မုတ်သုံမိုးက ပျမ်းမျှမိုးရေချိန်အောက်ကိုရောက်ရှိနေခြင်းဟာ နိုင်ငံရဲ့ ပဲထုတ်လုပ်မှုကို ထိခိုက်နိုင်တဲ့ စိုးရိမ်မှုတွေနဲ့အတူ ဥပုသ်လပွဲတော်နီးကပ်လာတဲ့ ကာလအတွင်း စားသုံးသူဝယ်လိုအား မြင့်တက်ဖွယ်ရှိခြင်း တို့ကြောင့် ဇွန်လ ၂၇ ရက် အိန္ဒိယ ကုလားပဲကြိုပွိုင့်ဈေးမြင့်တက်ခဲ့ပါတယ်။ NCDEX  မှာဇူလိုင် ကုလားပဲ စာချုပ်ဈေးက တစ်တန်ကို သုည ဒသမ ၈၄ ရာခိုင် နှုန်း မြင့်တက်ပြီး၊ ရူပီး ၄၃၁၅၀ (ကန်ဒေါ်လာ ၇၅၆)ဖြစ်ခဲ့ကြောင်း သိရပါတယ်။

    ပြည်တွင်းမှာ လက်ကျန်နည်းလာပြီဖြစ်တဲ့ ကုလားပဲကို ရောင်းဝယ်မှုရော ပြည်ပတင်ပို့မှုမှာ အနည်းငယ် သာရှိပါတယ်။ ယခင်တစ်ပတ်ကပင်လယ်ရေကြောင်း တင်ပို့မှုတန်ချိန် ၁၅၀၀ ရှိပြီး ယခုတစ်ပတ်မှာ တန်ချိန် တစ်သောင်းကျော်သာ တင်ပို့ နိုင်ကြောင်းတွေ့ရပါတယ်။ လက်ရှိဘဏ္ဍာနှစ် ဇွန် ၂၂ ရက်ထိ စုစုပေါင်း တင်ပို့ပြီးစီးမှုမှာ တန်ချိန် ၃၅၀၀၀ ကျော်ရှိပြီး ရရှိ တဲ့ ဝင်ငွေမှာ ကန်ဒေါ်လာ ၂၆ သန်းနီးပါးရရှိပါတယ်။ ယခင်ဘဏ္ဍာနှစ် ကာလတူမှာ တန်ချိန် ၂၅၀၀၀ ကျော်တင်ပို့ခြင်းမှ ကန်ဒေါ်လာ ၁၉ သန်းခန့်ရှိလို့ ယခုနှစ် ကာလတူမှာ တင်ပို့မှု ပမာဏရော ဝင်ငွေပါ ပိုမိုရရှိတာတွေ့ရပါတယ်။

    မြန်မာ-တရုတ်နယ်စပ်ရှိ မူဆယ် ၁၀၅ မိုင် ကုန်သွယ်ရေးဇုန်မှ ကန်ဒေါ်လာ ၂ ဒသမ ၈၁၁ သန်းတန်ဖိုးရှိ ပဲတီစိမ်း ၄၁၉၅ တန်ကို ဇွန်လ ၂၀ ရက်မှ ၂၆ ရက်ထိကာလအတွင်းမှာ တစ်ဖက်နိုင်ငံသို့ တင်ပို့နိုင်ခဲ့ပါတယ်။ ယခင်အပတ်တင်ပို့မှု နဲ့နှိုင်းယှဉ်လျှင် ၁၂၈၁ တန် ယခုအပတ်မှာ ပိုမိုတင်ပို့နိုင်ခဲ့ပါတယ်။ မိမိဘက်မြေပြင် ဈေးမြင့်တက်လျက်ရှိသော်လည်း တစ်ဘက်နိုင်ငံဈေး ပြောင်းလဲမှုမရှိပါဘူး။ ငွေလဲ နှုန်းကြောင့်သာ အနည်းငယ်လျော့နည်းခဲ့တာ ဖြစ်ပါတယ်-

    ပင်လယ်ရေကြောင်းက ပဲတီစိမ်းတင်ပို့မှုမှာ တန် ၃၀၀၀ အောက်မှာ မှန်မှန်သာ တင်ပို့နေပါတယ်။ ယခင်တစ်ပတ်က တန်ချိန် ၂၃၀၀ ကျော်တင်ပို့ခဲ့ပြီး ယခုတစ်ပတ် ဇွန် ၁၈ ရက်မှ ၂၂ ရက်အတွင်းမှာတော့ တန်ချိန် ၂၉၀၀ ကျော် တင်ပို့မှုရှိခဲ့ကြောင်း သိရပါတယ်။ ပြည်ပဝယ်လက်အနည်းငယ်သာရှိတဲ့အတွက် တင်ပို့မှုမှာလည်း နည်း နေတာဖြစ်ပါတယ်။