ကျပ်မှ ၁၇၇၀၀ ကျပ်၊ 929 တစ်တင်း ၁၇၁၀၀ ကျပ် မှ ၁၇၅၀၀ ကျပ်နဲ့ ထိုင်ဝမ်တစ်တင်း ၁၇၂၀၀ ကျပ်မှ ၁၇၅၀၀ ကျပ်အသီးသီးပေါက်ဈေးဖြစ်ခဲ့ကာ မုံရွာကုန်စည်ဒိုင် ဈေး ကွက်မှာ တစ်ရက်အိတ် ၂၀၀၀ အထက်နေ့စဉ် အရောင်း အဝယ်ဖြစ်ခဲ့တယ်လို့ ကုန်သည်ရပ်ကွက်က ဆိုပါတယ်။

၂၀၁၃ ခုနှစ်၊ မတ်လ ဒုတိယပတ် ပခုက္ကူ ကုန်စည်ဒိုင်မှာ အရောင်းအဝယ် ဖြစ်တဲ့ သီးနှံတွေကတော့ ပဲစင်းငုံနီ၊ ကုလားပဲဝါကြီး၊ ကုလားပဲဖြူကြီး၊ စွန် တာနီ၊ ပဲဇီးကွက်၊ ပဲယင်း(မြစ်ခြေ)၊ နှမ်းဖြူ၊နှမ်းနီ၊ နှမ်းညို၊ ဃဏ ပြောင်း၊ မန် ကျည်းသီးတောင့်၊ မန်ကျည်းဖတ်အစုံ အရောင်းအဝယ် ဖြစ်ပါတယ်။ ပဲစင်းငုံနီ တစ်ပိဿာ ၁၀၁၀ ကျပ်၊ တစ်တင်း ၂၀၂၀၀ ကျပ်ကနေတစ်ပိဿာ ၁၀၇၀ ကျပ်၊ တစ်တင်း ၂၁၄၀၀ ကျပ်ဆိုတော့ ဈေးမြောက်နေတယ်လို့ သုံးသပ်ရမှာ ပါ။ရန်ကုန်အော်ဒါလက်အောက် ဒေသ ခံ လှောင်လက်တွေ အပြိုင်ကျဲ အပြိုင် ဆွဲနေတဲ့သဘော ရှိပါတယ်။အချို့ဒေသ ခံ လှောင်လက်တွေ ၁၇၀၀၀ ကျပ် - ၁၇၅၀၀ ကျပ် တစ်ပတ်လည်ကနေ ၂၁၄၀၀ကျပ် ဆိုတော့သင့်ပြီဆိုပြီး လွှတ် ကြသလို ဆက်တက်မယ်ထင်လို့ ဆက် ဆွဲနေတဲ့သူတွေလည်း ရှိတယ်လို့ ကုန် စည်ရပ်ဝန်း သတင်းတွေအရ သိရပါ တယ်။ ဘယ်လိုပဲပြောရပြောရ တစ်နှစ် တာ အရောင်းအဝယ်ရဲ့ ဇာတ်ရှိန်မြင့် လေ့ရှိတဲ့ ဇွန်၊ဇူလိုင်လထိကတော့ ပဲစင်း ငုံ ဇာတ်လမ်း ဘယ်လမ်းနဲ့သွားမလဲ ဆို တာ စောင့်ကြည့်ရဦးမှာပါ။