ပြည်တွင်းအိမ်ခြံမြေသတင်း

                      ပြင်ဦးလွင် ဆွယ်တာဈေးကွက်မှာ ဒေသထွက် အနွေးထည်များသာမက တရုတ်အထည်များပါ အရောင်းအဝယ် သွက်လျက်ရှိကြောင်း သိရပါတယ်။ ပြင်ဦးလွင်စတား ဆွယ်တာဆိုင်မှ မချောစုလှိုင်က " ဆိုင်မှာ ၁၀ လပိုင်း ၁ ရက်ကစပြီး၊ အရောင်းအဝယ် သွက်လာတယ်။ သီတင်းကျွတ်ကာလ ပြင်ဦးလွင်တက်လာတဲ့သူများတော့ တော် တော် ရောင်းရတယ်။ နယ်ဘက်က ၉ လပိုင်းကတည်းက လာဝယ်ကြတာ။ ဒီနှစ်မှာ နယ်အဝယ်တက်တယ်။ နယ် ဘက်က မြေပြန့်ပိုင်းဆို အပါးကြိုက်ပြီး၊ ကလေး၊ လားရှိုးဘက်ဆို ဒီဇိုင်းအသစ် အဆန်းပို့ရတယ်။ ဒီနှစ်က ဒီဇိုင်းအသစ် ထုတ်ထားတာပိုများတယ်။ ၂၀၁၀တုန်း က ဒီဇိုင်း ၁၀ မျိုးပဲထွက်ခဲ့တာ။ ဒီနှစ်မှာ ၁၅ မျိုးလောက်ထွက်တယ်။ အထည် ထုတ်သလောက်က ကုန်သလိုဖြစ်တော့ တရုတ်ထည်နဲ့ ရောရောင်းရတယ်။ ဒေသထွက်အထည်ကြိုက်တဲ့သူရှိသလို၊ တရုတ်ထည်လဲ ကြိုက်တဲ့သူရှိတော့ အရောင်းသွက်တယ်။ တရုတ်ထည်မှာ ဦးထုပ်၊ လက်အိတ်၊ ခြေအိတ်က အစ ဝင်တယ်။ ကတ်တလောက်နဲ့လည်း လာတယ် "လို့ ပြောပါတယ်။                   ပြင်ဦးလွင်မြို့နဲ့ အနီးနားရွာများမှာ ဆွယ်တာလုပ်ငန်း အဓိက လုပ်ကိုင်လျက်ရှိရာ တစ်နှစ်ပတ်လုံး ဆွယ်တာများ ထုတ်လုပ်လျက်ရှိပါတယ်။ ယခု ကာလမှာ အလုပ်သမား အခက်အခဲ ရှိခြင်းကြောင့် ဝယ်လိုအားနဲ့ ထုတ်လုပ်မှုအားမမျှလို့ တစ်နှစ်ပတ်လုံး ထုတ်လုပ် ပြီး ချည်ဝယ်ယူသိုလှောင်ထားကြောင်း သိရပါတယ်။ ချည်ဈေးနှုန်းမှာ ဧပြီလ နောက်ပိုင်းတွင် ဈေးအတက်အကျဖြစ် ပေါ်လျက်ရှိကြောင်း၊ ချည်များကို ထိုင်း မှတင်သွင်းရာ ဒေါ်လာဈေးကျချိန် မြန်မာငွေမာချိန်၌ ဆွယ်တာဈေးကွက် မှာ အထိုက်အသင့်သာလည်ပတ်မှုရှိပြီး၊ ယခုဈေးကွက် သွက်တဲ့ကာလမှာ ဒေါ် လာဈေးမြင့်တက်လာခြင်းကြောင့် ချည်ဈေးမြင့်တက်မှုရှိကြောင်း၊ ယခုလတွင် အမြင့်ဈေးဖြင့် ချည်ဈေးကွက် ငြိမ် လျက်ရှိကြောင်း သိရပါတယ်။          " ဆွယ်တာဈေးကွက် မသွက်ခင်မှာ ချည်ပေါင်များများပေးပြီး ကြိုအပ်ထားရတယ်။ ဒီဇိုင်းက ကိုယ့်ဘာသာ ကိုယ် ထုတ်တယ်။ ဒီဇိုင်းထုတ်ပြီးရင် ဝေါရှိ၊ ပြက္ခဒိန်ထုတ်ပြီး ကြေညာတယ်။ ဒီနှစ် မှာ ကျား၊ မ ဆင်တူ ဝတ်အထည်တွေ ထုတ်ရတာများတယ်။ စက်က ဒီဇိုင်း အသစ်တစ်မျိုးထုတ်ပြီဆိုတာနဲ့ ထပ်ပြီး ထုတ်ထားရတော့တာပဲ။ တရုတ်ထည် က ဒီနှစ်ထဲမှာ အဝင်နည်းနေသေးတယ် "လို့ ၎င်းက ပြောပါတယ်။                   ဆွယ်တာဈေးနှုန်းများမှာ ကိုစီပါး တစ်ထည် ၄၅၀၀ ကျပ်မှ ၆၅၀၀ ကျပ်၊ ဇစ်ဆွဲဦးထုပ်ပါ အဆင်ကျား ဝတ်က ၆၅၀၀ ကျပ်၊ မဝတ် ၅၀၀၀ ကျပ်၊ ကိုစီ ရိုးရိုးအစွပ် ၃၀၀၀ ကျပ်၊ ကလေးဝတ် ထည် ၁၅၀၀ ကျပ်မှ ၁၀၀၀၀ ကျပ်၊ လက်ထိုးထည် ၁၅၀၀၀ ကျပ်မှ ၂၅၀၀၀ ကျပ်အထိ ဈေးရှိကြောင်း သိရပါတယ်။ ဇူးဇူး

                      မန္တလေးမြေဈေးကွက်မှာ အရောင်းအဝယ် ပြန်လိုက်လာခြင်းကြောင့် ဈေး ပြန်လိုက်လာသော်လည်း ယခင်နှစ်က ဈေးနှုန်းထိမရောက်ကြောင်း သိရပါတယ်။အရောင်းအဝယ်ဖြစ်တဲ့ မြေကွက် များမှာ မြို့ထဲပိုင်းထက် မြို့သစ်ပိုင်းရှိ 'လလ'၊ 'ဖဖ'၊ 'ပပ'၊ 'နန' ဖရိန်ရှိအကွက် များမှာ ပို၍အရောင်းအဝယ်ရှိကြောင်း သိရပါတယ်။                         မြေဈေးကွက်မှာ ရင်းနှီးမြှုပ်နှံသူများ၊ ရောင်းဝယ်သူများနဲ့ မြေအကျိုးဆောင် လုပ်ကိုင်သူများမှာ ကားဟောင်းဈေးကွက်ဘက် စိတ်ဝင်စားခြင်းကြောင့် ယခင်လပိုင်းက မြေဈေးကွက်အေးသွား ခြင်းဖြစ်ပါတယ်။ ယခုတစ်ပတ်တွင် မြေဘက် ပြန်လှည့်လာခြင်းကြောင့် အရောင်းအဝယ်ပြန်လိုက်လာရာ မြေ တစ်ကွက်လျှင် ထောင်ဘရိတ်တန်းဈေး ထက် ရာဘရိတ်တန်းရှိမြေကွက်များမှာ ပို၍အရောင်းအဝယ်သွက်လာပါတယ်။ မြေအကျိုးဆောင် ဦးမြင့်လွင်က "အရောင်းအဝယ် ပြန်လိုက် လာတာ တစ်ပတ်လောက်ရှိပြီ၊ အရင်ရက်တွေ က အရောင်းအဝယ် အေးနေတယ်ဆို ပေမယ့် ကြိုက်ရောင်းကြိုက်ဝယ်နဲ့တော့ သူ့ဈေးတန်းနဲ့ဖြစ်လာပါတယ်။ ဒီတစ် ပတ်မှာ ကားဟောင်း အရောင်းအဝယ် လုပ်တာတွေ၊ ဝယ်ယူတာတွေကလည်း ပြီးသလောက်ရှိနေတော့ မြေဘက်ကို ပြန်လှည့်လာကြတာ။ လလ၊ ဖဖ၊ ပပ၊ နနဖရိန်မှာ ၅၄ လမ်း ၅၅ လမ်းကြား ကွက်တွေဆို သိန်း ၁၉၀၊ ၂၀၀ ကြား၊ အနောက်ခြမ်းဆို သိန်း ၂၂၀၊ အရှေ့ ခြမ်းဆို သိန်း ၁၆၀၊ ၁၇၀ ဝန်းကျင်ဖြစ် လာတယ်။ လမ်းပေါ် မေးတင်အကွက် တွေဆို ကြားကွက်ထက် နှစ်ဆပိုတယ်။ မနှစ်ကနှစ်ကုန်ပိုင်းကပေါက်ခဲ့တဲ့ ဈေး ထိတော့ မရောက်သေးဘူး"လို့ ဆိုပါတယ်။                           မြေအရောင်းအဝယ်ပြန်လိုက်လာလို့ ယခင်လကထက် ပေ ၄၀ _ ပေ ၆၀ တစ်ကွက်လျင် ကျပ်သိန်း ၃၀ ဝန်းကျင် ဈေးနှုန်းမြင့်တက်ပြီး အရောင်းအဝယ် ဖြစ်ကြောင်း၊ သီတင်းကျွတ်ပြီးနောက် မြေဈေးကွက်မှာ ထပ်မံတက်လာဖွယ် ရှိကြောင်းသိရပါတယ်။ ဇူးဇူး

                        မော်တော်ကားဈေးကွက်တွင် ကားဟောင်းများ အစားထိုး ကားတင်သွင်း ခွင့်ပြုခြင်းနဲ့ မော်တော်ကားသစ် Show Room များ ဖွင့်လာနိုင်လို့ မန္တလေးစက်မှု ဇုန်ထုတ် မော်တော်ကားဈေးကွက်မှာ ထုတ်လုပ်မှု ရပ်နားထားသလောက်နီးပါးရှိ ကြောင်း မော်တော်ယာဉ်ထုတ်လုပ်သူများထံမှ သိရပါတယ်။ ''ကားသစ်တွေ တင်သွင်းလာတော့မယ်ဆိုတော့ လူတွေက စောင့်ဆိုင်းနေ ကြတာ။ စက်မှုဇုန်မှာTRUCK ကားအများဆုံးထုတ်နေတာ။ ပြည်ပကTRUCK  တွေဝင်လာရင် ပြည်တွင်းကဈေးနဲ့ယှဉ်ရင် ဈေးနှုန်းကွာခြားနိုင်တဲ့အတွက် စက်မှုဇုန် ထုတ်ကားတွေက ဈေးကွက်မှာ ရပ်သလိုဖြစ်သွားပြီ။ ၁ တန် TRUCK ု ကား လောက်သာ လက်ကျန်ရှိနေလို့ လက်စသတ်နေတာ။ ၂ တန်၊ ၆ တန်၊ ၁၀ တန်ကား တွေက ဈေးကွက်မရောက်သေးဘူး။ ဂျစ်ဈေးကွက်ကတော့ ပျောက်သွားပြီ''လို့ ကားထုတ်လုပ်သူတစ်ဦးက ပြောပါတယ်။                           ကားပါမစ်ကိစ္စသတင်း ထွက်ပေါ်ပြီးနောက် စက်မှုဇုန်ထုတ်မော်တော်ကား ဈေးကွက်မှာ ကျဆင်းသွားခဲ့ရာ ယခင်က ၁ တန် ထရပ်ကားတစ်စီး သိန်း ၁၄၀ ကျပ် ဈေးပေါက်ခဲ့ရာမှ ယခုအခါ ကျပ်သိန်း ၁၂၀ တွင် ဝယ်ယူမှုမရှိကြောင်း သိရပါတယ်။ မန္တလေးစက်မှုဇုန်တွင် မော်တော်ယာဉ်ထုတ်လုပ်သူ ၂၇ ဦးရှိကြောင်း၊ ယခုအခါလုပ်ငန်းရပ် နားထားရခြင်းကြောင့် အလုပ်သမားများမှာ အခြားလုပ်ငန်း များသို့ ရွေ့လျားသွားကြောင်း သိရပါတယ်။ ၂ တန်ယာဉ်ဈေးမှာ ယခင် ကျပ်သိန်း ၂၅၀ မှ ယခု ကျပ်သိန်း ၁၈၀ ဝန်းကျင်ရှိပြီး၊ ၁၀ ဘီးယာဉ် ကျပ်သိန်း ၈၅၀၊ ၉၀၀ မှ ကျပ်သိန်း ၇၀၀ ထိဈေးကျလာလို့ ထုတ်လုပ်မှုမရှိကြောင်း ဇုန်အတွင်း ဘယ်မောင်းသတ်မှတ်ပြီးနောက် ထုတ်လုပ်မှုနည်းလာကြောင်း သိရပါတယ်။ ဇူးဇူး

                 ပြင်ဦးလွင်-ရန်ကုန် အဝေးပြေးယာဉ်လိုင်းတစ်လိုင်း တိုးချဲ့ပြေးဆွဲမည်ဖြစ်ကြောင်းသိရပါတယ်။ တိုးချဲ့ပြေးဆွဲမယ့် 'အာကာသ' ယာဉ်လိုင်းမှာ ပြင်ဦးလွင် မြို့ သီရိပဒေသာ အဝေးပြေးယာဉ်ရပ် နားစခန်းနဲ့ ရန်ကုန်မြို့ အောင်မင်္ဂလာ အဝေးပြေးကားဝင်းသို့ တိုက်ရိုက်ပြေးဆွဲမှာဖြစ်ပြီး လက်မှတ်မှာယူပါက အိမ်တိုင်ရာရောက် ပို့ဆောင်ပေးကြောင်း သိရပါတယ်။                  ''အောက်တိုဘာ ၄ ရက်မှာ ရန်ကုန် ကစထွက်ပြီး ပြင်ဦးလွင်က ၆ ရက်နေ့ ညနေ ၆ နာရီမှာ စထွက်မယ်။ ကျွန် တော်တို့ အာကာသ ယာဉ်လိုင်းက ရန်ကုန်-မန်း၊ ရန်ကုန်-မုံရွာ-ရေဦး၊ ရန်ကုန် - ကျောက်ပန်းတောင်း - ရေနံ ချောင်း-မကွေး-မင်းဘူးကို ပြေးဆွဲ လျက်ရှိပါတယ်။ ယခုပြေးဆွဲမယ့် ပြင်ဦးလွင်လမ်းကြောင်းမှာ စတင်ဆွဲတဲ့ အထိမ်းအမှတ်အနေနဲ့ ကံစမ်းမဲဖောက် ပေးမယ်။ ယာဉ်လိုင်းနဲ့ လိုက်ပါစီးနင်း တာ (၁၀)ကြိမ်ပြည့်ရင် တစ်ကြိမ် အခမဲ့ ပေးမယ်။ အသွားအပြန် လက်မှတ် ဖြတ်ရင် ကျပ် ၁၀၀၀ လျှော့ပေးတယ်။ လက်မှတ်ခက တစ်ဦးကို ကျပ် ၁၁၄၀၀ ယူပါတယ်။ မုန့် ဒါမှမဟုတ် လက် ဆောင်ပစ္စည်းဝေမယ်။ ကားမူးတတ်တဲ့ သူတွေအတွက် အိမ်သုံးဆေးဝါးဆောင် ထားမယ်။ အအေးမခံနိုင်တဲ့ သူတွေ အနေနဲ့ စောင်လိုလို့တောင်းရင်လည်း ပေးပါတယ်။ ကားပေါ်ပါတဲ့ ဝန်ထမ်း တွေရဲ့ ဝန်ဆောင်မှုကို ကျေနပ်မှုမရှိရင် ၀၉-၅၁၁၇၆၄၄ကို ဖုန်းဆက်တိုင်ကြား နိုင်ပါတယ် '' လို့ အာကာသယာဉ်လိုင်းမှ တာဝန်ရှိသူတစ်ဦးက ပြောပါတယ်။ ပြင်ဦးလွင်-ရန်ကုန်သို့ အဝေးပြေး ယာဉ်လိုင်း ခုနစ်လိုင်း တိုးချဲ့ပြေးဆွဲ လျက်ရှိပြီး ထပ်မံတိုးချဲ့ပြေးဆွဲခြင်း ကြောင့် ယာဉ်လိုင်း ရှစ်လိုင်း တိုးချဲ့ ပြေးဆွဲပြီးဖြစ်ကြောင်း သိရပါတယ်။ ဇူးဇူး

                   စီမံချက်ချမှတ် လုပ်ဆောင်နေသော သက်တမ်းလွန် ယာဉ်ဟောင်း အပ်နှံ၍ အစားထိုးယာဉ်တင်သွင်းခွင့်ပြု ရေးအစီအစဉ်သည်ယခုအခါ တတိယ ပတ်အတွင်း ရောက်ရှိနေပြီဖြစ်ပြီး အပ်နှံ နှုန်းထားမှာလည်း စီးရေ ၅၀၀၀ ကျော်ရှိလာကာ ကားဈေးကွက်အတွင်း ကားအပ်နှံမှု စလစ်များ (အမှန်မှာ ကား အပ်နှံပြီးစီးကြောင်း ကညနမှထုတ်ပေး သည့် အသိအမှတ်ပြု ထောက်ခံစာ) လည်းလှိုင်လှိုင်ဝင်ရောက်၍ ရောင်းဝယ် ဖောက်ကားလာပြီး ကားဈေးကွက်မှာ လည်း အခြေအနေ တစ်မျိုးပြောင်းပြီး သတင်းစာများထဲတွင် ကြေညာချက် ထွက်ပြီးစကာလဈေးထက် ဈေးများ ပြန်မာလာကြောင်း သိရသည်။ လတ်တလော ပွဲစားတန်းများတွင် ကားပါမစ်ဈေးနှုန်းမှာ ယခင်အပတ်က နှင့်စာလျှင် ၁၀ သိန်း ၁၅ သိန်းခန့် ကျ ဆင်းသွားကြောင်း၊ရန်ကုန်အပ်နှံပါမစ်ဆို လျှင် ၁၁၀ သိန်း ၁၁၅ သိန်း ဖြစ်ပေါ်နေပြီး နယ်ပါမစ်ဆိုလျှင် ၉၅ သိန်း ၁၀၀ သိန်းခန့်ပြန်လည် ရောင်းချကြကြောင်း၊ ရန်ကုန်ပါမစ်ပို၍ အရောင်းအဝယ်ဖြစ် ကြောင်း၊ နယ်ဆိုလျှင်လည်း ရန်ကုန် အနီးအနားတစ်ဝိုက် မြို့များဖြစ်သည့် ပဲခူး၊ပြည်၊ ပုသိမ် စသည့် ပါမစ်များသာ ရောင်းရကြောင်း အပေါ်ဝိုင်းဝါရင့် ယာဉ်ဝယ်ရောင်း ကိုမြင့်ကျော်မှ ပြော သည်။ အပေါ်ကားများ ၃၀ သိန်းမှ ၅၀ သိန်းအထိ ပြန်မာလာခြင်း၊ သိန်း ၁၅၀ နှင့် ၁၀၀ ကြားကားများ ၂၀ သိန်း၊ ၃၀ သိန်းပြန်မာလာခြင်း ဖြစ်စဉ်များမှာ လည်းယခုပြုလုပ်နေသည့်ယာဉ်ဟောင်း အပ်နှံစီမံချက်အား အခြေအနေလိုက် ၍ ဖြစ်ပေါ်နေသည့် သဘာဝသာဖြစ် ကြောင်း ၎င်းမှ ပြောသည်။                       ယင်းစီမံချက်ကြောင့်ပင် ယာဉ် တင်သွင်းခွင့်လုပ်ငန်း ဆောင်ရွက်ပေး မည့် ကုမ္ပဏီများစွာ အသီးသီးပေါ် ပေါက်လာပြီး လုပ်ငန်းအဆင့်ဆင့်အား ငွေကြေးတန်းတစ်ရပ် သတ်မှတ်ကာ ဝန်ဆောင်မှုပေးကြကြောင်း၊ ငွေကြေး တတ်နိုင်သူများက ကုမ္ပဏီမှာ အပ်နှံ တင်သွင်းရေး ဆောင်ရွက်ကြကာ ငွေမလိုက်နိုင်သူများမှလည်း ၎င်းတို့ရောင်း ချခဲ့သည့် ဈေးတန်း(ဥပမာ ၈၀ သိန်း၊ ၉၀ သိန်း) အား အနည်းငယ် ထပ်ဆောင်းကာ သိန်း ၁၀၀ နှင့် သိန်း ၁၂၀ ဝန်းကျင်ဗင်ကားများ၊ လိုက်ထရပ်များ ပြန်လည်ဝယ်ယူစီးနင်း၊ စီးပွားရေးလုပ်ငန်းသုံး ပြုလုပ်ကြသဖြင့် ယခုကာလ ကားဝိုင်းများ ကားပွဲစားတန်းများ အတွင်း လူစည်ကားနေပြီး အရောင်း အဝယ်ရှိနေကြောင်း သိရသည်။ SN