Background
အိန္ဒိယဈေးကွက်များကို နိုဝင်ဘာလ ၂၃ ရက်မှာ ဝင်ရောက်မှုများလာတဲ့အတွက် နနွင်းဈေးထပ်မံ ကျဆင်းခဲ့ပါတယ်။ သီးနှံထွက်ရှိမှုအလားအလာကောင်းခြင်းနဲ့ လက်ကျန်များခြင်းတို့က ဈေးနှုန်းကိုဖိအားဖြစ်စေပါတယ်။ လတ်တလောမှာ ဝယ်လိုအားနည်းပေမဲ့ လာမယ့်သီတင်းပတ်များမှာ ပြည်ပဝယ်လိုအားတက်လာဖွယ်ရှိခြင်းကတော့ ဈေးနှုန်းကို အထောက်အပံ့ ဖြစ်စေပါတယ်။ ကုန်သည်များခန့်မှန်းတာကတော့ ထုတ်လုပ်မှုတိုးတက်မယ့်အလားအလာနဲ့ လက်ကျန်များနေတဲ့အတွက် ကာလတို အတွင်း ဈေးနှုန်းဆက်လက်အားပျော့နိုင်တယ်လို့သိရပါတယ်။ လှောင်လက်များကတော့ လာမယ့် ရက်တွေမှာ ဈေးနှုန်းမြင့် တက်မယ့် ခန့်မှန်းချက်တွေကြောင့် ဈေးအနိမ့်မှာ ၎င်းင်းတို့သိုလှောင်နနွင်းများ ဆက်ထိန်း ထားတယ်လို့ဆိုပါတယ်။ မဒ္ဒရာပရာဒေ့ရှ်မှာ မုတ်သုန်မိုးကောင်းတဲ့အတွက် စိုက်ပျိုးမှုတိုးတက်နေတယ်လို့ဆိုပါတယ်။ ယခုနှစ် နနွင်းထုတ်လုပ်မှုဟာ ၂၀၁၀-၂၀၁၁ အတွင်းထွက်ရှိခဲ့တဲ့ ၇၅ ကီလိုပါအိတ် ၆၅-၇၀ သိန်းထက်ပိုမိုပြီး အိတ် ၇၅-၈၅ သိန်းအထိ ရောက်ရှိ နိုင်တယ်လို့ခန့်မှန်းထားပါတယ်။ ပြည်ပတင်ပို့မှု နှေးကွေးဆဲဖြစ်ပေမဲ့ လာမယ့် သီတင်းပတ်များမှာတော့ ဥရောပ၊ အမေရိကန်၊ အနောက်အာရှနဲ့ဂျပန်တို့ကို တင်ပို့မှုမြင့်တက်ဖွယ် ရှိတယ်လို့ သိရပါတယ်။ ၂၀၁၁ ဧပြီလမှ စက်တင်ဘာလအတွင်း တန်ချိန် ၄၁၅၀၀ ထိ တင်ပို့ပြီးဖြစ်လို့ ၂၀၁၀ ကာလတူ တင်ပို့ခဲ့တဲ့ တန်ချိန် ၂၈၅၀၀ ထက် ၄၆ ရာခိုင်နှုန်း ပိုမိုတယ်လို့သိရပါတယ်။ နိုဝင်ဘာလ ၂၃ ရက်နေ့ အီရော့နနွင်းကုန်သည်မျာ းအသင်းဈေးဝင်းမှာ နနွင်းလက်ချောင်း တစ်တန် ရူပီး ၃၄၀၉၀- ၄၆၈၉၀ (ကန်ဒေါ်လာ ၆၅၅-၉၀၁) ရှိပြီး နနွင်းဥဈေးမှာ ရူပီး ၃၂၀၉၀-၄၄၇၅၀ (ကန်ဒေါ်လာ ၆၁၆-၈၅၉) ဈေးရှိတယ် လို့သိရပါတယ်။ ယမင်းခင်၊Source: commodityonline
ရှမ်းနနွင်းရဲ့ဈေးက ၂၀၁၀ ခုနှစ်မှာ ၅ နှစ်အတွင်း ဈေးအကောင်းဆုံးရခဲ့တဲ့နှစ်ဖြစ်ပါတယ်။ အိမ်နီးချင်း နိုင်ငံတွေက ဝယ်လိုအားများများနဲ့ ဝယ်ယူခဲ့တာကြောင့် အရောင်းရဆုံးနှစ်လည်းဖြစ်ပြီး၊ လက်ကျန်တွေ အများကြီး စုပုံနေတဲ့ နှစ်ချို့နနွင်း တွေလည်း ရောင်းထွက်ခဲ့ပါတယ်။ ၂၀၁၁ ခုနှစ်မှာတော့ ပြည်ပဝယ်လိုအားနည်းပြီး၊ ပြည်တွင်းသုံးအတွက် အမှုန့်ကြိတ်ရန်၊ ခြင်ဆေးခွေ ပြုလုပ်ရန်၊ ပရဆေးဖော်ရန်အတွက်သာ ဝယ်ယူသုံးစွဲတာကြောင့် အရောင်းမသွက်ခဲ့ပါဘူး။ နနွင်းခေါင်းတွေကို တော့ မူဆယ်ဝယ်လက်တွေ ဝယ်တာကြောင့် ပစ္စည်းလက်ကျန်ပြတ်သွားပေမယ့် နနွင်းတက်တွေကတော့ လက်ကျန်အများကြီး ရှိနေဆဲဖြစ်ပါတယ်။ လက်လီသမားတွေ ဝယ်နေတဲ့အတွက် အောင်ပန်းဈေးကွက်ကနေ တစ်ပတ်ကို ပိဿာချိန် ၂၀၀၀ - ၃၀၀၀ ခန့်သာ အထွက်ရှိ တယ်လို့လည်း သိရပါတယ်။ လွန်ခဲ့တဲ့ ၃-၄ လခန့်က ဆင်တောင်နနွင်းကို အရောင်တင်ဆီအဖြစ် အသုံးပြုဖို့ ဝယ်ပေမယ့် ယခုလောလောဆယ်တော့ အဝယ်ရပ်နေပါတယ်။ လက်ရှိနနွင်းဈေးနှုန်းကတော့ ရိုးရိုးနနွင်းက ကျပ် ၁၀၀၀ ကျပ် - ၁၂၀၀ ကျပ်နဲ့ ဆင်တောင်နနွင်းက တစ်ပိဿာ ၁၈၀၀ ကျပ် - ၂၀၀၀ ကျပ်နဲ့ ဈေးငြိမ်နေပါတယ်။ ဧဧခိုင်
အိန္ဒိယအစိုးရမှ ကြက်သွန်နီအနိမ့်ဆုံးတင်ပို့ဈေးနှုန်း MEP ကို တစ်တန်ကန်ဒေါ်လာ ၁၂၅ လျှော့ပြီး ကန်ဒေါ်လာ ၃၅၀ကို သတ် မှတ်ပြီးတဲ့နောက် ပြည်တွင်းဈေးနှုန်းကျဆင်းနေတဲ့အတွက် အနိမ့်ဆုံး တင်ပို့ဈေးနှုန်းကို ထပ်မံ လျှော့ချဖို့ စီစဉ် နေတယ်လို့ စိုက်ပျိုးရေး ဝန်ကြီး ရှရတ်ပါဝါမှ ပြောကြားပါတယ်။ နောက် ၃-၄ ရက်အတွင်း ပြည်တွင်းဈေးကွက်တွေမှာ ဖြစ်ပေါ်နေတဲ့ ကြက်သွန်နီဈေးနှုန်း သတင်းများကို စုဆောင်းဖို့ အစိုးရအရာရှိများကို ညွှန်ကြား ထား ကြောင်းလည်း ပြောကြားပါတယ်။ ရရှိတဲ့သတင်းအချက်အလက်များပေါ် အခြေခံပြီး ကြက်သွန်နီ တင်ပို့ဈေးနှုန်းကို ထပ်မံလျှော့ချဖို့ ဆုံးဖြတ်သွားမယ်လို့ ဆိုပါတယ်။ အိန္ဒိယအစိုးရဟာ ပြည်ပတင်ပို့မှုကို အားပေးတဲ့အနေနဲ့ နိုဝင်ဘာ ၁၉ ရက်မှာ အနိမ့်ဆုံးတင်ပို့ဈေးနှုန်းကို လျှော့ချခဲ့ပါတယ်။ ဖေဖော်ဝါရီလအတွင်းမှာ ပြည်တွင်းဈေးကျဆင်းနေတဲ့အတွက် တောင်သူတွေကို အကာအကွယ်ပေးဖို့ ကြက်သွန်နီတင်ပို့မှု ပိတ်ထားခြင်းကို ပြန်လည်ဖွင့်ပေးခဲ့တာဖြစ်ပါတယ်။ ဒါပေမဲ့လည်း ယခင်နှစ်ဒီဇင်ဘာလအတွင်းမှာ ကြက်သွန်နီလက်လီဈေး တစ်ကီလို ရူပီး ၇၀-၈၀(ကန်ဒေါ်လာ ၁ ဒသမ ၃၃ -၁ ဒသမ ၅၂ )ထိ မြင့်တက်နေခြင်းကို ထိန်းချုပ်ဖို့အတွက် ကြက်သွန်နီ တင်ပို့မှု အနိမ့်ဆုံးဈေးကို တစ်တန်ကန်ဒေါ်လာ ၆၀၀ နဲ့ဈေးအမြင့်မှာ သတ်မှတ်ခဲ့ပါတယ်။ အစိုးရဟာ တစ်ကီလို ၈၀-၈၅ ရူပီး (ကန်ဒေါ်လာ ၁ ဒသမ ၅၂ - ၁ ဒသမ ၆၂) ထိ မြင့်တက်ပြီးတဲ့နောက် အစိုးရဟာ ကြက်သွန်နီတင်ပို့မှုကိုပိတ်ခဲ့တာဖြစ်ပါတယ်။ လက်ရှိဘဏ္ဍာနှစ် ဇူလိုင်လ အထိ ကြက်သွန်နီတင်ပို့မှုဟာ တန်ချိန် ၄ ဒသမ ၅၂ သိန်းသာရှိလို့ ယခင်နှစ်ကာလတူ တင်ပို့ခဲ့တဲ့တန်ချိန် ၆ ဒသမ ၈၃ သိန်းထက် ၃၄ ရာခိုင်နှုန်းကျဆင်းခဲ့တယ်လို့ သိရပါတယ်။ အဓိကတင်ပို့မှုမှာ အနောက်အာရှ၊ စင်ကာပူနဲ့ ဘင်္ဂလားဒေ့ရှ်တို့ဖြစ်ပါတယ်။ ယမင်းခင်၊Source: PTI
ချင်းသစ်တွေ အောင်ပန်းဈေးကွက်ကို အဝင်လှိုင်နေပေမယ့် ဟိုပုံး၊ နမ့်စန်မြို့ တွေမှာတော့ ချင်းအသစ်တွေ အဝင်မရှိသေးပါဘူး။ ချင်း(ဥမ)တွေကလည်း ကုန်သွားပြီလို့ သိရပါတယ်။ ဒီနှစ်ဟိုပုံးချင်းက အစိုက်လည်း နည်းတာကြောင့် အထွက် လည်းနည်းနိုင်တယ်လို့ ဒေသခံတွေကပြောပါတယ်။ ၂၀၁၀ တုန်းက မိုးခေါင် ခဲ့တာ ကြောင့် ချင်းမျိုးတွေလည်း ပျက်သွားပါတယ်။ ဒီနှစ်က မိုးကောင်းပေမယ့် မျိုးမရှိလို့ အစိုက်နည်းခဲ့တာကြောင့် အထွက်ကလည်းမများနိုင်ပါဘူး။ ပြည်ပတင်ပို့မှု မရှိ ပေမယ့် ပြည်တွင်းသုံးအတွက်အဝယ်လိုက်တာကြောင့် အရောင်းအဝယ်ဖြစ်တဲ့ သီးနှံ ဖြစ်ပါတယ်။ ဟိုပုံးချင်းခြောက်ကတော့ ဝယ်လက်ကြိုက်တာကြောင့် ပစ္စည်းလက် ကျန်ပြတ်သွားပါပြီ။ ပေါ်စက တစ်ပိဿာ ၁၃၀၀ ကျပ်ဈေးနဲ့ ဖွင့်ခဲ့ပေမယ့် အဝယ် လိုက်တဲ့ ကာလတွေမှာ ၂၇၀၀ ကျပ်အထိ ဈေးရခဲ့ပြီး၊ အပိတ်ဈေးကတော့ ၂၃၀၀ ကျပ်ဈေးနဲ့ ပိတ်ခဲ့တယ်လို့ သိရပါတယ်။ ဒီတစ်ပတ် အောင်ပန်းဈေးကွက်ကိုတော့ ပင်းတယ ချင်းတွေပါ ဝင်လာတာ ကြောင့် အဝင်များလာပြီး၊ နေ့စဉ်ပိဿာချိန် သောင်းချီပြီး ဝင်နေပါတယ်။ ဈေး ကတော့ တစ်ပိဿာကို ၃၅၀ ကျပ် ၄၀၀ ကျပ်ဈေးရှိပါတယ်။ ချင်းခြောက်ကတော့ တစ်ပိဿာ ၂၀၀၀ ကျပ် - ၂၁၀၀ ကျပ်ဈေးနဲ့ တစ်ပတ်အတွင်းမှာ ပိဿာချိန် ၉၀၀၀ ခန့် အရောင်းအဝယ်ဖြစ်ခဲ့တယ်လို့ အောင်ပန်းပွဲရုံတွေက သိရပါတယ်။ ဧဧခိုင်
ချင်းစိုက်ပျိုးထွက်ရှိတဲ့ အောင်ပန်းနဲ့ တောင်ကြီးဒေသဈေးကွက်များမှာ ချင်း သစ်များ လှိုင်လှိုင်ထွက်ပေါ် ဝင်ရောက်နေပြီဖြစ်လို့ ယင်းဈေးကွက်များမှာ (ဂျွန်) ချင်းတစ်ပိဿာ ၅၅၀ ကျပ်ဈေးရှိနေပါတယ်။ ချင်းအထွက် လှိုင်ပြီး၊ ဝယ်ရင်းဈေးကျတဲ့အတွက် ပြည်ဈေးကွက်အတွင်းမှာလည်း ချင်းဈေးများ ယခင် တစ်ပိဿာ(ဂျွန်) ၈၀၀ ကျပ်မှ ယခု ၆၅၀ ကျပ် - ၇၀၀ ကျပ်၊ (ရှယ်) ၁၀၀၀ ကျပ်မှ ၈၅၀ ကျပ်ထိဈေးအေးသွားပါတယ်။ ဈေးနှုန်းမှာလည်း ချို၊ ပစ္စည်း အရည် အသွေးမှာလည်း ကောင်းနေတဲ့အတွက် အရောင်းအဝယ်မှာ စီးဝင်မှုပိဿာ ၃၀ ဝင် အိတ် ၅၅၀ ခန့်ကို ယခုတစ်ပတ်မှာလည်း လက်လီ၊ လက်ကားရောင်းဝယ် သူများ၊ ဧရာဝတီတိုင်းဒေသကြီးနဲ့ ရခိုင်ပြည်နယ်တို့ကို တင်ပို့မှုအပါအဝင် လက်ကျန် မရှိ ဆက်လက်အရောင်းအဝယ်သွက်နေကြောင်း သိရပါတယ်။ ဝင်းလဲ့ဝါ
ပင်လယ်ရေကြောင်းကုန်သွယ်မှုလမ်းမှ နိုဝင်ဘာ ၁၃ ရက်မှ ၁၉ ရက်နေ့တာ ကာလအတွင်း ချင်း ၁၂ တန်ကို တင်ပို့ခဲ့ပါတယ်။ တင်ပို့ခဲ့တဲ့နိုင်ငံက စင်ကာပူ နိုင်ငံဖြစ်ပါတယ်။ ယခင်သီတင်းပတ်အပို့ပျောက်ခဲ့တဲ့ ချင်းက ဒီတစ်ပတ်မှသာ ပြန်လည်တင်ပို့ခဲ့တာဖြစ်ပါတယ်။ တစ်တန်ကို အက်ဖ်အိုဘီဈေးက ကန်ဒေါ်လာ ၁၄၄၀ ဝန်းကျင်နဲ့ တင်ပို့ခဲ့လို့ စုစုပေါင်းပို့ကုန်ဝင်ငွေ ကန်ဒေါ်လာ တစ်သောင်းခုနှစ်ထောင် ကျော်ရရှိခဲ့ပါတယ်။ MIRT(DOT)
မုံရွာကုန်စည်ဒိုင် နိုဝင်ဘာစတုတ္ထပတ် ကုလားပဲဈေးကွက်အနေနဲ့ နထစသမအ ဝယ်လက်မရှိခဲ့ပေမဲ့ ဒေသတွင်းစက်သမားတွေနဲ့ လက်လီအသုံးသမားတွေ အဆွဲရှိ လို့ အရောင်းအဝယ်သွက်ခဲ့တယ်လို့ ဈေးကွက်ကဆိုပါတယ်။ ပေါက်ဈေးအနေနဲ့ ကုလားပဲအမျိုးအစားအားလုံး ယခုတစ်ပတ်မှာ ကျဈေးဖြစ်ပေါ်ခဲ့ကာ V2 တစ်တင်း ၁၈၈၀၀ ကျပ်၊ 929 တစ်တင်း ၁၇၀၀၀ ကျပ်၊ ထိုင်ဝမ်တစ်တင်း ၁၇၃၀၀ ကျပ်နဲ့ ကုလားပဲ ရိုးရိုးတစ်တင်း ၁၅၈၀၀ ကျပ် အသီးသီးအနိမ့်ဆုံးဖြစ်ပေါ်ခဲ့ပါတယ်။ အဓိကဒေသဝယ်လက်ဖြစ်တဲ့ မုံရွာစက်မှုဇုန်မှ ပဲခွဲစက်၊ အမှုန့်ကြိတ်စက်နဲ့ ကြာဇံ စက်သမားတွေအနေနဲ့ ပဲဟောင်းလက်ကျန်လျော့ချိန်မှာ ပဲသစ်မပေါ်ခင် အထိ ကုန်ကြမ်းမပြတ်ရအောင် ပေါက်ဈေးကြိုက်ရင် အဝယ်ပိုလိုက်ခဲ့ကြတယ်လို့ ဆိုပါတယ်။ လာမယ့်နှစ် ကုလားပဲသစ်ပေါ်ဖို့က တောင်သူအများစု စိုက်ချိန်နောက်ကျ ခဲ့သလို ပဲသစ်ပေါ်ချိန်လည်း နောက်ကျဖွယ်ရှိတဲ့အတွက် လက်ကျန်ရှိတဲ့ ကုန်သည် အချို့ကတော့ ပဲအရောင်းကိုဈေးနဲ့ထိန်းရောင်းနေကြတယ်လို့ ဈေးကွက်က ဆိုပါတယ်။ ထွန်းလှိုင်
ပြည်ကုလားပဲဈေးမှာ ယခင်တစ်ပတ်က တစ်တင်း ၁၉၂၀၀ ကျပ်ဖြင့် အရောင်းအဝယ်ရှိပြီး ယခု တစ်ပတ်တွင် တစ်တင်း ၁၈၅၀၀ ကျပ်ဖြင့် တစ်တင်း ၁၀၀၀ နီးပါးခန့် ဈေးအေးသွားခဲ့ပါတယ်။ ဒေသတွင်း ခွဲစက်သမားများမှ ပုံမှန်အဝယ်ရှိပြီး ကုလားပဲမှာ ယခုနှစ်အတွင်း တစ်တင်း ၂၀၀၀၀ ကျပ်ဝန်းကျင်ဖြင့် အရောင်းအဝယ်ဖြစ်ခဲ့ရာမှ ယခုနိုဝင်ဘာလအတွင်း တစ်တင်း ၂၀၀၀၀ ကျပ် အောက် ဈေးလျော့သွားခဲ့ပါတယ်။ ယခုတစ်ပတ်အတွင်း အခြားတိုင်းမှ အဝင်မရှိဘဲ ဒေသတွင်းလက်ကျန်ပဲများ အရောင်းအဝယ်ဖြစ်လျက်ရှိပြီး၊ တစ်နေ့အိတ် ၂၀၀ ခန့် အရောင်းအဝယ်ဖြစ်တယ်လို့သိရပါတယ်။ လွင်လွင်ဆန်း
အိန္ဒိယပြည်တွင်းဈေးကွက်များမှာ ကုလားပဲရိုးရိုးကို ဝယ်လိုအားနည်းတာ ကြောင့် ဈေးလျော့ကျပေမဲ့ ကာဘူလီကုလားပဲကို ပြည်ပဝယ်လိုအားရှိလို့ ဈေးအနည်းငယ်တိုးလာပါတယ်။ ကာနာတာကာနဲ့ ရန်ကုန်မှ ကာဘူလီကုလားပဲ များမှာ အရည်အသွေးပေါ်မူတည်ပြီးမှ ဈေးအပြောင်းအလဲရှိတယ်လို့ သိရပါတယ်။ ဒေလီဈေးကွက်ကို ကုလားပဲဝင်ရောက်မှု နေ့စဉ်ထရပ်ကား ၁၅ စီး-၁၆ စီးခန့်ရှိ တယ်လို့ သိရပါတယ်။ နောက်ရက် အနည်းငယ်အတွင်းမှာလည်း ဈေးအနည်းငယ် ထပ်ကျဆင်းနိုင်တယ်လို့ ခန့်မှန်းကြပါတယ်။ ဈေးကွက်အသီးသီးမှာ ဖြစ်ပေါ်တဲ့ ဈေးနှုန်းအပြောင်းအလဲများ နှိုင်းယှဉ်ဖော်ပြလိုက်ပါတယ် ဒေါ်လာ/ တန် ၂၄-၁၁-၁၁ ၂၃-၁၁-၁၁ ၂၂-၁၁-၁၁ ၂၁-၁၁-၁၁ဒေလီ ၆၄၂-၆၄၇ ၆၃၈-၆၄၁ ၆၅၈ ၆၆၈ကန်ပါ ၆၇၁-၆၇၆ ၆၆၇-၆၇၂ ၆၅၃-၆၅၈ ၆၈၃-၆၈၈အာကိုလာ ၇၁၂ ၇၀၄ ၇၀၁ ၇၂၂MIRT(MAPT)
ယခင်သီတင်းပတ်က ကုလားပဲတင်ပို့မှု မရှိခဲ့ပေမဲ့ ယခုတစ်ပတ်မှာတော့ တန်ချိန် ၇၀၀ ကျော်တင်ပို့ခဲ့တာ တွေ့ရပါတယ်။ FOB ဈေးကွက်မှာ အရောင်း အဝယ်ဖြစ်မှုကတော့ ယခင်တစ်ပတ်က တန်ချိန် ၃၄၀ ခန့် ရှိခဲ့ပေမဲ့ ယခုတစ်ပတ် နိုဝင်ဘာလ ၁၉-၂၄ ရက် အတွင်းမှာတော့ တန်ချိန် ၁၀၀ ခန့် သာရှိခဲ့တယ်လို့ သိရပါတယ်။ ပြည်တွင်းလက်ကျန်နည်းလာသလို ပြည်ပဝယ်ယူမှုနည်းပါးလာတာကြောင့် ဖြစ်ပါတယ်။ လက်ရှိဘဏ္ဍာနှစ် စုစုပေါင်း တင်ပို့မှုအနေနဲ့ တန်ချိန် ၆၃၀၀၀ ကျော်ရှိပြီး ဝင်ငွေအားဖြင့် ကန်ဒေါ်လာ ၅၄ သန်းကျော်ရရှိခဲ့လို့ ယခင်ဘဏ္ဍာနှစ် တစ်နှစ်လုံးတင်ပို့ခဲ့တဲ့ တန်ချိန် ၃၉၀၀ ခန့်၊ ဝင်ငွေ ကန်ဒေါ်လာ ၃ သန်းနီးပါးထက် အဆများစွာတင်ပို့နိုင်တာ တွေ့ရပါတယ်။ ရန်ကုန် FOB ဈေးအနေနဲ့ ယခင် တစ်ပတ်က တစ်တန် ကန်ဒေါ်လာ ၉၅၀-၉၇၀ ရှိရာမှ နိုဝင်ဘာလ ၂၅ ရက်မှာ တော့ ကန်ဒေါ်လာ ၉၆၀-၉၈၀ ကို အနည်းငယ်ပိုလာပါတယ်။ MIRT(MAPT)