ပဲလွန်းဖြူနီ တင်ပို့မှု ယခင် သီတင်းပတ်ထက်အနည်းငယ်လျော့                ပင်လယ်ရေကြောင်းက ပဲလွန်းဖြူနီတင်ပို့မှုဟာ ယခင်သီတင်းပတ်က တန်ချိန် ၈ဝဝ ကျော်ရှိခဲ့ရာက ယခု သီတင်းပတ် (ဇွန်လ ၉-၁၄ ရက်) အတွင်းမှာတော့ ပဲလွန်းဖြူ ၄၆၅ တန်နဲ့ ပဲလွန်းနီ တန် ၂၅ ခန့်သာ ရှိတာတွေ့ရ ပါတယ်။ တင်ပို့တဲ့ နိုင်ငံတွေကတော့ အီဂျစ်၊ အိန္ဒိယ၊ ဖိလစ်ပိုင်၊ ရုရှား၊ ဆော်ဒီအာရေးဗီးယားနဲ့ စင်ကာပူတို့ ဖြစ်ပါတယ်။ လက်ရှိဘဏ္ဍာနှစ် ဇွန်လ ၁ဝ ရက်နေ့အထိ ပြည်ပကို တင်ပို့ပြီး စီးမှုဟာ ပဲလွန်းဖြူ တန်ချိန် ၉၅ဝဝ ခန့်ရှိပြီး ယခင်ဘဏ္ဍာနှစ်ကာလတူက တန်ချိန် ၇၄ဝဝ ခန့် တင်ပို့မှုရှိခဲ့လို့ ယခုနှစ်မှာ ပိုမိုတင်ပို့နိုင်တာ တွေ့ရပါ တယ်။ လာမယ့်သီတင်းပတ်တွေမှာ လည်း ပုံမှန်တင်ပို့ဖွယ်ရှိတယ်လို့ ခန့်မှန်းကြပါတယ်။ MIRT- MAPT

ပင်လယ်ရေကြောင်းက ပဲစင်းငုံ တန် ၅၆ဝဝ ကျော်တင်ပို့                 ပင်လယ်ရေကြောင်းက ပဲစင်းငုံတင်ပို့မှုဟာ ယခင်သီတင်းပတ်က တန်ချိန် ၆ဝဝဝ ကျော်တင်ပို့မှု ရှိခဲ့ပြီး ယခုသီတင်းပတ် (ဇွန်လ ၉ ရက်မှ ၁၄ ရက်) အတွင်းမှာလည်း တန်ချိန် ၅၆ဝဝ ကျော် တင်ပို့နိုင်တာတွေ့ရပါတယ်။ ပဲစင်းငုံမှာ အိန္ဒိယကိုတင်ပို့တာဖြစ်ပါတယ်။ လက်ရှိဘဏ္ဍာနှစ် ၂ဝ၁၁-၁၂ ဇွန်လ ၁ဝ ရက်နေ့ အထိ ပဲစင်းငုံပြည်ပတင်ပို့မှု တန်ချိန် ၃၆ဝဝဝ ခန့်ရှိပြီး ယခင်ဘဏ္ဍာနှစ် ကာလ တူအတွင်း တန်ချိန် ၂၂ဝဝဝ ခန့်သာရှိလို့ ယခုနှစ်မှာ တန် တစ်သောင်းကျော် ပိုမိုတင်ပို့နိုင်တာတွေ့ရပါတယ်။ လာမယ့်သီတင်းပတ်မှာလည်း တင်ပို့မှု ဆက်လက် ကောင်းနေအုံးမယ်လို့ ကုန်သည်များက ခန့်မှန်းကြပါတယ်။MIRT- MAPT

မတ်ပဲသင်္ဘောတင်ပို့မှု တန်ချိန် ၂ သောင်းနား ကပ်နေ               ပင်လယ်ရေကြောင်းက မတ်ပဲသင်္ဘောတင်ပို့မှုဟာ ယခင်သီတင်းပတ်များက အပတ်စဉ်တန်ချိန် ၂ သောင်းကျော်ရှိနေသလို ယခုသီတင်းပတ် (ဇွန်လ ၉ ရက်မှ ၁၄ ရက်) အတွင်းမှာလည်း တန်ချိန် ၂ သောင်းနီးပါးတင်ပို့တာတွေ့ရပါတယ်။ တင်ပို့တဲ့ နိုင်ငံကတော့ အိန္ဒိယကို အများဆုံးဖြစ်ပြီး မလေးရှား၊ စင်ကာပူ၊ ယူအေအီး၊ ဗီယက်နမ်တို့ကိုလည်း တင်ပို့မှုရှိတာတွေ့ရပါတယ်။ လက်ရှိဘဏ္ဍာနှစ်အတွင်း ဇွန်လ ၁ဝ ရက်နေ့အထိ မတ်ပဲတန်ချိန် ၁၄၄ဝဝဝ ကျော်တင်ပို့ပြီးဖြစ်လို့ ယခင်ဘဏ္ဍာနှစ် ကာလတူတင်ပို့မှုမှာ တန်ချိန် ၉၁ဝဝဝ ကျော်နဲ့ ယှဉ်ရင် ယခုနှစ်မှာ တန်ချိန် ၅ဝဝဝဝ ကျော် ပိုမိုတင်ပို့တာတွေ့ရပါတယ်။ အိန္ဒိယပုံမှန်အဝယ်ရှိလို့ လာမယ့်သီတင်းပတ်များမှာလည်း တင်ပို့မှု ဆက်လက် အားကောင်းဖွယ်ရှိတယ်လို့ ခန့်မှန်းကြပါတယ်။   MIRT- MAPT 

ဝယ်လိုအားနည်းတဲ့ ရှမ်းနနွင်း              ရှမ်းပြည်နယ်ရဲ့ အကောင်းဆုံးနနွင်းတွေဖြစ်တဲ့ ဆင်တောင်နနွင်း၊ ဟိုပုံးနနွင်းကလည်း လက်ကျန်တွေ ကျန်နေပါတယ်။ ဟိုပုံးမှာလည်း နနွင်းလက်ကျန်က ပိဿာချိန် သောင်းဂဏန်းခန့်ရှိနေသေးတယ်လို့ သိရပါတယ်။ နှစ်စမှာ ဈေးကောင်းရပေမဲ့ ဝယ်လိုအားကနည်းပါတယ်။ ပြည်တွင်းသုံးအတွက် ဝယ်ယူပေမဲ့ ချင်းလိုတော့ အရောင်းမသွက်ပါဘူး။ ဟိုပုံးဈေးကွက်မှာ နနွင်းက တစ်ပိဿာ ၁၂ဝဝ ကျပ်သာရှိပါတယ်။ ပင်လောင်းနနွင်း တွေကတော့ ပြီးခဲ့တဲ့လတွေမှာ အောင်ပန်းဈေးကွက်ကို မလာတော့ဘဲ လိန်းလီကတစ်ဆင့် အောက်ဖက်ကို ဆင်းပေမဲ့ အခုလတွေမှာတော့ စီးဆင်းမှုနည်းသွားပြီလို့ သိရပါတယ်။ အောင်ပန်း ဈေးကွက်မှာ ပင်လောင်းနနွင်းစ ဈေးက တစ်ပိဿာ ၇ဝဝ ကျပ်မှ ၉ဝဝ ကျပ်သာရှိပါတော့တယ်။ ပင်းတယနနွင်းက တစ်ပိဿာ ၁၅ဝဝ ကျပ်ရှိပြီး ဆင်တောင်နနွင်းကတော့ ၃၅ဝဝ ကျပ်ဈေးနဲ့ ဈေးငြိမ်နေပါတယ်။ နမ့်စန်မှာလည်း နနွင်း လက်ကျန်တွေ အတော်ရှိနေပြီး တစ်ပိဿာ ၁၅ဝဝ ကျပ်မှ ၁၇ဝဝ ကျပ်ဈေးရှိပါတယ်။ တောင်ကြီးဈေးကွက်မှာတော့ ဒီတစ်ပတ် နနွင်းခြောက်ဈေးက တစ်ပိဿာ ၁၅ဝဝ ကျပ်ဈေးရှိပါတယ်။ ဧဧခိုင်