ချင်းပြန်စိုက်ချိန်နီးလို့ ရှမ်းချင်းဈေးကွက်ကို ချင်းဥမအဝင်များ                ရှမ်းပြည်နယ်တောင်ပိုင်းမှာ ချင်းသီးနံှကိုနှစ်စဉ်ဧက ၇ဝဝဝ ကျော်စိုက်ပျိုးပါတယ်။ စိုက်ဧကရဲ့တတိယအများ ဆုံးစိုက်တဲ့မြို့နယ်ကနမ့်ဆန်မြို့နယ်ဖြစ်ပါတယ်။ နမ့်ဆန်ကလည်း ကလော၊ အောင်ပန်းဒေသတွေလိုပဲ ချင်း(ဥမ) ကိုပြန်ဖော်ကြပါတယ်။ အခုလည်းချင်းဥမတွေကိုပြန်ဖော်ပြီးတာကြောင့် ပြန်စိုက်နေကြပါပြီ။ တစ်ချိုု့တောင်သူတွေက မေလကုန်မှာစိုက်ပြီး၊ တစ်ချို့တောင်သူတွေကလည်း ဇွန်လမှသာ ပြန်စိုက်ကြပါတယ်။ ချင်းအထွက်များတဲ့ ဒေသတစ် ခုဖြစ်ပြီး ထွက်တဲ့ ချင်းတွေကိုတော့ တောင်ကြီး၊ အောင်ပန်းကိုအဓိကပို့ပါတယ်။ မိတ္ထီလာ၊ မြင်းခြံ၊ ကျောက်ပန်းတောင်း စတဲ့နယ်တွေကိုတော့အနည်းအကျင်းလောက်သာ စီးတယ်လို့ သိရပါတယ်။ မနှစ်က ဒေသထွက်ချင်း (စို) တန်ချိန်ပေါင်း ၃၃၁ ဒသမ ၉ တန်တင်ပို့ရောင်းချနိုင်ခဲ့တယ်လို့ နမ့်ဆန်ကုန်စည်ဒိုင်က သိရှိရပါတယ်။ ချင်းတက်(စို)က ကုန်သလောက် ဖြစ်သွားပြီး (ဥမ)တွေသာဈေးကွက်မှာရှိပါတော့တယ်။ ချင်း(ဥမ) ဈေးက တစ်ပိဿာ ၄ဝဝ ကျပ်ဈေးရှိပြီး၊ ချင်းခြောက်ကတော့တစ်ပိဿာ ၁၈ဝဝ ကျပ်ဈေးရှိပါတယ်။ ဟိုပုန်းဈေးကွက် ကတော့ချင်းစိုတွေမရှိတော့ဘဲ ချင်းခြောက် ကတော့တစ်ပိဿာ ၁၈ဝဝ ကျပ်ဈေးရှိတယ်လို့သိရပါတယ်။ အောင်ပန်း ဈေးကွက် မှာချင်း (ဥမ) တစ်ပိဿာ ၃ဝဝကျပ်၊ ၃၈ဝကျပ်၊ ချင်းခြောက်ကတစ်ပိဿာ ၂ဝဝဝ ကျပ်ဈေးရှိပါတယ်။                                               ဧဧခိုင်

ကာရာလာအပြင် အခြားဒေသများ၌ ရော်ဘာတိုးခဲျ့ စိုက်ပျိုး               ကာရာလာဒေသဟာ အိန္ဒိယရဲ့ သဘာဝရော်ဘာထွက်ရှိရာဒေသအဖြစ် အချိန်ကြာမြင့်စွာ ကတည်းက ရပ်တည်ခဲ့ပြီး အိန္ဒိယရော်ဘာထွက်ရှိမှုရဲ့ ၉ဝ ရာခိုင်နှုန်းက ကာရာလာကနေထွက်တာဖြစ်ကြောင်း သိရပါတယ်။ ဒါပေမဲ့ ကာရာလာမှာ စိုက်မြေတွေပြည့်နှက်နေတာကြောင့် အိန္ဒိယရော်ဘာအသင်းက ရော်ဘာ စိုက်ပိုျးနိုင်တဲ့မြေနေရာတွေကို အခြားဒေသတွေမှာ ရှာဖွေနေကြောင်းသုတေသီများကပြောပါတယ်။ အရှေ့မြောက်ပိုင်းက ထရိုင်ပူရဒေသရဲ့ ရာသီဥတုအခြေအနေက ကာရာလာ နဲ့ နီးစပ်ပါတယ်ဒါ့အပြင် အခြားဒေသတွေ ဖြစ်တဲ့ မဟာရရှထရာနဲ့ ဂိုရာဒေသတွေကိုလည်း ရော်ဘာစိုက်ပျိုးဖို့ အလားအလာရှိကြောင်း ရှာဖွေတွေ့ရှိထားပါတယ်။ ၁၉၇၉ ခုနှစ်မှာ စတင်ခဲ့တဲ့ စိုက်ပျိုးရေးအစီအစဉ်မှာ ဂိုရာဒေသကို ရော်ဘာ စိုက်ပျိုးရေးဒေသအဖြစ်သတ်မှတ်ခဲ့ပြီးဖြစ်ပါတယ်။ ရော်ဘာအသင်းရဲ့ နောက်ဆုံးစာရင်းများအရ မဟာရရှထရာမှာ စိုက်ပျိုးရေး လုပ်ငန်း ၂၂ဝ ရှိပြီး ဂိုရာမှာ ၁၉၅ ခုရှိကြောင်းသိရပါတယ်။ မဟာရရှထရာမှာ ရော်ဘာ ဟက်တာ ၉ဝဝ စိုက်ပျိုးပြီး ဂိုရာမှာတော့ ဟက်တာ ၇ဝဝ စိုက်ပိုျးကြောင်းသိရပါတယ်။ မဟာရရှထရာက ဟက်တာ ၁ဝဝ နဲ့ ဂိုရာက ဟက်တာ ၆၅ဝ က အရွယ်ရောက်နေပြီဖြစ်တယ်လို့သိရပါတယ်။ ဂိုရာဒေသမှာ တစ်နှစ်ကို တန် ၉ဝဝ ထုတ်လုပ်နိုင်ပြီး တစ်ဟက်တာကို ၁၄ဝဝ ကီလိုဂရမ်ထုတ်လုပ်နိုင်ကာ မဟာရရှထရာဒေသမှာတော့ တစ်နှစ်ကို တန် ၂ဝဝ ထုတ်လုပ်နိုင်ပြီး တစ်ဟက်တာကို ပျမ်းမျှခြင်း ၂ တန်ထုတ်လုပ်နိုင်ကြောင်းသိရပါတယ်။ ဂိုရာဒေသက ရော်ဘာပင်တွေရဲ့ ၆ဝ ရာခိုင်နှုန်းက အပင်အိုတွေဖြစ်နေပြီး ပြန်လည်စိုက်ပျိုးဖို့ လိုအပ်လျက်ရှိကာ မဟာရရှထရာက ရော်ဘာပင်တွေကတော့ သက်တမ်းငယ်သေးကြောင်း သိရပါတယ်။ လာမယ့် ၅ နှစ်အတွင်းမှာ မဟာရရှထရာမှာ ရော်ဘာဟက်တာ ၂၅ဝဝ နဲ့ ဂိုရာမှာ ဟက်တာ ၅ဝဝ ထပ်မံစိုက်ပျိုးဖို့ ရော်ဘာအသင်းက ဆုံးဖြတ်ခဲ့ပြီးဖြစ်ကြောင်း သတင်းရရှိပါတယ်။   Source; Commodity online ,KZW 

မန်းထောပတ်ပဲ ဈေးအေးလာ              မန္တလေးဈေးကွက်မှ တရုတ်ဈေးကွက်ကို နှစ်စဉ်တင်ပို့တဲ့ အထဲမှာ ထောပတ်ပဲဟာ တစ်ခုအပါအဝင် ဖြစ်ပါတယ်။ ၂ဝ၁၁ ခုနှစ်အတွင်း ဖေဖော်ဝါရီလမှာ ၁ဝ တန်၊ မတ်လမှာ တန် ၁ဝဝ သာတင်ပို့နိုင်ခဲ့ပြီး ဧပြီလမှာတန် ၅ဝဝ တင်ပို့နိုင်ခဲ့ တာကို တွေ့ရပါတယ်။ မေလအတွင်းမှာ တန် ၂၅ဝ ခန့်နဲ့ ယခုဇွန်လ တတိယပတ်ထိ တန် ၁၅ဝ ခန့်တင်ပို့ပြီးဖြစ်ပါတယ်။ ဇွန်လအတွင်း တင်ပို့ခဲ့တဲ့ တန် ၁၅ဝ ဟာ ပထမပတ်အတွင်း က တင်ပို့ခဲ့တာဖြစ်ပြီး နောက်ပိုင်းမှာ တင်ပို့မှု အေးနေပါ တယ်။ဒါကြောင့် ဈေးကွက်အခြေအနေကလည်း အေးလာတာကို တွေ့ရပါတယ်။ ဈေးကွက်မှာဖြစ်ပေါ်ခဲ့တဲ့ ထောပတ်ပဲ တစ်ပိဿာဈေးများကတော့ ဇွန်လ ပထမပတ် ၈ ရက်နေ့မှာ အမြင့်ဆုံး ၁ဝ၆၇ ကျပ်၊ အနိမ့်ဆုံး ၇၄၇ ကျပ်ဖြစ်ခဲ့ပြီး၊ ဒုတိယပတ် ၁၃ ရက်နေ့က အမြင့်ဈေး ၁ဝ၇၆ ကျပ်၊ အနိမ့်ဈေး ၁ဝ၄၉ ကျပ်ထိ ဈေးကွက်မြင့်တက်ခဲ့ပါတယ်။ တတိယ ပတ်ထဲမှာတော့ အမြင့်ဈေး ၁ဝ၃ဝ ကျပ်၊ အနိမ့်ဈေး ၇၅၆ ကျပ်ထိ ဈေးအေးခဲ့ပါတယ်။ ဇွန်လ ၁ဝ ရက်နောက်ပိုင်းမှာ တော့ တရုတ်တင်ပို့မှု မရှိသလောက်ဖြစ်ခဲ့ပြီး ရန်ကုန်ဈေး ကွက် အနည်းငယ်နဲ့ ဒေသတွင်း ဝယ်လက်လောက်သာ ရှိကြောင်း သိရပါတယ်။ မိုးမိုးအေး

ဈေးမာလာတဲ့ မန်းပဲကြီး                မန်းပဲဈေးကွက်သို့ တိုင်းဒေသကြီးများမှ ပဲကြီးများ ဆက်လက်အဝင်ရှိနေပြီး ရန်ကုန်ဝယ်လက်နှင့် ဒေသတွင်း ပဲကြော်ဖိုသမားများ အဝယ်ရှိတာကြောင့် တစ်ရက်ကို အိတ် ၅ဝဝ ဝန်းကျင်ခန့် အရောင်းအဝယ်ဖြစ်လျက်ရှိကြောင်း သိရ ပါတယ်။ ဇွန်ပထမပတ်ပဲကြီးတစ်ပိဿာကို အမြင့်ဈေး ၈၃၃ ကျပ်၊ အနိမ့်ဈေး ၈၁၄ ကျပ် ဈေးရှိခဲ့ပြီး၊ ဒုတိယပတ်မှာတော့ အမြင့်ဈေး ၉၄၁ ကျပ်၊ အနိမ့်ဈေး ၉ဝ၅ကျပ်ဖြင့်ဈေးမာလာတာတွေ့ရပါတယ်။ ယခုအပတ်မှာတော့ အမြင့်ဈေး ၉၉၅ ကျပ် မှအနိမ့်ဈေး ၉၄၁ ကျပ်ဖြင့် ဈေးမြင့်ရောင်းဝယ်လျက်ရှိကြောင်း သိရပါတယ်။ တရုတ်လှောင်လက်သမားများမှ ပြန်လည်အဆွဲများလာတာကြောင့် ဈေးမာလာပြီး တင်ပို့မှု အနေနဲ့ကတော့ ဖေဖော်ဝါရီလမှာ ၃၃ တန်၊ မတ်လမှာ ၆၅၄ တန်အများဆုံးတင်ပို့ခဲ့ပြီး ဧပြီလ မှာတော့ ၅၈၂ တန်ခန့်၊ မေလမှာ ၂၆၅တန် တင်နိုင်ခဲ့ပါတယ်။ ယခုဇွန်တတိယပတ် အထိ တန် ၂၄၆ ခန့်တင်ပို့ပြီး ဖြစ်ကြောင်း သိရှိရပါတယ်။     မိုးးမိုးးအေး