မုံရွာကုန်စည်ဒိုင် ဒုတိယပတ် ပဲဈေးကွက်မှာ တရုတ်လက် ဝယ် လို အားကောင်းတဲ့ ပဲတီစိမ်းတစ်မျိုးသာ ဈေးမာနေခဲ့ပြီး၊ ကျန်ပဲအများစု ဈေး အေး ခဲ့တာတွေ့ရပါတယ်။ ကုလားပဲမျိုး စုံ ဈေးကွက်မှာတော့ လှောင်လက် သမားတွေ ဈေးအနည်းငယ် ဆွဲတင် ခဲ့လို့ ကုလားပဲထိုင်ဝမ်ဟာ တစ်တင်း ၁၄၂၀၀ ကျပ်မှ၁၄၇၀၀ ကျပ်၊ V2 တစ် တင်း ၁၅၅၀၀ ကျပ်မှ  ၁၅၇၀၀ ကျပ် နဲ့ 929 တစ်တင်း ၁၄၅၀၀ ကျပ်ကနေ ၁၅၀၀၀ ကျပ် အသီးသီးဈေးမြင့်လာပြီး၊ ကုလားပဲ ရိုးရိုးကတော့ တစ်တင်း ၁၄၀၀၀ ကျပ်မှာ ငြိမ်နေတာတွေ့ရပါ တယ်။

ပြီးခဲ့တဲ့နှစ် ဆောင်းကြက်သွန်နီဈေးကွက်မှာ ပေါ်ကာစ တစ်ပိဿာ ၃၀၀ ကျပ်ဝန်းကျင်မှ ယနေ့ လက်ကျန် ပြတ်ချိန် တစ်ပိဿာ ၇၅၀ ကျပ်၊ ၈၀၀ ကျပ်ဝန်းကျင် ဈေးရခဲ့တာ ကြောင့် စားသုံးသူတွေအတွက် ဝန်ထုတ်ဝန်ပိုး မဖြစ်စေခဲ့ပဲ စိုက်ပျိုးသူတွေသာ အကျိုးရှိခဲ့တာတွေ့ရပါတယ်။ ဒါကြောင့် လည်း မုံရွာခရိုင်က ဈေးကွက် မျှော်လင့်ချက် နဲ့ စိုက်ဧက ၁၃၀၀၀ ထက်ကျော်လွန်စိုက်ပျိုးခဲ့ကြကာ မှန်းချက်ကိုက်ခဲ့ တယ်လို့ ဆိုရမှာပါ။

မြိတ်မြို့နယ်အတွင်း ရော်ဘာအစေးခြစ် ရာသီချိန်ဖြစ်တဲ့ ပွင့်လင်းရာသီချိန်ရောက်မှရော်ဘာဈေး ရုတ်တရက် ကျဆင်း သွားပါတယ်။ ရော်ဘာခြံရှင်များအနေနဲ့ ယခုလို ရော်ဘာဈေး ရုတ်တရက်ကျဆင်းသွားပေမဲ့လည်း ရော်ဘာ အစေးခြစ် ထုတ်လုပ်မှုမှာ ယခင်အတိုင်းပဲ ပုံမှန်ဆောင်ရွက်လျက်ရှိတာ ကို သိရပါတယ်။

ရှမ်းပြည်နယ်တောင်ပိုင်းရှိ ဒေသအလိုက်ထွက်ရှိတဲ့ပြောင်းများမှာ ဈေးကွက် အတွင်းပုံမှန်အရောင်းအဝယ်ဖြစ်လျက် ရှိပါတယ်။ ပြီးခဲ့တဲ့ နိုဝင်ဘာလအတွင်း  တောင်ကြီးမှာပိဿာချိန် ၂၀ သိန်းခန့်၊ ရပ်စောက်မှာ ပိဿာချိန် ၂၇ သိန်း၊ နမ့်စန်မှာ ပိဿာချိန် ၁၀ သိန်းခန့်၊ လဲချားမှာပိဿာချိန် သုညဒသမ ၇၈ သိန်း၊ လားရှိုးမှာ ပိဿာချိန် သိန်း ၂၀ ကျော်ခန့် အရောင်းအဝယ်ဖြစ်ခဲ့ပါတယ်။ နိုဝင် ဘာလအတွင်းဖြစ်ပေါ်ခဲ့သော ပြောင်းတစ်ပိဿာ နိမ့်မြင့်ဈေးများကတော့ တောင်ကြီးမှာ ၃၅၀ ကျပ်၊ ၃၅၅ ကျပ်၊ လဲချားမှာ ၃၃၀ ကျပ်မှ ၃၆၀ ကျပ်၊ နမ့်စန်မှာ ၃၅၀ ကျပ်၊ လားရှိုးမှာ ၄၁၀ ကျပ်၊ ၄၂၀ ကျပ်၊ မူဆယ်မှာ ၄၅၈ ကျပ်၊ ၄၆၅ ကျပ်၊ ရွှေလီမှာ ၄၉၀ ကျပ်၊ ၄၉၈ ကျပ်ဈေးဖြစ်ပေါ်ခဲ့ပါတယ်။ နိုဝင်ဘာလ အတွင်း ပြောင်းရောင်းဝယ်မှုမှာ လက်လွှဲရောင်းချခြင်းသာ အဓိက ရောင်းဝယ်ခဲ့ပြီး၊ ပြည်နယ်အတွင်းနဲ့ ရန်ကုန်၊ မန္တလေးတိုင်းဒေသကြီးများရှိ အစာစပ်လုပ်ငန်းများမှ လည်း အဝယ်ရှိကြောင်း သိရပါတယ်။ ဒီဇင်ဘာလ ပထမအပတ်အတွင်း ပြောင်း ရောင်းဝယ်မှုမှာ တောင်ကြီးမှပိဿာချိန် ၆ သိန်းခန့်၊ ရပ်စောက်မှ ၄ ဒသမ ၅ သိန်း၊ လဲချားမှာ ၁ သိန်းခန့်၊ နမ့်စန်မှာ ၁ ဒသမ ၅ သိန်းခန့်၊ လားရှိုးမှာ ၈သိန်းခန့် အရောင်းအဝယ်ဖြစ်ခဲ့ပါတယ်။ ယခုတစ်ပတ်ပြောင်းတစ်ပိဿာပေါက်ဈေး များကတော့ တောင်ကြီးမှာ ၃၅၀ ကျပ်၊ ရပ်စောက် ၃၅၀ ကျပ်၊ နမ့်စန် ၃၅၀ ကျပ်၊ လဲချား ၃၃၀ ကျပ်၊ ၃၅၀ ကျပ်၊ လားရှိုး ၄၁၅ ကျပ်၊ မူဆယ် ၄၆၀ ကျပ်၊ ရွှေလီ ၄၉၃ ကျပ် ပေါက်ဈေးရှိကြောင်း သိရပါတယ်။    သန်းတိုး-တောင်ကြီး