မတ်လ ၂၁ ရက်မှ ၂၇ ရက်ထိကာလအတွင်းမှာ တရုတ်နယ်စပ်ရှိ မူဆယ်၊ ချင်းရွှေဟော်နဲ့ ထိုင်းနယ်စပ်ရှိ မြိတ် နယ်စပ်ကုန်သွယ်ရေးစခန်းများမှ ကန်ဒေါ်လာ ၅ ဒသမ ၆၈၁ သန်းတန်ဖိုးရှိ ရော်ဘာအဆင့်စုံ ၁၅၃၆ တန်ကျော် အပို့ ရှိခဲ့ ပါတယ်။ နယ်စပ်အလိုက်တင်ပို့နိုင်မှုတွေကတော့ မူဆယ်မှ ၅၅၃ တန်ကျော်၊ ချင်းရွှေဟော်မှ ၉၃၃ တန်ခန့်နဲ့ မြိတ်နယ်စပ်မှ တန် ၅၀ အသီးသီးဖြစ်ပါတယ်။

    ၂၀၁၁-၁၂ ခုနှစ်ထွက် အစေ့ထုတ်ပြောင်းသီးနှံအား စိုက်ပျိုးဖို့ ဧက သုံးထောင် ခန့် လျာထားခဲ့သော်လည်း အမှန်စိုက်ပျိုးပြီးစီးမှုမှာ ဧက ၂၇၀၀ ကျော် ဖြစ်ပါတယ်။ ယခုအချိန်မှာ အစေ့ထုတ်ပြောင်း သီးနှံများလည်း စတင် ထွက်ပေါ်လာပြီဖြစ်လို့ ကုန်စည်ဒိုင်ဈေးကွက်ကို ဟင်္သာတမြို့အနီးရှိ ကျေးရွာများနဲ့ ဟင်္သာတခရိုင်အတွင်းရှိ မြို့နယ်များမှတရက်ပျမ်းမျှအိတ် ၁၀၀၀ ခန့်လာရောက်ရောင်းချကြတယ်လို့ သိရ ပါ တယ်။ ရန်ကုန်ဝယ်လက် ကုန်သည်ကြီးများရဲ့ ဝယ်လိုအားကြောင့် တစ်ရက်ကို ပျမ်းမျှအိတ် ၅၀၀ ခန့် တင်ပို့တယ်လို့ သိရပါတယ်။ အစေ့ ထုတ်ပြောင်းဈေးနှုန်းများ ပိဿာ ၂၀ ဝင်တစ်တင်းကို ပေါ်စအချိန်မှာ ၅၂၀၀ ကျပ်ဈေးဖြစ်ပြီး၊ ယနေ့ ဈေးနှုန်း မှာတော့ ၄၈၀၀ ကျပ်ဈေးရှိကြောင်း သိရပါတယ်။              အေးအေးခိုင်

    မတ်လ ၁၈ ရက်မှ ၂၄ ရက်အထိကာလအတွင်း ပင်လယ်ရေကြောင်းမှ ပြောင်း ၅၁၇ တန် တန်ဖိုး ဒေါ်လာ သုည ဒသမ ၁၄၂ သန်းဖိုး တင်ပို့ခဲ့ပါတယ်။ ယခင် ရက်သတ္တပတ်က တန် ၁၀၀၀ ကျော် တင်ပို့ခဲ့တာကြောင့် တင်ပို့မှုထက်ဝက် ခန့် ကျဆင်းခဲ့ပါတယ်။ တင်ပို့တာကတော့ ဖိလစ်ပိုင်တစ်နိုင်ငံထဲကို ဖြစ်ပါတယ်။ နယ်စပ်ကုန်သွယ်ရေးကတော့ တရုတ်နယ်စပ်ကနေ တန်ချိန် ၈၀၀၀ ကျော် တင်ပို့ခဲ့ တာ တွေ့ရပါတယ်။ FOB (ရန်ကုန်) ဈေးကတော့ ပြောင်းလဲမှုမရှိဘဲ တစ်တန်ကို ဒေါ်လာ (၂၇၅-၂၉၅) ကြား ဈေးပေါက်လျက်ရှိပါတယ်။             K.Z.W

    ဒီတစ်နှစ်ထွက်တဲ့ ရှမ်းနနွင်းတွေက အရည်အသွေးကောင်းလာတာကြောင့် ဈေးလည်းပြန်ကောင်းလာပါတယ်။ တရုတ် ဝယ်လက်တွေ ပြန်ဝယ်ယူခြင်းမရှိသေးပေမဲ့ ပြည်တွင်းသုံးဟင်းခတ်အမွှေးအကြိုင်နဲ့ ပရဆေးဖော်ဖို့အတွက် ဝယ်ယူနေမှု ရှိတာကြောင့် ပုံမှန်အရောင်းအဝယ်ဖြစ်နေတယ်လို့လည်းသိရပါတယ်။ နနွင်းကလည်း ဈေးကွက်မှာ လက်ကျန်သိပ်မရှိ ပါဘူး။ တောင်သူတွေက ဈေးကောင်းရမှသာ ဖော်ကြရမှာဖြစ်တာကြောင့် ဈေးကွက်မှာ သိပ်မရှိဘူးလို့ ပွဲရုံတွေကသိရပါတယ်။ ပင်လောင်းနနွင်းကတော့ အခုအချိန်ထိ အဝင်မရှိသေးပါဘူး။ ဒီတစ်ပတ် နနွင်းဈေးတွေက အောင်ပန်းဈေးကွက်မှာ တောင်ပို့ နနွင်းတစ်ပိဿာ ၇၀၀ ကျပ်၊ ၈၀၀ ကျပ်ဈေးရှိပြီး၊ ဆင်တောင်နနွင်း ၄၀၀ ကျပ်၊ ၅၀၀ ကျပ်ဈေးရှိပါတယ်။ ပင်လောင်းနနွင်း တစ်ပိဿာ ၄၀၀ ကျပ်၊ ၅၀၀ ကျပ်ဈေးသာ ရှိပါတယ်။ ဟိုပုံးနနွင်းတစ်ပိဿာ ၈၀၀ ကျပ်ဈေးရှိတယ်လို့ ဒေသခံ ပွဲရုံတွေက သိရပါတယ်။ဧဧခိုင်