ယခင်နှစ်လောက်ဈေးကောင်းမရပေမယ့် ဈေးကွက်အတွင်း ပဲကြီးဈေး အမြင့်ဆုံးဖြစ်                ပဲခူးတိုင်းဒေသကြီးအနောက်တွင် ၂ဝ၁ဝ-၂ဝ၁၁ ဘဏ္ဍာနှစ်တွင် ပဲကြီးကို ဧက ၂၉ဝဝဝ ခန့်စိုက်ပိုျးဖို့ လျာထားခဲ့ပြီး ယခု ဒီဇင်ဘာလကုန်မှာ အားလုံးနီးပါး စိုက်ပျိုးပြီးဖြစ်တယ်လို့ သိရပါတယ်။ ပဲကြီးကို မိုးညို၊ အုတ်ဖို၊ နတ်တလင်း၊ ရွှေတောင်၊ ပြည်၊ ပေါက်ခေါင်း၊ ပန်းတောင်းမြို့နယ်များမှာ အများဆုံးစိုက်ပျိုးကြပါတယ်။ ပဲကြီးဈေးနှုန်းမှာ ယခင်နှစ်က ဒီဇင်ဘာလမှာ တစ်တင်း ၃၈ဝဝဝ ကျပ်ဈေးရှိခဲ့ပြီး ယခုနှစ်မှာတော့ ယခင်နှစ်ဈေးနှုန်း မရရှိဘဲ နှစ်ကုန်မှာ ပဲကြီး (ကမ်းနား) တစ်တင်း ၃၃၅ဝဝ ကျပ်နဲ့ ပဲကြီး (ရွှေကျွန်း) တစ်တင်း ၃၅ဝဝဝ ကျပ်သာရှိတဲ့အတွက် ယခင်နှစ်ထက် တစ်တင်း ၃ဝဝဝ ကျပ်ခန့် ဈေးလျော့နည်းနေကြောင်း သိရပါတယ်။ သို့သော်လည်း ပဲဈေးကွက်အတွင်း ပဲကြီးဈေးနှုန်းမှာ အမြင့်ဆုံး ဖြစ်နေခဲ့ပါတယ်။ ဈေးကွက်အတွင်း အရောင်းအဝယ်ဖြစ်မှုကတော့ တစ်ရက်ကို အိတ် ၁၅ဝ ခန့် အရောင်းအဝယ်ဖြစ်နေတယ်လို့ သိရပါတယ်။                                              ခင်ဆွေဝင်း

မုံရွာကုလားပဲ ဒီဇင်ဘာမှာ နယ်အဆွဲများခဲ့                 မုံရွာကုန်စည်ဒိုင် ကုလားပဲဈေးကွက်အနေနဲ့ ဒီဇင်ဘာလထဲမှာ ဒေသ တွင်းလုပ်ငန်းသမားများ မျိုးအတွက် ဝယ်ယူမှုများအပြင် မန္တလေး၊ ရန်ကုန်နယ် အဆွဲပါပိုခဲ့လို့ အရောင်းသွက်ခဲ့တာ တွေ့ရပါတယ်။ ပဲခွဲစက်၊ ကြာဇံစက်၊ အမှုံကြိတ် စက်လိုင်းသမားတွေအနေနဲ့ ဒီလထဲမှာ ကုန်ကြမ်းပစ္စည်းပိုသူက ထုတ်ရောင်း ခဲ့ကြသလို၊ စက်သမားအချို့ ကုန်ကြမ်းမပြတ်အောင် ဝယ်ယူစုဆောင်းမှုတွေ ရှိခဲ့တဲ့ အတွက် အခုလို အရောင်းသွက်ပြီး ဈေးမာခြင်း ဖြစ်တယ်လို့ ပွဲရုံရပ်ကွက်က ဆိုပါတယ်။ ဒီဇင်ဘာလထဲမှာ ဖြစ်ပေါ်ခဲ့တဲ့ ကုလားပဲဈေးရဲ့ တစ်တင်း အနိမ့် အမြင့်မှာ ကုလားပဲရိုးရိုး ၁၉ဝဝဝ ကျပ်၊ ၂ဝ၅ဝဝ ကျပ်၊ ကုလားပဲတိုင်ပေ ၂ဝဝဝဝ ကျပ်၊ ၂၂၅ဝဝ ကျပ်၊ ကုလားပဲ ဗွီတူး ၂၂၃ဝဝ ကျပ်၊ ၂၃၈ဝဝ ကျပ်နဲ့ ကုလားပဲ ၉၂၉ ၂၁၅ဝဝ ကျပ်-၂၃ဝဝဝ ကျပ်ဈေးပေါက်ခဲ့ပြီး လကုန်ပတ်မှာ အသီးသီး ဈေး အေးခဲ့ကာ ဒီဇင်ဘာလအတွင်း မုံရွာကုန်စည်ဒိုင်ဈေးကွက်ကနေ မန္တလေးကို တင်း ၁ဝဝဝဝ ခန့် ရန်ကုန်ကို တင်း ၁ဝဝဝ ခန့်နဲ့ ပခုက္ကူကို တင်း ၁၅ဝဝ အသီးသီး စီးထွက်သွားနိုင်ခဲ့တယ်လို့ သိရပါတယ်။                       ထွန်းလှိုင် 

ဈေးကွက်များကို ကုလားပဲအဝင်နည်းလို့ ဈေးမြင့်တက်ဖွယ်ရှိ                  အိန္ဒိယပြည်တွင်းဈေးကွက်တွေမှာ ကုလားပဲအထွက်ပိုမယ့် မျှော်လင့်ချက်တွေက ဈေးကျဆင်းဖို့ ဖိအားဖြစ်စေပေမဲ့ လတ်တလောဈေးကွက်တွေကို ပဲအဝင် လျော့ကျလာတာကြောင့် ဈေးအနည်းငယ်ပြန်မြင့်တက်လာပါတယ်။ ပဲစိုက် ပျိုး ဧရိယာမြင့်တက်ခြင်းနဲ့ ပဲအထွက်ပိုမယ့် မျှော်လင့်ချက်တွေ ရှိပေမဲ့ ကုလားပဲ ကုန်သည်များဟာ လွန်ခဲ့တဲ့ ရက်အနည်းငယ်အတွင်း သိသိသာသာကျဆင်းခဲ့တဲ့ ဈေးနိမ့်နဲ့ အဝယ်တက်လာခဲ့တယ်လို့ ဆိုပါတယ်။                   ပဲအများဆုံးစိုက်ပျိုးတဲ့ အတ္တရာပရာဒေ့ရှ်၊ ရာဂျက်စသန်၊ မဒ္ဒရာပရာ ဒေ့ရှ်၊ မဟာရှတရာနဲ့ ကာနာတာကာတို့မှာ မိုးရွာသွန်းနေခြင်းက မြေဆီလွှာ အစိုဓါတ်တိုးတက်စေပြီး စိုက်ပျိုးမှုကို ပိုမိုကောင်းမွန်စေပါတယ်။ ဒါပေမဲ့ စိုက်ပျိုးမှု ကတော့ အနည်းငယ် နှေးကွေးနေတယ်လို့ သိရပါတယ်။                                      ယမင်းခင်၊ ှSource: Business standard 

တရုတ်ဆွဲအားကောင်းလာတဲ့ မန်းပဲတီစိမ်း                မန်းဈေးကွက်သို့ မုံရွာ၊ ရွှေဘိုနယ်ဘက်မှ ပဲတီစိမ်းအသစ်များ ဝင်ရောက်မှုရှိနေပြီး၊ ဈေးကွက်အတွင်းမှာ အသစ်ရော၊ အဟောင်းပါ အရောင်းအဝယ်သွက်နေကြပါတယ်။ တရုတ်ဝယ်လက်မှ ပဲတီစိမ်း (ထိပ်စ) များသာ ဝယ်ယူကြပြီး၊ လတ်စနဲ့အောက်စများကိုတော့ ရန်ကုန်ဝယ်လက်နဲ့ ဒေသတွင်းပဲခွဲစက်လုပ်ငန်းရှင်များမှသာ အများဆုံးဝယ်ယူနေတာကို တွေ့ရပါတယ်။ အရည်အသွေးကောင်းတဲ့ ပဲတီစိမ်းတွေက တစ်ပိဿာ ၁၃၅ဝ ကျပ်၊ တစ်တန် ၈၂၆၇ဝဝ ကျပ်၊ အောက်စ တစ်ပိဿာ ၁ဝ၁၃ ကျပ်၊ တစ်တန် ၆၂ဝ၃ဝဝ ကျပ်ဈေးတို့ဖြင့် အရောင်းအဝယ်ဖြစ်နေကြပါတယ်။ တင်ပို့မှုအနေနဲ့ တစ်ပတ် အတွင်း တရုတ်သို့ ၈၇ဝ တန်၊ ရန်ကုန်သို့ ၄၉ဝ တန် တင်ပို့မှုရှိခဲ့ပြီး၊ ဈေးကွက်အတွင်းမှာ ယခင်တစ်ပတ်က ပဲတီစိမ်းဟာ တရုတ် ဝယ်လိုအားနည်းခဲ့ပေမယ့် ယခုတစ်ပတ်မှာတော့ တရုတ်ဝယ်လိုအား ပြန်ကောင်းလာတယ်လို့ ရောင်းဝယ်နေကြတဲ့ ကုန်သည်များမှ ပြောကြားကြောင်း သိရှိရပါတယ်။ ကျော်ကျော်မိုး