ပြည်တွင်းအိမ်ခြံမြေသတင်း

ကားဈေးနှုန်းများ ကျဆင်းကာ အရောင်းများ အဝယ် နည်းလာသော်လည်း ကားပါမစ်များ အရောင်းအဝယ်ဖြစ်နေ                         စက်တင်ဘာလ တတိယပတ်ခန့်မှစတင်ခဲ့သော မော်တော်ယာဉ် မှတ်ပုံတင် သက်တမ်းလွန် ယာဉ်အိုယာဉ်ဟောင်းများ အဆင့်ဆင့်ဖျက်သိမ်းကာ ပြည်ပမှယာဉ် သစ်များ သတ်မှတ်စည်းကမ်းနှင့်အညီ တင်သွင်းမည့်အစီအစဉ်သည် စက်တင်ဘာ နောက်ဆုံးပတ်တွင် အတော်ပင် ခရီးရောက်လာပြီဖြစ်ပြီး အထူးသဖြင့် ရန်ကုန်နှင့် မန္တလေးမြို့များရှိ မော်တော်ယာဉ်ဈေးကွက်များအတွင်း ပါမစ်ရောင်းဝယ်ဖောက် ကားမှုများ တစ်ပတ်ထက်တစ်ပတ် ဈေးနှုန်းနှင့်အတူ မြင့်တက်လာခဲ့သည်။ ပထမဆင့်အနေဖြင့် နှစ် ၄၀ နှင့် နှစ် ၄၀ အထက် သက်တမ်းလွန်ဖြစ်သည့် စ၊ ဆ၊ ဇ အက္ခရာပေါက် ယာဉ်ဟောင်းများအား အောက်တိုဘာလကုန်အထိ ပယ်ဖျက်ကာလသတ်မှတ်ကာ ဆောင်ရွက်ပေးနေမှုကြောင့် ပြီးခဲ့သည့်အပတ်က ကားဈေးကွက်ထဲတွင် ဂျစ်ကား၊ လေးဘီး၊ ဖယ်မလီယာ၊ ဆီဒင်၊ ဖိုဒ့်ကားများအား တစ်ဆင့်ဝယ်ယူသူများက ဦးစားပေးဝယ်ယူကြကာ ဈေးတန်းများမှလည်း ကြေညာ ချက်ထွက်ပြီးနောက်ပိုင်း ဈေးထက်ဝက်ခန့်မြင့်ကာ လေးဘီး ကျပ်သိန်း ၈၀၊ ၉၀ ခန့်၊ ဆလွန်းများမှာ ကျပ်သိန်း ၁၀၀၊ ၁၁၀ ခန့် ဈေးဖြစ်ပေါ်ခဲ့ကြောင်း သိရ သည်။စီမံချက်စသည့် ပထမပတ်အတွင်း ကညန (ကုန်လမ်းပို့ဆောင်ရေးညွှန်ကြားမှု ဦးစီးဌာန) သို့ သတင်းပို့သည့် ကားစီးရေ အများဆုံးဖြစ်ခဲ့ပြီး သတ်မှတ်စည်းကမ်း ညီညွတ်ကားများ ဆက်တိုက်ပင်ပါမစ်ရရှိလာသဖြင့် ဈေးကွက်တွင်းသို့ ပါမစ် တစ် စောင် ကျပ်သိန်း ၈၀ ဖြင့်စခဲ့ရာမှ ဒီဘက်ကာလတွင် ကျပ် ၁၂၅ သိန်း၊ ၁၃၀ ထိ ဈေးပေါက်လာကြောင်း သိရသည်။                         မြို့တွင်းပွဲစားတန်းများရှိ ကာဈေးကွက်အခြေအနေမှာ မကြုံစဖူးဈေးများကျ ဆင်းကာ ပြီးခဲ့သည့်အပတ်က အဝယ်ရှိသော်လည်း ယခုအဝယ်နည်းသွား ကြောင်း၊ ယခုကာလမှာ ကောလာဟလများကြောင့် ရောင်းမည့်ကားများလာပြီး ဝယ်လက် နည်းသွားကြောင်း၊ အရောင်းအဝယ်ဖြစ်ပါက ကြိုက်ရောင်းကြိုက်ဝယ်သာဖြစ် ကြောင်း၊ လတ်တလော အရောင်းအဝယ်ရှိသည်မှာ ကားပါမစ်စာရွက်စာတမ်းများ နှင့် ဒုတိယအဆင့် စီမံချက်ဝင်ယာဉ်ဟောင်းများသာဖြစ်ကြောင်း အပေါ်ဝိုင်းမှ ဝါရင့်ယာဉ်အကျိုးဆောင်တစ်ဦးက ပြောသည်။ SN

ရိုးရွာ လယ်ယာသုံးပစ္စည်းလုပ်ငန်း ဈေးကွက်                    မန္တလေးတိုင်းဒေသကြီး၊ ဝမ်းတွင်းမြို့နယ်၊ ညောင်ဦးဖီးအုပ်စု ရိုးရွာကျေးရွာ ဟာ ဝမ်းတွင်းမြို့အရှေ့ဘက် ၄ မိုင်ခန့်ကွာဝေးပြီး လယ်ယာသုံးပစ္စည်းများ ထုတ်လုပ်တဲ့ကျေးရွာဖြစ်ပါတယ်။ ထုတ်လုပ်တဲ့ပစ္စည်းများကတော့ လှည်းအိမ်၊ လှည်းဘီး၊ လှည်းတံ၊ လှည်းဝင်ရိုး၊ ဇင့်တုံး၊ ဆောင်ပန်း၊ ထမ်းပိုးတုံး၊ စွယ်မြှောင်၊ ငှက်ရုပ်၊ ထွန်တုံး၊ ထယ်ဒူး၊ ပွတ်လုံးတို့ဖြစ်ပါတယ်။                       ကျေးရွာအသေးစား ကုန်ထုတ်လုပ်ငန်းများ ဖွံ့ဖြိုးတိုးတက်ရေးအသင်း ဥက္ကဋ္ဌ ဖြစ်သူ ဦးခေတ်နိုင်က မိမိတို့ရွာဟာ လယ်ယာလုပ်ငန်းလုပ်ကိုင်သူ နည်းပါးကြောင်း၊ မိရိုးဖလာဖြစ်တဲ့ လယ်ယာသုံးပစ္စည်း လုပ်ကိုင်သူများကြောင်း၊ ကိုယ်ပိုင်အရင်းအနှီး မရှိသူများက အရင်းအနှီးရှိသူများထံ နေ့စား၊ ပုတ်ပြတ်အနေဖြင့် လုပ်ကိုင်ကြကာ၊ နေ့စားတစ်နေ့ ၁၅၀၀-၂၅၀၀-၃၀၀၀ ကျပ်ဖြင့် လည်းကောင်း၊ ပုတ်ပြတ်က လုပ်ကိုင်တဲ့ပစ္စည်းအလိုက် ရရှိကြကြောင်း၊ ဈေးကွက်လိုအပ်ချက်အရ မန္တလေး၊ မြင်းခြံ ဒေသသုံး လိုက်ပြီးထုတ်လုပ်ကြကြောင်း၊ ထုတ်လုပ်တဲ့သစ်သားပေါ်မူတည်ပြီး ဈေးအမျိုးမျိုးရှိကြောင်း၊ ကုန်ချောပစ္စည်းများကို သဲတော ၅ ရက်ဈေးသို့လည်းကောင်း၊ အော်ဒါလက်ခံ၍ လည်းကောင်း၊ မန္တလေး၊ ကျောက်ဆည်၊ မြစ်သား၊ နွားထိုးကြီး၊ မြင်းခြံ၊ မလှိုင်၊ သာစည်၊ မိတ္တီလာမြို့များသို့လည်းကောင်း တင်ပို့ရောင်းချကြကြောင်း ပြောပါတယ်။                      လယ်ယာသုံးပစ္စည်းဈေးနှုန်းများမှာ လှည်းတစ်စီး ကျပ် ၄ သိန်း၊ လှည်းအိမ် ၄၀၀၀၀ ကျပ်၊ လှည်းဝင်ရိုး ၆၅၀၀ ကျပ်၊ လှည်းတံတစ်စုံ ၂၅၀၀၀ ကျပ်၊ ဆောင်ပန်း ၅၀၀၀ ကျပ်၊ ထမ်းပိုးတုံး ၇၀၀၀ ကျပ်၊ ဇင့်တုံး ၅၀၀၀ ကျပ်၊ ထွန်တုံး ၆၅၀၀ ကျပ်၊ ငှက်ရုပ် ၂၅၀၀ကျပ်၊ စွယ်မြှောင် ၇၀၀၀ ကျပ်၊ လှည်းဘီး ကျပ် ၁ ဒသမ ၅ သိန်း၊ ထယ်ဒူး ၉၀၀၀ ကျပ်တို့ဖြင့် ရိုးရွာလယ်ယာသုံးပစ္စည်းများကို ဝယ်ယူရရှိနိုင် ကြောင်းသိရပါတယ်။          အောင်မြိုင်

မန္တလေးမြို့ ဒိုင်းမွန်းပလာဇာ ဖွင့်လှစ်                        ဒိုင်းမွန်းပလာဇာကို မန္တလေးမြို့ ၇၈ လမ်းနဲ့ ၃၃ လမ်းထောင့်တွင် စက်တင်ဘာ ၅ရက်က စတင်ဖွင့်လှစ်ခဲ့ပါတယ်။ ဒိုင်းမွန်းပလာဇာတာဝါ ဗတွင် ဆိုင်ခန်းပေါင်း ၆၀၀ ကျော်ပါဝင်ပြီး ၃၀ ရာခိုင်နှုန်းသာ ဖွင့်လှစ်ရောင်းချလျက်ရှိပါတယ်။ ပလာဇာတာဝါ A အောက်ထပ်တွင် ကားအစီးရေ ၃၀၀၊ ဆိုင်ကယ် အစီးရေ ၇၀၀ ရပ်နားရန် ကားပါကင်၊ မြေညီထပ်တွင် Branded  ဖက်ရှင် ပစ္စည်းများ၊ ရတနာဆိုင်များ၊ ပထမထပ် နဲ့ ဒုတိယထပ်မှာ လူသုံးကုန်ပစ္စည်း၊ တတိယထပ်တွင် ဗြူတီဆလွန်းနဲ့ ဖက်ရှင်ဆိုင်များ၊စတုတ္ထထပ်တွင်စားသောက် ဆိုင်များ၊ အလှပြင်ဆိုင်များနဲ့ ပရိဘောဂ ဆိုင်များ၊ Top Flow တွင် စတုရန်းပေ ၅ သောင်းအကျယ်အဝန်းရှိ ပရိုမိုးရှင်း ဧရိယာ ပါဝင်ပါတယ်။                      ဒိုင်းမွန်းပလာဇာကို နံနက် ၉ နာရီမှ ည ၉ နာရီထိ ဖွင့်လှစ်မှာဖြစ်ပြီး၊ အပတ်စဉ် ပျော်ပွဲရွှင်ပွဲများ ပြုလုပ်ပေးသွားမှာ ဖြစ်ပါတယ်။ ဖွင့်ပွဲအထိမ်းအမှတ်အနေ နဲ့ စက်တင်ဘာ ၅ ရက်မှ ၇ ရက်အထိ နာမည်ကြီးအဆိုတော်များဖြင့် ဧည့်ခံ ဖျော်ဖြေ၍ တင်မိုးလွင်ဦးစီးသော Model Show အစီအစဉ်များရဲ့ အက၊ အလှများဖြင့် တင်ဆက်ခဲ့ပါတယ်။ ပရို မိုးရှင်းဧရိယာ ငှားရမ်းလိုပါက ၂၅ သိန်း ဖြင့် နံနက် ၉ နာရီမှ ညနေ ၆ နာရီ အတွင်း ငှားရမ်းနိုင်ပြီး အနည်းဆုံး စတုရန်းပေ၂၅၀၀၀ ငှားရမ်းနိုင်ကြောင်း သိရပါတယ်။                   ဒိုင်းမွန်းပလာဇာတွင် ၂၄ နာရီ မီးတပ်ဆင်ထား၍ ဈေးဝယ်များ လုံခြုံမှုရှိ စေရန် CCTV ကင်မရာများ တပ်ဆင် ထားကြောင်း၊ ဒိုင်းမွန်းပလာဇာဧရိယာမှာ ၅ ဧကကျယ်ဝန်း၍ မန္တလေးမြို့တွင် အကြီးဆုံး ပလာဇာကြီးဖြစ်ကြောင်း  သိရပါတယ်။ ဇူးဇူး 

ဈေးနှုန်းကျဆင်းလျက် အရောင်းအဝယ်အေးနေသော ပုသိမ်ဆိုင်ကယ်ဈေးကွက်                      ပြောင်းလဲလာသော ခေတ်နဲ့အညီ ယခင် ၄-၅ နှစ်ခန့်က ပုသိမ်မြို့တွင်းသွားလာရာတွင် စက်ဘီးများကိုသာ အဓိကအသုံးပြုလျက်နေရာမှာ ယခုအချိန်တွင် အချိန်ကုန်သက်သာပြီး၊ ခရီးတွင် ကျယ်မှုရှိသော မော်တော်ဆိုင်ကယ်များကို ပုသိမ်မြို့တွင်း မြို့နယ်များနဲ့ ကျေးရွာများတွင်လည်း နေရာအနှံ့အသုံးပြုလျက်ရှိပါတယ်။ ပုသိမ်ဈေးကွက်တွင် တရုတ်နိုင်ငံမှထုတ်လုပ်၍ လူကြိုက်များသော ကမ်ဘို ၁၁၀၊ လော်ဂျား ၁၁၀၊ ရိုးမရာဇာ Stream 110 ဆိုင်ကယ်ဈေးနှုန်းများမှာ ဇူလိုင်-သြဂုတ်လပိုင်းဈေးနှုန်းမှ ယခုစက်တင်ဘာလမှာ ဆိုင်ကယ်တစ်စီး ကျပ် နှစ်သိန်းခန့် ဈေးနှုန်း ကျဆင်းပြီး အရောင်းအဝယ်အေးလျက်ရှိကြောင်း သိရပါတယ်။ တရုတ်နိုင်ငံထုတ် ကမ်ဘို ၁၁၀ လိုင်စင်ပါ ဆိုင်ကယ် တစ်စီးလျင် ယခင် ကျပ် ရှစ်သိန်းခွဲမှ ယခု ကျပ် ၆ သိန်း ၈သောင်း၊ လော်ဂျား ၁၁၀ မှာ ကျပ် ၈ သိန်း၊ ၈ သိန်းခွဲမှ ယခု ၆ သိန်း ၈ သောင်းကျပ်၊ ကမ်ဘိုဆူပါကပ် ယခင် ကျပ် ၇ သိန်းမှ ယခု ၅ သိန်းခွဲ၊ ၅သိန်း ၈ သောင်းဈေးနဲ့ ပခုက္ကူစက်မှုဇုန်ထုတ် ရိုးမရာဇာ Stream 110 ဆိုင်ကယ်မှာ ယခင် ကျပ် ၈ သိန်း ၃ သောင်းမှ ၇ သိန်း ၇ သောင်း ဈေးကျဆင်းပြီး ယခုအချိန် ၇ သိန်းဈေးသာရှိ ကြောင်းသိရပါတယ်။ ယိုးဒယားနိုင်ငံထုတ် Shogun Suzuki ဆိုင်ကယ်ဈေးနှုန်းမှာ ယခင် ကျပ် ၂၃ သိန်းမှ ယခုရောင်းဈေး ၁၇ သိန်းခွဲ၊ ၁၈ သိန်းဈေးနဲ့ ဈေးနှုန်းကျဆင်းလျက်ရှိပြီး၊ လူကြိုက်နည်းတဲ့ မာဘို၊ တွန်ဟွန်း၊ တိုယို၊ ဖီးလင်းဆိုင်ကယ်ဈေးနှုန်းမှာ ယခင်လိုင်စင်ပါ ကျပ် ၆ သိန်း၊ ၆ သိန်းခွဲမှ ယခုအချိန် ၄ သိန်းခွဲ၊ ၅ သိန်းကျပ်ဈေး အတွင်းသာရှိကြောင်း သိရပါတယ်။                  ပုသိမ်ဈေးကွက်တွင် ကမ်ဘို ၁၁၀၊ လော်ဂျား ၁၁၀၊ ဆူပါကပ်၊ ရိုးမရာဇာStream 110၊ Shogun Suzuki ဆိုင်ကယ်နဲ့ အခြားဆိုင်ကယ်မျိုးစုံ ရောင်းချလျက်ရှိတဲ့ Suzuki အရောင်းဆိုင်မှ ယခင် ပွင့်လင်းရာသီမှာ တစ်နေ့ ဆိုင်ကယ်အစီးရေ ၈၀-၁၀၀ ရောင်းချရသော်လည်း ယခုဆိုင်ကယ်ဈေးနှုန်းကျဆင်းချိန်မှာ တစ်နေ့အစီးရေ ၃၀-၄၀ခန့်သာရောင်းချမှုရှိကြောင်း၊ အရောင်းဆိုင်မှလည်း ဆိုင်ကယ် အသစ်များကို တစ်ဝက်လက်ငင်းချေ၊ တစ်ဝက် ၆ လအတွင်းပေးချေ ရသောစနစ်ဖြင့် ရောင်းချလျက်ရှိကြောင်း၊ လောလောဆယ် ဆိုင် ကယ်ဈေးနှုန်းကျဆင်းချိန် ဝယ်လိုအား လျော့နည်းနေသော်လည်း ပွင့်လင်းရာသီမှာ ဆိုင်ကယ်ဈေးကွက် ပြန်လည်သွက်လက်လာတယ် လို့ ခန့်မှန်းကြောင်း ဈေးကွက်မှသိရပါတယ်။ မင်းမင်းဦး 

မှတ်ပုံတင်သက်တမ်းလွန်ယာဉ်များ ပယ်ဖျက်ပြီး သတ်မှတ်မော်တော်ယာဉ်သစ်များ အစားထိုးလဲလှယ်ပေးမည့် အစီအစဉ်ကြောင့် ကားဈေးကွက်တစ်ခုလုံး လှုပ်ရှားမှုများစွာဖြစ်ပေါ်နေ                       မှတ်ပုံတင်သက်တမ်းလွန်ယာဉ်များအား နှစ် ၄၀ ကျော်ယာဉ်မှစ၍ သက်တမ်း အလိုက် အဆင့်အဆင့်ပယ်ဖျက်စေပြီး သတ်မှတ်မော်ဒယ်မြင့်ယာဉ်များအား ပြည်ပ မှ အစားထိုးတင်သွင်းစေမည့်အကြောင်း နိုင်ငံပိုင်သတင်းစာများတွင် စက်တင်ဘာ ၁၁ ရက်တွင် ထည့်သွင်းကြေညာခဲ့ရာ အကျုံးဝင်အောက်ကားများအားလုံး ဈေး များစွာထိုးတက်ကာ လာမည့်ကာလများတွင် ယာဉ်အရောင်းပြခန်းများ ဖွင့်လှစ် ရောင်းချခွင့်ပေးမည်ဆိုသည့် နောက်ဆက်တွဲသတင်းကြောင့် ကားဈေးကွက်တစ်ခု လုံး လှုပ်ရှားမှုများစွာ ဖြစ်ပေါ်နေခဲ့သည်။                           ဤသတင်းမကြေညာမီ ရက်သတ္တတစ်ပတ်ခန့်မှစ၍ အောက်ကားများ အရောင်းအဝယ် အနည်းငယ်ပြန်ဖြစ်နေပြီး ထိုစဉ်က အောက်ကားပိုင်ရှင်အချို့ မှာ "နယ်နှင်မှာလား"ဆိုသည့် သံသယဖြင့် ပေးသည့်ဈေးဖြင့် ရောင်းချမှုများရှိခဲ့ကြောင်း၊ တရားဝင်ကြေညာချက်ထွက်လာမှသာ အောက် ကားဈေးနှုန်း တစ်ရှိန်ထိုး ထိုးတက်ကာ အဝယ်များပြီး အရောင်းမရှိသည့်အခြေအနေသို့တိုင် ရောက်ရှိကာ ရောင်းချခဲ့သော အောက်ကားပိုင်ရှင်များ အမြတ်စွန်းပိုရခဲ့ကြောင်း သိရသည်။                          အဆိုပါသတင်းကြေညာချက်ကြောင့် ကားဈေးကွက်အတွင်း ပြောင်းလဲမှုများ စွာဖြစ်ပေါ်ခဲ့ပြီး စက်တင်ဘာ ၁၂ ရက်မှစ၍ အပေါ်ကားများ တအိအိဖြင့် ဈေးဆင်းလာရာ တစ်ပတ်အတွင်း ဈေးနှုန်းများပို၍လျော့ကျလာပြီး ဝယ်စီးအကြိုက် တွေ့မည့်ဈေးအထိ ကျဆင်းလာနိုင်ကြောင်း အပေါ်ဝိုင်း ဝါရင့်ယာဉ်ဝယ်ရောင်းများ မှ ပြောသည်။                         ဈေးကျဆင်းရာတွင် အပေါ်ကားများ အများဆုံးဖြစ်ပြီး ယခင် သိန်း ၁၂၀၀ ဖြစ်ခဲ့သည့် ၂၀၀၄ ခုနှစ်ထုတ် မတ်(ခ်)တူး (ရွှေငါး)ဆိုလျင် ယခု ကျပ်သိန်း ၆၀၀ လည်းကောင်း၊ ယခင် ကျပ်သိန်း ၇၅၀ ခန့်ဈေးပေါက်ခဲ့သည့် ၉၉ ခုနှစ်ထုတ် မတ်(ခ်)တူးဆိုလျင် ကျပ်သိန်း ၄၅၀ နှင့် ၄၅၀ အောက်သို့ လည်းကောင်း၊ ယခင် သိန်းထောင်ကျော် ရောင်းချခဲ့သည့် ၉၇ ခုနှစ်ထုတ် ပါရာဒိုဆိုလျင် ကျပ်သိန်း ၆၀၀ ဝန်းကျင်သို့ လည်းကောင်း၊ ယခင်က ကျပ်သိန်း ၅၀၀ ဝန်းကျင်ရောင်းချခဲ့သည့် ၉၄ ခုနှစ်ထုတ် ကိုရိုလာဗင်ဆိုလျင် ကျပ်သိန်း ၃၀၀ ဝန်းကျင်ဖြင့်လည်းကောင်း ရောင်းချလာကြောင်း သိရသည်။ ယခုလတ်တလော ရန်ကုန်မြို့ရှိ ကားပွဲစာတန်းများတွင် နေ့စဉ်နေ့တိုင်း လူစည် ကားနေပြီး ဟောင်းနွမ်းနေသည့် (ဖိုဒ့်၊ ချက်ပလက်၊ ဆီဒင်၊ လေးဘီး) စသည့် အောက်ကားပေါင်းစုံလည်း ဝိုင်းထဲတွင် ထူးခြားမှုတစ်ရပ်အဖြစ် မြင်တွေ့ရကာ ဈေးလျော့ရောင်းလာသည့် အပေါ်ကားများနှင့် အလယ်အလတ်ကားများလည်း လျော့ဈေးနှင့်ပင် အရောင်းအဝယ်ဖြစ်နေကြောင်း သိရသည်။ SN